O PALƐI Pɔɔl ve niŋ, dɛndɛla bɛndula kua o mɛŋndaŋ choo laŋ la ve le waŋchieeya kinɛi le. Le mi waŋndo ndoo luɛi o dɛndɔɔ niŋ le kɔlaŋ inɛ, ndoo nɔ mbo kuɛ o fondaŋ dɛndɛlaŋ la simndo mbo nyuna le dɛndɛ cho lakɔ o fondaŋ o yeema kɔlaŋndo. (Walta. 21:​2, 3) O yɔŋ bɛɛ mi dɛndɔɔ ndoo ve lakɔ o fondaŋ kpeekpei waŋndo wa kɔlaŋndo le, te dɛndɔɔ sim pɛ o fondaŋ cheleŋ, ndoo tiuba mbo sɔla vɛlɛ dɛndɛ cheleŋ o chɔɔlu ndu tiŋ sɔɔŋguu kpɛɛluŋ o fondaŋ o wa kɔlaŋndo.—Walta. 27:​1-6.

O teleŋ koŋ niŋ, a teleŋndaŋ dɛndɛla mamɛŋndaŋ laa kela ni, nduyɛ laa nɔ teleŋ kpeekpei laa mal te. O fulawɔ o choo wɔɔŋndo kɔɔli, wanaa ndaa kua a dɛndɛlaŋ nda ndaa nɔ laalaŋnda lachoowalaŋ. Le taamaseliiyo, te ndaa che pɛ basabasakuendioo ichali o yuei dɛndɛ mamɛŋndo choo mbo wa chaŋndo, ɔɔ ma che nyɛm dɛndɛ kɔɔlu niŋ paandu woŋ o siooŋnde choo, mi hei ndii tosa ma kɛɛ le kɔlaŋ. Mi ndaa tofa vɛlɛ te hueiye ndii wa pɛ hɔŋndo tau. Nduyɛ, te hueiye ndii ve hɔŋ tau le, mi ndaa mal le kɔlaŋ. Te waŋndo ndoo sɔla pɛ dɛndɔɔ le kɔlaŋ, ndoo kuɛ a wolɔɔla ndɔlaŋ le ma luei o dɛndɔɔ niŋ. Okoŋ, o chum le mbo tuei yondaa maa dɛndɔɔ cho suŋ hunɔɔ malɔɔ.

Mi wana yaasiaa ŋsɔɔ pilɛ diolaŋ Lionɛl Kasɔɔ dimi aa, “O Luom niŋ ndii hiou wa tɛtɛlɛ le mi waŋnda ndaa saaluŋ dɛndɛla kua o mɛŋndaŋ choo laŋ, nduyɛ ndaa nuuviaa laŋ a ba nda le. O Pee Bɛndoo Tiba dɛndɛla ndalaŋ laa sim ni. Fondaŋ bɛndoo wa o chioo Ositiaa niŋ a ɔfisiilaŋ la balaa silɔ. Nduyɛ ɔfisiilaŋ ndaŋ la bɔɔbɔɔ, la wa le wanaa wa hɔlteŋ le fondaŋnda yɛ yɛla dɛndɛla mamɛŋndaŋ laa simndo. Wanaa wa hɔlteŋ le dɛndɛ ndoo kua Nabɔŋ [a veelu ndu hau aa Filaŋsi] wo ndaa nɔ opilɛ. Nduyɛ, wanaa wa hɔlteŋ le dɛndɛ ndoo kua Katechi [a veelu ndu hau aa Tunisia] wo bɛɛ ndaa nɔ opilɛ, . . . vɛlɛ a la cheleŋndaŋ. Te waŋndo ndoo yeema pɛ kɔlaŋ o dɛndɛ mamɛŋndo niŋ, ndoo nɔ mbo kuɛ o ɔfisiila cho le chieeŋ cho o nɛi o wa kɔlaŋndo.”

Mi kɔla dɛndɔɔ laa tosa mi waŋnda ndaa keleŋa fuuluu, kɛ a koŋ kpou, kpundɔɔ wa. Teleŋnda bɔɔbɔɔ, mi dɛndɔɔ ndoo kɔɔlu a Pɔɔl o balɔɔ ndɔ lemisiɔnalueiyo niŋ.—2 Kɔliŋ. 11:​25.