Mɛɛ ya fuuluu wɔsilaŋ 13, chaŋyɛi kɛndɛi yaa nɔ a Chɛhowa ve ve lɛ ikala poŋ te. Mi kandu yiyaŋndo maa chaaŋaa niaa o sukuu waŋnuŋ bɔɔ hɛnɛkɛ, nduyɛ ya bɛɛ yaa yeema waa lende. Mi yiyaŋ maa sawala wanaa velu ya wa kɛsi laŋ, sawala Chɛhowalaŋ, a sɔɔŋ iMɛlɛkayaŋ kendu bɔɔ. Mi che bɛɛ yaa laalaŋ kɛsɛ maa Chɛhowa cho, kɛ yaa nɔ lɛ chaŋyɛi kpɛɛluŋ a ndu le.

A koŋ kpou, mi yaa kuɛ o wali pollo niŋ, mi che bɛɛ yaa tosa lɛ ndu maa paandu le. Nduyɛ yaa bɛɛndiaŋ lɛ le wali pollo le. Le hei, mi yaa che ndi ikala le baltaŋ kandɔɔ a waŋndo ɔɔ le miiŋgu makɔɔ tosaa. Fulamakɔɔlioo wa ni, yaa nɔ miiŋgula makɔɔ ɔɔ pɛɛkula Baabui le. Nduyɛ yaa tuii wali pollo yeela le. Lepum mi yaa nyunaŋ aa, ‘Mɛɛ le yɛɛ ya kua yɛ niŋ o wali pollo niŋ lɔɔ o lɔɔ ɔɔ ipaŋgu o ipaŋgu?’

Mɛɛ ya fuuluu wɔsilaŋ 17, yaa nɔ yeemɛi tau le waŋnɔŋndo a ba ni. Le hei mi dovi nyɛla nilaŋ, mi fulaŋ chiɛi niŋ. Okoŋ mi kuaŋnuŋ o lɛŋnde Ɔsiteeliaaleŋ niŋ. Mi wanaa velu ya wa tambu kɔl tau le hei. Mi che bɛɛ ma buulaŋ tau, kɛ ma yiyaŋ maa I cho hiouwɔɔ lachi a Chɛhowa piɛiyo.

 Mɛɛ ya fuuluu o lɛŋnde Ɔsiteeliaaleŋ niŋ, mi sɔɔŋ kɔ chɔɔlu pɛŋ lewɔu. Yaa kue lɛ o bɔŋaŋndaŋ kpou le. Mi holnuŋ feleŋguaa wa o yoomu mulu muluaŋndo niŋnda. Mi che bɛɛ mi ndaa kuɛ o bɔŋaŋndaŋ, kɛ mi ndaa kuɛ o yolaŋ, nduyɛ ndaa hɛnaŋ tau a muɛiyaŋ kolɔɔ bɛndoo. Te I yiyaŋ pɛ a teleŋ koŋ, I nɔla mi dimi maa pelei nii ipilɛ wa o tonyaa niŋ, ipilɛi wa o chieeŋndo niŋ. Kɛ o kpeekpei niŋ, I ve a kɔl kɛndɛ le.

Wɔsioŋ ŋmuuŋ hiouwɔɔ okoŋ kɔɔli, miŋ chiikaŋ naa ndepilɛnɔ pilɛ. Mi ndepilɛnɔɔ hoo mala ya mi yiyaŋ a mɛɛ ya wa yoomu nuu biyɔɔ yɛ okɔɔ, mi che bɛɛ o ve o sina choo le. I wa a ndepiliaa ŋuɛɛnuaa cheleŋ o chiɛi pilɔɔ niŋ, nduyɛ nda bɛɛ ndaa chellɔ o lanɔ le. Mɛɛ buɛi ibuŋgaa hiŋ kunda naa yilɔɔ, miŋ dimul ndu nda laa ndɔ Tamala le ma kɔ wa a naa latulu haaa mi lɔɔ koŋ o chuu. Mi Tamala ndoo chua teleŋndo tau a naa latulu a teleŋ pɔnɔ ndɔ ndoo wa kpɔndi kpɔndi a sɔɔŋ kundaa wo. Nduyɛ mi naŋ tosa mamɔɔlaŋ tau. Yaa kaala bɔɔ keŋ. Wana tusiaŋndo pila Tamala wa ni, nduyɛ i wa tɛtɛlɛ le miŋ naŋ soo o ndu lo. Mi kɔndɔfillo bii ya tau le chɔɔ wana waa lende sɔɔŋ mamaŋ tosaa.

Tamala wa bɔɔ wuye wuye, nduyɛ mi kaala o nɔ le tonyaa a wali pollo wo pilaŋ ya kɔllo tau. O wa a kɔl kɛndɛ kanifuule, o wa tosaa tau o wali Chɛhowaa niŋ. Kɛ ya ve a kɔl kɛndɛ le kanifuule, I ve tosa tau le. Mi kaa ndɔ kɛndɔɔ a nyaale ndɔɔ piiliaŋ ya tau. Mi taamasi ndɔɔ pɛɛku ya tonya sɔvɛ sɔviɔɔ hoo. Ndu cho ni maa: Chɛhowa yeema naa miŋ piɛi ndu “a kɔl kɛndɛ,” nduyɛ miŋ ‘soli chondoŋ’ o ndu lo.—Sam 100:​2.

Yaa yeema mi wa a kɔl kɛndɛ maa Tamala. Kɛ le mi hei ndii yɔŋnuŋ, mɛɛ mi yaa tosa siŋgaŋnda bɛndaŋ o yoomu nuu niŋ. Mɛɛ teleŋ tiŋ hiou, mi kandu siŋgaŋndaŋ tosaa o pɔmpɔmbɔ. Mi kandu bɛɛndiaŋndo le wali pollo. Nduyɛ lepum mi yaa chua kɔɔfale malalaŋndeŋ. Mi hei tosa mi kandu siɔmbulaŋ malɔɔ, nduyɛ mi nɔ kɔl simulaa. Mɛɛ yaa soliŋ Baabuiyo kpeku fau o wali pollo niŋ, lende koni yaa tuɛi wali pollo yeela ni. Teleŋ biŋgi okoŋ kɔɔli, I wa niŋ kɔɔfale malalaŋndeŋ tosaa ipaŋgu o ipaŋgu.

 Mi kandu wanaa wa tosaa tau o wali Chɛhowaa niŋnda biyɔɔ ichaŋya, mi che bɛɛ ŋ ve wɔsila pilɛ le. Mi taamaseliila ndalaŋ la mala ya mi kandu yiyaŋndo a nyɛ cho o sɔvɛ o yoomu nuu niŋndo okɔɔ. Nduyɛ mi kandu diomndaŋ veeloo o Baabuiyo niŋ lepaa o lepaa. Mi kandu wali pollo kaalaa tau. Nduyɛ mɛɛ teleŋ biŋgi hiou okoŋ kɔɔli, mi kandu kɔɔfale lɔɔlɔɔ leŋ. Mbo chua wɔsiŋ bɔɔbɔɔ I ve a kɔl kɛndɛ le. Kɛ a teleŋndo hoo mi kandu vɛlɛ waa a kɔl kɛndɛ, nduyɛ I wa hɛnɛkɛ o kundaa niŋ maa paandu.

Wɔsioo opilɛ okoŋ kɔɔli, miŋ chiikaŋ naa Alɛsi. Puaapilɛnɔɔ hoo ndoo nɔ kɛndɛi, nduyɛ ndoo kaala Chɛhowa a wali pollo tau. Buɛi malalaŋndo o wa ni, nduyɛ ndoo tosa niŋ kɔɔfaleŋ le wɔsilaŋ la ŋɔmpum. Ndoo kuɛ niŋ vɛlɛ malaa naa yeemɛi cho tau wa o lɛŋnde Malawileŋ niŋ. Nduyɛ mɛɛ o kuɛ loŋ, mi misiɔnalueiyaa o kɔ holnuŋ nda dɛɛniaa ndu, le mbo hiou lachi a Masale Mɛlɛkaleŋ kɛsioo nyɛ tase o yoomu ndɔɔ niŋ.

A wɔsi 2003, miŋ chal o nɔɔ niŋ naa Alɛsi. Nduyɛ chɔŋ niŋ a teleŋ koŋ, ŋ cho o wali lɔɔlɔɔ Mɛlɛkaa niŋ. Ŋ pɛɛku niŋ sɔɔŋ kɛndɛŋ bɔɔbɔɔ. Nduyɛ Chɛhowa dɔu niŋ naa sala o nɛila yɛ yɛlaŋ niŋ.

A wɔsi 2009, ma yɔŋ naa misiɔnalueileŋ o lɛŋnde Timo Lɛstleŋ niŋ. Nduyɛ lɛŋndeŋ ndeŋ le cho lɛŋii ibuŋga mɛŋndaŋ ma balu Iŋndoniisiaa ve tɛɛŋ. Mi kɔndɔfillo bii naa, nduyɛ ŋ wa a kɔl kɛndɛ tau. Kɛ a koŋ kpou, ŋ wa buulaŋndo. Paŋgoŋ ŋuɛɛnu okoŋ kɔɔli, miŋ kua o chiee bɛndoo le lɛŋnde Timo Lɛstleŋ. Nduyɛ chioo hoo nɔ diolaŋ ni aa Dili.

Miŋ tosa yɛlɛmiaalaŋ tau o yoomu naa niŋ kanifuule, naamu naa, suɛi nɛi maŋgalɛi, nyɛdiaa naŋ dia wo, a fondaŋ naŋ wa wo cho teŋgeŋ a lɛŋndeŋ ndeŋ. Te naŋ kuɛ pɛ o wali pollo niŋ, mi naŋ komal wanaa bala fonduaa, wanaa ndaa sina dɛnɛ tau le wa, a wanaa nda wa saaŋgiaa wo tau wa. Nduyɛ mi naŋ komal wanaa bɔɔbɔɔ a chɔuwo  ndoo piiliaŋ tau wa. Le hei, waŋnda haa wa a kɔl tambɛiyo tau. *

Miŋ sɔla fulamakɔɔlilaŋ tau o wali pollo niŋ. Le taamaseliiyo, paale pilɛ, mi komal chuaambɔ wɔsila 13 pilɛ diolaŋ Maliaa. * Kala ndɔ ndoo vi niŋ, nduyɛ lepilɛŋ koni ndoo cha finya ndɔ ni. Maa chuaambuaa bɔɔbɔɔ o lɛŋnde leŋ niŋ a teleŋ koŋ, Maliaa ndoo sina nyɛ kpeekpei ndoo tosa o yoomoo niŋndo le. I loonuŋ paale pilɛ mɛɛ o wa ya tɛɛsiallo mɛɛ o wa sinaŋndo yɛ, mbo chaŋ tau. Kɛ I ve biyɔɔ bila nyɛ o wa ya dimullo wo kpou le kanifuule, yaa dimi suɛi nduɛi maŋgalɛi nyɛkɛndɛi le. Mi piɛi o Chɛhowa lo le mbo mala ya mi dɛɛniaa ndu kɔllo. Nduyɛ okoŋ kɔɔli, mi veelul ndu diomndaŋ o bolii Baabui dɛɛniaa ndu kɔllo ve niŋ. Mɛɛ wɔsioŋ ŋtiŋ hiou, mi cha mɛɛ tonyaa wa yoomu Maliaa wo siŋgaa yɛ. Mbo siŋga kaala ndɔlaŋ a mɛɛ ndoo chuɛɛnuŋ yɛ. Mi Maliaa yɔŋgu yoomu ndɔɔ o Chɛhowa lo, nduyɛ mbo sɔla yiŋɔɔ. Suŋ suŋ niŋ, o cho wanaa cheleŋ Baabuiyo pɛɛkoo. Wanaa Chɛhowaa kpou simnuŋ niŋ yuŋgu Maliaa wo, nduyɛ a kaala ndu tau.

Chɛhowa cho wali dimiaa yooŋgu kɛndɔɔ salaa dɔwɔɔ tau o lɛŋnde Timo Lɛstleŋ niŋ. Mi che bɛɛ wanaa dimiaa yooŋgu kɛndiaa bɔɔbɔɔ chue wɔ wɔsilaŋ tɔ o tonyaa niŋ te, kɛ apum cho kɔɔfaa, buɛiyaa malalaŋnda ɔɔ bɛnduaa kundaa. Apum cho wallo o fondaŋ hiviaa cho landaŋ a lɛuve wo, nduyɛ ma wa malaa le yaulaŋ hivioo o sɔɔŋ ndaŋ maŋgalaŋ niŋ. Mi wa a kɔl kɛndɛ tau te I che nda pɛ chondoŋ solioo o bɔŋaŋndaŋ, mɛɛ nda wa mɛmɛlɛsɛɛ yɛ, a mɛɛ nda cho hiouwɔɔ lachioo tosaa o Mɛlɛka piɛiyo niŋ yɛ.

Mi che bɛɛ yoomoo o lɛŋnde Timo Lɛstleŋ niŋ cho teŋgeŋ a Ɔsiteeliaa, kɛ ŋ cho a kɔl kɛndɛ tau o wali naŋ cho tosaa wo niŋ. Lepum te naŋ wa pɛ kɔlaŋ inɛ, mi naŋ pɛ cha o mɔmbillo niŋ a wanaa cheleŋnda. Nduyɛ mi ndaa wou suwaa vesɛiya a nyɛdiaala cheleŋndaŋ o mɔmbil pilɛ koŋ niŋ. Lepum te naŋ kuɛ pɛ pɛɛkula Baabuilaŋ tosaa, mi fondaŋndo ndoo wa o tuu kpɛi. Nduyɛ lepum, fondaŋ naŋ tosa pɛɛku Baabuiyo wo wa o nɔɔlɛi a sɔɔwa ba o ba fee. Kɛ yaa chi sɔɔŋ muŋ kpou nyɛ o nyɛ le.

Lepum te I chal pɛ mi yiyaŋ, mi naŋ kɔl tau le mɛɛ wanaa velu ya wa pɛɛku ya a Chɛhowa okɔɔ, nduyɛ ma toolu ya yɛ, mi che bɛɛ chaŋyɛi nii a Chɛhowa ve ikala poŋ te. Nyɛ Pulɔwaa 22:​6 dimi wo cho tonya o yoomu nuu niŋ. Kala nuu a finya nuu cho a kɔl kɛndɛ tau le ya a pɔnɔ nuu Alɛsi. A cho a kɔl kɛndɛ le mɛɛ Chɛhowa cho naa soliŋndo kpeku o wali ndɔɔ niŋ yɛ. Chɔŋ a wɔsi 2016, ŋ cho niŋ wali buɛile ibuŋgaleŋ tosaa o tanda Ɔsiteleesiaa wo niŋ.

Mi che bɛɛ a teleŋ pum yaa tuii yooŋgu kɛndɔɔ dimioo yeela le, kɛ suŋ suŋ niŋ I kaala ndu bɔɔ, nduyɛ mi tuei ndu yeela tau. Nyɛ yɔŋnuŋ o yoomu nuu niŋndo chɔm kpendekele maa mɛɛ mɛɛ sɔɔŋ wa, te ŋ piɛi pɛ Chɛhowa a kɔllo kpou, ŋ nɔla miŋ wa a kɔl kɛndɛ. A tonya, I cho bɔɔ a kɔl kɛndɛ o wɔsila 18 naŋ chua latulu o wali Chɛhowaa niŋ naa Alɛsi laŋ. I che niŋ kpendekele maa nyɛ Deeve dimul Chɛhowa wo cho tonya. Mbo dimul ndu aa: “Wanaa huŋ naa num chua le nda malaa wa nda nda kinɛi, tosa . . . ma wa chondoŋ. Manda wanaa kaala num nda, o koŋ, ma naŋ kɔl le nyɛ ŋ tosal nda wo.”—Sam 5:​11.