Tuupa mi Chiisu sɔla piɔmndo, le yɛɛ o miŋgi yɛ sondo o diomnda Deeve dimi o Sam 22:​1 niŋndaŋ choo?

Diomnda cho o Maatiu 27:​46 niŋndaŋ la cho o diomnda mɛɛlaala Chiisu dimi tuupa mbo sɔla piɔmndo laŋ tɛɛŋ. Laŋ la cho ni aa: “Mɛlɛka nuu, Mɛlɛka nuu, vɛ ya malɔɔ?” Mɛɛ Chiisu dimi diomndaŋ ndaŋ, mbo peelu nyɛ Deeve dimi o Sam 22:​1 niŋndo. (Maki 15:​34) O cho naa maa Chiisu ndoo nɔ lɛ tiindaŋ bɔɔ o Chɛhowa niŋ, ɔɔ le mɛɛ ndoo tambu kɔl lɛ le o dimi diomndaŋ ndaŋ te. Ndoo sina le sabu o wa piɔmndo sɔlaa wo, nduyɛ o wa o yɔŋgaŋ a kɔllo kpou le hei tosaa. (Maa. 16:​21; 20:​28) Ndoo sina vɛlɛ maa te o wa pɛ piɔmndo sɔlaa, Chɛhowa ve ndu ‘manda’ le. (Choobu 1:​10) Mi Chɛhowa chɛl mi Chiisu sɔla piɔmndo kanifuule, ndoo yeema mi Chiisu ndoo chɔm maa mɛɛ mɛɛ sɔɔŋ wa, o nɔla mbo lo o pimbi ndɔ simiaa choo.—Maki 14:​35, 36.

Mɛɛ le yɛɛ Chiisu miŋgi yɛ sondo o diomndaŋ ndaŋ choo? Mi che bɛɛ ŋ sina nyɛ kpeekpei nyindu ndu le laŋ dimioo wo le, kɛ ŋ tofaŋndɔ sabulaŋ lapum. *

Baa dimioo Chiisu wa ni maa Chɛhowa ve ndu manda a teleŋ o wa piɔmndo sɔla wo le? Chiisu ndoo nɔ mbo soliŋ yoomu ndɔɔ sala le waŋchieeya baŋaa, mi Chɛhowa ndoo mala ndu bɛɛ le. Mi che bɛɛ o wa o dialuŋ iwana chieeyaŋ niŋ, kɛ ndoo nɔ mbo sɔla ‘piɔmndo le ŋwaŋnda chiee kpou.’—Hibu. 2:​9.

 Baa diomnda o dimilaŋ ndaŋ la chɔm ni maa a bolle Baabuile leŋ kpou okɔɔ o wa suɛi ni? O palɛi Chuuwa niŋ, i wa tɛtɛlɛ le mi waŋnda ndaa loonuŋ sɔɔŋ cho o yau Samndo niŋndoŋ. Lelaŋ mɛɛ Chiisu soo a Sam 22:​1 okɔɔ, naapum mi keŋ mala nda ma yiyaŋ a sɔɔŋ dimiŋ o bolle Baabuileŋ niŋndoŋ kpou okɔɔ. Te lende i wa ni, mɛɛ naapum mi hei mala Chuuwaa ndaa tol ndu kɔɔli wa, le ma loonuŋ huuluŋ dimiŋ o yau Samndo niŋ a piɔm ndɔɔ okɔɔ wo. (Sam 22:​7, 8, 15, 16, 18, 24) O mɛɛlula bolle Baabuileŋ ndeŋ, mi Deeve saŋgala Chɛhowa nduyɛ mbo suaa a mɛɛ Chɛhowa cho masaa le chieeŋndo kpou yɛ okɔɔ.—Sam 22:​27-31.

Baa dimioo Chiisu wa ni maa o tosa nyɛ o nyɛ le, mbo wa piɔmndo sɔlaa? Tuupa mbo sɔla piɔmndo, mi waŋnda handu ndu suɛi choo maa o tɛɛmbuu diola Mɛlɛkalaŋ. (Maa. 26:​65, 66) Le hei, mi waŋ bɛnduaa soliaa lasalaa a wanaa kialu yamaŋ nda chuuŋgiaŋ a nyumndaŋ le ndu yamɛi lakafɛi kilullo. (Maa. 26:​59; Maki 14:​56-59) Lelaŋ mɛɛ Chiisu nyuna Mɛlɛka aa: “Mɛlɛka nuu, Mɛlɛka nuu, vɛ ya malɔɔ?”, mi keŋ chɔm kɛsɛ maa o tosa nyɛ o nyɛ le mbo sɔla piɔmndo le.

Mi che bɛɛ mi Deeve saŋga tau, kɛ baa dimioo Chiisu wa ni maa Chɛhowa ndoo hini kɔl a Deeve le? Sako. Nyuna Deeve ndoo nyuna wo chɔm naa maa Chɛhowa ndoo hini kɔl a ndu le le. Kanifuule, mɛɛ o nyuna Chɛhowa, mbo hiau lachi a chɔmndo mɛɛ kpɛ o nɔ tiindaŋndo o kpaaya piŋiaa ndɔɔ niŋ yɛ. Nduyɛ mi Chɛhowa hiau lachi a ndu salaa dɔwɔɔ. (Sam 22:​23, 24, 27) O nɛi pilɛ koŋ choo, mi che bɛɛ mi Chiisu “Po Masaa Deevioo” wa saŋgaa o yɔm imɔnɔɔ choo, kɛ keŋ chɔm naa maa Chɛhowa ndoo hini lɛ kɔl a ndu le le.—Maa. 21:​9.

Mi Chɛhowa kɛɛ Chiisu mandaa le halikpeŋ mi Chiisu ndoo chɔm pimbi ndɔ simiaa o ndu lo haaa mbo sɔla piɔmndo. Baa mɔnɛi Chiisu wa biyɔɔ le hei ni? Chɛhowa ndoo toosiaa Po ndɔɔ le mbo saŋga nduyɛ mbo sɔla piɔmndo le. Kɛ mɛɛ Adam nda Ifi tosal ndu nilakalulaŋ, mbo tosa kɛɛsiaa le mi Po ndɔɔ huŋ saŋga nduyɛ mbo sɔla piɔmndo. Hei wa chɔm maa nyɛ Setana dimi a Chɛhowa okɔɔ wo cho tonya le. Nduyɛ i wa vɛlɛ tosa mi waŋchieeya ndaa sɔla baŋaŋndo, a dikeŋnaŋ ndoo hɛluŋ Adam nda Ifi wo. (Maki 8:​31; 1 Pitɛ 2:​21-24) Kɛ le mi hei kpou ndii yɔŋnuŋ, mɛɛ mi Chɛhowa ndoo kɛɛ Chiisu mandaa le teleŋ biŋgi okoŋ mbo sɔla piɔmndo.

Baa kindiŋndo Chiisu wa ni le buɛiyaa nduaa malaa ma bii bila sabu Chɛhowa chɛl mbo sɔla piɔm waa lende wo? * Mi Chiisu sina maa piɔmndo sɔlaa o nɛi waa lende choo wa tosa mi wanaa bɔɔbɔɔ ndaa kiisaŋ a piɔm ndɔɔ okɔɔ. (1 Kɔliŋ. 1:​23) Kɛ te buɛiyaa nduaa ndaa bii pɛ bila sabu Chɛhowa chɛl le mbo sɔla piɔm waa lende wo, keŋ wa nda mala ma che mɛɛ piɔm ndɔɔ cho o sɔvɛ yɛ. (Kalee. 3:​13, 14) Nduyɛ hei wa nda vɛlɛ mala ma che maa wana naa Piŋiaa o cho ni.

O yɔŋ bɛɛ maa le sabulaŋ ndaŋ ɔɔ le la cheleŋ Chiisu dimi diomnda laŋ ni, ndoo sina maa hɛnaŋ Chɛhowaa o wa tosaa ni. Mɛɛ Chiisu dimi diomnda cho o yau Samndo niŋndaŋ, teleŋ biŋgi okoŋ kɔɔli mbo dimi aa: “Nyɛ o nyɛ chuu yɔŋnɔŋ.” (Chɔŋ 19:​30; Luku 22:​37) A tonya, mɛɛ Chɛhowa kɛɛ Chiisu mandaa le teleŋ biŋgi, mi keŋ mala Chiisu le mbo tosa nyɛ Chɛhowa ndoo vem ndu le tosaa wo. Nduyɛ, mi keŋ mala ndu vɛlɛ le mbo peelu ‘nyɛ sawala Mɛlɛka ke Muuse laŋ, nyɛ wanaa suaa le Mɛlɛka wa, a nyɛ Yau Samndo dimi a ndu okɔɔ wo.’—Luku 24:​44.