1. Nɛɛnɛ o ba ke naŋ nɔ le suɛiyo fula yɛ?

 KE SƆVƐ sɔviɔɔ pila naŋ nɔ ni le suɛi. Nduyɛ Chɛhowa o ba o fula ni. Mɛɛ o toosiaa wana chiee tasoo Adam, mi Adam kandu diomndaŋ soliŋndo kpeku le suɛi o ndu lo. Ndoo tiuba mbo soliŋ diomnda sɛnɛilaŋ kpeku le suɛi. Mbo soliŋ kioo hoo kpeku le visiaa diolaŋ kioo. (Chɛ. 2:19) Nduyɛ yiyaŋndɔ mɛɛ o wa a kɔl kɛndɛ yɛ, mɛɛ o soo le teleŋ tasoo o laa ndɔ, Ifi lo!—Chɛ. 2:22, 23.

2. Vɛɛ waŋnda soliŋ yɛ niŋ ke naŋ nɔ le suɛiyo kpeku o nɛi wɔɔŋndo choo o paandoo niŋ, nduyɛ vɛɛ nda cho yɛ hei tosaa hau?

² Haupa mi waŋnda kandu ke naŋ nɔ le suɛiyo soliŋndo kpeku o nɛi wɔɔŋndo choo. Mi Setana Masa Nyinaa Wɔɔŋnda dimul Ifi choolaŋ. Mi choola laŋ la tosa mi Adam nda Ifi tosa hakioo, nduyɛ a ve lɛ walaŋ te. (Chɛ. 3:1-4) Mi Adam bɛɛ soliŋ kioo hoo kpeku o nɛi wɔɔŋndo choo, mɛɛ o bii Ifi a Chɛhowa tɔɔyaŋ, le biondɔŋ o tosa wo. (Chɛ. 3:12) Mi Keŋ bɛɛ dimul Chɛhowa choolaŋ mɛɛ o dii pɔmbɔ ndɔ Ebɛɛl. (Chɛ. 4:9) Nduyɛ pɛŋ, mi Lamɛki o fula o pulale Keŋndeŋ choo wo, poonyiaa chondei a niilu latanda wa o teleŋ koŋ niŋndo okɔɔ. (Chɛ. 4:23, 24) Kɛ vɛɛ waŋnda cho yɛ hau kioo hoo soliŋndo kpeku? Hau, mi simlachiaa le yalale chieeŋndeŋ soliŋ diomnda wɔɔŋndaŋ kpeku le suɛi o waŋnda lo. Nduyɛ o vidueila bɔɔbɔɔ niŋ, mi waŋnda soliŋ diomnda wɔɔŋndaŋ kpeku tau. Mi sukuuwa tuei waŋnda diomnda wɔɔŋndaŋ soliŋndo kpeku o sukuu. Nduyɛ mi kaasoŋaa cho wallo wa bɛɛ tuei diomnda wɔɔŋndaŋ o fondaŋnda nda tosa wallo laŋ. Diomnda wɔɔŋnda waŋnda soliŋ kpeku ba o ba fee laŋ chɔm kɛsɛ mɛɛ chieeŋndo cho hau fondaŋ wɔɔŋ bɛndu yɛ.

3. Te ŋ ve yekeŋ te, vɛɛ diomnda wɔɔŋndaŋ la piiliaŋ yɛ naa, nduyɛ yɛɛ naŋ cho yɛ yaasiaa o buŋgɛi hei niŋ?

³ Te ŋ ve yekeŋ te, mi diomnda wɔɔŋnda naŋ tuɛi lepaa o lepaa laŋ la nyindu naa le miŋ kandu laŋ soliŋndo kpeku. O kpeekpei  niŋ, naa Kilisiɔŋnda yeema miŋ nɛŋi Chɛhowa kɔllo. Le saboo hoo, ŋ nɔ miŋ fafaŋ diomnda wɔɔŋndaŋ soliŋndo kpeku. Nduyɛ, ŋ nɔ miŋ soliŋ ke naŋ nɔ le suɛiyo kpeku o nɛi bɛnda wo choo le halikpeŋ miŋ saŋgala Mɛlɛka. O buŋgɛi hei niŋ, ŋ cho chɔ mɛɛ naŋ tosa hei yɛ, te ŋ wa pɛ (1) o wali dimiaa yooŋgu kɛndɔɔ niŋ, (2) o bɔŋaŋndaŋ, nduyɛ (3) te ŋ wa pɛ baltaŋ a acheleŋnda. Le kandɔɔ, ŋ yaasiaŋndɔ fɛŋ miŋ che le sabu Chɛhowa yeema naa miŋ soliŋ diomnda kɛndɛlaŋ kpeku wo.

4. A mɛɛ Malakai 3:16 dimi yɛ, le sabu yɛɛ Chɛhowa yeema yɛ naa miŋ soliŋ diomnda kɛndɛlaŋ kpeku?

⁴ Nuawɔ Malakai 3:16. O bolle Baabuileŋ ndeŋ niŋ, mi Chɛhowa dimi maa, o cho diola wanaa nɔ siooŋii nduɛi, nduyɛ ma nɔ bɛɛle ndɔleŋ nda poonyiaa “o yauwo choo le loonɔŋndo a nda.” Baa a yiyaŋ pa maa, mi Chɛhowa tosa hei te waŋnda haa wa pɛ diomnda wɔɔŋndaŋ soliŋndo kpeku? Sako. Mi diomnda naŋ dimilaŋ la chɔm nyɛ cho naa o kɔllo. Mi Chiisu dimi aa: “Nyɛ wa waŋndo o piaa o kɔl lo, ndu o suaa ni.” (Maa. 12:34) Le hei, nyɛ naŋ suaa wo chɔm mɛɛ kpɛ naŋ kaala Chɛhowa yɛ. O yeema mi wanaa kaala ndu wa tuei yoomoo yeela lefafɛɛŋ o chieeŋ sɛnɛiyo niŋ.

5. (a) Vɛɛ mɛɛ naŋ suaa yɛ piiliaŋ yɛ piɛile naaleŋ? (b) A mɛɛ naŋ cho chɔɔ o fotueiyo niŋ yɛ, yɛɛ naŋ nɔ yɛ miŋ fafaŋ te ŋ wa pɛ suɛi?

⁵ Mɛɛ naŋ suaa yɛ tosa mi Chɛhowa chɛl piɛile naaleŋ ɔɔ mbo kɛɛ leŋ. (Chemi. 1:26) Mi wanaa kaala Mɛlɛka le wa apum soo a tumboo, o nɛi yoŋga niŋ, nduyɛ ma chɔm kaa heelaŋndo. (2 Timo. 3:1-5) Ŋ yeema kposoŋ miŋ wa maa nda le. Nduyɛ ŋ nɔ yeemɛi le diomnda naalaŋ soliŋndo kpeku le Chɛhowa kɔllo nɛŋioo. I cho tonya maa, mi Chɛhowa naŋ kɔl te ŋ wa pɛ diomnda kɛndɛlaŋ soliŋndo kpeku o bɔŋaŋnda naalaŋ a o wali dimiaa yooŋgu kɛndɔɔ niŋ. Kɛ baa mbo naŋ pa kɔl te ŋ wa pɛ diomnda wɔɔŋndaŋ soliŋndo kpeku o naa lo chiɛiniŋ?—1 Pitɛ 3:7.

6. Fulamakɔɔli kuɛɛ Kimbali ndoo sɔla yɛ, le mɛɛ o soliŋ diomnda kɛndɛlaŋ kpeku yɛ?

⁶ Te ŋ soliŋ pɛ ke naŋ nɔ le suɛiyo kpeku nyɛkɛndɛi, mi acheleŋnda che kpendekele  maa buɛiyaa Chɛhowaa naŋ cho ni. Nduyɛ, mi keŋ mala acheleŋnda le ma che “yɛ yiɔɔ wanaa saagial [Mɛlɛka] wa tɛɛŋ a wanaa saaŋgial” ndu le wa. (Mala. 3:18) Ŋ tofaŋndɔ mɛɛ hei cho tonya yɛ o tamasi ndepilɛnɔ naa pilɛ niŋ, diolaŋ Kimbali. * Paale pilɛ, ma ke ndu wallo le tosaa nda chaaŋ ndɔ o sukuu. Mɛɛ nda chii wali koŋ tosa, mi chaaŋ ndɔ cha kpendekele maa o cho teŋgeŋ a acheleŋnda. Kimbali ndoo suu sɔɔŋ wɔɔŋ a acheleŋnda okɔɔ le. Kɛ sɔɔŋ kɛndɔŋ ndoo suaa teleŋ o teleŋ ni, nduyɛ ndoo dimi diomnda wɔɔŋ te. Le hei, mi kɔndɔfillo bii Kimbali chaaŋ ndɔ tau. Nduyɛ okoŋ kɔɔli, mbo kandu Baabuiyo pɛɛkoo. Mi Chɛhowa naŋ kɔl tau te ŋ soo pɛ o nɛi tosa mi waŋnda nɔ yeemɛi le tonyaa sinaa wo niŋ.

7. Vɛɛ ŋ nɔ yɛ ma soliŋ ke ŋ nɔ le suɛiyo kpeku?

⁷ Naa kpou yeema miŋ soo o nɛi chuu Chɛhowa saŋgalaa, nduyɛ miŋ sɔɔŋguu puaapiliaa naa ikɛi kpɛɛluŋndo niŋ. Lelaŋ, ŋ yaasiaŋndɔ nɛilaŋ lapum miŋ che mɛɛ naŋ wa “wana tamasi kɛndɛ . . . a mɛɛ naŋ suaa yɛ.”

8. Tamasi yɛɛ Chiisu kɛsullɛ naa a mɛɛ naŋ nɔ miŋ soliŋ diomnda naalaŋ kpeku o yooŋgu kɛndɔɔ dimioo niŋ yɛ okɔɔ?

⁸ Soo o nɛi lebɛɛ niŋ o yɔŋ bɛɛ mi waŋndo pilaŋ num tana. Teleŋ Chiisu wa yooŋgu kɛndɔɔ dimioo wo, mi waŋnda ndaa nyiinduu ndu choolaŋ choo maa, wana kolaa a wana lepuloo o wa ni. Ma dimi vɛlɛ pɛŋ maa, a kpaaya Masa Nyina Wɔɔŋnda ndoo tosa sɔɔŋ ni, nduyɛ maa ndoo bii sawa wa a Paale Pɛŋgiaaleŋ okɔɔ wo le. Ma dimi vɛlɛ maa, o wa diola Mɛlɛkalaŋ tɛɛmbuuwo. (Maa. 11:19; 26:65; Luku 11:15; Chɔŋ 9:16) A koŋ kpou, Chiisu miŋgi maa le. Maa Chiisu, o yɔŋ bɛɛ mi waŋnda chiee isɔɔ o naa lo le, ŋ nɔ miŋ miŋgi maa le. (1 Pitɛ 2:21-23) O kpeekpei niŋ, hei ve bɛɛŋ bɛɛŋ le tosaa le. (Chemi. 3:2) Yɛɛ mala yɛ naa?

9. Yɛɛ mala yɛ naa miŋ mandaŋ a mɛɛ naŋ suaa yɛ te ŋ wa pɛ yooŋgu kɛndɔɔ dimioo?

⁹ Te waŋndo chiee isɔɔ o naa lo o wali dimiaa yooŋgu kɛndɔɔ niŋ te, ŋ nɔ miŋ dɔɔnuŋ tumbe a ndu le. Mi puaapilɛnɔ pilɛ diolaŋ Sam dimi aa: “Mi kindiŋ le kɔllo handɔɔ o yeemɛi wana chiɛiyo nɔ le sinaa a Mɛlɛka okɔɔ wo choo. Nduyɛ mi kɛsiŋ o kɔl maa wana koŋ tiuba mbo tosa siŋgaŋndaŋ o yoomu ndɔɔ niŋ.” Naapum, wana chiɛiyo cho a kɔl tambɛiyo le mɛɛ ŋ komal ndu a teleŋ wɔɔŋndo yɛ. Te ŋ komal pɛ waŋndo o wali dimiaa yooŋgu kɛndɔɔ niŋ mbo dɔɔnuŋ tumbe ɔɔ mbo wa a kɔl tambɛiyo, ŋ nɔ miŋ tosa nyɛ ndepilɛnɔ pilɛ diolaŋ Lusiaa tosa wo. Ŋ nɔ miŋ piɛi chobe o Chɛhowa lo le miŋ pɔlul kɔllo, yɔŋii naŋ dimi nyɛ o nyɛ tɛɛmbuu wana koŋ kɔllo, ɔɔ miŋ kɛɛ kaa lebiɔɔ chɔmndo.

10. A mɛɛ 1 Timoti 4:13 dimi yɛ, yɛɛ naŋ nɔ yɛ miŋ hiou lachi a tosaa?

 ¹⁰ Wa wana chaa waŋnda pɛɛkoo nyɛkɛndɛiyo. Mi che bɛɛ Timoti ndoo chaa yooŋgu kɛndɔɔ dimioo nyɛkɛndɛi, kɛ ndoo nɔ mbo chɔɔlu hiouwɔɔ lachioo tosa o waŋnda pɛɛkoo niŋ. (Nuawɔ 1 Timoti 4:13.) Vɛɛ naŋ looku yɛ miŋ simnuŋ wanaa pɛɛkaa kɛndɛ o yooŋgu kɛndɔɔ dimioo niŋ. Ŋ nɔ miŋ wa bɛɛndiaŋndo nyɛkɛndɛi. Chɛhowa ke naa nyɛm waliŋ bɔɔbɔɔ le naa malaa miŋ wa wanaa pɛɛkaa kɛndɛ. A cho malaa sɔla te a tofa pɛ buluchiɔɔ wo hoo, Wou Sɛmbɔɔ le Diomndaŋ Veeloo a Waŋnda Pɛɛkoo. Yoomu Naa leKilisiɔŋndo a Wali Pollo​—Yau Wali Bɔŋaŋndo nɔ vɛlɛ buŋgɛi, i mala naa ve. Buŋgɛi keŋ cho “Yɔŋguŋ o Wali Pollo Niŋ” ni. Baa a cho pa yaulaŋ ndaŋ soliŋndo kpeku le num malaa ma simnuŋ wana chaa pɛɛkoo wo? Te ŋ bɛɛndiaŋ pɛ nyɛkɛndɛi, keŋ mala naa miŋ wa fɛɛsɛŋ le suɛi, nduyɛ ŋ ve a isiooŋ te.

11. Yɛɛ mala yɛ niŋ Kilisiɔŋaa bɔɔbɔɔ ma simnuŋ wanaa pɛɛkaa kɛndɛ?

¹¹ Nyɛ cheleŋ mala naa miŋ wa wanaa pɛɛkaa kɛndɛ wo cho acheleŋnda mɛɛndaŋndo o kundaa niŋ ni. Mi Sam naŋ soo suŋ a ndu okɔɔ wo cha nyɛ mala puaapiliaa a ndepiliaa apum, ma simnuŋ wanaa pɛɛkaa kɛndɛ wo. Mbo pɛɛku nɛila yɛ yɛla nda soliŋ kpeku laŋ, nduyɛ mbo kindiŋ le tamasi ndaa tolɔɔ kɔɔli. Mi ndepilɛnɔ pilɛ diolaŋ Taliaa yaŋ nilaŋ nyɛkɛndɛi te puaapiliaa wa pɛ sɔɔŋ luŋndoŋ yɔŋgoo o kundaa niŋ. Nduyɛ, mbo pɛɛku mɛɛ wana chaa suukaŋndo a waŋndo o sɔɔŋ ŋpum choo o yooŋgu kɛndɔɔ dimioo niŋ yɛ.

12. Yɛɛ waŋnda apum cha yɛ ikala le tosaa o bɔŋaŋndaŋ?

¹² Naa kpou tiuba miŋ saŋgala Chɛhowa o bɔŋaŋndaŋ te ŋ soli pɛ chondoŋ diompilɛ, nduyɛ miŋ yɔŋgu mulila dɛɛniaa acheleŋnda kɔllo laŋ. (Sam 22:22) Mi apum che ndi ikala le chondoŋ solioo o bɔŋaŋndaŋ. Baa mi num bɛɛ che ndi pa ikala le hei tosaa? Te lende i cho ni, mɛɛ a cho malaa sɔla tau te a pɛɛku pɛ a nyɛ mala acheleŋnda le siooŋnde soliŋndo o kɔl le chondei solioo ɔɔ le mulioo yɔŋgoo o bɔŋaŋndo wo.

13. Yɛɛ mala yɛ num le chondoŋ solioo a kɔllo kpou o bɔŋaŋndo?

¹³ Soli chondoŋ o bɔŋaŋndo a kɔllo kpou. Te ŋ wa pɛ chonduŋ leMasaŋ solioo o bɔŋaŋndo, nyɛ naŋ nɔ miŋ kɛsiŋ o kɔllo cho yeemɛi naŋ nɔ le Chɛhowa saŋgalaa wo ni. Mi ndepilɛnɔ pilɛ diolaŋ Sala yiyaŋ maa o chiee chondoŋ solioo le. Kɛ o yeema mbo saŋgala Chɛhowa o chondoŋ niŋ. Le hei, o bɛɛndiaŋ fɛŋ nyɛkɛndɛi o ndu lo bɛɛ, mɛɛ o bɛɛndiaa pɛlta cheleŋ le bɔŋaŋndo yɛ. Mbo soli chondoŋ muŋ, nduyɛ mbo kindiŋ le sinaa mɛɛ diomnda cho leniŋ ndaŋ la chɛlaŋ a nyɛ nda cho lakɔ pɛɛku o bɔŋaŋndo wo yɛ. Mbo dimi aa: “Hei mala ya mi handu kɔllo o diomnda cho o chondei niŋndaŋ choo, nduyɛ mi faŋa kɔllo a mɛɛ ya cho ndi soli yɛ.”

14. Te a nɔ pɛ siɔmbulaŋ le mulilaŋ yɔŋgoo o bɔŋaŋndo, yɛɛ mala yɛ num?

 ¹⁴ Wa mulilaŋ yɔŋgoo teleŋ o teleŋ o bɔŋaŋndo. O kpeekpei niŋ, mi hei wa simullo le wanaa bɔɔbɔɔ. Mi Taliaa naŋ soo suŋ a ndu okɔɔ wo dimi aa: “Mi siɔmbulaŋ la bii ya le suɛi waŋnda o hɔl. Kɛ le mɛɛ ya suaa dɛɛ yɛ, wanaa bɔɔbɔɔ bii ndi bila le. Lelaŋ, simullo pila i cho le ya ni le mulilaŋ yɔŋgoo o bɔŋaŋndo. Kɛ keŋ kuuna Taliaa mulilaŋ yɔŋgoo le. Mbo chɔɔlu dimi aa: “Te I wa pɛ bɛɛndiaŋndo le bɔŋaŋndo, mi kɛsiŋ o kɔl maa te a nyuna pɛ, muli tasoo nɔ mbo wa o biŋgi, nduyɛ mbo wa sakpo a nyɛ dimiŋ o pɛllo niŋndo. Hei sim ni maa, te muli nuu wa pɛ o biŋgi nduyɛ mbo wa sakpo, mɛɛ o bɛnda, kanifuule ndu wana nyuna wo yeema ni.”

15. Yɛɛ naŋ nɔ yɛ miŋ kɛsiŋ o kɔl a mulila naŋ yɔŋgu o bɔŋaŋndo laŋ okɔɔ?

¹⁵ Mi Kilisiɔŋaa nɔ bɛɛ lasiɔmbu le wa che ndi ikala le mulilaŋ yɔŋgoo teleŋndaŋ lapum. Le yɛɛ? Mi ndepilɛnɔ pilɛ diolaŋ Chuliɛti dimi aa: “Lepum, mi kiisaŋ le mulioo yɔŋgoo o bɔŋaŋndo kanifuule, mi yiyaŋ maa muli nuu cho bɔɔ tɛtɛlɛ, nduyɛ maa o bɛnda tau le.” Kɛ ŋ nɔ miŋ kɛsiŋ o kɔl maa, Chɛhowa yeema naa miŋ yɔŋgu mulila chɛŋ naa o kɔllo niŋndaŋ mɛɛ naŋ tiuba yɛ. * Mi Chɛhowa naŋ kɔl tau, te ŋ dɔu pɛ sɛmbɔɔ le ndu saŋgalaa o bɔŋaŋnda naalaŋ. Lelaŋ, ŋ nɔ miŋ chɛl mi siooŋnde kuuna naa ndu saŋgalaa le.

16. Diomnda kuɛɛ naŋ nɔ yɛ miŋ fafaŋ dimioo?

¹⁶ Fafaŋ “diomnda wɔɔŋndaŋ dimioo.” (Ɛfi. 4:31) A mɛɛ naŋ dimi suŋ yɛ, Kilisiɔŋnda nɔ ma wa diomnda wɔɔŋndaŋ soliŋndo kpeku le. Kɛ lepum, miŋ soliŋ diomnda wɔɔŋndaŋ kpeku ŋ ve o sina choo le. Lelaŋ, ŋ nɔ miŋ mandaŋ a mɛɛ naŋ suaa yɛ. Le tamaseliiyo, ŋ nɔ miŋ dimi diomnda wɔɔŋndaŋ a wanaa fula o kɔɔlima cheleŋ niŋ, wanaa dimi suɛi maŋgalɛi cheleŋ nda ɔɔ a fula o lɛŋnde cheleŋ niŋ nda okɔɔ le. Le handɔɔ lechoo, ŋ nɔ miŋ soliŋ diomnda tɛɛmbuu acheleŋnda kɔllo laŋ te. Mi puaapilɛnɔ pilɛ dimi aa: “I soliŋ niŋ diomnda wɔɔŋnda yaa yiyaŋ maa, la tɛɛmbuu acheleŋnda kɔllo le laŋ kpeku o mamɔɔlaŋ niŋ. Kɛ o kpeekpei niŋ, mi diomndaŋ ndaŋ laa tɛɛmbuu acheleŋnda kɔllo tau. O wɔsila hiou laŋ niŋ, laa nuu mala ya niŋ o nɛiyo hoo choo tau te ŋ wa pɛ naa ndu kpeele. Mbo dimulla a diomnda wɔɔŋnda ya dimul acheleŋnda mi la tɛɛmbuu nda kɔllo laŋ okɔɔ.”

17. A mɛɛ Ɛfisiaŋnda 4:29 dimi yɛ, vɛɛ naŋ taŋgullɛ acheleŋnda?

¹⁷ Soo diomnda taŋgul acheleŋnda laŋ. Wa chɔ chɔ le nda chandɔɔ, nduyɛ ma fafaŋ nda pɛɛsaa ɔɔ ŋɔɔchaŋndo a nyɛ nda tosa wo okɔɔ. (Nuawɔ Ɛfisiaŋnda 4:29.) Mi che bɛɛ Isɔluɛiya ndaa nɔ sɔɔŋ bɔɔbɔɔ ndaa nɔ ma mel Chɛhowa balika le muŋ ndo, kɛ mi ndaa ŋɔɔchaŋ teleŋ o teleŋ a ndu. Te ŋ nɔ pɛ kaa ŋɔɔchaŋndo, mi keŋ tosa mi acheleŋnda bɛɛ kandu  ŋɔɔchaŋndo. Kɛsiŋ o kɔl maa, mi yooŋgu wɔɔŋ suaŋ suaŋaa tɔ wa dimul Isɔluɛiya wo tosa mi ‘nda kpou kandu ŋɔɔchiaŋndo a Muuse.’ (Nɔm. 13:31–14:4) O baa pilɔɔ choo, te ŋ chandu pɛ acheleŋnda, mi hei tosa mi wana o wana wa a kɔl kɛndɛ. I cho tonya maa, ‘chandɔɔla’ chua Chɛfitaa wo sɔla chaaŋaa nduaa o ba laŋ la dɛɛniaa ndu kɔllo ni, le mbo hiou lachi a wali ndɔɔ tosaa a kɔl kɛndɛ. (Chɔɔchi. 11:40, NWT) Mi Sala naŋ soo suŋ a ndu okɔɔ wo dimi aa: “Te ŋ chandu pɛ acheleŋnda, mi keŋ tosa ma sinaŋ maa Chɛhowa kaala nda, nduyɛ maa a cho a sɔvɛ o kɔɔna ndɔɔ niŋ.” Lelaŋ, nuuviaa nɛilaŋ le acheleŋnda chandɔɔ a kɔllo kpou.

18. A mɛɛ Sam 15:1, 2 dimi yɛ, le yɛɛ naŋ nɔ yɛ miŋ wa tonyaa dimioo, nduyɛ yɛɛ naŋ nɔ yɛ miŋ mandaŋ le tosaa?

¹⁸ Dimi tonyaa. Te ŋ ve tonyaa dimioo le, ŋ tiuba miŋ nɛŋi Chɛhowa kɔl te. Chɛhowa tul choola kɛ kɛ leyɛ. (Pulɔ. 6:16, 17) Mi che bɛɛ wanaa bɔɔbɔɔ chi choolaŋ dimioo maa suɛi wɔɔŋ te, kɛ ŋ nɔ miŋ nɔ yiyaŋ Chɛhowaa a choolaŋ okɔɔ. (Nuawɔ Sam 15:1, 2.) Mi che bɛɛ miŋ kindiŋ o nɛi o nɛi niŋ le miŋ fafaŋ choolaŋ dimioo, kɛ ŋ nɔ miŋ mandaŋ yɔŋii naŋ vioŋ tonyaa, okoŋ miŋ ke waŋnda yiyaŋ wɔɔŋndo.

19. A yɛɛ cheleŋ okɔɔ naŋ nɔ yɛ miŋ mandaŋ?

¹⁹ Fafaŋ chaanda choŋgulaŋ. (Pulɔ. 25:23; 2 Tɛsa. 3:11) Mi Chuliɛti naŋ soo suŋ a ndu okɔɔ wo chɔm mɛɛ choŋgulaŋ la paaliaŋ ndu yɛ. Mbo dimi aa: “Mi choŋgulaŋ nilaŋ yaŋɔɔ tɛɛmbuu ya kɔllo, nduyɛ mi kɛɛ laalaŋndo dɔwɔɔ o wana wa koŋ choŋgulaŋndo niŋ. Mi nyunaŋ aa: ‘Te waŋndo hoo choŋgu pɛ waŋndo o ya lo, baa o cho lakɔ ya choŋgu o wana cheleŋndo le?’” Te a sina pɛ maa balta nya cho laŋ la kandu hunɔɔ a choŋgulaŋ, mɛɛ o bɛnda ma siŋga balta laŋ.—Kolo. 4:6.

20. Yɛɛ ŋ nɔ yɛ ma kɛɛsiaŋ o kɔl le tosaa a diomnda numndaŋ?

²⁰ Hau, mi wanaa bɔɔbɔɔ soliŋ diomnda wɔɔŋndaŋ kpeku. Le hei, ŋ nɔ miŋ kindiŋ kpoke le mi diomnda naalaŋ la nɛŋi Chɛhowa kɔllo. Ŋ nɔ miŋ loonuŋ maa, suɛi naŋ suaa hei ve, ke fula Chɛhowa o ba wo i cho ni. Nduyɛ o buulaŋ tau a mɛɛ naŋ soliŋ kioo hoo kpeku yɛ. Te ŋ kindiŋ pɛ le ndu soliŋndo kpeku nyɛkɛndɛi o yooŋgu kɛndɔɔ dimioo niŋ, o bɔŋaŋndaŋ, a o baltaŋ niŋ, mbo dɔu naa sala tau. Nduyɛ, te o huŋ tɛɛmbuu pɛ chieeŋ dɛnɛwɔɔŋndo hoo, i cho wa tɛtɛlɛ le miŋ saŋgala ndu a diomnda naalaŋ. (Chudi 15) Kɛ le suŋ suŋndɔ, maa kɛɛsiaŋ o kɔl le Chɛhowa kɔllo nɛŋioo a ‘diomnda numndaŋ.’—Sam 19:14.