1-2. (a) Nɛɛ wa yɛ Yunisi, nduyɛ simulta kuɛɛ ndoo sɔla yɛ? (b) Tɛɛsiaawɔ fotueiyo o kɔɔ.

 MI CHE bɛɛ Baabuiyo suu a yiŋɔɔ Timoti wo okɔɔ le, kɛ ŋ tiuba miŋ yiyaŋ a mɛɛ Yunisi kala ndɔ wa a kɔl kɛndɛ o paaleleŋ choo yɛ. (Pulɔ. 23:25) Yiyaŋndɔ a mɛɛ o wa a kɔl kɛndɛ yɛ mɛɛ o che Timoti isisi o mɛŋndaŋ tɛɛŋ. Mbo handuŋ baa o kɔllo, mbo mam muɛɛŋ. Okoŋ, mi mamaa Timoti Lɔɔsi saa ndu. Mɛɛ nda mɔɔwa Timoti o mɛŋndaŋ bɛŋgu, mi Yunisi kala ndɔ yoomu fuu. Mɛɛ Timoti fula o mɛŋndaŋ bɛŋgu, mbo mam muɛɛŋ nduyɛ mi kala ndɔ tusi mɛmiaŋ kpasu kpasu. Mi che bɛɛ i ve suɛi bɛɛŋ bɛɛŋ te, kɛ mi Yunisi sɔla batiuwaa le po ndɔɔ pɛɛkoo le mbo kaala Chɛhowa, a Po ndɔɔ Chiisu Kiliti. Simulta kuɛɛ laa komallɛ ndu o hei tosaa niŋ?

² Finyaa Timoti ve Chɛhowa piɛi le, nduyɛ Kilikiinɔɔ o wa ni. Kɛ Chuuwa kalaa Timoti a mama ndɔ wa ni. (Walta. 16:1) Naapum Timoti wa feleŋgɔnɔ teleŋ Yunisi nda Lɔɔsi simnuŋ Kilisiɔŋnda wo. Kɛ finya ndɔ simnuŋ Kilisiɔŋnɔ kposoŋ te. Nɛɛnɛ Timoti cho yɛ niko tolɔɔ kɔɔli? Naapum a teleŋ koŋ, ndoo tiu niŋ ba mbo tosa kɛɛsiaa a ba ndɔ. Baa o cho pa finya ndɔ ve Chɛhowa piɛi le wo tolɔɔ kɔɔli? Baa o cho pa hiouwɔɔ lachi a naamula Chuula ndoo pɛɛku o chuaambɔyɛi nduɛi niŋndaŋ tolɔɔ kɔɔli? Ɔɔ o cho pa chɛlɔɔ le mbo simnuŋ buɛi Chiisu Kiliti wo?

3. A mɛɛ Pulɔwaa 1:8, 9 dimi yɛ, vɛɛ Chɛhowa che yɛ sɛmbɛ kalla duau le chuauwaa ndaa malaa ma simnuŋ chaaŋaa nduaa wo?

³ Kalla a cho Kilisiɔŋnda wa bɛɛ kaala yuŋgula ndalaŋ tau. Nduyɛ i hiou kpou ve, a yeema ma mala chuauwaa ndaa ma nɔ chaŋyɛi kpɛɛluŋnde a Chɛhowa. Nduyɛ Mɛlɛka naa che  bɔɔ sɛmbɛ nda cho dɔwɔɔ wo o sɔvɛ. (Nuawɔ Pulɔwaa 1:8, 9.) O mala niŋ a bɔɔbɔɔ le ma pɛɛku chuauwaa ndaa le ma kaala ndu, nduyɛ ma piɛi ndu.

4. Simulta kuɛɛ kalla a bɔɔbɔɔ nɔ yɛ hau?

⁴ O kpeekpei niŋ, lepum mi kalla buulaŋ a chuauwaa ndaa okɔɔ, nduyɛ ma yiyaŋ te a piɛi niŋ pɛ Chɛhowa maa Timoti. O fulawɔ okoŋ kɔɔli, kalaŋ chuauwa sina mɛɛ chuauwaa ndaa cho simultaŋ sɔlaa o chieeŋ Setanaa hoo niŋ yɛ. (1 Pitɛ 5:8) Kalla apum nɔ ŋpiaandu le. Nduyɛ apum, piaandaa ndaa cho Chɛhowa piɛi le. Le hei, mi i wa simullo le chuauwaa ndaa mandaa. Le tamaseliiyo, mi ndepilɛnɔ pilɛ diolaŋ Kilisiŋ * dimi aa: “Pɔnɔ nuu wa finya kɛndɛ, nduyɛ o wa bolle yuŋgu kɛndɛ. Kɛ, ndoo hɛnaŋ kposoŋ mi chuauwaa naa ndaa simnuŋ Seiyaa Chɛhowaa le. O wɔsila hiou laŋ niŋ, mi yaa chaŋ le teleŋnda bɔɔbɔɔ. Nduyɛ mi yaa buulaŋ te chuauwaa naa nɔla niŋ pɛ ma piɛi Chɛhowa.”

5. Yɛɛ naŋ cho yɛ yaasiaa o buŋgɛi hei niŋ?

⁵ Te kalaa ŋ cho ni ma wa Kilisiɔŋnɔɔ, a tiuba ma sɔla batiuwaa maa Yunisi. O buŋgɛi hei niŋ, ŋ cho yaasiaa a tamasi ndɔɔ okɔɔ. Nduyɛ, ŋ cho chɔ mɛɛ ŋ tual tamasi ndɔɔ kɔɔli le chuauwaa numnda pɛɛkoo sanaa a nyɛ ŋ dimi wo, vɛlɛ a nyɛ ŋ tosa wo yɛ. Ŋ cho vɛlɛ chɔ mɛɛ Chɛhowa mala num le hei tosaa yɛ.

6. A mɛɛ 2 Timoti 3:14, 15 dimi yɛ, vɛɛ Timoti looku yɛ simnɔŋ Kilisiɔŋnɔɔ?

⁶ Teleŋ Timoti wa o pɔmbɔ wo, mi kala ndɔ tosa nyɛ o tiuba wo le ndu pɛɛkoo “sɔɔŋ cho ŋ poonyiaa o yaula diandaa laŋ niŋndoŋ,” mɛɛ Chuuwa ndaa bii bila yɛ. I cho tonya maa o cho sɔɔŋ kpou le ndoo bii bila o yaula laŋ niŋ te, kanifuule ndoo sina nyɛ o nyɛ a Chiisu Kiliti okɔɔ le. A koŋ kpou, nyɛ o pɛɛku Timoti o yaula laŋ niŋndo wa ndu mala le mbo simnuŋ Kilisiɔŋnɔɔ. Baa Timoti wa pa chɛlɔɔ mbo simnuŋ Kilisiɔŋnɔɔ? Mɛɛ o wa feleŋgɔnɔ yɛ, ndoo nɔ dioo le kɛɛsiaa tosaa te o simnuŋ niŋ pɛ Kilisiɔŋnɔɔ ɔɔ o simnuŋ niŋ te. A tonya, mi Timoti “laalaŋ” tonya o pɛɛku a Chiisu okɔɔ wo, le mɛɛ kala ndɔ dɔu sɛmbɔɔ le ndu malaa yɛ. (Nuawɔ 2 Timoti 3:14, 15.) Yunisi wa a kɔl kɛndɛ tau le mɛɛ o pɛɛku po ndɔɔ a Chɛhowa okɔɔ yɛ, mi che bɛɛ i ve bɛɛŋ bɛɛŋ te. Mbo tosa nyɛ diola ndɔlaŋ la simndo. Ndu cho ni, “wana sɔla batiuwaa wo.”

7. Yɛɛ Yunisi ndoo tiu yɛ ba le tosaa le po ndɔɔ malaa mɛɛ o sɔla yiŋɔɔ?

⁷ Mɛɛ Timoti sɔla yiŋɔɔ, mbo komal kpeleŋ sɔvɛ sɔviɔɔ o yoomu ndɔɔ niŋ. Kɛ Yunisi wa wɔ buulaŋndo a po ndɔɔ okɔɔ. Vɛɛ po ndɔɔ wa yɛ yoomu ndɔɔ soliŋ kpeku? Baa o wa pa chaŋyaŋ wɔɔŋndoŋ holnɔŋ? Baa o wa pa lakɔ Aŋtɛŋ le sukuuwo? Nduyɛ baa o wa pa chɛlɔɔ pɛɛkula lachoowala nda wa pɛɛkoo laŋ? Baa o wa pa teleŋ ndɔɔ, yoomuma nduaŋ, a feleŋgɔyɛi nduɛi soliŋ kpeku le sullo nuuviaa? Yunisi ndoo nɔla mbo tosal Timoti kɛɛsiaa le. Kɛ ndoo tiuba mbo mala ndu. O nɛi kuɛɛ choo? Ndoo tiuba mbo hiou lachi a wallo tosaa kalaŋ le po ndɔɔ malaa mbo nɔ kaala yiŋgoloŋndo le Chɛhowa, nduyɛ mbo nɔ balika melaa le Po ndɔɔ Chiisu. O cho ko kalaŋ chuauwaa piaandaa ndaa ɔɔ laandaa ndaa cho Chɛhowa piɛi le wa le nɔ simultaŋ le chuauwaa ndaa malaa ma kaala Chɛhowa le. Kanifuule, o yɔŋ bɛɛ mi kalaŋ chuauwa wa Chɛhowa piɛiyo, mi i wa simullo  le chuauwaa ndaa malaa ma kaala ndu. Yɛɛ kalaŋ chuauwa pɛɛku yɛ o tamasi Yunisi wo niŋ?

8. Te pɔnɔɔ wa pɛ Chɛhowa piɛiyo, vɛɛ lanɔɔ mala yɛ ndu le chuauwaa ndaa malaa ma pɛɛku a Chɛhowa okɔɔ?

⁸ Pɛɛku Baabuiyo a chuauwaa numnda. Ndepiliaa, te piaandaa nyaa wa pɛ o tonyaa niŋ, Chɛhowa yeema nya mi la mala nda le chuauwaa nyaa pɛɛkoo a ndu okɔɔ. Nɛiyo opilɛ o nya tosa heiyo cho kɛɛsiaa nya nɔ le Pɛɛku Leyuŋgoo tosaa wo tooloo teleŋ o teleŋ ni. La wa sɔɔŋ kɛndɔŋ dimioo a pɛɛku leyuŋgoo okɔɔ, nduyɛ mi la nuuviaa nɛila nya tosa mi wana o wana tuei ndu yeela laŋ. Naapum la mala piaandaa nyaa le hɛlioo nyɛ nya cho tosa le pɛɛku leyuŋgoo wo. Le handɔɔ lechoo, te chuauwaa nyaa wa niŋ pɛ kpasu, naapum la mala piaandaa nyaa le kɛɛsiaa tosaa le mi la pɛɛku nda yauwo hoo, Tuei Yoomoo Yeela Lefafɛɛŋ! Hei cho tosa ma sɔla tɔnɔɔ tau.

9. Te lanɔɔ nɔ pɛ pɔnɔ cho Chɛhowa piɛi le wo, yɛɛ mala yɛ ndu le chuauwaa nduaa pɛɛkoo a Chɛhowa okɔɔ?

⁹ Kalla apum, ndapila nɔ ni ma chua chilaŋ le chuauwaa ndaa pɛɛkoo. Kanifuule, naapum a nɔ pɔnɔ le ɔɔ pɔnɔ nda cho Chɛhowa piɛi le. Te bahawɛiyo hoo ŋ nɔ ni, mɛɛ hiu buulaŋ te, Chɛhowa cho num mala. Soliŋ nyɛm waliŋ kɔɔna ndɔɔ cho naa kioo woŋ kpeku le chuauwaa numnda pɛɛkoo. A nyuna vɛlɛ kalaŋ chuauwaa nɔ taasioo tau wa, le ma chɔm num mɛɛ wana soliŋ nyɔɔŋ muŋ kpeku le pɛɛku leyuŋgoo tosaa yɛ. * (Pulɔ. 11:14) Chɛhowa tiu vɛlɛ ba mbo mala num le ma nɔ suukaŋ kɛndɔɔ a chuauwaa numnda. Nyuna ndu le mbo mala num ma sina mɛɛ ŋ soliŋ nyunalaŋ kpeku, le sinaa nyɛ cho nda o kɔllo yɛ. (Pulɔ. 20:5) Le baltaŋ kandɔɔ a nda, a soliŋ nyuna tɛtɛlɔɔ kpeku mɛɛ hoo cho nuaa yɛ, ‘Simul kuɛɛ ŋ sɔla yɛ hau o sukuu?’

10. O nɛi cheleŋ kuɛɛ choo ŋ mala yɛ chuauwaa numnda ma pɛɛku a Chɛhowa okɔɔ?

¹⁰ Nuuviaa nɛila yɛ yɛlaŋ le chuauwaa numnda pɛɛkoo a Chɛhowa okɔɔ. Soo o nda lo a Chɛhowa okɔɔ, vɛlɛ a nyɛ o tosal num niŋndo. (Ditɔnɔ. 6:6, 7; Aisaya 63:7) Hei cho suɛi sɔvɛ taama taama te a tiuba ma pɛɛku chuauwaa numnda teleŋ o teleŋ o nyalo bɛɛ le. Mi Kilisiŋ naŋ soo suŋ a ndu okɔɔ wo dimi aa: “Yaa nɔ nɛila bɔɔ le suɛi o chuauwaa naa lo a Chɛhowa okɔɔ o naalo bɛɛ le. Le hei, mi yaa soliŋ teleŋ kɛ kɛ kpeku le suɛi o nda lo a Chɛhowa okɔɔ. Mi yaa chua nda miŋ kuɛ kelaa ɔɔ mi naŋ luɛi o dɛndɔɔ niŋ, le kelaa o mɛŋndaŋ choo. Nduyɛ mi yaa soliŋ teleŋ koŋ kpeku le suɛi a nyɛm Chɛhowa toosiaa woŋ okɔɔ, vɛlɛ a nyɛm cheleŋ muŋ mala nda le ma simnuŋ chaaŋaa nduaa wo. Mɛɛ chuauwaa naa sul dɔɔ ŋkaasoŋ, mi dɛɛniaa nda le ma wa Baabuiyo pɛɛkoo a ba nda.” Le handɔɔ lechoo, wa sɔɔŋ kɛndɔŋ dimioo a kɔɔna Chɛhowa okɔɔ, vɛlɛ a puaapiliaa a ndepiliaa numnda. Dimi sɔɔŋ wɔɔŋndoŋ a bɛnduaa kundaa okɔɔ le. Nyɛ ŋ dimi a nda okɔɔ wo cho tosa mi chuauwaa numnda nyuna nda le malaa ɔɔ a nyuna nda le.

11. A mɛɛ Chemisi 3:18 dimi yɛ, le yɛɛ i cho yɛ suɛi sɔvɛ le miŋ hiŋ a kɔl nyuloo o yuŋgoo niŋ?

¹¹ Tosa mi kɔl nyuloo wa o yuŋgoo niŋ. Wa pɔnɔ num a chuauwaa numnda dimullo teleŋ o teleŋ maa a kaala nda. Soo a pɔnɔ num okɔɔ o nɛi lebɛɛ niŋ, nduyɛ ma pɛɛku chuauwaa numnda le ma tosa nyɛ pilɛ koŋ. Te a wa pɛ tosaa lende, i cho wa tɛtɛlɛ  le mi chuauwaa numnda pɛɛku a Chɛhowa okɔɔ. (Nuawɔ Chemisi 3:18.) Tofawɔ tamasi puaapilɛnɔ pilɛ diolaŋ Choosɛ. Kɔɔfanɔ teŋgeŋndo o cho o lɛŋnde Luomaaniaaleŋ niŋ ni. Teleŋ o wa o pɔmbɔ wo, mi finya ndɔ tosa ndi ikala kpoke, le mi ndu, kala ndɔ, yema ndɔ, a pɔmbuaa nduaa piɛi Chɛhowa. Mi Choosɛ dimi aa: “Mi kala nuu ndoo kindiŋ kpoke le mi kɔl nyuloo wa o yuŋgu naa niŋ. Mɛɛ finya nuu ndoo tosa ndi ikala fau, lende koni kala nuu ndoo tosa ni mi kɔl nyuloo wa o yuŋgoo niŋ. Mɛɛ o che maa ŋ ve finya naa lebɛɛ ke nduyɛ miŋ diikuŋ ndu le, mbo tɛɛsial naa nyɛ dimiŋ o Ɛfisiaŋnda 6:1-3 niŋndo. Mi ndoo mala vɛlɛ naa le miŋ bii bila le sabu naŋ nɔ miŋ ke ndu bɛɛleŋndo. Mi keŋ mala le mi kɔl nyuloo wa o yuŋgu naa niŋ.”

12. A mɛɛ 2 Timoti 1:5 dimi yɛ, vɛɛ tamasi Yunisi wo piiliaŋ yɛ Timoti?

¹² Nuawɔ 2 Timoti 1:5. Mi Yunisi kɛsi tamasi kɛndɔɔ le Timoti. Mbo pɛɛku ndu le sinaa maa te a nɔ pɛ laalaŋndo, a nɔ ma dɔu ndu o wali niŋ. (Chemi. 2:26) Mi Timoti cha kɛsɛ maa sɔɔŋ kala ndɔ ndoo tosa woŋ muŋ chɔm ni maa o kaala Chɛhowa. Nduyɛ maa muŋ wa ndu malaa ni, le mbo wa a kɔl kɛndɛ. Vɛɛ tamasi Yunisi wo piiliaŋ yɛ Timoti? Mi kiilanɔɔ Pɔɔl dimi maa Timoti ndoo nɔ laalaŋ kala kalaa maa kala ndɔ. Hei ve suɛi kɔndɔfili le. Mi Timoti mɛɛndaŋ tamasi kala ndɔ wo, nduyɛ mbo tual ndu kɔɔli. O nɛi pilɛ koŋ choo, kalla a bɔɔbɔɔ mala niŋ hau wanaa nda cho o yuŋgoo niŋnda le ma piɛi Chɛhowa “mi che bɛɛ a dimul nda nyɛ o nyɛ le.” (1 Pitɛ 3:1, 2) Num bɛɛ tiuba ma tosa nyɛ pilɛ koŋ kpe. O nɛi kuɛɛ choo?

13. Le yɛɛ kalaa nɔ yɛ mbo kɛsi chaŋyɛi o nɔ a Chɛhowa ve nyɛ tase o yoomu ndɔɔ niŋ?

¹³ Kɛsi chaŋyɛi numnde a Chɛhowa nyɛ tase o yoomu numndo niŋ. (Ditɔnɔ. 6:5, 6) Maa kalla a bɔɔbɔɔ, num bɛɛ soliŋ niŋ sala tau. A soliŋ niŋ teleŋ numndo, nyɛsɔlaa, luaaŋ, a nyɛm cheleŋndoŋ sala le halikpeŋ ma mala chuauwaa numnda ma sɔla nyɛm nda hauba woŋ. A koŋ kpou, a nɔ ma wa kpɔndi kpɔndi o nyɛm nda hauba woŋ nuuviaa niŋ, okoŋ ma puɛɛnuŋ a chaŋyɛi numnde a Chɛhowa le. Wa piɛileŋ teleŋ o teleŋ o Chɛhowa lo, nduyɛ ma kɛsi teleŋndo le Baabuiyo pɛɛkoo. Wa vɛlɛ kɔlaŋ o bɔŋaŋndaŋ teleŋ o teleŋ. Te a wa pɛ hei tosaa, a cho chaŋyɛi numnde a Chɛhowa kindi poŋ, nduyɛ ma kɛsi tamasi kɛndɔɔ le yuŋgu numndo vɛlɛ a acheleŋnda.

14-15. Yɛɛ naŋ pɛɛku yɛ o tamasi Lini, Maliaa, a Chowaa wo niŋ?

¹⁴ Ŋ tofaŋndɔ tamaseliila feleŋguaa apum a pɛɛku o tamasi kalaa ndaa niŋ le Chɛhowa kaalaa, nduyɛ ma duau tiindaŋndo o ndu niŋnda. Mi Kilisiŋ naŋ soo suŋ a ndu okɔɔ wo chua ndɔɔ Lini dimi aa: “Naŋ tiuba miŋ pɛɛku Baabuiyo finya naa o hɔl te. Kɛ mi kala naa ndoo kuɛ o bɔŋaŋndaŋ teleŋ o teleŋ. Mi che bɛɛ naŋ sina tau a Baabuiyo okɔɔ le, kɛ mi tamasi ndɔɔ mala naa le miŋ nɔ laalaŋ kala kalaa. Tuupa pɛŋ miŋ kandu kɔlaŋ o bɔŋaŋndaŋ, naŋ sina niŋ maa tonyaa cho hoo ni.”

¹⁵ Mi finyaa Maliaa ndoo tusi nda nyɛpalaa choo te ndaa kuɛ pɛ o bɔŋaŋndaŋ. Mi Maliaa dimi aa: “Kɔl simulaa pila kala nuu nɔ ni. Teleŋ ya wa chuaambɔ wo, lepum mi yaa kɛɛ sɔɔŋ ŋpum tosaa kanifuule, I wa a siooŋnde le nyɛ acheleŋnda cho dimi a ya okɔɔ wo. Kɛ mɛɛ ya che mɛɛ kala nuu nɔ kɔl simulaa yɛ, vɛlɛ a mɛɛ o handu Chɛhowa wana tasoo  o yoomu ndɔɔ niŋ yɛ, mi keŋ mala ya le siooŋnde soliŋndo o kɔl.” Mi finyaa Chowaa handu sawaa maa wana suu a Chɛhowa okɔɔ o nda lo bɛɛ le. Mi Chowaa dimi aa: “Nyɛ mala ya tau wo cho mɛɛ kala nuu ndoo diikuŋ finya nuu teleŋ o teleŋ yɛ ni. Mi ndoo tosa nyɛ o nyɛ ndoo dimul ndu pɛ. Mɛɛ dɔɔ mi ndoo dimul ndu le mbo kɛɛ Chɛhowa piɛiyo.”

16. Vɛɛ tamasi kalla kɛsi wo piiliaŋ yɛ acheleŋnda?

¹⁶ Kalla, la loonuŋ maa mi tamasi nyaa piiliaŋ acheleŋnda. O nɛi kuɛɛ choo? Yiyaŋndɔ a mɛɛ tamasi Yunisi wo piiliaŋ kiilanɔɔ Pɔɔl yɛ. Mbo poonyiaa maa Timoti ndoo nɔ laalaŋ kala kalaa kanifuule, ‘Yunisi kala ndɔ fɛlɛŋ ndoo nɔ laalaŋ waa lende.’ (2 Timo. 1:5) Ɔɔ teleŋ tase Pɔɔl che maa Yunisi nɔ laalaŋndo wo? Naapum a teleŋ tase o kandu balɔɔ ndɔ lemisiɔnalueiyo wo o komal Lɔɔsi nda Yunisi Lista ni, nduyɛ mbo mala nda ma simnuŋ Kilisiɔŋnda. (Walta. 14:4-18) Yiyaŋndɔ a hei okɔɔ. Mɛɛ wɔsilaŋ 15 hiou okoŋ kɔɔli, mbo poonyial Timoti yauwo. Nduyɛ o yau koŋ niŋ, mbo suaa a sɔɔŋ kɛndɛŋ Yunisi tosa woŋ okɔɔ, vɛlɛ a mɛɛ o wa wana tamasi kɛndɛ, o naŋ tual kɔɔli wo yɛ. I cho kpendekele maa, mi tamasi ndɔɔ dɛɛniaa kiilanɔɔ Pɔɔl a acheleŋnda kɔllo tau. Baa a nɔ pa chuauwa, kɛ a nɔ pɔnɔ le, ɔɔ pɔnɔ num cho Chɛhowa piɛi le? Te lende i cho ni, mɛɛ nɔ tiindaŋndo maa tamasi num kɛndɔɔ cho acheleŋnda yoomuaŋ luei, nduyɛ mbo dɛɛniaa nda kɔllo.

17. Yɛɛ ŋ nɔ yɛ ma tosa te chuauwaa numnda kɛɛ pɛ nyɛ ŋ cho nda pɛɛkoo wo dɔwɔɔ o wali niŋ?

 ¹⁷ Kɛ te o wa yɛ mi chua numndo kɛɛ le nyɛ ŋ cho ndu pɛɛkoo wo dɔwɔɔ o wali niŋ? Loonuŋ maa teleŋndo tau yeemaŋ ni le chuauwa pɛɛkoo. A mɛɛ fotueiyo cho chɔmndo yɛ, te ŋ tɔl pɛ kulle, lepum ŋ sina te kulii keŋ cho pɛ hindɔɔ mi i simnuŋ tɔlɔɔ, okoŋ mi i yɔŋgu komɔɔ le. A koŋ kpou, miŋ hiou lachi a ndi pɔɔliaa le halikpeŋ mi i hindu. (Maki 4:26-29) O nɛi pilɛ koŋ choo, naapum mi nya kalla buulaŋ, te nyɛ nya cho chuauwaa nyaa pɛɛkoo wo cho pɛ nda kɔllo pilaŋndo. O cho num te tosa kɛɛsiaa le chuauwaa numnda le. Kɛ te a hiou pɛ lachi a nyɛ ŋ tiuba wo tosaa le nda pɛɛkoo, keŋ cho nda mala ma nɔ chaŋyɛi kpɛɛluŋnde a Chɛhowa.—Pulɔ. 22:6.

18. Vɛɛ Chɛhowa mala yɛ chuauwaa numnda le ma simnuŋ chaaŋaa nduaa?

¹⁸ Chɔŋ o sindɔɔ niŋ, Chɛhowa mala niŋ feleŋguaa bɔɔbɔɔ le ma simnuŋ chaaŋaa nduaa. (Sam 22:9, 10) O tiu vɛlɛ ba mbo mala chuauwaa numnda ma simnuŋ kaasoŋnda o ndu piɛiyo niŋ, te a yeema pɛ. (1 Kɔliŋ. 3:6, 7) Kɛ o yɔŋ bɛɛ ma mal Chɛhowa piɛiyo, o cho hiouwɔɔ lachi a nda kaalaa. (Sam 11:4) Nyɛɛmbɔ bɛɛ nda chɔm pɛ “yeemɛi” le ma kandu ndu vɛlɛ piɛiyo, mbo wa o bɛɛndiaŋ le nda malaa ma simnuŋ chaaŋaa nduaa. (Walta. 13:48; 2 Kolo. 16:9) O cho num mala ma soliŋ diomnda bɛnda laŋ kpeku le suɛi o nda lo a teleŋ nda yeema le laŋ tueiyɔɔ wo. (Pulɔ. 15:23) Ɔɔ naapum mbo soliŋ puaapilɛnɔɔ ɔɔ ndepilɛnɔɔ o kundaa niŋ kpeku le yeemɛi kpeekpeiye chɔmndo o nda niŋ. O yɔŋ bɛɛ ma sul kaasoŋnda, Chɛhowa tiuba mbo looŋnuŋ nda a nyɛ nda pɛɛku o chuaambɔyɛi ndɛi niŋndo okɔɔ. (Chɔŋ 14:26) Te a hiou pɛ lachi a chuauwaa numnda pɛɛkoo sanaa a nyɛ ŋ dimi wo vɛlɛ a nyɛ ŋ tosa wo, Chɛhowa cho num salaa dɔwɔɔ.

19. Yɛɛ ŋ nɔ yɛ ma tosa le mi Chɛhowa naŋ kɔl tau a num?

¹⁹ Kaala Chɛhowa nɔ le numndo tolnuŋ o kɛɛsiaala chuauwaa numnda tosalaŋ choo le. O kaala num le mɛɛ ŋ kaala ndu yɛ. Te o yɔŋ pɛ maa numpilɛ cho chuauwaa numnda mandaa ni, mɛɛ kɛsiŋ o kɔl maa, Chɛhowa mɛi lediom le mbo wa Finyaa le chuauwaa numnda nduyɛ mbo manda nda. (Sam 68:5) O cho num te kɛɛsial chuauwaa numnda le ma piɛi Chɛhowa ɔɔ le ma kɛɛ ndu piɛiyo le. Kɛ te a hiou pɛ lachi a Chɛhowa tiindaŋndo le mbo mala num, nduyɛ ma tosa nyɛ ŋ tiuba wo, keŋ cho tosa mbo naŋ kɔl tau a num.