Buŋgɛi chuaa cho ni, “dimioo maa a chɛl le nyɛ tosa, nduyɛ ma pɛl diola Mɛlɛkalaŋ le ndu tosaa. O sim vɛlɛ, simndaŋ Mɛlɛka o hɔl ma dimi maa a cho nyɛ tosa.” Lepum, mi waŋndo poonyiaa ɔɔ mbo dimi nyɛ o chua buŋgɛi le tosaa wo.

Mi waŋnda apum yiyaŋ maa o cho suɛi kɛndɛ le buŋgɛi chuaa le. Kanifuule, mi Chiisu dimi aa: “La mɛnaŋ kposoŋ [le buŋgɛi chuaa le.] . . . Kɛ ‘Ei’ nyaa wa ei, mi ‘Ɛ ɛ’ nyaa wa ɛ ɛ, kanifuule nyɛ o nyɛ cheleŋ handuŋ lechoo pɛ, Setana o ba o fula ni.” (Maa. 5:33-37) Chiisu ndoo sina maa, o Sawala Mɛlɛka ndoo ke Muuselaŋ bɛŋgu, mi buɛiyaa Mɛlɛkaa ndaa chua buŋgɛi le nyɛ tosa nduyɛ mi ndaa mɛnaŋ le ndu tosaa. (Chɛ. 14:22, 23; Ɛsɔ. 22:10, 11) Nduyɛ ndoo sina vɛlɛ maa, mi Chɛhowa bɛɛ ndoo mɛnaŋ a ndupila te ndoo wa pɛ buŋgɛi chuaa. (Hibu. 6:13-17) Lelaŋ, Chiisu dimi naa maa ŋ nɔ miŋ chua ibuŋga le le. Kɛ silaa o wa ni maa, ŋ nɔ miŋ chua ibuŋga o fondo fuu wo choo le. Le hei, ŋ nɔ miŋ che buŋgaŋ naŋ chua woŋ ŋ sɔvɛ, nduyɛ miŋ peelu muŋ.

Mɛɛ yɛɛ ŋ nɔ yɛ ma tosa, te a dimul num pɛ le ma mɛnaŋ le buŋgɛi chuaa? O tasoo, a nɔ fɛŋ ma sina maa a tiuba ma peelu buŋgɛi keŋ. Te a sina pɛ maa a tiuba le, mɛɛ chua ndi le. Mi Diom Mɛlɛkaa sila naa aa: “O bɛnda bɛɛ te a wa nyɛ o nyɛ tosa pɛ a chue ibuŋga kposoŋ te, mbo hiau buŋgɛi chuaa a tosa nyɛ ŋ chua buŋgɛiyo le.” (Ikili. 5:5) Nyɛ ŋ nɔ vɛlɛ ma tosa wo cho sawala mandaala Baabuiyo tofaa a buŋgɛi chuaa okɔɔ ni. Nduyɛ ma tol kɔl iyama num sɔla pɛɛkoo wo kɔɔli le ndi chuaa. Ɔɔ sawala mandaalaŋ ndaŋ latiŋ?

Buŋgaŋ ŋpum tɛɛmbuu sawa Mɛlɛkaa le. Le tamaseliiyo, mi Seiyaa Chɛhowaa chua buŋgɛi te a wa pɛ nɔɔ chuaa. Mi poo a chuaa sim Mɛlɛka a wanaa cheleŋnda lachi, ma chua buŋgɛi maa a cho kaaliaŋ vellaa velle, ma che opilɛ a o cheleŋndo o sɔvɛ, nduyɛ ma keŋnaŋ bɛɛleŋ haaa a yoomula ndalaŋ mɛɛlulaŋ. (Wanaa chua nɔlaŋ nda apum dimi diomnda waa nuaa le. A koŋ kpou, buŋgɛi nda chua Mɛlɛka o hɔl ni.) Nduyɛ ma simnuŋ pɔnɔɔ a lanɔɔ. Hei sim ni maa, nɔ ndaa nɔ mbo wa lefafɛɛŋ. (Chɛ. 2:24; 1 Kɔliŋ. 7:39) Kɛɛsiaa sɔviɔɔ pila cho hoo ni, nduyɛ o chɛlaŋ a hɛnaŋ Mɛlɛkaa.

Buŋgaŋ ŋpum chɛlaŋ a hɛnaŋ Mɛlɛkaa kposoŋ te. Le tamaseliiyo, Kilisiɔŋnɔɔ nɔ mbo chua buŋgɛi mbo dimi maa o mal laalaŋ ndɔɔ le. Nduyɛ o nɔ vɛlɛ mbo chua buŋgɛi le kɔlaŋ o chɔuwo le lɛŋnde ndɔleŋ mandaa le. Te o tosa keŋ pɛ, mɛɛ o tɛɛmbuu sawa Mɛlɛkaa. Kilisiɔŋnda nɔ ma wa “le chieeŋndo le.” Lelaŋ, ŋ nɔ miŋ wou laba o sɔɔŋ lemasaŋ a o chɔulaŋ niŋ te.—Chɔŋ 15:19; Aisaya 2:4; Chemi. 1:27.

 Le buŋgaŋ ŋpum chuaa, ŋ nɔ miŋ soliŋ kɔl iyama naa kpeku. Lepum, ŋ nɔ miŋ yiyaŋ nyɛkɛndɛi o buŋgɛi naŋ yeema chuaa ve choo le sinaa te i chɛlaŋ pɛ a sila Chiisu yɔŋgu maa naŋ ‘ke Siisa nyɛ cho le Siisa wo, miŋ ke Mɛlɛka nyɛ cho le Mɛlɛka wo.’—Luku 20:25.

Le tamaseliiyo, te o wa yɛ mi Kilisiɔŋnɔɔ yeema yauwo le mbo simnuŋ pilachioo o lɛŋndeŋ niŋ ɔɔ mbo yeema yau ke ndu dioo le kelaa o lɛŋnde niŋndo? Kɛ ma dimul ndu maa o nɔ fɛŋ mbo chua buŋgɛi le chɔmndo maa o yɔŋguŋ o lɛŋnde leŋ ndo. Te o yɔŋ pɛ maa o lɛŋnde leŋ niŋ buŋgɛi waa nuaa chuaa sim maa, o nɔ mbo tosa nyɛ chɛlaŋ a sawa Mɛlɛkaa le wo, mɛɛ o nɔ mbo chua ndi le. Kɔl ndɔ iyama sɔla pɛɛkoo wo cho ndu mala ni le kɛɛsiaa hoo tosaa. Naapum mi masaleŋ le chɛl ndu le mbo siŋga diomndaŋ lapum o buŋgɛi keŋ chuaa niŋ, le halikpeŋ mi i chɛlaŋ a kɔl ndɔ iyamaa.

Te i wa lende pɛ, mɛɛ keŋ chɛlaŋ a sawa mandaa cho o Luomaŋnda 13:1 niŋndo. Le dimi aa: “Ŋ nɔ miŋ diikuŋ wanaa cho naa masaleŋ choo wa.” Lelaŋ, Kilisiɔŋnɔɔ kɛɛsiaa maa, i cho suɛi wɔɔŋ le buŋgɛi waa nuaa chuaa le kanifuule, i cho suɛi wɔɔŋ Mɛlɛka o hɔl te.

Ŋ nɔ vɛlɛ miŋ soliŋ kɔl iyama naa kpeku te a dimul naa pɛ le miŋ soliŋ nyɛ kpeku ɔɔ le miŋ tosa nyɛ teleŋ naŋ cho wa buŋgɛi chuaa wo. O sindɔɔ niŋ, te Luomaŋnda a kaala wa landaŋ ndaŋ laa wa pɛ buŋgaŋ chuaa, mi ndaa soliŋ nyɛ ndoo sim le mɛlɛka chɔuwo wo kpeku le muŋ chuaa. Mi Kilikiiya bɛɛ ndaa heelu baa le buŋgɛi chuaa. Keŋ ndii chɔm ni maa, Mɛlɛka cho chɔɔ nyɛ nda cho tosaa wo a nyɛ nda cho dimioo wo. Nduyɛ maa o ndu lo naa kpou yɔŋguŋ ni.

I cho tonya maa, Kilisiɔŋnda nɔ ma soliŋ nyɛ kɛ kɛ sim le lɛŋndeŋ mbo wa o chɛlaŋ a piɛiyii lachoowɛi yo kpeku le buŋgɛi chuaa le. Kɛ te o wa yɛ ma wa o chiɛi kialaa ŋyamaa niŋ ma dimul num le ma handu baa o Baabuiyo choo, okoŋ ma mɛnaŋ le tonyaa dimioo? O keŋ niŋ, a kɛɛsiaa le ndi tosaa kanifuule, Baabuiyo chɔm a buɛiyaa Chɛhowaa apum okɔɔ, a ndaa tosa nyɛ teleŋ nda wa mɛnaŋndo le buŋgɛi chuaa wo. (Chɛ. 24:2, 3-4, 9; 47:29-31) I cho suɛi sɔvɛ le kɛsiŋndo o kɔl maa, teleŋ ŋ cho wa mɛnaŋndo le nyɛ tosa wo, Mɛlɛka o hɔl ŋ sim ni le tonyaa dimioo. Lelaŋ, a nɔ ma bɛɛndiaŋ le tonyaa dimioo o nyuna kɛ kɛ ŋ wa pɛ mulioo niŋ.

Le mɛɛ naŋ che chaŋyɛi nɛi a Chɛhowa isɔvɛ yɛ, ŋ nɔ miŋ piɛi, nduyɛ miŋ yiyaŋ a buŋgɛi kɛ kɛ naŋ wa pɛ chuaa okɔɔ. Nduyɛ ŋ nɔ miŋ tosa a sabu maa buŋgɛi naŋ cho chua ve, tɛɛmbuu niŋ sawa Mɛlɛkaa le ɔɔ i paaliaŋ niŋ kɔl naa iyamaa le. Te a kɛɛsiaa pɛ le buŋgɛi chuaa, a nɔ ma kɛsiŋ o kɔl maa a nɔ le ndi peeloo.—1 Pitɛ 2:12.