1. Yɛɛ cho kpele hɛnɛkiɔɔ o Mɛlɛka piɛiyo niŋ, nduyɛ yɛɛ naŋ nɔ yɛ miŋ kɛɛsiaŋ o kɔl le tosaa?

 HAU, kpele hɛnɛkiɔɔ cho o lɛŋndeŋ choo, nduyɛ wanaa cho leniŋ nda cho kpɔndi kpɔndi a sɔɔŋ kɛndɔŋ tosaa. Waŋnda o miiliɔŋndaŋ niŋ cho o kpele hɛnɛkiɔɔ hoo niŋ ni, ma wa kɔl nyulu kpeekpeiyo tueiyɔɔ yeela. Wanaa cho niŋ o kpele hɛnɛkiɔɔ hoo niŋnda kɛɛsiaŋ o kɔl maa, fɛɛŋ bɛɛ a mel ndu le. Nduyɛ, a yeema mi wanaa bɔɔbɔɔ luɛi o kpele hɛnɛkiɔɔ hoo niŋ. Kpele hɛnɛkɛ kuɛɛ cho yɛ koŋ? Ndu cho kpele hɛnɛkiɔɔ o Mɛlɛka piɛiyo niŋ ni. a

2. Le yɛɛ i cho yɛ suɛi kɔl kɛndɛ le sinaa maa, Mɛlɛka kila kpele hɛnɛkiɔɔ o ndu piɛiyo niŋ?

² I cho suɛi kɔl kɛndɛ le sinaa maa, Chɛhowa kila kpele hɛnɛkiɔɔ o lɛŋndeŋ choo, le mi wanaa nduaa tuei kɔl nyulu kpeekpeiyo yeela, nduyɛ ma wa o diompilɔɔ niŋ, mi che bɛɛ a cho o chieeŋ wɔɔŋ Setanaa niŋ. Mi waŋnda o chieeŋ wɔɔŋndo hoo niŋ tulnaŋ yɛlɛŋ vellaa velle. (1 Chɔŋ 5:19; Sɔɔŋ. 12:12) Mi Mɛlɛka naa kaalaa che mɛɛ chieeŋ wɔɔŋndo hoo piiliaŋ naa yɛ. Lelaŋ, mbo tosa mi buɛiyaa nduaa wa o manda sɔviɔɔ bɛŋgu le halikpeŋ ma hiou lachi a ndu piɛiyo. Mi Diom ndɔɔ tɛɛsiaa a kpele hɛnɛkiɔɔ o ndu piɛiyo niŋ okɔɔ maa, “fondaŋ” nyɛ o nyɛ yɔŋnuŋ wana le wo o cho ni, nduyɛ maa o cho ko “mɛɛ kpele nda pɔɔla hoo le teleŋ o teleŋ ndo o wa nuaa yɛ.” (Aisaya 4:6; 58:11) A mala ndɔɔ, wanaa cho o kpele hɛnɛkiɔɔ hoo niŋnda tiuba ma wa a kɔl kɛndɛ, nduyɛ ma wa o manda ndɔɔ bɛŋgu o palɛi mɛɛlɛi hei niŋ.—Aisaya 54:14; 2 Timo. 3:1.

3. A teleŋ kuɛɛ Aisaya bolle 65 peeluŋ yɛ le teleŋ tasoo?

³ Mi Chɛhowa soliŋ Aisaya wana ndoo suaa le ndu wo kpeku, le tɛɛsiaa mɛɛ yoomoo wa niŋ le wanaa cho wa o kpele hɛnɛkiɔɔ  o ndu piɛiyo niŋnda yɛ. A tiuba ma sina mɛɛ Aisaya tɛɛsiaa a kpele hɛnɛkiɔɔ hoo okɔɔ yɛ o Aisaya bolle 65 niŋ. Mi nyɛ dimiŋ o bolle Baabuileŋ ndeŋ niŋndo peeluŋ le teleŋ tasoo a wɔsi 537 Tuupa mi Chiisu Vialuŋ. A teleŋ koŋ, mi Chuuwaa mal yɔŋnda ndala wɔɔŋndaŋ nda fula o chɛleŋ niŋ Babilɔŋ, okoŋ ma miiŋgu o lɛŋnde ndaleŋ niŋ. Mi Chɛhowa duau wanaa nduaa sala, nduyɛ mbo mala nda ma miŋgi Chulusalɛm bɛɛndiaa nyɛkɛndɛi. Mbo mala nda vɛlɛ ma miŋgi piɛile tonyaleŋ pila o Chulusalɛm niŋ.—Aisaya 51:11; Sɛka. 8:3.

4. Vɛɛ Aisaya bolle 65 cho yɛ peelɔŋndo o palɛi nɛi niŋ?

⁴ A wɔsi 1919 O Faŋaŋ Chiisu Wo Kɔɔli kandɔŋndo, mi huului Aisaya poonyiaa ve peeluŋ vɛlɛ peelɔŋ diiŋ ndɔɔ. A wɔsi koŋ wanaa Chɛhowaa o palɛi nɛi niŋ fula o chɛleŋ niŋ Babilɔŋ Bɛndoo o ba ni. Okoŋ, mi kpele hɛnɛkiɔɔ o Mɛlɛka piɛiyo niŋ kandu kilaŋndo a pɛŋgɛlaŋndo chieeŋndo balɔɔ silɔ. Nduyɛ, mi wanaa dimiaa yooŋgu kɛndiaa duau sɛmbɔɔ le kundala bɔɔbɔɔ kilaa, a suliŋnda leKilisiɔŋndaŋ chɔmndo. Mi puaa a waŋlaanduaa wa kaŋ paandu o kaala nɔɔlɛilaŋ niŋnda “wounuŋ wana chieeyɛi sɛnɛiye.” (Ɛfi. 4:24) I cho tonya maa, salala bɔɔbɔɔ Aisaya soo a laŋ okɔɔ laŋ, la cho peelɔŋ kpeekpei o chieeŋ sɛnɛiyo niŋ. Kɛ suŋ suŋ bɛɛ, ŋ cho tɔnɔlaŋ sɔlaa tau. Ŋ tofaŋndɔ mɛɛ naŋ cho tɔnɔlaŋ sɔlaa o kpele hɛnɛkiɔɔ o Mɛlɛka piɛiyo niŋ yɛ, a le sabu naŋ nɔ miŋ mal ndu kposoŋ te wo.

MƐƐ WANAA CHO O KPELE HƐNƐKIƆƆ O MƐLƐKA PIƐIYO NIŊNDA CHO SINAŊNDO YƐ

5. A mɛɛ Aisaya 65:13 dimi yɛ, salala kuɛɛ naŋ cho yɛ tueiyɔɔ yeela o kpele hɛnɛkiɔɔ o Mɛlɛka piɛiyo niŋ?

⁵ A cho kɛndiaa o Mɛlɛka piɛiyo niŋ, nduyɛ ma wa hɛnɛkɛ. Mi huului Aisaya dimi ve tɛɛsiaa teŋgeŋ cho wanaa cho o kpele hɛnɛkiɔɔ o Mɛlɛka piɛiyo niŋnda tɛɛŋ a wanaa cho leniŋ te wa. (Nuawɔ Aisaya 65:13.) Mi Chɛhowa ke wanaa nduaa nyɛm nda hauba o ndu piɛiyo niŋndoŋ tau. Le tamaseliiyo, o ke naa nyina ndɔ diandaa, Diom ndɔɔ, a nyɛm mala naa le pɛɛkoo a ndu okɔɔ woŋ le miŋ ‘de, miŋ kol, nduyɛ miŋ wa a kɔl kɛndɛ.’ (Tuuwɔ Sɔɔŋ Chɔɔmaŋndoŋ 22:17.) O baa pilɔɔ choo, mi wanaa cho o kpele hɛnɛkiɔɔ hoo niŋ te wa ‘wa a yiaaŋ vɛlɛ a bolola vesɛilaŋ, nduyɛ ma wa a siɔmbulaŋ.’ A tonya, waŋnda haa nɔ ichaŋya kposoŋ a Mɛlɛka le.—Emɔɔ. 8:11.

6. Vɛɛ Chowɛɛ 2:21-24 tɛɛsiaa yɛ nyɛm Chɛhowa ke naa woŋ, nduyɛ vɛɛ naŋ sɔla yɛ tɔnɔɔ o muŋ niŋ?

⁶ O huului Chowɛɛ poonyiaa ve niŋ, mbo soliŋ nyɔɔŋ muŋ, nyɛdiaa, muɛiyaŋ, a chuɛima ɔlifiiyaŋ kpeku le chɔmndo maa, mi Chɛhowa ke wanaa nduaa nyɛm nda hauba woŋ tau, mɛɛ nyɛm mala nda le pɛɛkoo a ndu okɔɔ woŋ cho nuaa yɛ. (Chowɛɛ 2:21-24) Mbo soliŋ Baabuiyo, yaula naalaŋ, tɛɛŋgii nɛi, bɔŋaŋndaŋ, bɔŋaŋnda ibuŋgalaŋ, a la bɛŋndaŋ kpeku le naa malaa o ndu piɛiyo niŋ. Lepaa o lepaa, miŋ sɔla tɔnɔɔ o nyɔɔŋ muŋ niŋ. Keŋ cho naa malaa tau o ndu piɛiyo niŋ, nduyɛ miŋ wa hɛnɛkɛ.

7. Yɛɛ tosa yɛ miŋ wa a “kɔl kɛndɛ”? (Aisaya 65:14)

⁷ A cho a kɔl kɛndɛ, nduyɛ ma nɔ kɔl hiniaa. Mi wanaa Mɛlɛkaa ‘deŋi choo choo a kɔl kɛndɛ’ kanifuule, a nɔ balika melaa le sɔɔŋ o cho nda tosallo woŋ. (Nuawɔ Aisaya 65:14.) Tonyala sɔvɛlaŋ a diomnda mɛyaala Mɛlɛkalaŋ o Baabuiyo niŋ, nduyɛ a tiindaŋ naa tɔlnuŋ o sala baŋaa Kiliti wo choo wo tosa miŋ wa a “kɔl kɛndɛ.” Te ŋ wa pɛ suukaŋndo a sɔɔŋ muŋ okɔɔ naa puaapiliaa a ndepiliaa latulu, keŋ tosa miŋ wa a kɔl kɛndɛ.—Sam 34:8; 133:1-3.

8. Yɛɛ cho yɛ nyɛ sɔvɛ sɔviɔɔ, le waa o kpele hɛnɛkiɔɔ o Mɛlɛka piɛiyo niŋ?

⁸ Kaalaa a diompilɛ cho wanaa Chɛhowaa tɛɛŋndo cho nyɛ sɔvɛ sɔviɔɔ ni, le waa o kpele hɛnɛkiɔɔ o Mɛlɛka piɛiyo niŋ. Kaala “mɔɔsa [naa] kpou diompilɛ” wo, cho naa chɔmndo mɛɛ yoomoo wa niŋ o chieeŋ sɛnɛiyo niŋ yɛ. Nduyɛ o chieeŋ sɛnɛiyo niŋ, buɛiyaa  Chɛhowaa cho kaalaa a diompilɔɔ tueiyɔɔ yeela, mbo hiou bɛɛ mɛɛ nda cho ndu tueiyɔɔ yeela suŋ suŋ yɛ. (Kolo. 3:14) Mi ndepilɛnɔ pilɛ tɛɛsiaa nyɛ o che wanaa Chɛhowaa tɛɛŋndo, mɛɛ o chiikaŋ a nda le teleŋ tasoo. Mbo dimi aa: “Kposoŋ bɛɛ yaa sina mɛɛ wana wa a kɔl kɛndɛ yɛ, vɛlɛ a mɛɛ wana chɔm kaala kpeekpeiyo yɛ le, hali o yuŋgu nuu niŋ bɛɛ. Teleŋ tase ya che waŋnda kaala kpeekpeiyo chɔmndo wo, wa teleŋ ya chiikaŋ a Seiyaa Chɛhowaa wo ni.” Wana o wana yeema pɛ mbo nɔ kɔl kɛndɛ kpeekpeiyo a kɔl hiniaa, o nɔ mbo luɛi o kpele hɛnɛkiɔɔ o Mɛlɛka piɛiyo niŋ. O yɔŋ bɛɛ mi chieeŋndo hoo nɔ yiyaŋ kɛ kɛ a wanaa Chɛhowaa okɔɔ, nyɛ naŋ sina wo cho ni maa, ŋ nɔ tɔɔ kɛndɔɔ, nduyɛ ŋ cho a Chɛhowa vɛlɛ a wanaa nduaa latulu.—Aisaya 65:15.

9. Diomnde mɛyaale kuɛɛ cho yɛ o Aisaya 65:16, 17 niŋ, te o hiŋ pɛ a sɔɔŋ kindilaŋ komal naa hau woŋ okɔɔ?

⁹ Ma kɛsi kɔllo, a ve pulaŋ pulaŋ te. Aisaya 65:14 chɔm maa, mi wanaa yeema kposoŋ ma luɛi o kpele hɛnɛkiɔɔ o Mɛlɛka piɛiyo niŋ te wa, “koŋul choo choo kpeleŋ, a kɔl tambɛi bɛndu komal” nda wo. Kɛ wanaa Mɛlɛkaa bɛɛ, mi sɔɔŋ kindilaŋ komal nda. Mɛɛ, yɛɛ Chɛhowa cho yɛ tosa a sɔɔŋ muŋ okɔɔ? O pɔmpɔmbɔ, Chɛhowa cho hunɔɔ tosa ma “puɛɛnuŋ a muŋ okɔɔ, wana o wana yiyaŋ ndɛ niŋ a muŋ okɔɔ le.” (Nuawɔ Aisaya 65:16, 17.) A tonya, Chɛhowa cho tosa mi sɔɔŋ muŋ kpou faŋaŋ naa choo, nduyɛ te teleŋ tiŋ hiou pɛ, ŋ yiyaŋ lɛ niŋ kposoŋ a muŋ okɔɔ le.

10. Le yɛɛ ŋ yiyaŋ yɛ maa sala bɛndoo pila i cho ni le waa latulu a puaapiliaa a ndepiliaa naa? (Tofa vɛlɛ fotueiyo.)

¹⁰ Suŋ suŋ bɛɛ, miŋ sinaŋ nyɛkɛndɛi te ŋ kuɛ pɛ o bɔŋaŋnda naalaŋ. Mi bɔŋaŋnda naalaŋ la mala naa miŋ kɛsi kɔllo, mi che bɛɛ sɔɔŋ kindilaŋ cho naa komallo o chieeŋ wɔɔŋndo hoo niŋ. Ŋ tiuba miŋ mala puaapiliaa a ndepiliaa naa le ma kɛsi kɔltaŋ, te ŋ nɔ pɛ suliŋnda nyina Mɛlɛkaa, mɛɛ kaalaa, nyaaloo, kɔl nyuloo, kɛndɛi a waa mɔɔsɔlɔɔ cho nuaa yɛ. (Kalee. 5:22, 23) Nuawɔ se sala bɛndu, le waa o kɔɔna Chɛhowaa niŋ! Wanaa cho loo o kpele hɛnɛkiɔɔ o Mɛlɛka piɛiyo niŋnda cho diomnde ndɔle mɛyaaleŋ le “choo choo sɛnɛiyo a chieeŋ sɛnɛiyo” chɔ o peelɔŋndo kpou.

11. A mɛɛ Aisaya 65:18, 19 dimi yɛ, vɛɛ kpele hɛnɛkɛ Chɛhowa pila kila wo piiliaŋ yɛ naa?

¹¹ A cho a kɔl kɛndɛ tau, nduyɛ a nɔ balika melaa. Mi Aisaya hiau lachi a chɔmndo sabula naŋ nɔ miŋ wa “a kɔl kɛndɛ, nduyɛ [miŋ] dɔɔnuŋ nyaale” le waa o kpele hɛnɛkiɔɔ o Mɛlɛka piɛiyo niŋndo. Chɛhowa pila kpeekpei kila kpele hɛnɛkiɔɔ hoo ni. (Nuawɔ Aisaya 65:18, 19.) Le sabu koŋ o cho naa soliŋndo kpeku ni, le waŋnda malaa ma fula o kɔɔnala cho o chieeŋndo hoo niŋndaŋ niŋ, okoŋ ma luɛi o kpele hɛnɛkiɔɔ o ndu piɛiyo niŋ. Ŋ nɔ balika melaa tau  le mɛɛ naŋ cho o tonyaa niŋ, miŋ wa salala bɔɔbɔɔ tueiyɔɔ yeela yɛ. Nduyɛ, ŋ nɔ yeemɛi le acheleŋnda dimullo a salalaŋ ndaŋ okɔɔ.—Chɛlui. 31:12.

12. Vɛɛ diomnda mɛyaala cho o Aisaya 65:20-24 niŋndaŋ, la tosa yɛ num ma sinaŋ, nduyɛ le yɛɛ?

¹² Ŋ nɔ vɛlɛ balika melaa le tiindaŋ sɔvɛ naŋ nɔ le waa o kpele hɛnɛkiɔɔ o Mɛlɛka piɛiyo niŋndo. Yiyaŋndɔ a nyɛ naŋ cha niŋ, vɛlɛ a nyɛ naŋ tosa niŋ o chieeŋ sɛnɛi Mɛlɛkaa niŋndo okɔɔ. Baabuiyo dimi aa: “Chɛlɛkpɛ o chɛlɛkpɛ viluŋ ndɛ niŋ . . . , mbo vi o lende le. Nduyɛ wana o wana o keleŋa niŋ wu le, mɛɛ mbo chiŋa wɔsila ndɔlaŋ sɔdɔ.” Ŋ cho ‘chiɛilaŋ taŋgul, miŋ waŋnuŋ leniŋ, nduyɛ ŋ cho kpelelaŋ tosa, miŋ de laŋ tɔnɔ’ kanifuule, Chɛhowa cho naa dɔwɔɔ sala. O mɛi lediom maa o cho tosa miŋ wa hɛnɛkɛ, miŋ nɔ kɔl hiniaa, nduyɛ miŋ nɔ saboo o yoomoo niŋ. O dimi vɛlɛ maa, ‘tuupa bɛɛ miŋ huŋ nyuna ndu le nyɛ o nyɛ,’ o cho sina nyɛ naŋ hauba wo, okoŋ mbo “tosa mi wana o wana hini kɔl.”—Aisaya 65:20-24; Sam 145:16.

13. Vɛɛ Aisaya 65:25 tɛɛsiaa yɛ siŋgaŋnda waŋnda apum tosa o yoomula ndalaŋ niŋndaŋ, mɛɛ nda kandu Chɛhowa piɛiyo?

¹³ A cho o kɔl nyuloo niŋ, nduyɛ a cho o manda sɔviɔɔ bɛŋgu. A mala nyina Mɛlɛkaa, wanaa bɔɔbɔɔ ndaa nɔ kaala ivisiyalaŋ o paandoo niŋnda tosa niŋ siŋgaŋndaŋ o yoomula ndalaŋ niŋ. (Nuawɔ Aisaya 65:25.) Mi waŋnda haa tosa wallo kalaŋ, le halikpeŋ ma mal kaala ndaa nɔ paandu laŋ. (Luomaŋ. 12:2; Ɛfi. 4:22-24) Kɛ, wanaa Mɛlɛkaa cho walaŋ te. Lelaŋ, a cho wa biondɔŋndaŋ tosaa. A koŋ kpou, Chɛhowa hiŋ a “wana o wana” o kpele hɛnɛkiɔɔ hoo niŋ ni, miŋ wa kɔl nyuloo a diompilɔɔ tueiyɔɔ yeela. (Tai. 2:11) A tonya, suɛi kɔndɔfille pila cho hei ni. Nduyɛ, Mɛlɛka kpou kpou wo kinɛi tiuba ni mbo tosa ndi.

14. Vɛɛ nyɛ Aisaya 65:25 dimi wo peeluŋ yɛ niŋ a puaapilɛnɔ pilɛ?

¹⁴ Baa waŋnda tiuba pa kpeekpei ma siŋga yoomula ndalaŋ? Yiyaŋndɔ a suɛi yɔŋnaŋnde hei okɔɔ. Teleŋnda bɔɔbɔɔ, mi ndaa bii po feleŋgɔnɔ wa wɔsilaŋ 20, ma dɔu ndu o chiɛi manyumndo niŋ, le mɛɛ o wa balaŋ o kaala nɔɔlɛilaŋ a o niilu latandaa niŋ yɛ. Ma duau ndu o chiɛi manyumndo niŋ le mɛɛ o chiimbuu mɔmbil pilaa yɛ, le mɛɛ o pɛl chiɛi pilaa mbo luɛi loŋ le viileŋ yɛ, vɛlɛ a le sɔɔŋ wɔɔŋ cheleŋ o tosa woŋ. Po feleŋgɔnɔɔ hoo wa o bɛɛndiaŋ teleŋ o teleŋ le wana o wana chɔulabaa. Kɛ, teleŋ tase o tuei a tonyala Baabuiyo okɔɔ, okoŋ mbo kandu kɔlaŋ o bɔŋaŋnda Seiyaa Chɛhowaa wo, mbo saaluŋ nyɛ tosa mbo nɔ saboo o yoomoo niŋ, nduyɛ mbo piɛi Chɛhowa o kpele hɛnɛkiɔɔ o ndu piɛiyo niŋndo. Mi po koŋ sɔla yiŋɔɔ, okoŋ mbo simnuŋ Sei Chɛhowaa. Teleŋnda bɔɔbɔɔ, mbo yiyaŋ a mɛɛ nyɛ Aisaya 65:25 dimi wo piiliaŋ ndu yɛ okɔɔ. A tonya, mi poo hoo mal kaala wɔɔŋnda ndoo nɔlaŋ. Nduyɛ suŋ suŋ niŋ, o cho wana kɔl nyulu.

15. Le yɛɛ naŋ nɔ yɛ miŋ mala acheleŋnda le ma huŋ wa a naa latulu o kpele hɛnɛkiɔɔ o Mɛlɛka piɛiyo niŋ, nduyɛ vɛɛ naŋ tosa yɛ keŋ?

¹⁵ Mi Aisaya 65:13 kanduŋ a diomndaŋ ndaŋ aa: “Nyɛ Mɛlɛka Yaawɛɛ Kpuluŋguma bɛndoo o dimi wo cho hoo ni.” Nduyɛ o Baabuiyo hoo niŋ, Hivioo le Chieeŋ Sɛnɛiyo, Aisaya 65:25 mɛɛlu a diomndaŋ ndaŋ aa: “ya Chɛhowa dimi lende ni.” Teleŋ o teleŋ, mi diomnda mɛyaala Chɛhowalaŋ la peeluŋ. (Aisaya 55:10, 11) Suŋ suŋ, kpele hɛnɛkiɔɔ o Chɛhowa piɛiyo niŋ cho niŋ o kilaa. O nɔ wanaa cho ndu piɛiyo o lɛŋndeŋ choo ma wa teŋgeŋ a wanaa cheleŋnda wa. Te ŋ wa pɛ wanaa nduaa tɛɛŋ, ŋ tiuba miŋ wa o kɔl nyulu niŋ, nduyɛ miŋ wa o manda sɔviɔɔ bɛŋgu, mi che bɛɛ ŋ cho o chieeŋ wɔɔŋndo hoo niŋ. (Sam 72:7) Lelaŋ, ŋ nɔ miŋ mala wana o wana naŋ tiuba, le ma huŋ wa a naa latulu o kpele hɛnɛkiɔɔ hoo niŋ. Ŋ tosa hei, te ŋ kindiŋ pɛ le tosaa nyɛ naŋ tiuba wo le waŋnda malaa ma simnuŋ buɛiya le Chiisu.—Maa. 28:19, 20.

 VƐƐ NAŊ MALA YƐ ACHELEŊNDA LE MA HUŊ WA A NAA LATULU O KPELE HƐNƐKIƆƆ O MƐLƐKA PIƐIYO NIŊ?

16. Yɛɛ naŋ nɔ yɛ miŋ tosa le mi waŋnda nɔ yeemɛi le luɛiyɔɔ o kpele hɛnɛkiɔɔ o Mɛlɛka piɛiyo niŋ?

¹⁶ Naa kpou nɔ kalaŋ sɔvɛ sɔviɔɔ le tosaa mi waŋnda nɔ yeemɛi le luɛiyɔɔ o kpele hɛnɛkiɔɔ o Mɛlɛka piɛiyo niŋ. Le miŋ chua kalaŋ naa hoo, ŋ nɔ miŋ tol tamasi Chɛhowaa kɔɔli. O beŋ waŋnda le ma luɛi o kɔɔna ndɔɔ niŋ te. Kɛ, o nɛi kaalaa niŋ o ‘huŋ’ a nda leniŋ ni. (Chɔŋ 6:44; Chɛlui. 31:3) Mi i wa tɛtɛlɛ le mi wanaa nɔ yeemɛi le pɛɛkoo a kaala Chɛhowaa okɔɔ, vɛlɛ a suliŋnda ndɔla kɛndɛlaŋ nda naŋnuŋ ndu ikɛi. Vɛɛ suliŋnda naala kɛndɛlaŋ a kaala naala kɛndɛlaŋ la mala yɛ waŋnda ma nɔ yeemɛi le luɛiyɔɔ o kpele hɛnɛkiɔɔ o Mɛlɛka piɛiyo niŋ?

17. Vɛɛ naŋ mala yɛ acheleŋnda le ma nɔ yeemɛi le luɛiyɔɔ o kpele hɛnɛkiɔɔ o Mɛlɛka piɛiyo niŋ?

¹⁷ Nɛiyo opilɛ o naŋ mala acheleŋnda le ma nɔ yeemɛi le luɛiyɔɔ o kpele hɛnɛkiɔɔ o Mɛlɛka piɛiyo niŋndo cho chaaŋaa naa laalaŋnda kaalaa chɔmndo, a nda kɛndɛi tosallo ni. Te wanaa sɛnɛiya hiŋ pɛ o bɔŋaŋnda naalaŋ, ŋ yeema nda ma dimi diomnda wanaa ndaa nɔ laalaŋ o Kɔliŋ niŋ te wa dimilaŋ. Mɛɛ wanaa kaŋ kuɛ naapum o bɔŋaŋnda wanaa Mɛlɛkaa, ma dimi aa: “Lekɛndɛi, Mɛlɛka cho nya tɛɛŋ.” (1 Kɔliŋ. 14:24, 25; Sɛka. 8:23) Lelaŋ, ŋ nɔ miŋ hiou lachi a silaa hoo dɔwɔɔ o wali niŋ. Ndu cho ni aa: “Kɔl nyuloo wa nya tɛɛŋ vellaa velle.”—1 Tɛsa. 5:13.

18. Yɛɛ tosa yɛ mi waŋnda nɔ yeemɛi le luɛiyɔɔ o kpele hɛnɛkiɔɔ o Mɛlɛka piɛiyo niŋ?

¹⁸ Ŋ nɔ miŋ kindiŋ teleŋ o teleŋ le puaapiliaa a ndepiliaa naa chɔɔ, mɛɛ Chɛhowa che nda yɛ. Ŋ tosa hei te ŋ kɛsi pɛ kɔllo o suliŋnda ndala kɛndɛlaŋ choo, nduyɛ miŋ faŋa kɔllo o biondɔŋnda ndalaŋ choo. Kanifuule, biondɔŋnda ndalaŋ la ve niŋ lefafɛɛŋ te. Te kɛɛ sinapɛŋgoo luɛi naa pɛ tɛɛŋ, ŋ nɔ miŋ toosiaŋ tɛɛŋ o nɛi kaalaa niŋ, miŋ hiou lachi a ‘kɛndɛi tosalaŋndo vellaa  velle, miŋ nɔ nyiɛɛye, nduyɛ miŋ malnaŋ lahaki fasɛi.’ (Ɛfi. 4:32) Okoŋ, wanaa nɔ yeemɛi le mi waŋnda bii nda o nɛi waa lende choo wa, cho nɔ yeemɛi le luɛiyɔɔ o kpele hɛnɛkiɔɔ o Mɛlɛka piɛiyo niŋ. b

FƐƐŊ BƐƐ MAL KPELE HƐNƐKIƆƆ O MƐLƐKA PIƐIYO NIŊ TE

19. (a) A mɛɛ kɔfoo hoo, “ Ma Mal, Kɛ Ma Miiŋgu” chɔm yɛ, yɛɛ waŋnda apum dimi yɛ mɛɛ nda miiŋgu o kpele hɛnɛkiɔɔ o Mɛlɛka piɛiyo niŋ? (b) Yɛɛ naŋ nɔ yɛ miŋ kɛɛsiaŋ o kɔl le tosaa? (Tofa vɛlɛ fotueiyo.)

¹⁹ Ŋ cho bɔɔ a kɔl kɛndɛ le waa o kpele hɛnɛkiɔɔ o Mɛlɛka piɛiyo niŋ. Suŋ suŋ, kpele hɛnɛkiɔɔ hoo cho o kɛndɛ kɛndɛ mbo hiau maa paandu, nduyɛ wanaa nɔ yeemɛi le Chɛhowa piɛiyo wa cho leniŋ tau, mbo hiau maa paandu. Lelaŋ, ŋ nɔ miŋ hiou lachi a balika melaa chɔmndo le kpele hɛnɛkɛ Chɛhowa kila hoo le naa wo. Wana o wana yeema pɛ mbo wa hɛnɛkɛ, mbo kɛsi kɔllo, nduyɛ mbo wa o manda sɔviɔɔ bɛŋgu, o nɔ mbo luɛi o kpele hɛnɛkiɔɔ o Mɛlɛka piɛiyo niŋ, nduyɛ pesiŋ bɛɛ o nɔ mbo mal ndu le. Kɛ ŋ nɔ miŋ kɛsiŋ o kɔl maa, Setana cho kindiŋndo o nɛi o nɛi niŋ le tosaa miŋ fula o kpele hɛnɛkiɔɔ hoo niŋ. (1 Pitɛ 5:8; Sɔɔŋ. 12:9) Kposoŋ bɛɛ ŋ nɔ miŋ chɛl ndu le mbo sɔla batiuwaa le. Maa ŋ kɛɛsiaŋ o kɔl, le tosaa mi kpele hɛnɛkiɔɔ hoo hiou lachi a naŋɔɔ, mbo wa o diandaa, vɛlɛ mi kɔl nyuloo wa leniŋ.