1. Vɛɛ puaapiliaa a ndepiliaa apum yiyaŋ yɛ le acheleŋnda yooŋgu kɛndɔɔ dimullo? (Tofa vɛlɛ fotueiyo.)

 NAA wanaa Chɛhowaa, miŋ dimul acheleŋnda yooŋgu kɛndɔɔ kanifuule, ŋ kaala Finya naa o choo choo niŋ, nduyɛ ŋ yeema miŋ mala wanaa naŋ chiɛɛliaŋnda le ma sina ndu. Mi wanaa dimiaa yooŋgu kɛndiaa bɔɔbɔɔ tuei yooŋgu kɛndɔɔ dimioo yeela tau. Kɛ apum tui ndu yeela le. Le yɛɛ? Kanifuule, apum nɔ siɔmbulaŋ, nduyɛ ma yiyaŋ maa a chiee waŋnda pɛɛku le. Apum yɛ, te waŋndo veelu nda o ndulo bɛɛ le, a ve fɛɛsɛŋ le kɔlaŋ loŋ te. Mi apum nɔ siooŋnde maa waŋnda cho tumbe dɔɔnɔŋ a nda. Apum yɛ, a sɔla pɛɛkoo maa, a nɔ ma fafaŋ acheleŋnda kɔllo tɛɛmbuuwo. Mi che bɛɛ puaapiliaa a ndepiliaa haa kaala Chɛhowa tau, kɛ ma che ndi ikala le wanaa nda sina le wa yooŋgu kɛndɔɔ dimullo. A koŋ kpou, a sina maa wallo hoo cho o sɔvɛ. Lelaŋ, ma tosa ndu teleŋ o teleŋ. Nuawɔ se mɛɛ Chɛhowa wa a kɔl kɛndɛ yɛ, te o che nda pɛ ndu tosaa!

2. Te o yɔŋ pɛ ma che ndi ikala le nyaaloo sɔlaa o wali pollo niŋ, le yɛɛ a nɔ ma tambu kɔl te?

² Baa mi yiyaŋnda waa nuaa la tosa ndi pa ikala le ma sɔla nyaaloo o wali pollo niŋ? Te lende i cho ni, mɛɛ tambu kɔl te. Hei chɔm maa a cho wana tusiaŋ, nduyɛ a yeema mi waŋnda muli num hɔlla kɔɔli le. I chɔm vɛlɛ maa, a yeema ma hiŋaŋ ladiom a wana le. O faŋaŋ okoŋ kɔɔli, wana o wana yeema mi waŋnda kɛɛ ndu nilaŋ yaŋɔɔ le, taama taama te o wa pɛ kindiŋndo le acheleŋnda nyɛ cho o kɛndɔɔ wo tosallo. Finya num cho o choo choo niŋndo sina simulta cho num komallo laŋ, nduyɛ o nɔ yeemɛi le num mala ŋ yeema wo kioo. (Aisaya 41:13) O buŋgɛi hei niŋ, ŋ cho chɔ sɔɔŋ ŋuɛɛnu, ŋ mala num ma soliŋ yiyaŋnda waa nuaa o kɔllo, nduyɛ a mɛɛ ŋ chɔɔlu nyaaloo sɔla o wali pollo niŋ yɛ.

 CHƐL MI DIOM MƐLƐKAA LUEI NUM YOOMUAŊ

3. Yɛɛ mala yɛ Chɛluimaya le waŋnda yooŋgu Mɛlɛkaa dimullo?

³ Chɔŋ o paandoo niŋ huŋ bii a hau, mi Diom Mɛlɛkaa luei buɛiyaa nduaa yoomuaŋ, te a sɔla pɛ wali kala kalaa le tosaa. Le tamaseliiyo, yiyaŋndɔ a Chɛluimaya wana ndoo suaa le Mɛlɛka wo okɔɔ. Mbo buulaŋ tau mɛɛ Mɛlɛka ke ndu wallo le waŋnda yooŋgu ndɔɔ dimullo. Mbo dimi aa: “I cho wana chaa isɔɔ faŋga tɛɛŋ le kpeku waa lende le. Nduyɛ o fula o koŋ kɔɔli, I cho wɔ bɔɔ chuaambɔ.” (Chɛlui. 1:6) Yɛɛ mala yɛ Chɛluimaya le mbo nɔ kɔl simulaa le yooŋgu Mɛlɛkaa dimioo? Diom Mɛlɛkaa luei ndu yoomuaŋ ni. Mbo dimi aa: “Mɛɛ yiŋndeŋ le wa nuaa waŋndo lumi lumioo yɛ, lende diomnda numndaŋ la wa ya wallo niŋ ni. I kindi bɛɛ le laŋ kɛsiŋndo o kɔl, I nɔla le, mɛɛ mi dimi laŋ.” (Chɛlui. 20:8, 9) Mi che bɛɛ wanaa wa o tanda ndɔɔ niŋnda ve nila yaŋɔɔ le, kɛ mi yooŋgu o wa nda dimullo wo luei ndu yoomuaŋ le wali koŋ tosaa.

4. Tɔnɔ yɛɛ naŋ sɔla yɛ te ŋ wa pɛ diomndaŋ veeloo o Baabuiyo niŋ, nduyɛ miŋ yiyaŋ lechoo? (Koloosiaŋnda 1:9, 10)

⁴ Mi Diom Mɛlɛkaa luei vɛlɛ Kilisiɔŋnda yoomuaŋ. Mɛɛ kiilanɔɔ Pɔɔl wa kundaa Koloose yauwo poonyiallo, mbo dimi maa te puaapiliaa kaŋ ndaa kindiŋ pɛ le “kɔl kialu kpeekpeiyo sɔlaa a Mɛlɛka okɔɔ,” keŋ wa nda mala “mi kelala [ndalaŋ] la wa maa wanaa Chɛhowa wa, nduyɛ [ma] tosa sɔɔŋ nɛŋi ndu kɔllo woŋ.” (Nuawɔ Koloosiaŋnda 1:9, 10.) Yooŋgu kɛndɔɔ cho o sɔɔŋ nɛŋi Chɛhowa kɔllo woŋ tɛɛŋ. Lelaŋ, te ŋ veelu pɛ diomndaŋ o Diom Mɛlɛkaa niŋ, nduyɛ miŋ yiyaŋ lechoo, mi laalaŋ naa o Chɛhowa niŋ chɔɔlu kalu poŋ, nduyɛ miŋ che mɛɛ i cho suɛi sɔvɛ le waŋnda dimullo a Masale ndɔleŋ okɔɔ yɛ.

5. Vɛɛ naŋ sɔla yɛ tɔnɔɔ tau, te ŋ wa pɛ diomndaŋ veeloo o Baabuiyo niŋ a pɛɛkoo?

⁵ Le miŋ sɔla tɔnɔɔ tau o Diom Mɛlɛkaa niŋ, ŋ nɔ miŋ lau le diomndaŋ veeloo leniŋ, le ndu pɛɛkoo, a le yiyaŋndo lechoo le. Kindiŋ ma chua teleŋndo tau le hei tosaa. Te a komal pɛ bolle Baabuile ŋ bii bila le leŋ, huulu leŋ te. Soliŋ Yau Yaasiaa ŋSɔɔ le Seiyaa Chɛhowaa ɔɔ yaula naala cheleŋ kpeku, le ma che mɛɛ nda tɛɛsiaa bolle Baabuile leŋ yɛ. Te a chua pɛ teleŋndo le Diom Mɛlɛkaa yaasiaa nyɛkɛndɛi, keŋ cho num mala ma kindi tiindaŋ numndo o tonyala cho leniŋndaŋ niŋ. (1 Tɛsa. 5:21) Mɛɛ ŋ hiau lachi a tiindaŋndo dɔwɔɔ o laŋ niŋ fau, lende koni ŋ sɔla nyaaloo le acheleŋnda dimullo a nyɛ ŋ pɛɛku wo okɔɔ ni.

 BƐƐNDIAŊ NYƐKƐNDƐI LE WALI POLLO

6. Le yɛɛ naŋ nɔ yɛ miŋ bɛɛndiaŋ nyɛkɛndɛi le wali pollo?

⁶ Te a bɛɛndiaŋ pɛ nyɛkɛndɛi le wali pollo, naapum keŋ cho num mala ma wa fɛɛsɛŋ te a wa pɛ suɛi o acheleŋnda lo. Mi Chiisu mala buɛiyaa nduaa le ma bɛɛndiaŋ nyɛkɛndɛi te a wa pɛ kɔlaŋ o wali pollo niŋ. (Luku 10:1-11) Nduyɛ mɛɛ nda dɔu nyɛ Chiisu pɛɛku nda wo o wali niŋ, mi keŋ mala nda le ma wa a nyaale o yooŋgu kɛndɔɔ dimioo niŋ.—Luku 10:17.

7. Vɛɛ naŋ bɛɛndiaŋ yɛ nyɛkɛndɛi le wali pollo? (Tofa vɛlɛ fotueiyo.)

⁷ Vɛɛ naŋ bɛɛndiaŋ yɛ nyɛkɛndɛi le wali pollo? Ŋ nɔ miŋ yiyaŋ yiŋgoloŋ a nyɛ naŋ cho waŋnda dimullo okɔɔ, vɛlɛ miŋ dimul nda ndu o nɛi tɛtɛlɔɔ niŋ. Ŋ nɔ vɛlɛ miŋ yiyaŋ a nyɛ waŋnda apum dimi niŋndo okɔɔ, nduyɛ a mɛɛ naŋ cho nda mulullɛ. Te ŋ komal pɛ waŋnda, ŋ nɔ miŋ kindiŋ le waa fɛɛsɛŋ, miŋ mam muɛɛŋ, vɛlɛ miŋ wa wanaa ichaŋya.

8. O nɛi kuɛɛ choo Kilisiɔŋnda cho yɛ maa kpɛɛnɛŋ puuloŋ, ŋ kiilanɔɔ Pɔɔl soo a muŋ okɔɔ o tamasi ndɔɔ niŋndoŋ?

⁸ Mi kiilanɔɔ Pɔɔl chɔm tamaseliiyo le naa malaa miŋ che kalaŋ naŋ nɔ o yooŋgu kɛndɔɔ dimioo niŋndo. Mbo dimi aa: “Naŋ nɔ sullo hoo o ba wa, ŋ cho machuaa kpɛɛnɛŋ puuloŋ.” (2 Kɔliŋ. 4:7) A sul kuɛɛ okɔɔ Pɔɔl wa yɛ suɛi? Ndu cho yooŋgu kɛndɛ naŋ cho hoo dimioo le yoomula waŋnda piŋioo wo ni. (2 Kɔliŋ. 4:1) Kɛ, nɛɛ yaa cho yɛ kpɛɛnɛŋ puuloŋ? Nda cho buɛiyaa Mɛlɛkaa, a cho acheleŋnda yooŋgu Mɛlɛkaa dimullo wa ni. O teleŋ Pɔɔllo niŋ, mi wanaa leyulaa ndaa soliŋ kpɛɛnɛŋ puuloŋ kpeku, le kɔlaŋ a nyɛm ndaŋ leyulaŋ o fondaŋnda cheleŋ, mɛɛ nyɛdiaa, muɛiyaŋ, a kaniei cho nuaa yɛ. O nɛi pilɛ koŋ choo, Chɛhowa ke naa dikeŋnaŋ sɔvɛ sɔviɔɔ le acheleŋnda yooŋgu kɛndɔɔ dimullo. A mala ndɔɔ, ŋ tiuba miŋ nɔ yoomuaŋ le yooŋgoo hoo dimioo nyɛkɛndɛi.

PIƐI LE MI MƐLƐKA KE NUM KƆL SIMULAA

9. Vɛɛ naŋ soliŋ yɛ siooŋii wanachioo o kɔl, ɔɔ yiyaŋndo maa waŋnda cho naa nilaŋ yaŋɔɔ le? (Tofa vɛlɛ fotueiyo.)

⁹ Teleŋndaŋ lapum, miŋ nɔ siooŋii waŋnda chieeya, ɔɔ miŋ yiyaŋ maa a yeŋ niŋ naa lani le. Vɛɛ naŋ tiu yɛ simullo hoo ba? Yiyaŋndɔ a piɛile kiilaa piɛi o Mɛlɛka lo leŋ okɔɔ, mɛɛ nda dimul nda maa, a dimi lɛ yooŋgu kɛndɔɔ le. A chɛl mi siooŋnde bii nda, okoŋ ma chalnuŋ te. Kɛ ma nyuna Chɛhowa le mbo mala  nda “ma hiou lachi a diom [ndɔɔ] dimioo a kɔl simulaa.” Nduyɛ o lepilɛ niŋ kpe, mbo muli piɛile ndaleŋ. (Walta. 4:18, 29, 31) Te o yɔŋ pɛ maa, naa bɛɛ lepum miŋ nɔ siooŋii wanachioo, ŋ nɔ miŋ piɛi o Chɛhowa lo le mbo mala naa. Nyuna ndu le mbo mala num ma soliŋ siooŋii wanachioo o kɔl, le halikpeŋ ma dimul waŋnda yooŋgu kɛndɔɔ.

10. Vɛɛ Chɛhowa mala yɛ naa le miŋ timbi seileŋ a ndu okɔɔ? (Aisaya 43:10-12)

¹⁰ Chɛhowa yulu naa iso le miŋ wa Seiyaa nduaa, nduyɛ o mɛi lediom maa o cho naa mala miŋ nɔ kɔl simulaa. (Nuawɔ Aisaya 43:10-12.) Ŋ tofaŋndɔ nɛilaŋ lahiɔɔlu, la o tosa keŋ ndo. O tasoo, te ŋ wa pɛ yooŋgu kɛndɔɔ dimioo, mi Chiisu wa a naa latulu. (Maa. 28:18-20) O diiŋ ndɔɔ, mi Chɛhowa vem maalikɛiya apum le naa malaa. (Sɔɔŋ. 14:6) O yaa ndɔɔ, mbo ke naa nyina ndɔ diandaa le naa malaa miŋ loonuŋ sɔɔŋ naŋ pɛɛku woŋ. (Chɔŋ 14:25, 26) O hiɔɔloo, o ke naa puaapiliaa a ndepiliaa naa le ma wa a naa latulu o wali pollo niŋ. A tonya, sanaa a mala ndɔɔ vɛlɛ a puaapiliaa naa, ŋ nɔ nyɛ o nyɛ naŋ yeema le batiuwaa sɔlaa o wali pollo niŋ.

TOSA YƐLƐMIAALAŊ, VƐLƐ MA NƆ YIYAŊ KƐNDƆƆ O WALI POLLO NIŊ

11. Te a wa pɛ o wali pollo niŋ, yɛɛ mala yɛ num ma komal waŋnda tau? (Tofa vɛlɛ fotueiyo.)

¹¹ Baa ma tambu pa kɔllo te a komal wanaa bɔɔ o wali pollo niŋ te? Te lende i cho ni, mɛɛ nyunaŋndɔ aa: ‘Kuɛɛ wanaa cho o tanda nuu niŋnda cho yɛ suŋ suŋ?’ (Walta. 16:13) ‘Baa o wallo niŋ nda cho ni ɔɔ o lɔɔ niŋ nda kuɛ ni?’ Te o yɔŋ pɛ maa a komal nda o ndalo bɛɛ le, mɛɛ kindiŋ ma dimi yooŋgu kɛndɔɔ naa waŋnda hiau tau wa. Mi puaapilɛnɔ pilɛ diolaŋ Chɔɔsuaa dimi aa, “Mi sɔla fondaa le waŋnda yooŋgu kɛndɔɔ dimullo, te I kuɛ pɛ o fondaŋnda pisiaa laŋ, vɛlɛ a foŋndaŋ nda kɛsi nyɛm nyaanaŋndoŋ ndaŋ.” Mi ndu nda laa ndɔ Bilichɛti, ndaa komal waŋnda tau o ndalo bɛɛ te ndaa kuɛ pɛ o ndalo a paale yɔŋgaŋndeŋ, a o Kuɛɛndulaŋ choo ipalaa.—Ɛfi. 5:15, 16.

12. Vɛɛ naŋ looku yɛ sina nyɛ waŋnda laalaŋndo, ɔɔ nyɛ nda nɔ yeemɛi leniŋndo?

¹² Te waŋnda o tanda numndo niŋ chɔm iyeema o yooŋgu kɛndɔɔ niŋ te, kindi ma sina nyɛ nda laalaŋndo, ɔɔ nyɛ nda nɔ yeemɛi leniŋndo. Mi Chɔɔsuaa nda Bilichɛti soliŋ  nyuna cho o yau pɔmbɔɔ kɔɔ wo kpeku, le suɛi kandɔɔ a waŋnda. Le tamaseliiyo, te a wa pɛ yau pɔmbɔ nɔ suɛi lebolle aa, Yɛɛ ŋ yiyaŋ yɛ a Baabuiyo? soliŋndo kpeku, ma dimi aa: “Waŋnda apum yiyaŋ maa yau fula Mɛlɛka o ba wo Baabuiyo cho ni, kɛ apum yiyaŋ lende le. Num yɛ, vɛɛ ŋ yiyaŋ yɛ?” Teleŋndaŋ lapum, mi hei tosa ma suukaŋ a waŋnda tau.

13. Le yɛɛ naŋ dimi yɛ maa miŋ sɔla batiuwaa o wali pollo niŋ, o yɔŋ bɛɛ mi waŋnda yeŋ naa lani le? (Pulɔwaa 27:11)

¹³ O yɔŋ bɛɛ mi waŋnda yeŋ naa lani le, keŋ chɔm nuaa maa ŋ sɔla batiuwaa le le. Le yɛɛ naŋ dimi yɛ lende? Kanifuule, ŋ tosa nyɛ Chɛhowa nda Po ndɔɔ dimul naa le tosaa wo. (Walta. 10:42) Lelaŋ, o yɔŋ bɛɛ miŋ seeluŋ waŋndo le suɛi o ndulo le, ɔɔ mi waŋnda kɛɛ yooŋgu naŋ cho nda dimullo wo, ŋ tiuba miŋ wa a nyaale kanifuule, ŋ sina maa ŋ cho tosaa nyɛ nɛŋi Finya naa o choo choo niŋ kɔllo wo.—Nuawɔ Pulɔwaa 27:11.

14. Le yɛɛ naŋ nɔ yɛ miŋ dɔɔnuŋ nyaale, te wana dimiaa yooŋgu kɛndɛ cheleŋ saaluŋ pɛ wana nɔ yeemɛiyo?

¹⁴ Ŋ nɔ vɛlɛ miŋ dɔɔnuŋ nyaale, te wana dimiaa yooŋgu kɛndɛ cheleŋ saaluŋ pɛ wana nɔ yeemɛiyo. O teleŋnda hiou laŋ niŋ, mi Bandu Mɛŋgɛlaa tuu wali naŋ cho tosaa wo, a mɛɛ waŋnda wa nuaa poombɔ luusiaŋndo nuuviaa yɛ. Mi wanaa bɔɔbɔɔ tosa wallo kalaŋ le ndu nuuviaa, nduyɛ ma kuɛ o fondaŋnda yɛ yɛlaŋ. Te a saaluŋ ndu pɛ, mi wana o wana dɔɔnuŋ nyaale, o cho ko wana saaluŋ ndu wo le. O nɛi pilɛ koŋ choo, wana o wana o kundaa niŋ tosa wallo diompilɛ ni, le wana sɛnɛiyo malaa mbo simnuŋ buɛi Chiisu wo. Mi wana o wana cho o kundaa niŋ dimi yooŋgu kɛndɔɔ o tanda koŋ niŋ, nduyɛ ma dɔɔnuŋ nyaale, te waŋndo saaluŋ pɛ wana nɔ yeemɛiyo, mi wana koŋ kandu kɔlaŋ o bɔŋaŋndaŋ.

HANDU KƆLLO O KAALA Ŋ NƆ LE CHƐHOWA WO CHOO, A WANAA NYA CHIƐƐLIAŊNDA

15. Vɛɛ Maatiu 22:37-39 dɔwɔɔ o wali niŋ mala yɛ naa, miŋ chɔɔlu nyaaloo sɔla le yooŋgu kɛndɔɔ dimioo? (Tofa vɛlɛ fotueiyo .)

¹⁵ Ŋ tiuba miŋ chɔɔlu nyaaloo sɔla le yooŋgu kɛndɔɔ dimioo, te ŋ handu pɛ kɔllo o kaala naŋ nɔ le Chɛhowa wo choo, a wanaa naŋ chiɛɛliaŋnda. (Nuawɔ Maatiu 22:37-39.) Yiyaŋndɔ mɛɛ Chɛhowa wa a kɔl kɛndɛ yɛ, te o che naa pɛ wallo hoo tosaa. Nduyɛ yiyaŋndɔ vɛlɛ a mɛɛ waŋnda wa a kɔl kɛndɛ yɛ, te a kandu pɛ Baabuiyo pɛɛkoo. Loonuŋ maa, wanaa yaŋ nilaŋ o yooŋgu kɛndɔɔ vɛlɛ ma kɛɛsiaa le Chɛhowa piɛiyo wa, cho hunɔɔ yoomu fafɛɛŋndo sɔla.—Chɔŋ 6:40; 1 Timo. 4:16.

16. Te o yɔŋ pɛ maa ŋ tiuba miŋ fula yooŋgu kɛndɔɔ dimioo le, vɛɛ naŋ wa yɛ a nyaale o wali pollo niŋ? Chɔmndɔ tamaseliilaŋ.

 ¹⁶ Baa nyɛ cho pa tosaa ma wa o numndo bɛɛ a nɔla yooŋgu kɛndɔɔ dimioo le? Te lende i cho ni, mɛɛ handu kɔllo o nyɛ ŋ tiuba le tosaa le Chɛhowa a wanaa nya chiɛɛliaŋnda kaalaa chɔmndo wo choo. A teleŋ Naa Kolonaa, puaapilɛnɔ pilɛ diolaŋ Saamiɛɛ nda laa ndɔ Daniaa, ndaa fula yooŋgu kɛndɔɔ dimioo le. Haaa mi naa koŋ chuu, mi ndaa dimi yooŋgu kɛndɔɔ teleŋ o teleŋ o foŋndo choo, yaulaŋ poonyiaa, a pɛɛkula Baabuilaŋ tosaa o Zoom choo. Teleŋ Saamiɛɛ wa o dandaa niŋ le naa kaŋsɛiyo wo, mi ndoo dimul wanaa ndoo chiikaŋ a nda o fondaŋ chiɔuwaa wa yooŋgu kɛndɔɔ. Mbo dimi aa: “Te sɔɔŋ kindilaŋ komal naa pɛ, lepum miŋ buulaŋ tau, miŋ saŋga tau, nduyɛ mi laalaŋ naa luɛi o tofaa bɛŋgu. A koŋ kpou, ŋ nɔ miŋ wa a nyaale o Chɛhowa piɛiyo niŋ.” O Naa Kolona koŋ bɛŋgu, mi Daniaa del a naa, nduyɛ le paŋgoŋ ŋgaa ndoo nɔla mbo chɛŋ o kpele le. Okoŋ kɔɔli, mbo chal o kandu namtaa niŋ le paŋgoŋ ŋɔmpum. Mbo dimi aa: “Mi kindiŋ le tosaa o yaa tiuba le tosaa wo. Mi yaa dimul wana chiɔuwaa ndoo huŋ le ya dandaa dɔwɔɔ wo yooŋgu kɛndɔɔ, vɛlɛ a wanaa ndaa chuu ya nyɔɔŋ nda. Mi yaa dɔu vɛlɛ baltaŋ o foŋndo choo a chua ndoo tosa wallo o fondaŋ pisiaa makoŋgoo wo.” Mi bahawɛila Saamiɛɛ nda Daniaa ndaa nɔ laŋ la tosa ndaa tiu lɛ ba le tosaa tau o wali pollo niŋ te, kɛ ma tosa o nda tiuba wo, nduyɛ a wa a nyaale o ndu tosaa niŋ.

17. Yɛɛ ŋ nɔ yɛ ma tosa le ma sɔla tɔnɔɔ tau o sɔɔŋ naŋ soo a muŋ okɔɔ o buŋgɛi hei niŋndoŋ niŋ?

¹⁷ Kindiŋ ma dɔu sɔɔŋ ŋuɛɛnuŋ naŋ che o buŋgɛi hei niŋndoŋ o wali niŋ. Sɔɔŋ muŋ cho ko mɛɛ toosiaala yɛ yɛlaŋ la wa nuaa o lamndo niŋ yɛ. Te waŋndo dɔu pɛ toosiaala yɛ yɛlaŋ o lamndo niŋ, mi lam koŋ yeela tau. O nɛi pilɛi koŋ choo, te a dɔu pɛ sɔɔŋ yɛ yɛŋ naŋ pɛɛku muŋ ndoŋ o wali niŋ, keŋ cho num mala ma wa o bɛɛndiaŋ le yiyaŋnda wɔɔŋndaŋ fafaŋndo, nduyɛ ma chɔɔlu nyaaloo sɔla o wali pollo niŋ.