1, 2. (a) Wali suu kuɛɛ ndoo hiou yɛ wa wali sɔvɛ o yoomu Chiisoo niŋ, nduyɛ le yɛɛ? (b) Yɛɛ naŋ nɔ yɛ miŋ tosa le batiuwaa sɔlaa maa ‘wanaa cho wallo latulu a Mɛlɛka’ wa?

KAAPINDƐINƆƆ a wana pɛɛkaa Chiisu Kiliti wa ni. (Maki 6:​3; Chɔŋ 13:​13) Mi ndoo tosa walta tiɔɔŋndaŋ ndaŋ nyɛkɛndɛi. Maa kaapindɛinɔ, mbo pɛɛku mɛɛ o soliŋ nyɛm waliŋ ndɔŋ kpeku le nyɛm sɔviɔŋ toosiaa a yɔmnde yɛ. Nduyɛ maa wana pɛɛkaa, mbo soliŋ kɔl kalu yiŋgoloŋ ndoo nɔ a Diom Mɛlɛkaa okɔɔ wo kpeku, le waŋnda malaa ma bii tonya cho o Diom Mɛlɛkaa niŋndo bila. (Maatiu 7:​28; Luku 24:​32, 45) Mɛɛ Chiisu fuuluu wɔsilaŋ 30, mbo pɛŋgi wali lekaapindɛiyo tosaa. Okoŋ, mbo simnuŋ wana pɛɛkaa kanifuule, ndoo sina maa ndu wa wali sɔvɛ ndoo nɔ le tosaa wo ni. Mbo dimi maa yooŋgu kɛndɔɔ dimioo a Masale Mɛlɛkaleŋ okɔɔ wa saboo opilɛ o Mɛlɛka vem ndu o chieeŋndo choo wo ni. (Maatiu 20:​28; Luku 3:​23; 4:​43) Mi Chiisu handu kɔl ndɔɔ kpou o wali dimiaa yooŋgu kɛndɔɔ choo, nduyɛ ndoo yeema le mi acheleŋnda bɛɛ tosa nyɛ pilɛ koŋ kpe.—Maatiu 9:​35-38.

² Naa bɔɔbɔɔ ŋ cho a kaapindɛi le, kɛ naa kpou wanaa dimul waŋnda yooŋgu kɛndɔɔ wa naŋ cho ni. Wallo hoo cho bɔɔ wali sɔvɛ, nduyɛ Mɛlɛka bɛɛ cho ndu tosaa. Lelaŋ pɛɛŋ i cho i dimiŋ ni maa, “wanaa walla naŋ cho latulu a Mɛlɛka ni.” (Kɔliŋtiaŋ Tasoo 3:​9, NW; Kɔliŋtiaŋ Diiŋ Ndɔɔ 6:​4) Ŋ chɛl nyɛ wana ŋchondoo  dimi wo aa, “Diomnda numndaŋ kpou tonyaa la cho ni.” (Sam 119:​160) Tonyaa Diom Chɛhowaa cho ni. Le sabu koŋ kpeekpei naŋ nɔ ni miŋ kindiŋ kpoke le “diom tonyaa hivioo . . . waŋnda o lani” o wali pol naa niŋ. (Nuawɔ Timoti Diiŋ Ndɔɔ 2:​15.) Lelaŋ, ŋ nɔ miŋ hiou lachi a kindiŋndo le Baabuiyo soliŋndo kpeku nyɛkɛndɛi. Ndu cho yau kpeekpei naŋ soliŋ kpeku le waŋnda pɛɛkoo a Chɛhowa, Chiisu, vɛlɛ a Masale Mɛlɛkaleŋ okɔɔ wo ni. Le naa malaa miŋ sɔla batiuwaa o wali pol naa niŋ, kɔɔna Chɛhowaa ke naa nyɛm waliŋ kɛndɛ cheleŋ, nduyɛ ŋ nɔ miŋ sina mɛɛ naŋ soliŋ muŋ kpeku yɛ. Nyɛm walloŋ muŋ cho o Kɔfu Nyɛm Waliŋ Naŋ Pɛɛku Waŋnda Woŋ niŋ.

3. O yɛɛ choo naŋ nɔ yɛ miŋ handu kɔllo o wali pol naa niŋ, nduyɛ vɛɛ Walta Wanaa Chiisuaa 13:​48 mala yɛ naa le hei tosaa?

³ Naapum mi kɔndɔfillo bii num ma nyunaŋ aa, le yɛɛ naŋ veelu yɛ ndu aa Kɔfu Nyɛm Waliŋ Naŋ Pɛɛku Waŋnda Woŋ, kɛ o cho naa aa Kɔfu Nyɛm Waliŋ Naŋ Dimi Yooŋgu Kɛndɔɔ Woŋ te? Kanifuule, diomndo hoo “dimi” sim le yooŋgoo pɛŋgɛlaa. Kɛ diomndo hoo, “pɛɛku” sim le waŋndo yooŋgu koŋ tɛɛsiallo, okoŋ mbo bii nyɛ o tueiyo bila nyɛkɛndɛi. Nduyɛ, hei nyindu ndu le mbo dɔu nyɛ o pɛɛku wo o wali niŋ. O teleŋ biŋgi naŋ nɔ wɔ hoo o chieeŋndo niŋndo bɛŋgu, ŋ nɔ miŋ handu kɔllo le pɛɛkula Baabuilaŋ kandɔɔ vɛlɛ a waŋnda tonyaa pɛɛkoo le mi nda bɛɛ huŋ simnuŋ buɛiyaa Kilitiaa. Koŋ cho ni, ŋ nɔ miŋ wou sɛmbɔɔ le “wanaa Mɛlɛka hɛli le ma sɔla yoomu kpeekpeiyo o nɔ lamɛɛlu le wo wa” nuuviaa o wali pollo niŋ, nduyɛ miŋ mala nda le ma kandu Chɛhowa piɛiyo.—Nuawɔ Walta Wanaa Chiisuaa 13:​44-48.

4. Vɛɛ naŋ looku yɛ “wanaa Mɛlɛka hɛli le ma sɔla yoomu kpeekpeiyo o nɔ lamɛɛlu le wo wa” saalɔŋ?

⁴ Vɛɛ naŋ looku yɛ “wanaa Mɛlɛka hɛli le ma sɔla yoomu kpeekpeiyo o nɔ lamɛɛlu le wo wa” saalɔŋ? Le Kilisiɔŋaa tasiaa, nɛi ndaa saaluŋ waŋnda haa kinɛiyo wa nda yooŋgu kɛndɔɔ dimullo ni. Mi Chiisu dimul buɛiyaa nduaa aa, “Te la fuuluu o chiee o chiee pɛ, la nuuviaa le wana kaa kɛndɔɔ, o wa o chɛlaa le nya yiyaa wo.” (Maatiu 10:​11) Nyɛ pilɛ koŋ kpe naa bɛɛ nɔ hau le tosaa ni. Kɛ o wa bɛɛ lende, te waŋnda kɛɛ pɛ le yeemɛi chɔmndo, ma wa wanaa heelaŋnda, ɔɔ ma buulaŋ kposoŋ a Mɛlɛka okɔɔ le, ŋ ve nda kɔl le ma yaŋ nilaŋ o yooŋgu kɛndɔɔ le. Wanaa chɔm yeemɛi kpeekpeiye wa, wanaa tusiaŋnda vɛlɛ a wanaa yeema kɛsɛ le tonyaa sinaa wa naŋ cho nuuviaa ni. Ŋ tuu wali naŋ cho le waŋnda nuuviaa wo, a nyɛ Chiisu ndoo nɔ le tosaa wo teleŋ o wa kaapindɛinɔɔ wo. Tuupa mi ndoo toosiaa kpeŋgbeiyo, dioo, ɔɔ nyɛ cheleŋ, ndoo nɔ fɛlɛŋ mbo nuuviaa yɔm kɛndɔɔ. Okoŋ, o chua kɔfu ndɔ nyɛm walloŋ, o soliŋ kɔl kalu Mɛlɛka ndoo ke ndu wo kpeku, o toosiaa nyɛ koŋ. O nɛi pilɛ koŋ choo hau, ŋ nɔ fɛlɛŋ miŋ nuuviaa wanaa nɔ yeemɛiya. Okoŋ, ŋ soliŋ nyɛm waliŋ naŋ pɛɛku waŋnda woŋ vɛlɛ a kɔl kalu Mɛlɛka ke naa wo kpeku, le waŋnda malaa ma simnuŋ buɛiyaa Chiisuaa.—Maatiu 28:​19, 20.

5. Yɛɛ naŋ nɔ yɛ miŋ sina a nyɛm waliŋ cho o Kɔfu Nyɛm Waliŋ Naŋ Pɛɛku Waŋnda Woŋ niŋ? Tɛɛsiaawɔ. (Tofa fotueiyo o peele naŋ kandu leŋ choo.)

⁵ O kɔfu nyɛm walloŋ niŋ, nyɛ wali kɛ kɛ nɔ sabu kpeekpeiyo. Le taamaseliiyo, yiyaŋndɔ a nyɛm waliŋ Chiisu ndoo soliŋ kpeku teleŋ o wa kaapindɛinɔɔ wo. * (Tofa tɛɛsiaa amatou.) Ndoo yeema nyɛm walloŋ le tuuwo, pulaleŋ keiyo, yɔmndo kiolɔɔ, siɔlɔɔ, vɛlɛ a nyɛm walloŋ le yɔmii biŋgiei mɔɔsaa naapilɛ. O nɛi pilɛ koŋ choo, naa bɛɛ nyɛ wali kɛ kɛ cho o Kɔfu Nyɛm Waliŋ Naŋ Pɛɛku Waŋnda Woŋ niŋ, nɔ sabu kpeekpeiyo. Ŋ yaasiaŋndɔ miŋ che mɛɛ naŋ soliŋ nyɛm waliŋ sɔviɔŋ muŋ kpeku yɛ.

6, 7. (a) Vɛɛ num soliŋ yɛ niŋ yaula ŋ kua o jw.org wo kpeku? (b) Le yɛɛ naŋ soliŋ yɛ yau veelaa le bɔŋaŋnda naala leKilisiɔŋndaŋ kpeku?

⁶ Yaula Ŋ Kua o Jw.org wo. Yaulaŋ ndaŋ la cho yaula bɛndu le, kɛ la cho bɔɔ yaula sɔvɛ le waŋnda chɔmndo wanaa suu naŋ cho wa, vɛlɛ a le nda yɔɔ o tɛɛŋgii nɛi. Waŋnda tiuba ma pɛɛku tau a naa okɔɔ o tɛɛŋgii nɛi, nduyɛ ma nyuna pɛɛŋ le pɛɛku Baabuiyo. Waŋnda hiouwɔɔ 400,000 nyuna niŋ le pɛɛku Baabuiyo o jw.org ni. Nduyɛ, waŋnda o kɛmɛlaŋ niŋ cho nyɛ pilɔɔ hoo kpe tosaa lepaa o lepaa! A kɛsiŋ yaulaŋ ndaŋ latiŋ o ba, nduyɛ ma soliŋ ndaŋ kpeku le suɛi o wanaa ŋ cho wa komallo wa lo teleŋ o teleŋ.

⁷ Yau Veelaa. Yau veelaa le bɔŋaŋnda naalaŋ dimi aa, “A cho o veelaa le Baabuiyo pɛɛkoo a Seiyaa Chɛhowaa latulu.” Mbo dimi vɛlɛ maa a tiuba ma tosa hei “o bɔŋaŋnda naa laŋ” “ɔɔ mi waŋndo wa num pɛɛkoo.” Yau veelaa hoo chɔm waŋnda wanaa suu naŋ cho wa, nduyɛ o dɛɛniaa vɛlɛ wanaa “yaŋ nilaŋ o suɛi Mɛlɛkɛi, nduyɛ ma tosa nyɛ Mɛlɛka dimi wo wa” le Baabuiyo pɛɛkoo a naa latulu. (Luku 11:​28) Kɛ a koŋ kpou, waŋnda tiuba ma hiŋ o bɔŋaŋnda naalaŋ o yɔŋ bɛɛ ma chɛl le pɛɛku Baabuiyo ɔɔ ma kɛɛ. Te a hiŋ pɛ o bɔŋaŋnda naalaŋ, a cho chɔ mɛɛ kpɛ nda tiuba ma pɛɛku a Baabuiyo okɔɔ yɛ.

8. Le yɛɛ i cho yɛ suɛi sɔvɛ le mi waŋndo hiŋ o bɔŋaŋnda naalaŋ o yɔŋ bɛɛ lepilɛ kpe? Chɔmndɔ taamaseliiyo.

⁸ I cho bɔɔ suɛi sɔvɛ le miŋ lambaŋ waŋnda veeloo le hunɔɔ o bɔŋaŋnda naalaŋ o yɔŋ bɛɛ lepilɛ kpe. Le sabu kuɛɛ? Kanifuule, te a hiŋ pɛ, waŋnda haa cho chɔ maa Seiyaa Chɛhowaa cho tonya cho o Baabuiyo niŋndo pɛɛkoo ni, nduyɛ ma wa waŋnda malaa le ma sina Mɛlɛka. Nduyɛ, piɛiyii lachoowɛi cho hei tosa kposoŋ te. (Aisaya 65:​13) Le taamaseliiyo, mi pɔnɔɔ a lanɔ pilɛ diolaŋ Lue nda Liŋnda cha teŋgeŋndo hoo o wɔsila hiou laŋ niŋ. Ndaa laalaŋ o Mɛlɛka niŋ, nduyɛ ndaa yeema ma sina ndu nyɛkɛndɛi. Okoŋ, ma kandu kɔlaŋ o kaaŋii wa o tanda ndaa niŋnde kpou. Kɛ sɔɔŋ muuŋ nda wa nuuviaa ni o kaŋnde kɛ kɛ nda wa kɔlaŋ niŋ tuupa ma simnuŋ wanaa nda kpeekpei. O tasoo, ndaa nɔ fɛlɛŋ ma pɛɛku nyɛ a kaŋnde leŋ okɔɔ, nduyɛ o diiŋ ndɔɔ, ma che maa wanaa cho o kaŋnde leŋ niŋnda nɔ ma chuɛinuŋ maa wanaa cho Mɛlɛka piɛiyo wa. Mi hei chua nda wɔsiŋ bɔɔbɔɔ, kanifuule, ndaa nɔ kaaŋnde i hɔbɛi o tanda ndaa niŋ. Kɛ a ve a kɔl kɛndɛ kposoŋ te. A pɛɛku nyɛ o nyɛ le, nduyɛ wanaa wa o kaaŋii keŋ niŋnda ndaa chuɛinuŋ o nɛi lebɛɛ niŋ te. Mɛɛ nda kuɛ o kaŋnde mɛɛlaale wa o yau ndaa choo leŋ, mi Liŋnda kua o wallo niŋ, okoŋ mi Lue miiŋgu o bɛɛ. Mɛɛ o wa kɔlaŋ o bɛɛ, mbo kei o Toŋgo leMasaa ikɛi. Mbo dimi aa, ‘I luɛiyɔɔ leniŋ, okoŋ mi che nyɛ nda tosa loŋ ndo.’ Nduyɛ, suɛi yɔŋnaŋii sɔvɛ sɔvɛi wa hei le ndu ni! Mi wana o wana wa o Toŋgo leMasaa niŋ bii ndu nyɛkɛndɛi, nduyɛ ma chɔm ndu kaalaa. Nda kpou wa a chuɛiyaŋ nyɛkɛndɛi. Mi Lue kɔ chal o kpeŋgbeila wa lachi laŋ opilɛ choo, nduyɛ mbo naŋ kɔl tau a nyɛ o pɛɛku wo! Hei yiyalaŋ naa a nyɛ kiilanɔɔ Pɔɔl dimi wo maa, te waŋndo hiŋ pɛ hunɔɔ tasoo o bɔŋaŋnda naalaŋ, o tiuba mbo dimi aa, “Tonya kpeekpei, Mɛlɛka cho nya tɛɛŋ.” (Kɔliŋtiaŋ Tasoo 14:​23-25) Mɛɛ keŋ i hiou, mi Lue kandu hunɔɔ lɔɔlɔɔ o bɔŋaŋnda naŋ bii o Kuɛɛndoo choo laŋ. O viu bɛɛ le, mbo kandu vɛlɛ hunɔɔ o bɔŋaŋnda naŋ bii o lɔɔ tɛɛŋ ndaŋ. Mi Liŋnda bɛɛ kandu hunɔɔ o bɔŋaŋndaŋ. Mi che bɛɛ a wa niŋ o wɔsila 70 laŋ niŋ, ma pɛɛku Baabuiyo, nduyɛ ma sɔla yiŋɔɔ.

9, 10. (a) Le yɛɛ i cho tɛtɛlɛ le yaula pɔmbɔlaŋ soliŋndo kpeku? (b) Tɛɛsiaawɔ mɛɛ naŋ soliŋ yau pɔmbɔɔ kpeku yɛ, Yɛɛ cho yɛ Masale Mɛlɛkaleŋ?

⁹ Yaula Pɔmbɔlaŋ. Ŋ nɔ yaula pɔmbɔlaŋ la ŋɔmaa o kɔfu naa nyɛm walloŋ niŋ. Yaulaŋ ndaŋ la kindu kpeku soliŋ te, nduyɛ la mala tau le suukaŋndo kandɔɔ. Chɔŋ a teleŋ la taselaŋ la fula o wɔsi 2013 ve niŋnde, la nda soli niŋ o laŋ kɔɔli laŋ la cho niŋ le biiliɔŋndaŋ la ŋuɛɛnu! O nɛi pilɔɔ choo kpe yaula pɔmbɔlaŋ ndaŋ la toosiaŋ ni. Te a pɛɛku pɛ mɛɛ wana soliŋ opilɛ kpeku yɛ, a tiuba ma soliŋ ndaŋ kpou kpeku! Vɛɛ ŋ soliŋ yɛ yau pɔmbɔɔ kpeku le suukaŋndo kandɔɔ a waŋndo?

¹⁰ Naapum, a yeema ma soliŋ yau pɔmbɔɔ hoo kpeku, Yɛɛ cho yɛ Masale Mɛlɛkaleŋ? Chɔm wana koŋ nyuna cho o peele taseleŋ choo wo, okoŋ ma nyuna ndu aa, “Baa kɔndɔfillo bii num niŋ pa a nyɛ cho Masale Mɛlɛkaleŋ ndo? Dimioo ŋ cho ni maa . . . ?” Okoŋ, a nyuna ndu le muli o cho chua o mulila yaa laŋ tɛɛŋndo. Yɔŋi ŋ dimul ndu maa o chaa muli ɔɔ o chiee muli le, kumbi yau pɔmbɔɔ o suɛi lebolle hei bɛŋgu, “Yɛɛ Baabuiyo Ndu Dimi Yɛ?” o yauwo niŋ, okoŋ a veelu diomndaŋ o Daaniɛɛ 2:​44 a Aisaya 9:​6, NW niŋ. Te a hiŋ pɛ le suukaŋndo chiiyo, nyuna ndu nyuna cho o kɔɔ wo o suɛi lebolle hei bɛŋgu wo, “Yiyaŋndɔ A Nyunaa Hoo” aa, “Vɛɛ yoomoo wa yɛ niŋ o Masale Mɛlɛkaleŋ bɛŋgu?” A tiuba ma muli nyuna koŋ a teleŋ cheleŋ ŋ cho miiŋgu wo. Te a miiŋgu pɛ, a soliŋ buŋgɛi 7 kpeku o buluchiɔɔ hoo niŋ, Yooŋgu Kɛndɛ Chɛŋ O Mɛlɛka Lo Wo. Nduyɛ, yauwo hoo cho nyɛ wallo opilɛ o naŋ kandu waŋnda Baabuiyo pɛɛkoo wo.

11. Le yɛɛ Bandu Mɛŋgɛlaa a “Tiondoo!” toosiaŋ yɛ, nduyɛ yɛɛ naŋ nɔ yɛ miŋ sina a laŋ okɔɔ?

¹¹ Bandu Mɛŋgɛlaa a “Tiondoo!” Yaula hiou toosiaŋ o chieeŋndo choo kpou, nduyɛ mi la wa la hiviaŋ mbo hiau yau kɛ kɛ wo, cho Bandu Mɛŋgɛlaa a “Tiondoo!” ni! Le mɛɛ waŋnda o lɛŋii yɛ yɛi niŋ veelu diomndaŋ o yaulaŋ ndaŋ niŋ yɛ, le sabu koŋ sɔɔŋ lebolluŋ wa o yaulaŋ ndaŋ kɔɔ wo toosiaŋ nyɛkɛndɛi ni, le waŋnda suu o suu kɔllo pilaŋndo. Ŋ nɔ miŋ soliŋ yaulaŋ ndaŋ kpeku le waŋnda malaa le ma che nyɛ hiou wa hau o sɔvɛ o yoomoo niŋndo. Kɛ le hei tosaa, ŋ nɔ fɛlɛŋ miŋ sina yau suu toosiaŋ le waŋndo wo.

12. (a) Le nɛɛ niaa yau “Tiondoo!” toosiaŋ yɛ, nduyɛ yɛɛ cho yɛ sabu ndɔɔ? (b) Sɔɔŋ yɔŋnaŋ kɛndɛŋ kuɛɛ ŋ laŋga sɔla yɛ o nyɛ wallo hoo soliŋndo kpeku niŋ?

¹² “Tiondoo!” Yau “Tiondoo!” toosiaŋ le wanaa sina nyɛɛmbɔ ɔɔ a sina nyɛ o nyɛ a Baabuiyo okɔɔ le wa. Naapum, waŋnda haa sina nyɛ o nyɛ a pɛɛkula leKilisiɔŋndaŋ okɔɔ le, a laalaŋ o piɛiye niŋ kposoŋ te, ɔɔ naapum pɛɛŋ a ve yiyaŋ maa Baabuiyo tiuba mbo mala nda o yoomula ndalaŋ niŋ te. Sabu kpeekpeiyo opilɛ le “Tiondoo!” cho ni, le wana cho diomndaŋ veeloo wo malaa mbo laalaŋ kɛsɛ maa Mɛlɛka cho. (Luomaŋnda 1:​20; Hibuluiya 11:​6) Yauwo hoo tiuba mbo mala vɛlɛ wana veelu diomndaŋ leniŋ ndo, le mbo nɔ tiindaŋndo kɛsɛ maa Baabuiyo “lekɛndɛi, Mɛlɛka Diom ndɔɔ kpeekpei o cho ni.” (Tɛsaloniaŋ Tasoo 2:​13) Sɔɔŋ lebolloŋ le yaula “Tiondoo!” le wɔsi 2018 cho ni, “Nɛi Yoomu Kɔl Kɛndɔɔ,” “Sɔɔŋ Viaŋnaŋ 12 Tosa Mi Yuŋgulaŋ la Sɔla Batiuwaa Wo,” a “Malaa le Wanaa Cho a Kɔlta Tambɛilaŋ Nda.” * (Tofa tɛɛsiaa amatou.)

13. (a) Le nɛɛ niaa Bandu Mɛŋgɛlaa cho le wana o wana wo toosiaŋ yɛ? (b) Sɔɔŋ yɔŋnaŋ kɛndɛŋ kuɛɛ ŋ laŋga sɔla yɛ o nyɛ wallo hoo soliŋndo kpeku niŋ?

¹³ Sabu kpeekpeiyo le Bandu Mɛŋgɛlaa cho le wana o wana wo cho ni, le wanaa nɔ niŋ bɛɛleŋ le Mɛlɛka vɛlɛ a Baabuiyo wa tɛɛsiallo pɛɛkula Baabuiyo. Naapum, waŋnda haa  sina sɔɔŋ pum a Baabuiyo okɔɔ, kɛ a bii nyɛ Baabuiyo pɛɛku wo bila nyɛkɛndɛi le. (Luomaŋnda 10:​2; Timoti Tasoo 2:​3, 4) Sɔɔŋ lebolloŋ le yaula Bandu Mɛŋgɛlaa cho le wana o wana wo le wɔsi 2018 cho ni, “Baa Baabuiyo Cho Wɔ Pa Hau Nyɛ Sɔvɛ?,” “Vɛɛ Chila Chieeŋndo Hoo La Wa yɛ Niŋ?,” a “Baa Mɛlɛka Buulaŋ Pa a Num?”

14. (a) Le sabu kuɛɛ vidueila hiɔɔlu cho o Kɔfu Nyɛm Waliŋ Naŋ Pɛɛku Waŋnda Woŋ niŋndo toosiaŋ yɛ? (b) Sɔɔŋ yɔŋnaŋ kɛndɛŋ kuɛɛ ŋ sɔla yɛ niŋ o vidueilaŋ ndaŋ soliŋndo kpeku niŋ?

¹⁴ Vidueilaŋ. O teleŋ Chiisoo niŋ, nyɛm waliŋ kaapindɛinɔɔ ndoo nɔ kinɛiyoŋ wa ŋ ndoo tosa wallo a laba woŋ ni. Kɛ suŋ suŋ niŋ, kaapindɛiya nɔ nyɛm waliŋ soliŋ yiŋnde chɛnɛwɛileŋ kpeku wo mɛɛ suɛilaŋ, maasiilaŋ le sooŋndo touwɔɔ ɔɔ le pɛŋgɔŋ siɔlɔɔ cho naa yɛ. Te ŋ wa hau yooŋgu kɛndɔɔ dimioo pɛ, o fula o yaula naalaŋ kɔɔli, ŋ nɔ vɛlɛ vidueila kɛndɛlaŋ le waŋnda chɔmndo. Vidueilaŋ ndaŋ la hiɔɔlu la cho o kɔfu nyɛm waliŋ naŋ niŋ. Laŋ la cho ni, Le Yɛɛ Ŋ Pɛɛku yɛ Baabuiyo?, Vɛɛ Naŋ Pɛɛku yɛ Baabuiyo a Waŋnda?, Yɛɛ Naŋ Tosa yɛ o Toŋgo naa leMasaa Niŋ?, a Nɛɛ Yaa Cho yɛ Seiyaa Chɛhowaa? O kɔla taselaŋ, a chɔm waŋnda vidueila biŋgila fuuluu bɛɛ chemchemndaŋ mamiɔɔŋ te laŋ, nduyɛ mi hei mala nda tau. A soliŋ vidueila bandu tiŋ ndaŋ kpeku o miiŋgu makɔɔ te wana chiɛiyo nɔ pɛ teleŋndo tau. Vidueilaŋ ndaŋ la cho bɔɔ nyɛm waliŋ sɔvɛ, kanifuule, la luei waŋnda yoomuaŋ le Baabuiyo pɛɛkoo vɛlɛ a hunɔɔ o bɔŋaŋnda naalaŋ.

15. Te waŋnda tofa pɛ vidueila naalaŋ opilɛ o suɛi maŋgalɛi ndɛi niŋ, vɛɛ hei piiliaŋ yɛ nda? Chɔmndɔ taamaseliilaŋ.

¹⁵ Le taamaseliiyo, mi ndepilɛnɔ pilɛ komal chua pilɛ fulaa o lɛŋnde Makoloneesialeŋ niŋ, nduyɛ suɛi maŋgalɛi chuaa hoo ndoo dimi ve wa Yapisiiye ni. Mi ndepilɛnɔɔ chɔm chuaa hoo vidueiyo, Le Yɛɛ Ŋ Pɛɛku yɛ Baabuiyo? o Yapisiiye niŋ. Mɛɛ vidueiyo kanduŋ, mi chuaa dimi aa, “Suɛi nii maŋgalɛi choo hei ni. I laalaŋ hei le! Mɛɛ o cho suɛi yɛ chɔm kpendekele maa o lɛŋnde ibuŋga le ya fula leŋ niŋ ndu bɛɛ fula ni. Suɛi maŋgalɛi nii o cho dimioo ni.” Okoŋ kɔɔli, mbo dimi maa o cho lakɔ diomndaŋ veelu o nyɛ o nyɛ cho o suɛi nduɛi maŋgalɛi niŋ o jw.org, nduyɛ mbo tofa vɛlɛ vidueilaŋ. (Tuuwɔ Walta Wanaa Chiisuaa 2:​8, 11.) Taamaselii cheleŋ cho a ndepilɛnɔɔ o Amɛlika niŋ, o po yema ndɔɔ cho o lɛŋnde cheleŋ niŋndo. Mbo yɔŋ ndu nɛi chɔmaa o tual kɔɔli le viduei pilɔɔ hoo kpe saalɔŋndo o suɛi maŋgalɛi nduɛi niŋndo. Mbo tofa vidueiyo, okoŋ mbo poonyial ndu aa, “Naa vidueiyo chɔm maa nyina wɔɔŋndo chieeŋndo cho hau o ba bɛŋgu ni wa, pilaŋ ya bɔɔ kɔllo. Mi nyuna le pɛɛku Baabuiyo.” Hei cho bɔɔ suɛi kɛndɛ kanifuule, o lɛŋnde nda kuuna naa yooŋgu kɛndɔɔ dimioo wo niŋ laŋunɔɔ hoo cho ichali ni!

16. Tɛɛsiaawɔ sabu kpeekpei buluchiɔɔ kɛ kɛ: (a) Yaŋ Mɛlɛka Nilaŋ Ma Wa Achal Lefafɛɛŋ. (b) Yooŋgu Kɛndɛ Chɛŋ O Mɛlɛka Lo Wo (c) Nɛɛ Yaa Cho Yɛ Hau Hɛnaŋ Chɛhowaa Tosaa?

¹⁶ Buluchiɔɔlaŋ. Vɛɛ naŋ tiu yɛ ba miŋ pɛɛku wana chiee diomndaŋ veeloo le wo ɔɔ wana nɔ yaula Baabui kɛ kɛ o suɛi nduɛi maŋgalɛi niŋ te wo? Ŋ soliŋ buluchiɔɔ wo hoo kpeku, Yaŋ Mɛlɛka Nilaŋ Ma Wa Achal Lefafɛɛŋ. * (Tofa tɛɛsiaa amatou.) Nyɛ wali sɔviɔɔ le pɛɛkula Baabuilaŋ kandɔɔ cho buluchiɔɔ wo hoo ni, Yooŋgu Kɛndɛ Chɛŋ O Mɛlɛka Lo Wo.  Chɔm waŋndo buŋgaŋ 14 cho o yauwo kɔɔ woŋ, ma nyuna ndu le buŋgɛi o yeema mi la suukaŋ choo ve. Okoŋ, a kandu pɛɛkoo o buŋgɛi keŋ niŋ. Baa a kindiŋ niŋ pa le hei tosaa o miiŋgula makɔɔlila numndaŋ? Buluchiɔɔ yaa ndɔɔ o kɔfu naa niŋ cho ni, Nɛɛ Yaa Cho Yɛ Hau Hɛnaŋ Chɛhowaa Tosaa? Yauwo hoo toosiaŋ le wanaa naŋ cho Baabuiyo pɛɛkoo wa pɛɛkoo a kɔɔna naa okɔɔ. Le sinaa mɛɛ wana soliŋ yauwo hoo kpeku o pɛɛku Baabui kɛ kɛ choo yɛ, tofa yau Yoomu Naa leKilisiɔŋndo a Wali Pollo—Yau Wali Bɔŋaŋndo le Fuoo 2017.

17. (a) Yɛɛ cho yɛ sabu kpeekpei bukui kɛ kɛ naŋ pɛɛku waŋnda wo? (b) Yɛɛ wanaa sɔla yiŋɔɔ wa kpou nɔ yɛ ma tosa, nduyɛ le yɛɛ?

¹⁷ Bukuilaŋ. Te a kandu pɛ waŋndo pɛɛkoo o buluchiɔɔ wo niŋ, a tiuba ma hivi pɛɛku koŋ a teleŋ kɛ kɛ o yauwo hoo niŋ, Yɛɛ Baabuiyo Pɛɛku yɛ Naa? Nyɛ wallo hoo tiuba mbo mala waŋnda le ma pɛɛku tau sɔɔŋ tasoŋ o Baabuiyo niŋ. Te wana ŋ cho pɛɛkoo wo wa pɛ hiouwɔɔ lachioo tosaa, nduyɛ mi la chii yau koŋ pɛɛku, a hiau lachi a ndu pɛɛkoo o yauwo hoo niŋ, Lo o Kaala Mɛlɛka wo Bɛŋgu. Nyɛ wallo hoo tiuba mbo mala wana ŋ cho pɛɛkoo wo mɛɛ o duau sawala mandaala Baabuiyo o wali niŋ lepaa o lepaa o yoomu ndɔɔ niŋ yɛ. Kɛsiŋ o kɔl maa, o yɔŋ bɛɛ mi wana ŋ cho pɛɛkoo wo yiŋ, o nɔ mbo hiou lachi a pɛɛkoo haaa mbo chii yaula tiɔɔŋndaŋ kpou. Hei cho ndu mala mbo nɔ tiindaŋ kala kalaa o Chɛhowa niŋ, nduyɛ mbo chɔm lo lechoo wo o ndu lo.—Nuawɔ Kolosiaŋnda 2:​6, 7.

18. (a) Yɛɛ Timoti Tasoo 4:​16 dɛɛniaa yɛ naa le tosaa maa wanaa cho tonyaa pɛɛkoo wa, nduyɛ yɛɛ cho yɛ wa fulamakɔɔlioo? (b) Yɛɛ cho yɛ kpeleŋ naa te ŋ wa pɛ Kɔfu Nyɛm Waliŋ Naŋ Pɛɛku Waŋnda Woŋ soliŋndo kpeku?

¹⁸ Maa Seiya Chɛhowaa, ŋ nɔ kalaŋndo le waŋnda pɛɛkoo ‘Mɛlɛka diom ndɔ tonyaa, ndu yɔŋ ni maa yooŋgu kɛndɛ Mɛlɛkaa’ o yaa wana o yoomu nɔ lamɛɛlu le wo. (Kolosiaŋnda 1:​5; nuawɔ Timoti Tasoo 4:​16.) Le naa malaa miŋ tosa hei, ŋ nɔ Kɔfu Nyɛm Waliŋ Naŋ Pɛɛku Waŋnda Woŋ a nyɛm waliŋ yeemaŋ ndoŋ leniŋ. (Tofa kɔfoo hoo, “ Kɔfu Nyɛm Waliŋ Naŋ Pɛɛku Waŋnda Woŋ.”) Ŋ soliŋ nyɛm walloŋ muŋ kpeku nyɛkɛndɛi mɛɛ naŋ tiu ba yɛ. Naa pilɛ pilɛŋnda kɛɛsiaa le nyɛ wali cho o kɔfoo niŋndo soliŋndo kpeku, nduyɛ a teleŋ naŋ yeema wo. Kɛ kɛsiŋ o kɔl maa, kpeleŋ naa cho ko le yaulaŋ piɔuwo le, nduyɛ ŋ nɔ miŋ ke wanaa nɔ iyeema o yooŋgu naa niŋ te wa yaula naa laŋ te. Kpeleŋ naa cho le wanaa chɔm yeemɛi kpeekpeiye wa siiŋguu wo buɛiya ni. Waŋnda haa cho wanaa tusiaŋ, nduyɛ a nɔ yeemɛi kɛsɛ le sinaa a Mɛlɛka okɔɔ. Nda cho wanaa huŋ niŋ ma “sɔla yoomu kpeekpeiyo o nɔ lamɛɛlu le wo wa” ni.—Walta Wanaa Chiisuaa 13:​48; Maatiu 28:​19, 20.