1. Le yɛɛ naŋ nɔ yɛ miŋ piɛi Chɛhowa ndupilɛ kpe?

CHƐHOWA kinɛi naŋ nɔ ni miŋ piɛi kanifuule ndu cho Wana Toosiaa naa a Wana Ke Naa Yoomoo wo ni. (Sɔɔŋ. 4:​11) Kɛ, simullo cho. Mi che bɛɛ ŋ kaala Chɛhowa nduyɛ miŋ nɔ bɛɛleŋ le ndu, kɛ mi sɔɔŋ naŋ tosa lepum ndoŋ kɛɛlu naa ndu piɛiyo a kɔllo kpou. Ŋ nɔ miŋ sina mɛɛ keŋ yɔŋnuŋ yɛ. Kɛ tuupa miŋ sina keŋ, ŋ yaasiaŋndɔ fɛŋ nyɛ o sim le Chɛhowa piɛiyo ndupilɛ kpe wo.

2. A mɛɛ Ɛsɔdɔɔ 34:​14 dimi yɛ, yɛɛ naŋ cho yɛ fafaŋ te ŋ wa pɛ Chɛhowa piɛiyo a kɔllo kpou?

² O Baabuiyo niŋ, Chɛhowa piɛiyo ndupilɛ kpe cho kaala yiŋgoloŋndo nɔɔ le ndu ni. Te ŋ kaala pɛ Chɛhowa a kɔl naa kpou, mɛɛ ŋ cho ndu piɛi ndupilɛ kpe. Ŋ chɛl mi nyɛ o nyɛ ɔɔ wana o wana faŋa kaala naŋ nɔ le ndu wo lechoo le.—Nuawɔ Ɛsɔdɔɔ 34:​14.

3. Sabula kuɛɛ naŋ nɔ yɛ le Chɛhowa kaalaa?

³ Ŋ sina le sabu naŋ nɔ miŋ kaala Chɛhowa wo. Le yɛɛ naŋ dimi yɛ lende? Kanifuule, ŋ pɛɛku fɛŋ a ndu okɔɔ o Baabuiyo niŋ. Ŋ sina niŋ suliŋnda kɛndɛla o nɔ laŋ. Ŋ sina nyɛ Chɛhowa kaala wo a nyɛ o tul leyɛ wo. Ŋ sina sabu ndɔɔ le waŋchieeya nduyɛ miŋ toolu ndu. Ŋ naŋ kɔl tau le mɛɛ o chɛl naa le waa chaaŋaa nduaa yɛ. (Sam 25:​14) Nyɛ o nyɛ naŋ pɛɛku niŋ a Wana Naa Toosiaa okɔɔ tosa miŋ sɔɔŋguu ndu ikɛi kpɛɛluŋ.—Chemi. 4:​8.

4. (a) Yɛɛ Masa Nyinaa Wɔɔŋnda cho yɛ soliŋndo kpeku le naa kɛɛloo Chɛhowa piɛiyo a kɔllo kpou? (b) Yɛɛ naŋ cho yɛ yaasiaa o buŋgɛi hei niŋ?

 ⁴ Masa Nyinaa Wɔɔŋnda chieeŋndo hoo kpou cho o ba ni. Nduyɛ, o cho ndu soliŋndo kpeku le naa vɛɛloo miŋ tol yeemaŋ naŋ kɔɔli, a tosaa ndi ikala le fafaŋndo yeemaŋ wɔɔŋndoŋ. (Ɛfi. 2:​1-3; 1 Chɔŋ 5:​19) O yeema naa vɛlɛ miŋ kaala nyɛm cheleŋndoŋ le halikpeŋ ŋ piɛi Chɛhowa a kɔllo kpou le. Ŋ yaasiaŋndɔ nɛilaŋ latiɔɔŋ la Masa Nyinaa Wɔɔŋnda tosa heiyo. Nɛi tasoo, mbo tosa miŋ nɔ kaala ŋkanioo. Nɛi diiŋ ndɔɔ, mbo kindiŋ le naa nyindɔɔ miŋ hɛli yelelaŋ wɔɔŋndo.

5. Le yɛɛ naŋ nɔ yɛ miŋ wa yekeŋ yɔŋi kaala ŋkanioo luɛi naa o kɔl?

⁵ O kpeekpei niŋ, naa kpou yeema miŋ sɔla nyɛ naŋ dia wo, nyɛ chuɛɛnaŋ sɔviɔɔ, a naa lɔlaa kɛndiaa. Kɛ ŋ nɔ miŋ mandaŋ yɔŋi kaala ŋkanioo luɛi naa o kɔl. “Wanaa kaala ŋkaniaa” wanaa bɔɔbɔɔ cho hau o chieeŋ Setanaa niŋnda cho ni, nduyɛ a nɔ hɔlte nyɛm kiɔɔŋ tau. (2 Timo. 3:​2) Chiisu ndoo sina maa naapum tol kɔɔliaa nduaa cho tɔɔndaŋndo sɔla le kaala ŋkanioo nɔɔ. Lelaŋ mbo dimi aa, “Buɛi o buɛi cho mbo wa le masaa ŋiɔɔŋ te. Kani fuule, te hoo o kaala ni, o tul o pilɔɔ leyɛ. Te hoo o diikuŋ ni, o diikuŋ o pilɔɔ le. Lelaŋ, wana lenduŋ kɔl o nyɛ sɔlaa, ma nɔla Mɛlɛka saaŋgial te.” (Maa. 6:​24) Te waŋndo wa pɛ Chɛhowa piɛiyo kɛ mbo wa vɛlɛ teleŋ ndɔɔ a yoomuma nduaŋ soliŋndo kpeku tau le sul chieeŋndo hoo sɔlaa, mɛɛ masaa a ŋiɔɔŋ o wa koŋ biiloo ni. O ve Chɛhowa ndupilɛ kpe le wana koŋ wa piɛiyo le.

6. Yɛɛ naŋ pɛɛku yɛ o diomnda Chiisu dimul kundaa Lawodisia laŋ niŋ?

⁶ O wɔsiŋ kɛmɛ tasoŋ C.E. mɛɛlulaŋ, mi Chiisu suaa a saŋgalaŋ wanaa wa o kundaa niŋ Lawodisia wa okɔɔ. Mbo dimi aa: “La dimi  maa la cho a sulaa, maa dɛnɛ kɛndɔɔ cho nya choo, [nduyɛ] maa nyɛ o nyɛ cho nya lepɛŋ te.” Kɛ o cho mɛɛ waŋnda haa ndaa che ndapila yɛ le Chɛhowa nda Chiisu ndaa che nda le. Mi Chiisu dimi aa: “La sina bɛɛ maa mɔnɛi nyɛi i cho waŋnda i biyaa tau a kuɛi bɛndui cho nya choo ve le. La cho a tambɛi, a sumɛi, nduyɛ mi la wa tuu fondo.” O cho le mɛɛ ndaa nɔ kanioŋ tau yɛ le Chiisu ndoo sila nda le, kɛ le mɛɛ kaala ŋkanioo wa chaŋyɛi ndɛi tɛɛmbuu wo a Chɛhowa yɛ. (Sɔɔŋ. 3:​14-17) Te ŋ chiikuu pɛ maa kaala ŋkanioo cho naa luɛiyɔɔ o kɔl, ŋ nɔ miŋ keleŋa ndu soliŋ o kɔl chɔ chɔ. (1 Timo. 6:​7, 8) Te ŋ tosa lende le, mɛɛ ŋ cho kandɔɔ nyɛm cheleŋndoŋ vɛlɛ kaalaa nduyɛ Chɛhowa chɛl niŋ piɛile naaleŋ te. O yeema naa miŋ “sooluu mɛlɛka o mɛlɛka cheleŋ o ndu kɔɔli le.” (Ditɔnɔ. 4:​24) Mɛɛ vɛɛ naŋ handu yɛ kaniei nyɛ tasoo o yoomu naa niŋ?

7-9. Yɛɛ ŋ pɛɛku yɛ o taamasi bɛndu kunda nɔ diolaŋ aa Deeve wo niŋ?

⁷ Tofawɔ taamasi bɛndu kunda pilɛ diolaŋ aa Deeve o cho Amɛlika wo. Wallo pila o tosa ni le hei, ma chɔɔlu ndu foofoo ke o naa nduaa walla. Mbo pialnuŋ pɛŋ ladio o lɛŋnde ndɔleŋ niŋ le mɛɛ ndoo chaa wali ndɔɔ tosaa yɛ. Mi Deeve dimi aa, “A teleŋ koŋ, mi yiyaŋ maa le mɛɛ Chɛhowa wa ya salaa dɔwɔɔ yɛ ya wa batiuwaa sɔlaa ni.” Kɛ baa Chɛhowa kɛsɛ wa ndu salaa dɔwɔɔ ni?

⁸ Mi Deeve kandu chɔɔ maa wali ndɔɔ cho chaŋyɛi o nɔ a Chɛhowa ve lueiyo o kpundɔɔ niŋ. Mbo dimi aa, “Yaa wa o bɔŋaŋndaŋ a o wali pollo niŋ mi saa yiyaŋndo a bahawɛila ya sɔla o wallo niŋndaŋ okɔɔ. I wa kanioŋ sɔlaa tau, kɛ I wa bɔɔ o kɔl landɛiyo niŋ nduyɛ, diompilɛ ve lɛ naa tɛɛŋ naa laanuu le.”

⁹ Mi Deeve cha maa o nɔ mbo hɛli nyɛ hiou wa o sɔvɛ o yoomu ndɔɔ niŋndo. Mbo  dimi aa, “Mi tosa kɛɛsiaa le bahawɛiyo hoo solioo.” Deeve ndoo yeema mbo siŋga kɛɛsiaa ndɔ wallo, okoŋ mbo dimul wana ke ndu wallo wo a kɛɛsiaa ndɔ sɛnɛiyo okɔɔ. Yɛɛ wa yɛ fulamakɔɔlioo? Mi wallo hialuŋ Deeve! Yɛɛ ndoo tosa yɛ okoŋ kɔɔli? Mbo dimi aa, “Diimandɔɔ, mi yɔŋgu yauwo le waa kɔɔfale malalaŋndeŋ tosaa.” Mi Deeve nda laa ndɔ kandu wali dindiaa la chiɛiyo tosaa le o diaa sɔlaa. Mɛɛ teleŋ tiŋ hiou, mbo kandu kɔɔfale lɔɔlɔɔleŋ tosaa, nduyɛ mi laa ndɔ bɛɛ kandu kɔɔfaleŋ. Mi pɔnɔɔ a lanɔɔ hoo kɛɛsiaa le tosaa wali wanaa bɔɔbɔɔ che chɔdɔ wo. Kɛ o cho wali nda cho tosaa wo le cho o sɔvɛ le nda le. Mi che bɛɛ a cho lɛ ŋkani sɔla maa paandu le, kɛ ŋ nda sɔla lɔɔlɔɔ woŋ cho tuuleŋ le nyɛm nda hauba woŋ piondɔɔ. A yeema mi Chɛhowa wa wana tasoo o yoomu ndaa niŋ, nduyɛ a che niŋ kɛsɛ maa o mel wanaa handu Masale ndɔleŋ nyɛ tase o yoomu ndaa niŋnda le.—Maa. 6:​31-33.

10. Vɛɛ naŋ manda yɛ kɔlta naalaŋ?

¹⁰ O yɔŋ bɛɛ miŋ nɔ kanioŋ tau ɔɔ ŋ nɔ ŋ bɔɔ le, ŋ nɔ miŋ manda kɔlta naalaŋ. Vɛɛ naŋ tosa yɛ keŋ? Nɔ yeemɛi le sullo le. Nduyɛ, chɛl mi wali numndo wa nyɛ sɔvɛ o yoomu numndo niŋ mbo hiou Chɛhowa piɛiyo le. Vɛɛ ŋ looku yɛ sina maa hei cho num yɔŋnɔŋndo? Nyunaŋndɔ aa: ‘Baa mi yiyaŋ pa a wali nuu te I wa pɛ lɔɔlɔɔ o bɔŋaŋndaŋ ɔɔ o wali pollo niŋ? Baa mi buulaŋ pa le kanioŋ sɔlaa tau o chilaŋ niŋ? Baa kanioŋ a hɔlte nyɛm kiɔɔŋ cho pa hunɔɔ a bahawɛilaŋ o nɔ nuu niŋ? I yɔŋguŋ pa a kɔllo wulee le tosaa wali wanaa bɔɔbɔɔ chua chɔdɔ wo, te wali koŋ ke ya pɛ teleŋndo le tosaa tau o wali Chɛhowaa niŋ?’ (1 Timo. 6:​9-12) Te ŋ wa pɛ yiyaŋndo o nyunalaŋ ndaŋ choo, ŋ loonuŋ maa Chɛhowa kaala naa, nduyɛ o mel wanaa yɔŋguŋ kpou o ndu lo wa lediom aa: “I feŋaŋ nya ikɛi le, nduyɛ, o nyɛ palaa niŋ bɛɛ I mel nya nya kpeele le.” Lelaŋ pɛŋ Pɔɔl, wana Chiisu vem hɔlte ndɔ wo poonyiaa ni aa: “La duau kɔlta nyalaŋ o kaala ŋkanioo le.”—Hibu. 13:​5, 6.

11. Vɛɛ yelelaŋndo paaliaŋ yɛ waŋndo?

¹¹ Chɛhowa yeema naa miŋ tuei yoomoo yeela, nduyɛ yelelaŋndo mala naa le keŋ tosaa. Diom Mɛlɛkaa dimi pɛŋ maa, “Wana chioo nyɛ bɛnda le ndu suee wo koni cho dioo a kolɔɔ ni mbo de saŋga ndɔɔ tɔnɔ.” (Ikili. 2:​24) Kɛ mi yelelaŋnda bɔɔbɔɔ cho hau o chieeŋndo niŋndaŋ la paaliaŋ naa. Mi la tosa mi wanaa bɔɔbɔɔ luei balaŋ o kaa nɔɔlɛiyo niŋ,  nduyɛ ma chɛl ɔɔ ma kaala pɛŋ sɔɔŋ Baabuiyo pɛɛsa woŋ.

12. A mɛɛ Kɔliŋtiaŋ Tasoo 10:​21, 22 dimi yɛ, le yɛɛ o bɛnda yɛ miŋ hɛli yelelaŋ naa a taasi?

¹² Ŋ yeema miŋ piɛi Chɛhowa ndupilɛ kpe, lelaŋ, ŋ nɔ miŋ wa nyɛdiaa dioo a “wanaa laalaŋnda” nduyɛ miŋ wa vɛlɛ ndu dioo a “nyinaa wɔɔŋnda le.” (Nuawɔ Kɔliŋtiaŋ Tasoo 10:​21, 22.) Nyɛdiaa dioo a waŋndo chɔm ni maa a cho o chaŋyɛi niŋ a ndu. Te ŋ wa pɛ vidueila cho a sɔŋgɔlaŋ, sɔɔŋ nyinaa wɔɔŋnda, kaa ihini nɔɔlɛiyo, ɔɔ a kaala wɔɔŋnda cheleŋ okɔɔ laŋ tofaa, mɛɛ o wa ko maa ŋ cho nyɛdiaa dioo a wanaa tul Chɛhowa leyɛ wa. Nduyɛ fulamakɔɔlioo cho wa ni, ŋ cho naapila luei o kpundɔɔ niŋ nduyɛ miŋ tɛɛmbuu chaŋyɛi nɛi a Chɛhowa.

13-14. A mɛɛ Chemisi 1:​14, 15 dimi yɛ, le yɛɛ naŋ nɔ yɛ miŋ mandaŋ a yelelaŋ naŋ hɛli wo? Chɔmndɔ taamaseliiyo.

¹³ Tofawɔ nɛila naŋ tuu yelelaŋndo a nyɛdiaa naŋ dia hoo wo latiŋ. Te ŋ yeema nyɛdiaa dioo pɛ, naapila hɛli o naŋ hɛnaŋ le dioo wo ni. Kɛ te ŋ de niŋ nyɛdiaa koŋ pɛ, ŋ nɔ lɛ kpaaya ndu choo le wallo tosaa o dialuŋ naŋ niŋ te. Nyɛdiaa kɛndɔɔ dioo tosa miŋ wa kɛndiaa, kɛ mi o wɔɔŋndo dioo tosa miŋ naa. Ŋ di dɔɔ ko nyɛdiaa mbo chii naa wallo tosa o ŋdial o foofo le, kɛ o pɔmpɔmbɔ o tosa naa wallo o ŋdial ni.

¹⁴ Mɛɛ lende koni i cho a yelelaŋndo ni. Miŋ nɔ ndu kpaayaa choo teleŋ naŋ wa ndu hɛlioo wo. Kɛ te ŋ chii niŋ pɛ ndu tosa, ŋ nɔ lɛ kpaaya ndu choo le wallo tosaa o yiyaŋ naa niŋ a o kɔlta naalaŋ niŋ te. Mi yelelaŋ kɛndɔɔ chuu naa tɔnɔɔ tau, kɛ mi o wɔɔŋndo luei naa o kpundɔɔ niŋ. (Nuawɔ Chemisi 1:​14, 15.) Ŋ tosa dɔɔ ko yelelaŋ wɔɔŋndo miŋ che fulamakɔɔli ndɔɔ o foofo le, kɛ o pɔmpɔmbɔ fulamakɔɔli wɔɔŋndo huŋ ni. Le sabu koŋ Baabuiyo sila naa ni aa: “Wana o wana hui num pila ma mam Mɛlɛka le. . . . Yɛiyii wana saŋ o chiɛi numnde niŋ nde, ndi koni ŋ kuau ni. Te o wa pɛ mi waŋndo ndu dimi maa nyɛ wana chieeyɛi nduɛi i dimul ndu le tosaa wo maa nyɛ koŋ o tosa ni, mɛɛ tɔnɔ o cho hunɔɔ sɔla leniŋ ndo, ndu cho piɔmndo ni. Kɛ nduyɛ te o wa pɛ maa sɔɔŋ Nyina Mɛlɛkaa dimul num le tosaa woŋ maa muŋ ŋ tosa ni, mɛɛ yoomu kpeekpei nɔ lamɛɛlu le wo ndu Nyina Mɛlɛkaa o ke num ni.” (Kal 6:​7, 8) O cho bɔɔ suɛi sɔvɛ le miŋ fafaŋ yelelaŋnda nɔ sɔɔŋ Chɛhowa tul leyɛ woŋ leniŋ ndaŋ!—Sam 97:​10.

15. Yɛɛ Chɛhowa ke yɛ naa le miŋ tuei ndu yeela?

¹⁵ Wanaa Chɛhowaa a bɔɔbɔɔ tuɛi bɔɔ Tɛlivisiɔŋ Seiyaa Chɛhowaa^® tofaa yeela. Tɛɛŋgii nɛi hei nɔ sɔɔŋ nɔɔlɛi leniŋ te. Mi ndepilɛnɔ pilɛ diolaŋ aa Maliliŋ dimi aa: “Tɛlivisiɔŋ Seiyaa Chɛhowaa mala ya niŋ le waa a kɔl kɛndɛ, nduyɛ te I chal ndu pɛ tofaa, I nɔ buulaŋ maa I cho sɔɔŋ nɔɔlɛiyoŋ chɔ leniŋ te. Te I che pɛ maa I cho kpeele ɔɔ mi kɔllo tambu ya, I nuuviaa suɛi dɛɛniaa ya kɔllo ve ɔɔ Piɛile Idiile nda yɔŋgu o Bɛtɛɛl teŋ le nuaa. Keŋ mala ya niŋ le sɔɔŋgoo Chɛhowa ikɛi kpɛɛluŋ a kɔɔna ndɔɔ. Tɛlivisiɔŋ Seiyaa Chɛhowaa tosa niŋ mi sɔɔŋ siŋgaŋ tau o yoomu nuu niŋ.” A cho pa tɔnɔɔ sɔlaa o ke Chɛhowaa hoo niŋ? Ipaŋgu o ipaŋgu, mi buŋgaŋ sɛnɛiyoŋ fula o Tɛlivisiɔŋ Seiyaa Chɛhowaa choo. O fulawɔ o muŋ kɔɔli, ma handu vɛlɛ diomnda nda chualaŋ, chonduŋ yeelɛiyoŋ a vidueila ŋ nɔla ma tofa teleŋ o teleŋ ndaŋ.

16-17. Le yɛɛ naŋ nɔ yɛ miŋ soliŋ teleŋ naa kpeku nyɛkɛndɛi le yelelaŋndo tosaa, nduyɛ vɛɛ naŋ tosa yɛ keŋ?

¹⁶ O cho ko a yelelaŋ suu naŋ hɛli wo le naŋ nɔ miŋ mandaŋ te, kɛ ŋ nɔ vɛlɛ miŋ mandaŋ a mɛɛ kpɛ naŋ chua teleŋndo le ndu tosaa yɛ. Te ŋ tosa lende le, ŋ cho teleŋ naa soliŋ kpeku tau le yelelaŋndo mbo hiou teleŋ naŋ soliŋ kpeku le Chɛhowa piɛiyo wo. Mi wanaa bɔɔbɔɔ che ndi ikala le yɛlɛmiaa tosaa a teleŋ nda  chua le yelelaŋndo tosaa wo okɔɔ. Mi ndepilɛnɔ pilɛ diolaŋ aa Abi o cho wɔsilaŋ 18 wo dimi aa: “Tɛlivisiɔŋndo tofaa mala ya ni mi pɛŋgi nyɛkɛndɛi te I niilu pɛ kpɛŋ o wallo niŋ. Kɛ te I ve yekeŋ te, mi chua hawɛilaŋ tau le ndu tofaa.” Mi puaapilɛnɔ feleŋgɔnɔ pilɛ diolaŋ aa Saamiɛɛ bɛɛ dimi aa: “Teleŋnda bɔɔbɔɔ mi chua teleŋndo tau le vidueila biŋgi laŋ tofaa o intanɛtiiyo choo. Mi kandu a opilɛ, nduyɛ tuupa mi del kɔl, hawɛilaŋ layaa ɔɔ la hiɔɔlu hiaunuŋ niŋ.”

¹⁷ Vɛɛ ŋ soliŋ yɛ teleŋ numndo kpeku nyɛkɛndɛi le yelelaŋndo tosaa? Nyɛ tase ŋ nɔ ma tosa wo cho sinaa mɛɛ kpɛ ŋ chua teleŋndo le ndu tosaa yɛ ni. A nɔla pa ma poonyiaa teleŋ ŋ chua wo le lɔɔ opilɛ? Poonyiaa o yau ŋpaŋgoo choo mɛɛ kpɛ ŋ chua teleŋndo le tɛlivisiɔŋndo tofaa, yooŋgulaŋ nuaa o intanɛtiiyo choo, a pisultaŋ a nyɛ num mapuuloo yɛ. Te a sina pɛ maa a cho bɔɔ teleŋndo chuaa, mɛɛ tosa kɛɛsiaa. Kindiŋ ma tosa fɛŋ sɔɔŋ hiou wa ŋ sɔvɛ woŋ, okoŋ ma kɛsi niko teleŋndo le yelelaŋndo tosaa. Nyuna Chɛhowa le mbo mala num ma lo o kɛɛsiaa numndo choo. Te a tosa lende pɛ, a cho sɔla teleŋndo a yoomuaŋ le pɛɛkɔŋ ipilayaa, pɛɛku leyuŋgoo, kɔlaŋ o bɔŋaŋndaŋ a o wali pollo niŋ. Naapum a cho vɛlɛ teleŋ ŋ chua le yelelaŋndo wo tueiyɔɔ yeela kanifuule, a handu Chɛhowa wana tase o yoomu numndo niŋ.

18-19. Vɛɛ naŋ chɔm yɛ maa Chɛhowa ndupilɛ kpe naŋ cho piɛiyo ni?

¹⁸ Mɛɛ Pitɛ, wana Chiisu vem hɔlte ndɔ wo wa poonyiaa a mɛɛlula chieeŋ Setanaa hoo vɛlɛ a chieeŋ sɛnɛi cho hunɔɔ wo okɔɔ, mbo dimi aa: “Chaaŋaa niaa kaalaa, mɛɛ nya cho nuaa chumndo le paale sɔɔŋ muŋ ŋ cho yɔnɔŋ ndeŋ yɛ, la kindi o nɛi o nɛi niŋ, te la huŋ sim ndu o hɔl pɛ o hini kɔl a nya, la nɔ yɔŋ o yɔŋ wɔɔŋ te, nduyɛ la nɔ sɔŋ te.” (2 Pitɛ 3:​14) Te ŋ diikuŋ pɛ sila koŋ, nduyɛ miŋ kindiŋ le waa a diandaa o kaa naa niŋ a o Chɛhowa piɛiyo niŋ, mɛɛ ŋ dimi maa Chɛhowa ndupilɛ kpe naŋ cho piɛiyo ni.

¹⁹ Setana a chieeŋ ndɔɔ cho hiouwɔɔ lachi a naa tɔɔndaŋndo le miŋ handu nyɛm cheleŋndoŋ lachi o yoomu naa niŋ mbo hiou Chɛhowa piɛiyo. (Luku 4:​13) Kɛ mɛɛ mɛɛ simultaŋ la wa, ŋ nɔ miŋ chɛl mi nyɛ o nyɛ ɔɔ wana o wana wa o sɔvɛ o yoomu naa niŋ mbo hiou Chɛhowa piɛiyo le. Maa i wa naa o kɔl le Chɛhowa kioo nyɛ ndupilɛ kpe nɔ mbo sɔla wo, piɛiyo ndu a kɔllo kpou!