Wɔsila 40 la Isɔluɛiya chii o lɛŋnde polteŋ niŋndaŋ kpou, manɛiyo wa nyɛdiaa kpeekpei ndaa dia wo ni. (Ɛsɔ. 16:35) Mi Chɛhowa ke nda vɛlɛ wɔlla a teleŋnda yɛ yɛlaŋ latiɔɔŋ. (Ɛsɔ. 16:​12, 13; Nɔm. 11:31) Kɛ, Isɔluɛiya ndaa nɔ vɛlɛ nyɛdiaala cheleŋ le dioo.

Le tamaseliiyo, lepum mi Chɛhowa ndoo kuɛ a wana nduaa o “fondaŋ [ndaa] nɔ ma pɛŋgi wo.” Nduyɛ mi fondaŋnda laŋ laa nɔ nyɔɔŋ ŋ mala nda ma sɔla nyɛm nda hauba woŋ ndo. (Nɔm. 10:33) Fondaŋnda laŋ opilɛ wa Ilɛm ni. Nduyɛ “peela pɔmbɔlaŋ la wa loŋ 12 a wauwaŋ 70.” Wana che pɛ maa, o cho wauma kpeekpeiyaŋ te ma wa maŋ te. (Ɛsɔ. 15:27) Mi yau pilɛ suaa a tɔlɔɔla Baabuiyo soo a laŋ okɔɔ laŋ dimi maa, mi wauwaŋ maŋ ma “vil ba o ba fee. . . . Nduyɛ komɔɔ wauwaŋ maŋ kpeekpei waŋnda o fondaŋnda vesɛila bɔɔbɔɔ niŋ soliŋ kpeku ni le nyɛdiaa. Mi ma ke waŋnda haa o miiliɔŋndaŋ niŋ chuɛiyaŋ, a naa lɔlaa.”

Naapum, mi Isɔluɛiya ndaa pɛŋgi vɛlɛ o peela bɛndulaŋ ikɛi. Mɛɛ pee bɛndu nda veelu hau aa, Fɛlaŋndo cho nuaa yɛ. Pioo hoo del pee bɛndu nda veelu aa Wadi Fɛlaŋndo choo. a Mi yau pilɛ soo a Baabuiyo okɔɔ wo dimi maa, pioo hoo bandii nduɛi cho le “mɛɛliilaŋ 81. Nduyɛ o peela bandu tau o Sanai niŋndaŋ tɛɛŋ, pioo hoo cho opilɛ. O fondaŋ koŋ niŋ kpou, pioo hoo hiou naŋɔɔ, nduyɛ ndu waŋnda hiou sina.” Mi yau koŋ hiau lachi a dimioo aa: “Wauma kɛndɛ kɛndiaŋ ma cho o pee bɛndoo hoo ikɛi. Nduyɛ chɔŋ o fondaŋ pioo hoo kanduŋndo, kɔ naa wauwaŋ maŋ ma cho wa, tiŋndo wa le mɛɛliilaŋ 28. Wauwaŋ maŋ bandii nduɛi wa le mɛɛliilaŋ 3. Fondaŋ kɛndɛ kɛndɔɔ pila cho hoo ni o Sanai niŋ. Le naŋɔɔ fondaŋndo hoo, mi wanaa bɔɔbɔɔ kuɛ loŋ le challe.”

Mɛɛ Isɔluɛiya wa faŋaŋndo Ichipi, ma chua kpeyaŋndo, a hɛŋgɛila ndaa linda ndu laŋ. Nduyɛ wana che pɛ maa, ma chua vɛlɛ chuɛiyaŋ matiŋ a nyɛm cheleŋ. I cho tonya maa, nyɔɔŋ muŋ viu nda o laba le. Baabuiyo dimi maa, “ma kua vɛlɛ a saa, chuiŋnda a nauwa tau tau.” (Ɛsɔ. 12:​34-39) Kɛ le mɛɛ yoomoo wa o kala o lɛŋnde polteŋ niŋ yɛ, naapum mi chɔluaa kaŋ apum sɔla piɔmndo, ma dia apum, nduyɛ ma soli apum salalaŋ, hali o mɛlɛkaa lachoowaa lo. b (Walta. 7:​39-43) A koŋ kpou, mɛɛ nda kɛɛ laalaŋndo dɔwɔɔ o Chɛhowa  niŋ, diomnda o dimul nda laŋ la chɔm maa, ndaa nɔ wɔ chɔluaa o laba. Mbo dimul nda aa: “Chuauwaa nyaa cho wa wanaa mandaa lasaa o pollo hoo niŋ le wɔsilaŋ 40.” (Nɔm. 14:33) Wana che pɛ maa, mi chɔluaa kaŋ ndaa ke nda nɔnɔɔ. Nduyɛ lepum, mi ndaa sɔla visioŋ o nda niŋ. Kɛ naapum, visiŋ muŋ ve letuu le mi waŋnda miiliɔŋndaŋ layaa de muŋ le wɔsilaŋ 40 le. c

Kuɛɛ chɔluaa kaŋ ndaa sɔla yɛ nyɛdiaa a mɛŋndaŋ? d O sindɔɔ niŋ, naapum mi piɔɔ ndoo sia tau, nduyɛ mi tɔlɔɔlaŋ laa naŋ o lɛŋnde polteŋ niŋ. Mi Insight on the Scriptures, Volume 1 dimi maa, le wɔsilaŋ niŋ hiouwɔɔ 3,500, “mi mɛŋndaŋ maa wa tau o Aleebiaa niŋ mbo hiau mɛɛ ma cho loŋ suŋ suŋ yɛ. Peela velɛilaŋ ɔɔ kpoloŋnda cho loŋ ndaŋ la chɔm maa, mi piɔɔ ndoo sia loŋ tau o sindɔɔ niŋ. Le hei, mi mɛŋndaŋ maa wa o lɛŋnde leŋ niŋ tau.” A koŋ kpou, fondaŋ vesɛiyo a fondaŋ isiooŋndo pila lɛŋnde polteŋ le wa ni. (Ditɔnɔ. 8:​14-16) Te Chɛhowa ndoo tosa kaamaa le Isɔluɛiya mɛŋndaŋ kioo le, nda ni vɛlɛ a chɔluaa ndaa kpou wa piɔmndo sɔla.—Ɛsɔ. 15:​22-25; 17:​1-6; Nɔm. 20:​2, 11.

Mi Muuse dimul Isɔluɛiya maa, mi Chɛhowa ke nda manɛiyo “le halikpeŋ [ma] sina maa, o cho ko nyɛdiaa le tosa mi wana wa yoomu le. Kɛ diom o diom Chɛhowa dimi pɛ, o tosa mi wana wa yoomu.”—Ditɔnɔ. 8:3.