1-2. (a) A mɛɛ Chiisu dimi o Maatiu 28:​18-20 niŋ yɛ, wali yɛɛ Kilisiɔŋaa tonyaa kpede nɔ yɛ ma handu kɔllo choo? (b) Nyunala kuɛɛ naŋ cho yɛ yaasiaa o buŋgɛi hei niŋ?

MƐƐ Chiisu sɔla fulasɛiniŋndo, mbo dimul buɛiyaa nduaa le ma bɔɔŋiaŋ o pembii pilɛ choo. Naapum kɔllo wa buɛiyaa nduaa wuye wuye mɛɛ nda wa kɔlaŋ o fonda koŋ. (Maa. 28:​16) Kɛlɛŋgaa o paaleleŋ choo, “mbo chɔɔmuŋ wanaa laalaŋnda kunda, nda aa hiou kɛmɔɔ le ŋuɛɛnu.” (1 Kɔliŋ. 15:​6) Le yɛɛ Chiisu dimullɛ Buɛiyaa nduaa le ma bɔɔŋiaŋ o pembii keŋ choo? Le mbo ke nda wallo. Mbo dimul nda aa, “Lelaŋ, la kɔ o ŋwaŋnda chiee lo ba o ba fee mi la siiŋguu nda buɛiyaa ni.”—Nuawɔ Maatiu 28:​18-20.

² Buɛiyaa Chiisuaa wa o bɔŋaŋ koŋ mbo ke nda wallo hoo wa wa o kunda leKilisiɔŋ tasoo niŋ. Wali Kilisiɔŋnda haa ndaa handu kɔllo choo mbo hiau nyɛ o nyɛ wo wa waŋnda siiŋguu wo buɛiyaa Kilitiaa ni. * Hau, kundala Kilisiɔŋaa tonyaa cho o waalaŋ niŋ chieeŋndo balɔɔ silɔ. Nduyɛ, wali pilɔɔ hoo kpe nda bɛɛ handu kɔllo choo ni mbo hiau nyɛ o nyɛ. O buŋgɛi hei niŋ, ŋ cho yaasiaa nyunalaŋ la hiɔɔlu. Le yɛɛ waŋnda siiŋgoo buɛiyaa Chiisuaa cho yɛ wali sɔvɛ? Yɛɛ yeemaŋ yɛ le hei tosaa? Baa Kilisiɔŋnda kpou nɔ ni ma siiŋguu waŋnda buɛiyaa Chiisuaa? Nduyɛ, le sabu yɛɛ biuwɔŋndo yeemaŋ yɛ le wallo hoo tosaa?

3. A mɛɛ Chɔŋ 14:​6; 17:​3 dimi yɛ, le yɛɛ wali Chiisu ke naa le waŋnda siiŋgoo buɛiyaa ndɔ wo cho yɛ o sɔvɛ?

³ Le yɛɛ wali Chiisu ke naa le waŋnda siiŋgoo buɛiyaa ndɔ wo cho yɛ o sɔvɛ? Kanifuule, wanaa cho buɛiyaa Kilitiaa wa kinɛi simnuŋ chaaŋaa Mɛlɛkaa ni. Le handɔɔ lechoo, te waŋnda simnuŋ pɛ buɛiyaa Kilitiaa, ma tosa siŋgaŋnda mala nda le yoomoo tueiyɔɔ yeela suŋ suŋndo, nduyɛ ma nɔ vɛlɛ tiindaŋndo le yoomu fafɛɛŋndo sɔlaa o chilaŋ niŋ. (Nuawɔ Chɔŋ 14:​6; 17:​3.) Hei kɛsɛ chɔm ni maa wali sɔviɔɔ pila Chiisu ke naa hoo ni. Kɛ o cho a kpaaya naa le naŋ cho wallo hoo tosaa le. Mi Pɔɔl, wana Chiisu vem hɔlte ndɔ wo chɔm nyɛ mala ndu a chaaŋaa nduaa le wallo hoo tosaa wo. Mbo dimi aa, “Wanaa walla naŋ cho latulu a Mɛlɛka ni.” (1 Kɔliŋ. 3:​9, NW) Di bɛndoo pila Chɛhowa nda Chiisu ke waŋchieeyaa lahakiaa ni!

4. Yɛɛ suɛi yɔŋnaŋii Ivaŋ nda Matilda ve pɛɛku yɛ naa?

⁴ Nyaaloo pila wali dimiaa yooŋgu kɛndɔɔ chuu naa ni. Ŋ yaasiaŋndɔ taamasi Ivaŋ nda Matilda laandɔ wo, a cho Kolombiaa wa. Mɛɛ nda dimul po chua piaandu pilɛ diolaŋ aa Daviaa yooŋgu kɛndɔɔ, mbo dimul nda aa, “I yeema mi tosa siŋgaŋndaŋ o yoomu nuu niŋ, kɛ I nɔla le.” Wali Daviaa ndoo tosa le kanioŋ sɔlaa wo wa chɔulaba la bɔtaa ni. Mi ndoo kol vɛlɛ muɛiyaŋ tau a taŋ bɛndoo, nduyɛ ndoo nɔ samaa diolaŋ aa Ɛlika. Mi Ivaŋ dimi aa, “Miŋ kandu ndu Baabuiyo pɛɛkoo. Mi che bɛɛ a nɛɛsoola naalaŋ naŋ kua ni, kɛ mi naŋ viou o nɛi tau kanifuule tiŋndo pila ndoo bandu le kɔlaŋ o sɔndɔkɔlɔ ndɔɔ ni. Mɛɛ Ɛlika che maa Daviaa sama ndɔ kandu kaala ndɔla wɔɔŋndaŋ malɔɔ, mi ndu bɛɛ kandu Baabuiyo pɛɛkoo.” Mɛɛ nyɔɔ viou tiŋ, mi Daviaa mal muɛiyaŋ a taando kolɔɔ, nduyɛ mbo soli balaŋ o chɔulaba la bɔtaa niŋ. Mbo soli vɛlɛ yau nɔɔ le Ɛlika sama ndɔ. Mi Matilda bɛɛ dimi aa, “Mɛɛ Daviaa nda Ɛlika wa yiŋɔɔ o wɔsi 2016 niŋ, miŋ loonuŋ maa mi Daviaa ndoo dimi aa, ‘I yeema mi siŋgaŋ kɛ I nɔla le.’ Mi mɛmɛma kɔl kɛndiaŋ ma tual naa kpasu kpasu.” Wana dimi isɔɔ a tonya, mi kɔllo naŋ naa tau te ŋ mala pɛ waŋnda ma simnuŋ buɛiyaa Kilitiaa.

5. Ɔɔ nyɛ tase yeemaŋ le waŋnda siiŋgoo buɛiyaa Chiisuaa wo?

⁵ Nyɛ tase yeemaŋ le waŋnda siiŋgoo buɛiyaa Chiisuaa wo cho “nuuviaa” wanaa yeema le pɛɛkoo a Chɛhowa okɔɔ wa ni. (Maa. 10:​11) Ŋ chɔm maa Seiyaa Chɛhowaa kɛsɛ naŋ cho ni te ŋ dimul pɛ wana o wana naŋ komal yooŋgu kɛndɔɔ. Nduyɛ, ŋ chɔm vɛlɛ maa Kilisiɔŋaa tonyaa naŋ cho ni te ŋ tosa pɛ wali dimiaa yooŋgu kɛndɛ Kiliti ke naa wo.

6. Yɛɛ mala yɛ naa le batiuwaa sɔlaa o wali pollo niŋ

⁶ Waŋnda apum nɔ yeemɛi tau le Baabuiyo pɛɛkoo, kɛ apum o tasela ndɔ, ma chɔm maa a nɔ iyeema kposoŋ te. Ŋ nɔ miŋ dɛɛniaa wanaa chɔm haa iyeema le wa le mi ndaa bɛɛ chɛl le pɛɛkoo. Le miŋ sɔla batiuwaa o wali pollo niŋ, mɛɛ miŋ bɛɛndiaŋ nyɛkɛndɛi tuupa miŋ kuɛ. Te a wa pɛ bɛɛndiaŋndo, a nɔ ma hɛli sɔɔŋ pilaŋ wanaa ŋ cho komalla kɔllo woŋ. Okoŋ, ma yiyaŋ niko a mɛɛ ŋ cho lakɔ suɛi kandɔɔ yɛ.

7. Vɛɛ ŋ kandu yɛ suukaŋndo a waŋndo? Le yɛɛ i cho yɛ suɛi sɔvɛ miŋ yaŋ wanaa naŋ komalla nilaŋ, nduyɛ miŋ ke nda bɛɛleŋ?

⁷ Le taamaseliiyo, a dimul wana ŋ komallo aa, “Yandii I yeema mi nyuna num a suɛi pum okɔɔ. Chieeŋndo balɔɔ silɔ, wana o wana nɔ hau bahawɛilaŋ o yoomoo niŋ. A yiyaŋ pa maa masale wanachioo nɔla bahawɛila naalaŋ chii?” Te waŋndo muli pɛ, a chɔm ndu nyɛ Daaniɛɛ 2:​44 dimi wo. A nyuna vɛlɛ waŋndo aa, “Yɛɛ num yiyaŋ yɛ maa o mala hau naa le chuauwa manda sɔviɔɔ kioo?” Te o chɔm num  pɛ yiyaŋ ndɔɔ, chɔm ndu sila cho o Ditɔnɔmii 6:​6, 7 niŋndo. Nyɛ o nyɛ ŋ hɛli pɛ le suɛi a ndu okɔɔ o wali pollo niŋ, o bɛnda ma yiyaŋ a wanaa ŋ cho komalla okɔɔ. Yiyaŋ a mɛɛ nyɛ ŋ cho nda dimullo mala niŋ nda o yoomu ndaa niŋ yɛ. Te a wa pɛ suukaŋndo a nda, o bɛnda bɔɔ ma yaŋ nda nilaŋ te a wa pɛ suɛi. Ke nda bɛɛleŋ o yɔŋ bɛɛ mi yiyaŋ ndaa chɛlaŋ a nyɛ Baabuiyo dimi wo le. Te a tosa lende pɛ, mɛɛ a nɔla ma chɔɔlu nda biyɔɔ bila, nduyɛ mi nda bɛɛ wa fɛɛsɛŋ le suukaŋndo a num.

8. Le yɛɛ naŋ nɔ yɛ miŋ lambaŋ miiŋgoo o wanaa naŋ komalla lo?

⁸ Le mi waŋndo chɛl le Baabuiyo pɛɛkoo, mɛɛ ma dɔu sɛmbɔɔ le miiŋgoo o ndu lo teleŋnda bɔɔbɔɔ. Le yɛɛ hei yeemaŋ yɛ? Lepum te ŋ miiŋgu pɛ o waŋnda lo, ŋ komal nda le. Lepum yɛ, mɛɛ miŋ miiŋgu le teleŋnda bɔɔbɔɔ malaŋ wana chiɛiyo wa fɛɛsɛŋ a naa. Nduyɛ o mɛɛlulaŋ kpɔŋ, mbo chɛl niko le Baabuiyo pɛɛkoo. Kɛsiŋ o kɔl maa le mi tɔlɔɔ hindu, mɛɛ mbo wa mɛŋndaŋ sɔlaa lɔɔlɔɔ. Mɛɛ lende ko i cho a wanaa nɔ yeemɛi le Baabuiyo pɛɛkoo wa ni. Le mi kaala nda nɔ le Chɛhowa vɛlɛ a Kiliti wo hiou lachi, mɛɛ miŋ wa nda Diom Mɛlɛkaa pɛɛkoo lɔɔlɔɔ.

9-10. Taamaselii kuɛɛ chɔm yɛ maa Kilisiɔŋnda kpou mala waŋndo ni mbo simnuŋ buɛi Kilitioo?

⁹ Kilisiɔŋnda kpou tosa wallo ni le wanaa yeema pɛɛkoo a Chɛhowa okɔɔ wa nuuviaa. Ŋ tuu wali dimiaa yooŋgu kɛndɔɔ a chɛlɛkpɛ luusiaŋ ndo nuuviaa. O nɛi kuɛɛ choo? Ŋ dimi wɔ maa poombɔ wɔsila yaa wo luusiaŋ waŋndo o ba mi waŋnda 500 fula le ndu nuuviaa. Nda kpou ma nuuviaa ndu le hawɛilaŋ 20 kɛ a seeluŋ ndu le. O mɛɛlulaŋ kpɔŋ, mi wana pilɛ nda tɛɛŋ kɔ saaluŋ poombɔɔ hoo yondoo niŋ pɔ. Kɛ mɛɛ waŋnda wa ndu lisaa le mɛɛ o saaluŋ ndu yɛ, mbo kuuna nda. Mbo dimul nda aa, “O cho ya pilɛ le saaluŋ poombɔɔ hoo le,  wanaa bɔɔbɔɔ dɔu balaŋ diompilɛ ni le ndu nuuviaa.”

¹⁰ Wanaa bɔɔbɔɔ cho hau maa poombɔ luusiaŋ koŋ ndo. A nɔ lɛ tiindaŋ o yoomu ndaa niŋ te, kɛ a yeema malaa. (Ɛfi. 2:​12) Chieeŋndo balɔɔ silɔ, naŋ cho waŋnda haa nuuviaa wa ŋ hiou miiliɔŋndaŋ la ŋɔmaa. Naapum mbo wa ikala le ma saaluŋ wana ŋ pɛɛku Baabuiyo wo o tanda numndo niŋ. Kɛ mi wanaa dimiaa yooŋgu kɛndiaa a piliaa saaluŋ wana nɔ yeemɛi le Diom Mɛlɛkaa pɛɛkoo wo o tanda koŋ niŋ. Te puaapilɛnɔɔ ɔɔ ndepilɛnɔɔ saaluŋ pɛ wana nɔ yeemɛi le Baabuiyo pɛɛkoo wo, nduyɛ mbo simnuŋ buɛi Kilitioo, mɛɛ wanaa dɔu balaŋ diompilɛ le wana koŋ nuuviaa wa bɛɛ nɔ ma dɔunuŋ nyaale.

11. Nɛila cheleŋ kuɛɛ ŋ mala yɛ le waŋnda siiŋguu wo buɛiyaa Kilitiaa o yɔŋ bɛɛ ma nɔ wɔ wana ŋ pɛɛku le?

¹¹ O yɔŋ bɛɛ ma nɔ wɔ wana ŋ pɛɛku Baabuiyo suŋ suŋ te, a nɔla ma mala o nɛila cheleŋ niŋ le waŋnda siiŋguu wo buɛiyaa Kilitiaa. Le taamaseliiyo, te a che pɛ wanaa sɛnɛiya o Toŋgo leMasaa, yil nda a dialuŋ fulaa, nduyɛ ma bii nda ichaŋya. Te a chɔm nda pɛ kaalaa o nɛi koŋ choo, a cho laalaŋ kɛsɛ maa Kilisiɔŋaa tonyaa naŋ cho ni. (Chɔŋ 13:​34, 35) Mulila ŋ yɔŋgu o bɔŋaŋndo laŋ la mala wanaa sɛnɛiya haa le mi nda bɛɛ kandu mulilaŋ yɔŋgoo. A kua vɛlɛ a wana kandu yooŋgu kɛndɔɔ dimioo sɛnɛiyo o wali pollo niŋ le ma chɔm ndu mɛɛ wana soliŋ Baabuiyo kpeku le waŋnda pɛɛkoo yɛ. Te a tosa lende pɛ, mɛɛ malaa ŋ wa ndu koŋ le taamasi Kilitioo tuulaa a mɛɛ ndoo pɛɛku waŋnda yɛ ni.—Luku 10:​25-28.

12. Baa mɛɛ miŋ nɔ kɔl kaloo tau malaŋ naŋ siiŋguu waŋnda buɛiyaa Chiisuaa? Chɔmndɔ taamaseliiyo.

¹² Wana o wana nɔ mbo yiyaŋ maa mɛɛ miŋ nɔ kɔl kaloo tau malaŋ naŋ siiŋguu waŋnda buɛiyaa Chiisuaa le. Le yɛɛ naŋ dimi yɛ lende? Ŋ yaasiaŋndɔ taamasi Fɔsitina o cho Bolivia wo. Teleŋ chuaa hoo kandu pɛɛkoo a Seiyaa Chɛhowaa wo, ndoo chiee diomndaŋ veeloo kposoŋ te. Mbo pɛɛku le diomndaŋ veeloo, nduyɛ o chaa niŋ o pɔmpɔmbɔ. O yiŋ niŋ, nduyɛ kaalaa pila o kaala waŋnda pɛɛkoo ni. O lɔɔ o lɔɔ bɛŋgu, waŋnda a ŋuɛɛnu o pɛɛku Baabuiyo ni. Mi che bɛɛ wanaa Fɔsitina pɛɛku wa apum hiou ndu chaa diomndaŋ veeloo, kɛ wanaa ŋɔmpum o mala wɔ ni ma sɔla yiŋɔɔ.—Luku 10:​21.

13. O yɔŋ bɛɛ miŋ wa kpɔndi kpɔndi, tɔnɔla kuɛɛ naŋ sɔla yɛ te ŋ kindiŋ pɛ le wali dimiaa yooŋgu kɛndɔɔ tosaa?

¹³ Kilisiɔŋaa bɔɔbɔɔ nɔ hau kalaŋndaŋ tau. Le hei, lepaa o lepaa yoomu ndaa wa bɔɔ kpɔndi kpɔndi. Kɛ a koŋ kpou, ma nuuviaa teleŋndo le waŋnda Baabuiyo pɛɛkoo, nduyɛ nyaaloo pila nda sɔla ni le keŋ tosaa. Tofawɔ taamasi Melani o cho Alaska wo. Ndupilɛ wa chuaambɔ ndɔ wɔsila ŋɔmaa wo mandaa ni, o ve nda pɔnɔ ndɔ le. Lepaa o lepaa, mi ndoo niilu kpɛŋ o wallo niŋ, nduyɛ o wa vɛlɛ finya ndɔ ndoo nɔ naa kaŋsɛiyo wo mandaa. Melani  ndupilɛ kpe wa Sei Chɛhowaa o chiee ndɔɔ niŋ ni. Mi ndoo piɛi o Chɛhowa lo le mbo ke ndu yoomuaŋ le kɔlaŋ yooŋgu kɛndɔɔ dimioo. Ndoo nɔ bɔɔ yeemɛi le sɔlaa wana o pɛɛku Baabuiyo wo lelaŋ, mi ndoo fula o hueiyii misisie niŋ le kɔlaŋ yooŋgu kɛndɔɔ dimioo. Mbo komal Sela o wali pollo niŋ paale pilɛ nduyɛ mbo chɔm ndu diola Mɛlɛkalaŋ. Mi kɔllo naŋ chuaa hoo tau le sinaa maa Mɛlɛka nɔ diolaŋ. Mɛɛ nyɔɔ viou tiŋ, mi Sela chɛl le Baabuiyo pɛɛkoo. Mi Melani dimi aa, “A paale yɔŋgaŋndeŋ o Chimɛiyo choo, saŋgaa wa ya bɔɔ o dialloŋ niŋ. Kɛ naa chua nuu, mi naŋ sɔla tɔnɔɔ te naŋ kuɛ pɛ chuaa hoo pɛɛkoo. Mi kɔllo ndoo naŋ naa tau te naŋ wa pɛ mulilaŋ nuuviaa le nyunala ndɔlaŋ mulioo, nduyɛ mi nyɔɔ hɛnaŋ naa tau le mɛɛ o wa simnɔŋndo chaaŋ o Chɛhowa yɛ.” Mi Sela sim yi mɛɛ waŋnda simul ndu le pɛɛku o wa wo. Mbo fulaŋ o kaŋnde ndɔleŋ niŋ, nduyɛ mbo sɔla yiŋɔɔ.

14. (a) Le yɛɛ Chiisu tuu yɛ wanaa dimiaa yooŋgu kɛndiaa a wanaa yɔɔyaa? (b) Vɛɛ ŋ duau yɛ sila cho o Timoti Diiŋ Ndɔɔ 4:​1, 2 niŋndo o wali niŋ?

¹⁴ Wu ŋdial le wanaa ŋ pɛɛku wa nuuviaa le, o yɔŋ bɛɛ ma keleŋa nda saalɔŋ te. Kɛsiŋ o kɔl maa mi Chiisu tuu wanaa dimiaa yooŋgu kɛndiaa a wanaa yɔɔyaa. Lepum, mɛɛ mi wanaa yɔɔyaa yɔɔya fɛŋ le teleŋ vilɛi malaŋ nda bii suuwa. Teleŋnda bɔɔbɔɔ, ma lo yɔɔyaa haaa mi nyumndaŋ ma tol kpiŋgbi. Teleŋndaŋ lapum yɛ, ma pena fula idii puŋ nduyɛ ma kuɛ landaŋ le suuwa saalɔŋndo. (Luku 5:​5) Mɛɛ lende ko wanaa dimiaa yooŋgu kɛndiaa tosa ni. Mi apum chua teleŋndo tau le wanaa yeema Baabuiyo pɛɛkoo wa “nuuviaa.” Lepum  pɛŋ, ma siŋga teleŋ nda fula le yooŋgu kɛndɔɔ dimioo wo, a fonda nda dimi ndu wo. Le yɛɛ? Le halikpeŋ maa saaluŋ wanaa yeema tonya Baabuiyo pɛɛkoo wa. Mi Mɛlɛka dɔu wanaa kindiŋ haa kpoke le wanaa naŋ pɛɛku wa nuuviaa wa sala ma saaluŋ wanaa nɔ yeemɛi ya. A nɔla pa ma fula yooŋgu kɛndɔɔ dimioo a teleŋ waŋnda wa o la nda lo bɛɛ wo, ɔɔ ma kuɛ o fondaŋ ŋ sina maa waŋnda wa lɔɔlɔɔ wo?—Nuawɔ Timoti Diiŋ Ndɔɔ 4:​1, 2.

15. Le yɛɛ biuwɔŋndo yeemaŋ yɛ le waŋnda Baabuiyo pɛɛkoo?

¹⁵ Le yɛɛ biuwɔŋndo yeemaŋ yɛ le waŋnda Baabuiyo pɛɛkoo? Saboo opilɛ cho ni, o cho ko tonya cho o Baabuiyo niŋndo le naŋ nɔ miŋ pɛɛku waŋndo nduyɛ mbo kaala ndu le. Kɛ ŋ nɔ vɛlɛ miŋ mala ndu mbo sina Wana nɔ Baabuiyo wo Chɛhowa, nduyɛ mbo kaala ndu. O faŋaŋndɔ wana naŋ cho pɛɛkoo wo chɔmndo sɔɔŋ Chiisu dimul buɛiyaa nduaa le tosaa woŋ kɔɔli, ŋ nɔ vɛlɛ miŋ chɔm ndu mɛɛ o duau muŋ o wali niŋ yɛ. Ŋ nɔ miŋ biunuŋ te ŋ wa ndu pɛ malaa nduyɛ mbo wa kindiŋndo le sawala mandaala Baabuiyo dɔwɔɔ o wali niŋ. Mi wanaa naŋ pɛɛku wa apum tosa siŋgaŋndaŋ o yoomu ndaa niŋ o teleŋ biŋgi bɛŋgu. Kɛ apum yɛ, mbo chua nda teleŋ vilɛi malaŋ nda siŋgaŋ.

16. Yɛɛ taamasi Luwallo pɛɛku yɛ num?

¹⁶ Nyɛ yɔŋnuŋ misiɔnalueinɔ pilɛ o lɛŋnde Pɛlu leŋ niŋndo mala naa miŋ sina sabu biuwɔŋndo naŋ ndo. Mbo dimi aa, “Yaulaŋ latiɔɔŋ ya pɛɛku wana ni pɛɛkaa pilɛ ni diolaŋ aa Luwal. Kɛ ndoo nɔ wɔ bɔɔ bahawɛilaŋ o yoomu ndɔɔ niŋ. Lepaa o lepaa, mi ndaa sɛɛŋgiaŋ nda laa ndɔ, nduyɛ yeiyo pila ndoo yei ni. Le saboo hoo, chuauwaa nduaa ndaa ke ndu lebɛɛ kposoŋ te. Kɛ lɔɔlɔɔ mi ndoo hiŋ o bɔŋaŋndaŋ, ya bɛɛ mi hiau lachi a kɔlaŋ o ndu lo le ndu a yuŋgu ndɔɔ malaa. Chɔŋ a paale tasele ya komal ndu leŋ, ndoo hiou wɔsilaŋ layaa tuupa mbo suliŋ le yiŋɔɔ.”

17. Yɛɛ naŋ cho yɛ pɛɛku o buŋgɛi cho lachi ve niŋ?

¹⁷ Mi Chiisu dimul naa aa, “la kɔ o ŋwaŋnda chiee lo ba o ba fee mi la siiŋguu nda buɛiyaa ni.” Le miŋ tosa wali o ke naa hoo wo, lepum miŋ kindiŋ kpoke le suukaŋndo a wana o wana. Miŋ komal waŋnda apum a naŋ nɔ laalaŋnda pilɛ le wa, ɔɔ a nɔ lepiɛi le wa. Apum laalaŋ pɛŋ maa Mɛlɛka cho le. Buŋgɛi cho lachi ve cho naa chɔm nɛila naŋ dimul waŋnda haa yooŋgu kɛndɔɔ laŋ.