1. Yɛɛ Chɛhowa tosallɛ num niŋ?

VƐƐ ŋ looku yɛ simnɔŋ Sei Chɛhowaa? O tasoo, kɛlɛŋgaa wanaa velu num nda, chaaŋ num o wallo niŋ ɔɔ chaaŋ num o sukuu dimul num yooŋgu kɛndɔɔ ni. Ɔɔ naapum, Seiyaa Chɛhowaa lo yooŋgu kɛndɔɔ dimioo chiɛiyo a chiɛiyo ni ma komal num. (Maki 13:​10) O faŋaŋ okoŋ kɔɔli, mi waŋndo duau sɛmbɔɔ nduyɛ mbo chua teleŋndo tau le num Baabuiyo pɛɛkoo. A teleŋ nya wa koŋ pɛɛkoo wo, mi kaala numndo le Chɛhowa chɔɔlu hindɔɔ, nduyɛ ma pɛɛku maa ndu bɛɛ kaala num tau. Mi Chɛhowa huŋ a num o tonyaa niŋ. Nduyɛ le mɛɛ ŋ cho niŋ buɛi Chiisu Kiliti wo yɛ, a nɔ tiindaŋndo le hunɔɔ yoomu fafɛɛŋndo sɔlaa o chilaŋ niŋ. (Chɔŋ 6:​44) I cho kpendekele maa a nɔ balika melaa le Chɛhowa, le mɛɛ o soliŋ waŋndo kpeku le num tonyaa pɛɛkoo yɛ, a le mɛɛ o chɛl num le waa buɛi ndɔɔ yɛ.

2. Yɛɛ naŋ cho yɛ yaasiaa o buŋgɛi hei niŋ?

² Mɛɛ naŋ sina niŋ naa tonyaa yɛ, naa bɛɛ nɔ dikeŋnaŋndo le acheleŋnda malaa mi nda bɛɛ tol naa kɔɔli le kɔlaŋ o nɛi yaa wana o yoomu kpeekpeiyo wo choo. Miŋ che ndi tɛtɛlɛ le yooŋgu kɛndɔɔ dimioo chiɛiyo a chiɛiyo. Kɛ i ve bɛɛŋ bɛɛŋ le pɛɛkula Baabuilaŋ kandɔɔ a waŋnda le. Te o yɔŋ pɛ maa bahawɛi numndo cho koŋ ni, mɛɛ kɛɛsiaala cho o buŋgɛi hei niŋndaŋ la tiuba mi la mala num tau. O buŋgɛi hei niŋ, ŋ cho yaasiaa nyɛ mala naa le waŋnda siiŋguuwo buɛiyaa Chiisuaa wo. Ŋ cho vɛlɛ chɔ mɛɛ naŋ tiu simulta kuuna naa le waŋnda Baabuiyo pɛɛkoo laŋ ba yɛ. Le kandɔɔ, ŋ yaasiaŋndɔ fɛŋ le sabu naŋ nɔ miŋ dimul waŋnda yooŋgu kɛndɔɔ nduyɛ miŋ pɛɛku nda wo.

3. Le yɛɛ naŋ dimi yɛ yooŋgu kɛndɔɔ?

³ Teleŋ Chiisu wa o chieeŋndo choo wo, mbo dimul buɛiyaa nduaa le ma tosa sɔɔŋ ŋmuuŋ o wali o ke nda wo niŋ. I tasei, mbo  dimul nda le ma dimul waŋnda yooŋgu kɛndɔɔ a masale Mɛlɛkaleŋ okɔɔ. Nduyɛ, mbo chɔm nda mɛɛ nda nɔ ma dimi ndu yɛ. (Maa. 10:​7; Luku 8:​1) Le taamaseliiyo, mbo chɔm nda nyɛ nda nɔ ma tosa wo te waŋnda yaŋ nda pɛ nilaŋ, ɔɔ te a kɛɛ pɛ le nda nilaŋ yaŋɔɔ. (Luku 9:​2-5) Mbo dimul nda vɛlɛ mɛɛ kpɛ wali dimiaa yooŋgu kɛndɔɔ nɔ mbo pɛŋgɛlaŋ yɛ. Mbo dimi maa a nɔ le ndu tosaa “ba o ba fee o chieeŋndo choo.” (Maa. 24:​14; Walta. 1:​8) Buɛiyaa Chiisuaa ndaa nɔ ma dimul waŋnda a Masale Mɛlɛkaleŋ okɔɔ vɛlɛ a sɔɔŋ le cho hunɔɔ tosa woŋ, mɛɛ o mɛɛ waŋnda ndaa yiyaŋ a yooŋgu kɛndɔɔ okɔɔ.

4. A mɛɛ Maatiu 28:​18-20 dimi yɛ, yɛɛ cheleŋ naŋ nɔ yɛ miŋ tosa o faŋaŋ o yooŋgu kɛndɔɔ dimioo kɔɔli?

⁴ Ɔɔ suɛi diiŋ nduɛi o wali Chiisu ndoo ke buɛiyaa nduaa le tosaa wo niŋ? Mbo dimul nda le ma pɛɛku wanaa nɔ yeemɛiya ma tosa nyɛ o nyɛ o dimul naa le tosaa. Kɛɛ baa Kilisiɔŋnda o wɔsiŋ kɛmɛ tasoŋ niŋ koni ndaa nɔ ni ma dimul waŋnda yooŋgu kɛndɔɔ nduyɛ ma pɛɛku nda? Sako. Mi Chiisu dimi maa wallo hoo nɔ mbo hiou lachi a tosaŋndo haaa o palɛi nɛi niŋ. Mbo dimi vɛlɛ pɛŋ maa, o nɔ mbo tosaŋ “haaa mi chieeŋndo fuuluu o mɛɛlulaŋ.” (Nuawɔ Maatiu 28:​18-20.) Naapum a teleŋ o miiŋgu yoomu nduyɛ mbo fula waŋnda 500 o hɔllo o ke nda wallo hoo le tosaa ni. (1 Kɔliŋ. 15:​6) O yilaŋii o chɔm Chɔŋ nde niŋ, mi Chiisu chɔm kpendekele maa buɛiyaa nduaa kpou nɔ ma mala acheleŋnda le ma pɛɛku a Chɛhowa okɔɔ.—Sɔɔŋ. 22:​17.

5. A mɛɛ Kɔliŋtiaŋ Tasoo 3:​6-9 dimi yɛ, vɛɛ Pɔɔl chɔm yɛ mɛɛ wali dimiaa yooŋgu kɛndɔɔ chiɛɛliaŋ a waŋnda pɛɛkoo yɛ?

⁵ Mi kiilanɔɔ Pɔɔl tuu waŋnda siiŋguuwo buɛiya a mɛɛ waŋnda tual naa tɔlɔɔlaŋ yɛ. Mbo chɔm maa o cho ko kulloŋ tɔlɔɔ le yeemaŋ te. Le hei mbo loonuŋ Kɔliŋtiaŋnda aa: “Ya tɔl ni, mi Apɔlɔɔ ndu pɔɔliaa. . . . Nya cho chiɛi Mɛlɛka cho tosaa ve ni.” (Nuawɔ Kɔliŋtiaŋ Tasoo 3:​6-9.) Le mɛɛ naŋ cho wanaa walla o ‘chiɛi Mɛlɛkɛi’ niŋ yɛ, o cho ko kulloŋ te naŋ tual te. Kɛ miŋ pɔɔla muŋ, nduyɛ miŋ hiou lachi a muŋ tofaa teleŋ o teleŋ le chɔɔ mɛɛ ŋ cho hindɔɔ yɛ. (Chɔŋ 4:​35) Nduyɛ ŋ nɔ miŋ sina maa Mɛlɛka tosa ni mi tɔlɔɔ kalaa hindu.

6. Yɛɛ yeemaŋ yɛ o waŋnda pɛɛkoo niŋ?

⁶ Ŋ cho ‘wanaa nɔ yeemɛi le chɛlɔɔ tonya yɔŋgu yoomu fafɛɛŋndo wo wa’ nuuviaa. (Walta. 13:​48) Le mi waŋnda haa simnuŋ buɛiyaa Chiisuaa, ŋ nɔ miŋ mala nda ma (1) sina sɔɔŋ cho o Baabuiyo niŋndoŋ, (2) chɛl sɔɔŋ nda pɛɛku muŋ o Baabuiyo niŋndoŋ, nduyɛ (3) dɔu nyɛ nda cho pɛɛkoo wo o wali niŋ. (Chɔŋ 17:​3; Kolo. 2:​6, 7; 1 Tɛsa. 2:​13) Wana o wana o kundaa niŋ tiuba mbo mala wanaa cho Baabuiyo pɛɛkoo wa te o yɔŋ pɛ mbo kɛsi taamasi kɛndɔɔ le nda kaalaa chɔmndo, a nda malaa ma wa fɛɛsɛŋ te a kuɛ pɛ o bɔŋaŋndaŋ. (Chɔŋ 13:​35) Wana cho waŋndo Baabuiyo pɛɛkoo wo nɔ mbo chua teleŋndo tau, nduyɛ mbo soliŋ yoomuma nduaŋ kpeku le wana o cho pɛɛkoo wo malaa le mbo mal laalaŋnda lachoowalaŋ, a kaala wɔɔŋnda cho ndu la tualnaŋ o kɔl taŋ. (2 Kɔliŋ. 10:​4, 5) Mbo chua fɛŋ paŋguŋ bɔɔbɔɔ le wana waa ndoo malaa mbo mal kaalaŋ ndaŋ, le halikpeŋ mbo suliŋ le yiŋɔɔ. Kɛ i cho bɔɔ suɛi sɔvɛ le hei tosaa.

7. Yɛɛ nyindu yɛ naa le waŋnda yooŋgu kɛndɔɔ dimullo a nda siiŋguuwo buɛiyaa Chiisuaa?

⁷ Le yɛɛ naŋ yɔŋguŋ yɛ wulee le waŋnda yooŋgu kɛndɔɔ dimullo a nda malaa ma simnuŋ buɛiyaa Chiisuaa? Sabu tasoo cho ni, le mɛɛ naŋ kaala Chɛhowa yɛ. Te a tosa pɛ mɛɛ ŋ tiuba yɛ le waŋnda yooŋgu kɛndɔɔ dimullo a nda malaa ma simnuŋ buɛiyaa Chiisuaa, mɛɛ keŋ chɔm maa a kaala Chɛhowa. (1 Chɔŋ 5:​3) Yiyaŋndɔ a hei okɔɔ: Kaala ŋ nɔ le Chɛhowa wo nyindu num niŋ le yooŋgu kɛndɔɔ dimioo chiɛiyo a chiɛiyo. Baa i wa pɛ tɛtɛlɛ le hei tosaa? Sako.  Baa a wa pa a siooŋnde paale tasele ŋ kuɛ yooŋgu kɛndɔɔ dimioo leŋ? O kpeekpei niŋ, a wa a siooŋnde. Kɛ le mɛɛ ŋ sina maa wali Chiisu dimul naa le tosaa wo cho koŋ ni yɛ, ma diikuŋ le ndu tosaa. Nduyɛ wana dimi isɔɔ a tonya, mɛɛ teleŋ tiŋ hiou, ma cha ndi tɛtɛlɛ le yɔŋgɔŋndo o wallo hoo niŋ. Kɛ ɔɔ niŋ a waŋndo Baabuiyo pɛɛkoo okɔɔ? Baa mi siooŋnde bii num pa te a yiyaŋ pɛ a ndi okɔɔ? Naapum. Kɛ te o yɔŋ pɛ ma nyuna Chɛhowa o piɛileŋ niŋ le mbo mala num ma kandu waŋndo Baabuiyo pɛɛkoo, o cho num kɔl simulaa ke le hei tosaa.

8. A mɛɛ Maki 6:​34 dimi yɛ, yɛɛ cheleŋ nyindu yɛ naa le waŋnda Baabuiyo pɛɛkoo?

⁸ O diiŋ ndɔɔ, kaala naŋ nɔ le chaaŋaa naa waŋnda chieeya wo nyindu naa vɛlɛ ni le nda pɛɛkoo tonya cho a Mɛlɛka okɔɔ wo. Paale pilɛ, mɛɛ Chiisu a buɛiyaa nduaa niilu yooŋgu kɛndɔɔ dimioo kpɛŋ, ma yeema fondaŋ pɛŋgiaa nuuviaa kanifuule a wa a saŋgɛiya yɔkɔɔ. Kɛ mi faŋga bɛndu bɛndoo tual nda kɔɔli, nduyɛ ma saaluŋ nda. Le mɛɛ Chiisu ndoo nɔ nyiɛɛye le nda yɛ, mbo kandu nda “sɔɔŋ pɛɛkoo tau.” (Nuawɔ Maki 6:​34.) Mi che bɛɛ Chiisu wa o saŋgɛiyo, kɛ mbo yɔŋguŋ le nda malaa. Le yɛɛ? Kanifuule, mbo duau ndupila o foofo ndaa. Mbo cha mɛɛ kpɛ nda wa saŋgaa yɛ, a mɛɛ kpɛ ndaa yeema tiindaŋndo yɛ. Okoŋ mbo kɛɛsiaa le nda malaa. Hau bɛɛ waŋnda nɔ bahawɛilaŋ, nduyɛ a yeema tiindaŋndo mi che bɛɛ ma chɔm o hɔlla maa a cho a kɔl kɛndɛ vɛlɛ maa a nɔ kɔl hiniaa o yoomoo niŋ. Waŋnda haa cho ko mɛɛ saa wa naa a nɔ wana mandaa le yɛ. Mi Pɔɔl suaa a waŋnda haa okɔɔ maa a sina Mɛlɛka le, nduyɛ maa a nɔ tiindaŋ o tiindaŋ te. (Ɛfi. 2:​12) Waŋnda haa cho vɛlɛ o “dio yaa wana o tambei niŋndo” choo. (Maa. 7:​13) Te ŋ yiyaŋ pɛ mɛɛ wanaa cho o tanda naa niŋnda cho saŋgaa le sinaa a Mɛlɛka okɔɔ yɛ, mi kaalaa a nyɛiyii naŋ nɔ le nda ve nyindu naa le nda malaa. Nduyɛ, nɛi sɔvɛ naŋ nɔla miŋ mala nda wo cho yɔŋgɔŋndo le nda Baabuiyo pɛɛkoo ni.

9. A mɛɛ Filipiaŋnda 2:​13 dimi yɛ, vɛɛ Chɛhowa mala yɛ num?

⁹ Teleŋndo tau yeemaŋ ni le waŋndo Baabuiyo pɛɛkoo. Le mɛɛ ŋ sina hei yɛ, kɛlɛŋgaa mi keŋ tosa ma kiisaŋ le yɔŋgɔŋndo le waŋndo Baabuiyo pɛɛkoo. Te keŋ cho num kuunaa ni le yɔŋgɔŋndo le waŋnda pɛɛkoo, mɛɛ chɔm Chɛhowa mɛɛ ŋ cho sinaŋndo yɛ o piɛileŋ niŋ. Nyuna ndu le mbo mala num ma nɔ yeemɛi le ma saaluŋ wana ŋ pɛɛku Baabuiyo wo. (Nuawɔ Filipiaŋnda 2:​13.) Mi kiilanɔɔ Chɔŋ ke naa tiindaŋndo maa, nyɛ o nyɛ naŋ nyuna pɛ Mɛlɛka mbo chɛlaŋ a hɛnaŋ ndɔɔ, nilaŋ o yaŋ naa ni. (1 Chɔŋ 5:​14, 15) Lelaŋ, a nɔ ma nɔ tiindaŋndo maa Chɛhowa cho num mala ma nɔ yeemɛi le yɔŋgɔŋndo le waŋnda siiŋguuwo buɛiyaa Chiisuaa.

10-11. Yɛɛ kuuna yɛ naa waŋnda Baabuiyo pɛɛkoo?

¹⁰ Ŋ che bɔɔ wali naŋ nɔ le waŋnda pɛɛkoo ma simnuŋ buɛiyaa Chiisuaa wo o sɔvɛ. Kɛ a koŋ kpou, mi simulta kuuna naa le hei tosaa laŋ la komal naa. Ŋ yaasiaŋndɔ simultaŋ ndaŋ lapum, nduyɛ miŋ che mɛɛ naŋ looku miŋ tiu laŋ ba yɛ.

¹¹ Te ŋ nɔla lɛ tosaa tau maa paandu le. Le taamaseliiyo, wanaa dimiaa yooŋgu kɛndiaa apum cho niŋ a yuuwɛi, nduyɛ apum nɔ lɛ kɛndiaa kɛndɛ le. Baa bahawɛi waa naa cho num choo ni? Te lende i cho ni, mɛɛ tofawɔ sɔɔŋ ŋpum ŋ naŋ pɛɛku a teleŋ naa Kolonaa wo. Ŋ saaluŋ maa ŋ nɔla miŋ tosa pɛɛkula Baabuilaŋ o nyɛm naŋ mapuuloŋ choo. Mɛɛ hei sim ni maa o yɔŋ bɛɛ ma wa o num ndo bɛɛ, a tiuba ma kandu pɛɛku Baabuiyo a waŋndo nduyɛ ma hiou lachi a ndu pɛɛkoo. Suɛi cheleŋ naŋ pɛɛku ve cho ni, mi apum nɔ yeemɛi le Baabuiyo pɛɛkoo, kɛ a nɔ ba a teleŋ puaapiliaa kua yooŋgu kɛndɔɔ dimioo wo le. Kɛ te o yɔŋ pɛ maa idii ɔɔ a nyumndaŋ, ŋ tiuba miŋ sɔla nda. A nɔla pa ma pɛɛku waŋndo Baabuiyo a teleŋnda waa naa?  A nyumndaŋ Chiisu pɛɛku Nikodimɔɔ ni kanifuule, teleŋ koŋ ndoo nɔ ba ni.—Chɔŋ 3:​1, 2.

12. Sɔɔŋ kuɛɛ ke yɛ naa tiindaŋndo maa ŋ tiuba miŋ simnuŋ wanaa pɛɛkaa kɛndɛ?

¹² Te ŋ yiyaŋ pɛ maa ŋ nɔ taasi le pɛɛku Baabuiyo tosa le. Lepum miŋ yiyaŋ maa mɛɛ miŋ nɔ fɛŋ taasioo tau, malaŋ naŋ pɛɛku waŋndo Baabuiyo. Te lende ŋ yiyaŋ ni, mɛɛ tofawɔ sɔɔŋ ŋgaa ŋ nɔla miŋ mala num ma nɔ tiindaŋndo maa a tiuba ma pɛɛku waŋndo Baabuiyo wo. I tasei, Chɛhowa che num maa a suliŋ le waŋnda Baabuiyo pɛɛkoo. (2 Kɔliŋ. 3:​5) I diiŋ nduɛi, Chiisu nɔ ‘kpaayaa choo choo a o lɛŋndeŋ choo wo’ vem num le waŋnda pɛɛkoo ni. (Maa. 28:​18) I yaa nduɛi, a nɔla ma tiindaŋ Chɛhowa a puaapiliaa numnda le num malaa. Nyɛ Chɛhowa pɛɛku Chiisu wo ndoo tiindaŋ ni le waŋnda pɛɛkoo. Nduyɛ naa bɛɛ nɔ miŋ tiindaŋ nyɛ Chɛhowa pɛɛku naa wo. (Chɔŋ 8:​28; 12:​49) O faŋaŋ okoŋ kɔɔli, a nɔla ma nyuna wana cho kunda wali poli nyaa chilaŋndo, kɔɔfanɔɔ, ɔɔ wana dimiaa yooŋgu kɛndɛ nɔ taasioo tau wo le mbo mala num ma kandu pɛɛku Baabuiyo, nduyɛ ma hiou lachi a ndu tosaa. Nɛi cheleŋ mala num ma nɔ tiindaŋndo le waŋndo pɛɛkoo wo cho liilaa wanaa waa naa o pɛɛkula Baabuila ndalaŋ ni, ma che mɛɛ nda tosa pɛɛku Baabuiyo yɛ.

13. Le yɛɛ naŋ nɔ yɛ miŋ chɛl le nɛila sɛnɛilaŋ soliŋndo kpeku le waŋnda pɛɛkoo?

¹³ Te ŋ che ndi pɛ ikala le nɛila sɛnɛilaŋ a nyɛm waliŋ sɛnɛiyoŋ soliŋndo kpeku le waŋnda pɛɛkoo. Siŋgaŋndaŋ la yɔŋnuŋ niŋ a mɛɛ naŋ tosa niŋ pɛɛkula Baabuilaŋ yɛ. Yau kpeekpei naŋ soliŋ niŋ kpeku le waŋnda pɛɛkoo wo cho Tuei Yoomoo Yeela Lefafɛɛŋ! ni. A toosiaa yauwo hoo o nɛi teŋgeŋndo choo. Lelaŋ, mɛɛ miŋ bɛɛndiaŋ niŋ nyɛkɛndɛi le kɔlaŋ waŋndo Baabuiyo pɛɛkoo, nduyɛ miŋ tosa pɛɛku koŋ o nɛi teŋgeŋndo choo mbo hiou maa paandu. Pɛltaŋ nyɛɛmbɔ koni naŋ veelu niŋ diomndaŋ ni, okoŋ miŋ soliŋ teleŋndo tau kpeku le suukaŋndo a wana naŋ cho Baabuiyo pɛɛkoo wo. Miŋ soliŋ vɛlɛ vidueilaŋ tau kpeku a nyɛm waliŋ cheleŋ, mɛɛ JW Library cho naa yɛ. Te o yɔŋ pɛ maa a chiee nyɛm walloŋ muŋ soliŋ kpeku le, mɛɛ nyuna wana cheleŋ mbo pɛɛku num. Naa waŋnda chieeya, mɛɛ naŋ dɛli sɔɔŋ tosaa yɛ naŋ yeema muŋ tosaa ni. Lelaŋ, i ve bɛɛŋ bɛɛŋ le sɔɔŋ tosaa o nɛila naŋ dɛli tosa le laŋ choo le. Kɛ sanaa a mala Chɛhowaa vɛlɛ a acheleŋnda, a tiuba ma che ndi tɛtɛlɛ le yɛlɛmiaalaŋ tosaa, nduyɛ ma tuei pɛŋ waŋnda pɛɛkoo yeela tau. Mi kɔɔfanɔ pilɛ dimi maa, Te wana dimiaa yooŋgu kɛndɔɔ soliŋ pɛ nɛiyo hoo kpeku le waŋndo pɛɛkoo, “ndu a wana o cho pɛɛkoo wo nɔla ma tuei ndu yeela.”

14. Yɛɛ naŋ nɔ yɛ miŋ kɛsiŋ o kɔl te ŋ wa pɛ o tanda i cho ikala le waŋnda Baabuiyo pɛɛkoo wo niŋ? Nduyɛ vɛɛ Kɔliŋtiaŋ Tasoo 3:​6, 7 dɛɛniaa yɛ naa?

¹⁴ Te o yɔŋ pɛ miŋ wa o tanda i cho ikala le pɛɛkula Baabuilaŋ kandɔɔ wo niŋ. Waŋnda apum nɔ iyeema o yooŋgu naŋ dimul nda wo niŋ te. Nduyɛ pɛŋ, ma simul naa. Yɛɛ mala yɛ naa miŋ hiou lachi a yiyaŋ kɛndɔɔ nɔɔ te ŋ wa pɛ o tanda waa naa niŋ? Kɛsiŋ o kɔl maa te sɔɔŋ palaŋ komal pɛ waŋnda o chieeŋ wɔɔŋndo hoo niŋ, a tiuba ma siŋga yiyaŋnda ndalaŋ o lepilɛ niŋ kpe. Nduyɛ, mi wanaa ndaa nɔ paandu iyeema o yooŋgu naa niŋ te wa sina maa a nɔ ma pɛɛku a Mɛlɛka okɔɔ. (Maa. 5:​3) Wanaa ndaa kɛɛ bɛɛ paandu le yaula naalaŋ biyɔɔ wa chɛl niŋ le Baabuiyo pɛɛkoo. Ŋ sina vɛlɛ maa Chɛhowa cho wana nɔ chiɛiyo ni. (Maa. 9:​38) O yeema naa miŋ hiou lachi a tɔlɔɔla naalaŋ tɔlɔɔ nduyɛ miŋ wa laŋ pɔɔliaa. Kɛ ŋ nɔ miŋ sina maa, ndu tosa ni mi tɔlɔɔ kalaa hindu. (1 Kɔliŋ. 3:​6, 7) Nduyɛ i cho suɛi kɔl dɛɛniaa le sinaa maa o yɔŋ bɛɛ miŋ nɔ pɛɛku Baabui suŋ suŋ te, Chɛhowa cho naa salaa dɔwɔɔ le kindi kindiŋ naŋ cho wo. Kɛ o cho mɛɛ kpɛ naŋ cho batiuwaa sɔlaa yɛ le. *

15. Vɛɛ Chɛhowa sinaŋ yɛ te waŋndo chɛl pɛ le Baabuiyo pɛɛkoo nduyɛ mbo wa nyɛ o cho pɛɛkoo wo dɔwɔɔ o wali niŋ?

¹⁵ Mi Chɛhowa naŋ kɔ tau te waŋndo chɛl pɛ le tonya cho o Baabuiyo niŋndo pɛɛkoo, nduyɛ mbo yɔŋguŋ le acheleŋnda ndu pɛɛkoo. (Pulɔ. 23:​15, 16) Mbo naŋ vɛlɛ kɔl tau te o che pɛ hau wanaa nduaa sɛmbɔɔ dɔwɔɔ le yooŋgu kɛndɔɔ dimioo a waŋnda pɛɛkoo! Le taamaseliiyo, mi che bɛɛ mi naa Kolonaa pɛŋgɛlaŋ o wɔsi naa wallo le wɔsi 2020 niŋ, kɛ miŋ tosa pɛɛkula Baabuila laŋ 7,705,765. Nduyɛ miŋ mala waŋnda 241,994 le yɔŋgɔŋndo o Chɛhowa lo nduyɛ ma sɔla yiŋɔɔ. Wanaa sɛnɛiya haa bɛɛ cho waŋnda Baabuiyo pɛɛkoo nduyɛ ma wa nda malaa le ma simnuŋ buɛiyaa Chiisuaa. (Luku 6:​40) Ŋ laalaŋ kɛsɛ maa mi Chɛhowa naŋ kɔl tau a naa te o che naa pɛ wallo hoo tosaa.

16. Kpeleŋ sɔvɛ kuɛɛ naŋ nɔ yɛ miŋ kɛsi?

¹⁶ O cho bɛɛŋ bɛɛŋ le waŋnda siiŋguuwo buɛiyaa Chiisuaa le. Kɛ a mala Chɛhowaa, ŋ tiuba miŋ mala wanaa sɛnɛiya haa ma nɔ kaalaa le Finya naa cho o choo choo niŋndo. Baa ŋ nɔla pa miŋ kɛsi kpeleŋndo le pɛɛku Baabuiyo opilɛ bɛɛ kpe kandɔɔ? Te ŋ nyuna pɛ waŋnda te a nɔ niŋ pɛ yeemɛi le Baabuiyo pɛɛkoo a naa, kɔndɔfillo cho naa biyɔɔ a mulila nda cho naa ke laŋ. Ŋ nɔ miŋ laalaŋ kɛsɛ maa Chɛhowa cho sɛmbɛ naa dɔwɔɔ sala.

17. Vɛɛ naŋ sinaŋ yɛ te ŋ pɛɛku pɛ waŋndo Baabuiyo?

¹⁷ Dikeŋnaŋ bɛndoo pila naŋ nɔ hoo ni le waŋnda yooŋgu kɛndɔɔ dimullo a nda pɛɛkoo tonya cho a Mɛlɛka okɔɔ wo! Mi wallo hoo tosa miŋ wa a kɔl kɛndɛ tau. Mi kiilanɔɔ Pɔɔl, o ndoo mala wanaa bɔɔbɔɔ o Tɛsalonaika niŋndo chɔm mɛɛ kpɛ o sinaŋ o wallo hoo tosaa niŋ yɛ. Mbo dimi aa: “Yɛɛ cho yɛ tiindaŋ naa ɔɔ nyaale naa ɔɔ fanda naa, o naŋ kialu yoŋgaa a ndu Masanɔɔ Chiisu o hɔl, boondii o cho miiŋgu naŋnde? Baa o cho nya le? Nya kpeekpei tosa ni miŋ pɛɛluŋ, nduyɛ miŋ wa a nyaale.” (1 Tɛsa. 2:​19, 20; Walta. 17:​1-4) Wanaa bɔɔbɔɔ che niŋ maa nyɛ Pɔɔl dimi hoo wo cho tonya. Ndepilɛnɔ pilɛ diolaŋ Stɛfani nda pɔnɔ ndɔ mala niŋ wanaa bɔɔbɔɔ le yiŋɔɔ sɔlaa. Mbo dimi aa: “Nyɛ o nyɛ tosa miŋ wa a kɔl kɛndɛ mbo hiau waŋnda malaa ma yɔŋguŋ o Chɛhowa lo nduyɛ ma sɔla yiŋɔɔ le.”