Chɛhowa yeema mi wanaa chal o nɔɔ niŋnda wa a kɔl kɛndɛ, nduyɛ ma tuei chaŋyɛi kɛndɛi yeela lefafɛɛŋ. (Maa. 19:​4-6) Te a yeema pɛ nɔɔ chuaa, vɛɛ ŋ looku yɛ ma saaluŋ wana bɛnda le numndo? Le mɛɛ Chɛhowa cho Wana naa Toosiaa yɛ, o sina nyɛ naŋ nɔ miŋ tosa le miŋ sɔla batiuwaa o nuaŋnaŋndo niŋ a o nɔɔ niŋndo. Lelaŋ, te o yɔŋ pɛ ma dɔu sawala mandaala o ke naalaŋ o wali niŋ, a cho fulamakɔɔlila kɛndɛlaŋ sɔla. Ŋ yaasiaŋndɔ sawala mandaalaŋ ndaŋ lapum.

O tasoo, ŋ nɔ fɛɛŋ miŋ sina hei a naapila okɔɔ. Ndi cho ni maa: “Kɔl wana chioo o hui wana o hiou nyɛ o nyɛ, nduyɛ o cho nyɛ dɛnɛ wɔɔŋ bɛndu.” (Chɛlui. 17:​9) Te poo a chuaa chiikaŋ pɛ nduyɛ ma kandu nuaŋnaŋndo, mi yeemɛi nda nɔ ndapila tɛɛŋnde keleŋa hindɔɔ. Le hei, i wa ikala le ma tosa kɛɛsiaala kɛndɛlaŋ. Te waŋndo hiviŋ pɛ yeemɛi lachi le kɛɛsiaa tosaa a wana o cho chua o nɔɔ niŋndo okɔɔ, o mɛɛlulaŋ o cho suei kiolɔɔ. (Pulɔ. 28:​26) Lelaŋ, o ve suɛi taasi le mi poo a chuaa hiviŋ yeemɛi lachi ɔɔ ma chuel naŋ buŋgaŋ tuupa ma siiniaŋ nyɛkɛndɛi le.

Pulɔwaa 22:​3 dimi aa: “Wana kɔl kaloo, mbo nɔla mbo che kpundɔɔ ndu lachi, mbo kpɛkpɛla ndu. Kɛ diɔmndo ndu ndu, o lo kɔlaŋ mbo kɔ del o kpundɔɔ niŋ.” Kpundɛ yɛɛ cho yɛ le intanɛtiiyo soliŋndo kpeku le wana ŋ yeema chuaa o nɔɔ niŋndo nuuviaa? I cho suɛi imɔnɔ le sinaa maa mi waŋnda apum kandu nuaŋnaŋndo o intanɛtiiyo choo a wanaa nda sina le wa. Kɛ te teleŋ tiŋ hiou pɛ, mi wanaa kaŋ hui nda. Mi apum soliŋ diolaŋ a hɔlaa wana cheleŋ kpeku o intanɛtiiyo choo le halikpeŋ ma de wanaa sina nda le wa nyɛsɔlaa o ba. Lepum, mi wanaa hui waŋnda o nɛila waa naa choo wa dimi maa Seiyaa Chɛhowaa nda cho ni.

Tofawɔ vɛlɛ kpundɛ cheleŋ. Ndu cho ni, mi wanaa wa o intanɛtiiyo choo wa soliŋ kɔmpitɛiyo kpeku le waŋnda kɛɛsiallo wanaa nda nɔ ma chua o nɔɔ niŋnda. Kɛ nyɛ o nyɛ cho o chɔm maa nɔ la waa lende la lo le fɛɛŋ te. Kɛɛsiaa sɔvɛ sɔviɔɔ pila i cho ni te o hiŋ pɛ a wana naŋ yeema chuaa o nɔɔ niŋndo okɔɔ. Lelaŋ, baa i cho pa suɛi taasi le soliŋndo nɛi waa naa kpeku le batiuwaa sɔlaa a kɛɛsiaa waa naa okɔɔ? Sako. Sawala mandaala Baabuiyo kinɛi nɔla ni mi la mala naa, kɛ o cho taasi wanachioo le.—Pulɔ. 1:​7; 3:​5-7.

Sawa mandaa cho o Pulɔwaa 14:​15 dimi aa: “Diɔmndo, nyɛ o nyɛ wana dimul ndu, laalaŋndo o laalaŋ ni. Kɛ wana kɔl kaloo ndu, lɔɔpa mbo tosa nyɛ o nyɛ, mɛɛ mbo yiyaŋ nyɛkɛndɛi.” Ŋ nɔ fɛŋ miŋ sina waŋndo nyɛkɛndɛi, tuupa miŋ yiyaŋ maa  o bɛnda le ndu chuaa o nɔɔ niŋ. Kɛ te o yɔŋ pɛ maa o intanɛtiiyo choo, ŋ tiuba miŋ sina ndu nyɛkɛndɛi le. O yɔŋ bɛɛ mi la wa fotueilaŋ yɔŋnaŋndo ɔɔ mi la wa teleŋndo chuaa tau le yooŋgulaŋ yɔŋnaŋndo, baa keŋ chɔm ni maa a sina wana koŋ kɛsɛ kɛsɛ? Mɛɛ waŋnda apum soliŋ nɛiyo hoo kpeku, ma yiyaŋ maa a saaluŋ kaala kpeekpeiyo. Kɛ mi kɔndɔfillo bii nda mɛɛ nda che niko wana koŋ hɔlla a hɔlla.

Mi wana ŋchondoo dimi aa: “Ŋ dou labali naa wana lachoowa le, nduyɛ I yee naaŋaŋ a wana sondo yeelɛi le.” (Sam 26:​4) Mi wanaa bɔɔbɔɔ hui waŋnda a fotueila ndalaŋ ɔɔ ma handu fotueila wanaa cheleŋ o intanɛtiiyo choo le chɔmnda maa nda cho kaŋ ni. Nduyɛ ma toosiaa fotueilaŋ ndaŋ le halikpeŋ mi waŋnda kaala nda. Ma veŋ kaala ndala wɔɔŋndaŋ te a wa pɛ suukaŋndo a acheleŋnda o intanɛtiiyo choo. Kɛ i cho suɛi sɔvɛ le miŋ yiyaŋ a nyunalaŋ ndaŋ okɔɔ: Mi apum chɔm o intanɛtiiyo choo maa Seiyaa Chɛhowaa nda cho ni, kɛ baa a yɔŋguŋ niŋ pa o Chɛhowa lo ma sɔla yiŋɔɔ? O yɔŋ bɛɛ maa a sɔla yiŋɔɔ, baa Kilisiɔŋaa kendu o Mɛlɛka piɛiyo niŋnda nda cho ni? Baa a nɔ pa chaŋyɛi kpɛɛluŋnde a Chɛhowa? Puaapiliaa nɔ pa bɛɛleŋ le nda o kundala ndalaŋ niŋ? A cho pa wanaa taamasi kɛndɛ o kundala ndalaŋ niŋ ɔɔ baa chaŋyaŋ wɔɔŋndoŋ nda cho ni? (1 Kɔliŋ. 15:​33; 2 Timo. 2:​20, 21) A mɛɛ sawala mandaala Baabuiyo chɔm yɛ, baa wana koŋ nɔ pa dioo le mbo chua wana cheleŋ o nɔɔ niŋ? Ŋ nɔ miŋ sina mulilaŋ le nyunalaŋ ndaŋ kpou. Kɛ le naa malaa miŋ sina mulilaŋ le nyunalaŋ ndaŋ, mɛɛ miŋ suukaŋ a wanaa sina wana koŋ nyɛkɛndɛiya. (Pulɔ. 15:​22) O kpeekpei niŋ, Kilisiɔŋnɔ cho Chɛhowa piɛiyo o laalaŋndo choo wo yiyaŋ pɛŋ le ‘wana cho wana laalaŋ te wo’ chuaa o nɔɔ niŋ te.—2 Kɔliŋ. 6:​14; 1 Kɔliŋ. 7:​39.

Le naa malaa miŋ kpakpala kpundɛla cho le waŋndo nuuviaa o intanɛtiiyo choo le challe o nɔɔ niŋndo, nɛila cheleŋ la cho la naŋ soliŋ kpeku le wana naŋ yeema chuaa o nɔɔ niŋndo nuuviaa nduyɛ miŋ sɔla batiuwaa wo. Kuɛɛ naŋ saaluŋ yɛ waŋndo o bɛnda niŋ le naa wo? Te o cho mi sɔɔŋ pum kuuna naa chuuŋgiaŋndo diompilɛ le, ŋ nɔla miŋ sina puaapiliaa a ndepiliaa nyɛkɛndɛi te ŋ kuɛ o bɔŋaŋndaŋ, bɔŋaŋnda ibuŋgalaŋ a la bɛŋndaŋ, ɔɔ o chuuŋgiaŋnda cheleŋ.

Te o yɔŋ pɛ maa ŋ nɔla miŋ chuuŋgiaŋ diompilɛ naa puaapiliaa a ndepiliaa naa le, mɛɛ teleŋ naa Kolonaa cho naa yɛ, ŋ nɔla miŋ soliŋ nyɛm mapuuloŋ kpeku le bɔŋaŋndaŋ biyɔɔ o kundala yembuaa cho laŋ niŋ, le halikpeŋ miŋ sina nda nyɛkɛndɛi. Ŋ nɔla miŋ che mɛɛ kpɛ nda nɔ laalaŋndo o Mɛlɛka niŋ yɛ, o sɔɔŋ nda yɔŋgu woŋ niŋ a o mulila nda yɔŋgu laŋ niŋ. (1 Timo. 6:​11, 12) A tiuba ma suukaŋ vɛlɛ a nda te o yɔŋ pɛ mi la mal bɔŋaŋndo nduyɛ ma piɔu nya a kundala pɔmbɔlaŋ o zoom choo. Te o yɔŋ pɛ mi la kuɛ o yelelaŋnda Seiyaa Chɛhowaa kɛɛsiaa laŋ, kindiŋ ma che mɛɛ wana ŋ nɔ yeemɛi o ndu niŋndo bii acheleŋnda yɛ. Keŋ cho num mala ma sina wana suu o cho kpeekpeiyo. (1 Pitɛ 3:​4) Mɛɛ nya hiau lachi fau a siiniaŋndo, keŋ cho tosa ma sina te kpeleŋnda pilɛlaŋ nya nɔ ni, ɔɔ te o bɛnda pɛ mi la chal nya ndu o nɔɔ niŋ.

Te wanaa chue wɔ nɔɔ le wa tol pɛ sawala mandaala Baabuiyo kɔɔli le wana nda yeema chuaa o nɔɔ niŋndo nuuviaa, keŋ cho tosa ma sɔla batiuwaa nduyɛ mi nyaaloo wa lɔɔ lɔɔ o nɔ ndaa niŋ. Hei cho i chɛlaŋ a nyɛ Baabuiyo dimi hoo wo: “Wana o wana sɔla lanɔɔ [ɔɔ pɔnɔɔ] pɛ, o sɔla nyɛ kɛndɛ bɛndu. Wana koŋ, Mɛlɛka Yaawɛɛ o che ndu nyina bɔɔ.”—Pulɔ. 18:​22.