1. Yɛɛ cho yɛ hau yeemɛi Mɛlɛkɛi?

 HAU, yeemɛi Mɛlɛkɛi cho ni, le mi yooŋgu kɛndɛ leMasaa dimiŋ ba o ba fee o chieeŋndo choo. (Maki 13:​10; 1 Timo. 2:​3, 4) Wali ndɔɔ cho hoo ni. Nduyɛ, i cho bɔɔ suɛi sɔvɛ le mɛɛ o handu Po ndɔ kaalaa wallo hoo chilaŋ yɛ. Lelaŋ, le mɛɛ Chiisu cho simlachinɔ nɔ taasioo wo yɛ, ŋ nɔ miŋ nɔ tiindaŋndo maa wali dimiaa yooŋgu kɛndɔɔ hoo cho tosaŋ mɛɛ Chɛhowa yeema yɛ, tuupa mi mɛɛlula chieeŋndo la fuuluu.—Maa. 24:​14.

2. Yɛɛ naŋ cho yɛ yaasiaa o buŋgɛi hei niŋ?

² O buŋgɛi hei niŋ, ŋ cho chɔ mɛɛ Chiisu cho “buɛi cho sakpo, nduyɛ mbo wa buɛi taasi wo” soliŋndo kpeku, le buɛiyaa nduaa nyɛm mala nda le pɛɛkoo a Mɛlɛka okɔɔ woŋ kioo yɛ. Nduyɛ buɛiyo hoo cho buɛiyaa Chiisuaa kɔɔnaa ni, le wali dimiaa yooŋgu kɛndɛ cho hoo tosaŋndo chieeŋndo balɔɔ silɔ, mbo hiau maa paandu wo. (Maa. 24:​45) Ŋ cho vɛlɛ chɔ nyɛ naa a pilɛŋ pilɛŋnda nɔ miŋ tosa le Chiisu a buɛi cho sakpo wo tooloo wo.

3. Kpaaya yɛɛ Mɛlɛka ke yɛ Chiisu?

³ Chiisu cho nɛi chɔmaa yɔŋgoo ni le wali dimiaa yooŋgu kɛndɛ cho tosaŋndo wo. Vɛɛ naŋ looku yɛ hei sina? Tuupa mbo miiŋgu choo choo, mbo bii bɔŋaŋndo a buɛiyaa nduaa chɔm lo lechoo wo wa atiŋ o pembei Kalili. Nduyɛ mbo dimul nda aa: “Mɛlɛka ke ya kpaayaa nyɛ o nyɛ choo o choo choo niŋ a o lɛŋndeŋ choo.” Okoŋ kɔɔli mbo dimul nda vɛlɛ aa: “Lelaŋ, la kɔ o  ŋwaŋnda chiee lo ba o ba fee mi la siiŋguu nda buɛiyaa ni.” (Maa. 28:​18, 19) Hei chɔm maa o sɔɔŋ Mɛlɛka ke ndu kpaayaa le tosaa woŋ tɛɛŋ, ipilɛ cho nɛi chɔmaa yɔŋgoo le wali dimiaa yooŋgu kɛndɔɔ ni.

4. Le yɛɛ naŋ nɔ yɛ miŋ nɔ tiindaŋndo maa, Chiisu cho wɔ hiouwɔɔ lachi a nɛi chɔmaa yɔŋgoo le wali dimiaa yooŋgu kɛndɔɔ?

⁴ Mi Chiisu dimi maa wali dimiaa yooŋgu kɛndɔɔ le waŋnda siiŋguuwo buɛiya, cho tosaŋ “ba o ba fee” o chieeŋndo choo. Nduyɛ maa o cho wa a buɛiyaa nduaa “latulu lepaa o lepaa haaa mi chieeŋndo fuuluu o mɛɛlulaŋ.” (Maa. 28:​20) Nyɛ o dimi hoo wo chɔm kpendekele maa, wali dimiaa yooŋgu kɛndɔɔ wa hiouwɔɔ lachi a tosaŋndo o nɛi ndɔ chɔmaa bɛŋgu haaa o palɛi nɛi niŋ.

5. Vɛɛ naŋ cho yɛ nyɛ dimiŋ o Aisaya 6:​8 niŋndo tosaa?

⁵ Baa buulaŋndo Chiisu wa ni maa waŋnda ve niŋ a bɔɔ le wallo hoo tosaa o mɛɛlula chieeŋndo le? Sako. Ndoo sina maa diomnda Aisaya wana ndoo suaa le Mɛlɛka wo dimilaŋ la cho peelɔŋ a wanaa cheleŋnda. Mi Aisaya dimi aa: “A che ya, viom ya.” (Aisaya 6:​8) Te num bɛɛ cho pɛ yooŋgu kɛndɔɔ dimioo, mɛɛ a cho Chiisu tooloo a buɛi cho sakpo wo, nduyɛ ma wa nyɛ Aisaya dimi wo tosaa. Mi che bɛɛ wallo hoo cho hiouwɔɔ lachi a tosaŋndo, kɛ simultaŋ la cho tau.

6. Ɔɔ simullo opilɛ o komal hau wanaa dimiaa yooŋgu kɛndiaa wo?

⁶ Simullo opilɛ o wanaa dimiaa yooŋgu kɛndiaa sɔla wo cho nyɛkindilaa nda handu nda choo wo ni. Mi wanaa simul tonyaa wa, simlachiaa lepiɛiya, a wanaa cho o yalale chieeŋndeŋ niŋnda dimi sɔɔŋ wɔɔŋndoŋ a wali naa okɔɔ. Te wanayaŋ naŋ, chaaŋaa naa, a wanaa naŋ tosa wallo wa laalaŋ pɛ choola nda dimilaŋ ndaŋ, mi keŋ tosa ma handu naa nyɛkindilaa choo le halikpeŋ miŋ mal Chɛhowa piɛiyo, a wali dimiaa yooŋgu kɛndɔɔ tosaa. O lɛŋnde ipum niŋ, mi wanaa simul naa wa luei naa siooŋnde, ma kɔŋgɔliaŋ naa, nduyɛ pɛŋ ma dɔu naa o chiɛila manyumndaŋ niŋ. Kɔndɔfili bii naa a sɔɔŋ cho muŋ yɔŋnɔŋndo woŋ te. Mi Chiisu dimi aa: “Waŋnda kpou a cho nya yɛleŋ tul le diola nilaŋ.” (Maa. 24:​9) Yɛle waŋnda cho naa tullo leŋ chɔm ni maa buɛiyaa Chiisuaa naŋ cho ni, nduyɛ maa Chɛhowa hini kɔl a naa. (Maa. 5:​11, 12) Masa Nyinaa Wɔɔŋnda tosa ni mi simultaŋ ndaŋ kpou la komal naa. Kɛ Chiisu hiou ndu kpaayaa poloŋ! Le mɛɛ Chiisu cho naa tooloo yɛ, yooŋgu kɛndɔɔ hoo cho dimiŋndo ba o ba fee o chieeŋndo choo.

7. Vɛɛ naŋ cho yɛ chɔɔ nyɛ dimiŋ o Sɔɔŋ Chɔɔmaŋndoŋ 14:​6, 7 niŋndo o peelɔŋndo?

⁷ Simul cheleŋ komal wanaa dimiaa yooŋgu kɛndiaa wo cho suɛi maŋgalɛi ni. O yilaŋii Chɔŋ che ve niŋ, mi Chiisu dimul ndu maa o palɛi nɛi niŋ, simul koŋ kuuna niŋ naa yooŋgu kɛndɔɔ dimioo le. (Nuawɔ Sɔɔŋ Chɔɔmaŋndoŋ 14:​6, 7.) O nɛi kuɛɛ choo? Hau, ŋ cho wanaa bɔɔbɔɔ malaa le ma tuei yooŋgu kɛndɛ leMasaa hoo. Waŋnda chieeŋndo balɔɔ silɔ tiuba ma kuɛ o tɛɛŋgii nɛi jw.org, ma veelu diomndaŋ o yaula tɔlnuŋ o Baabuiyo choo laŋ niŋ. Kanifuule yooŋgulaŋ la cho loŋ o sɔɔŋ maŋgalaŋ niŋ hiouwɔɔ 1,000! Mi Dialii Kuumbaŋ Choo Ve chɛl le ma hivi yauwo hoo, Tuei Yoomoo Yeela Lefafɛɛŋ! o sɔɔŋ maŋgalaŋ hiouwɔɔ 700 niŋ. Nduyɛ yauwo hoo cho nyɛ wali kpeekpei naŋ soliŋ niŋ kpeku, le waŋnda siiŋguuwo buɛiya wo ni. Bobuaa bɛɛ, mi kɔɔnaa toosiaa vidueilaŋ, le nda malaa ma sɔla nyɛm mala nda le pɛɛkoo a Mɛlɛka okɔɔ woŋ. O faŋaŋ okoŋ kɔɔli, mi kɔɔnaa toosiaa vɛlɛ yaulaŋ le wanaa sumɛiya. A tonya, ŋ cho chɔɔ kpendekele mɛɛ huuluŋ Baabuiyoŋ cho peelɔŋndo yɛ. Waŋnda, “a sim le lɛŋnde kpou a kaalaŋ kpou wa,” cho pɛɛkoo le ‘suɛi maŋgalɛi walaŋnde’ dimioo. Ndi cho yɛ tonya Baabuiyo ni. (Sɛka.  8:​23; Sɛfa. 3:​9) Sɔɔŋ muŋ kpou cho yɔŋnɔŋndo le mɛɛ naŋ nɔ simlachinɔ taasioo Chiisu Kiliti yɛ.

8. Fulamakɔɔlila kuɛɛ naŋ sɔla yɛ niŋ o yooŋgu kɛndɛ naŋ cho dimioo wo niŋ?

⁸ Hau, waŋnda hiouwɔɔ 8,000,000 o lɛŋnde 240 niŋ cho o kɔɔna Chɛhowaa niŋ ni. Nduyɛ iwɔsi o iwɔsi, waŋnda o waalaŋ niŋ sɔla yiŋɔɔ ni! Nyɛ hiou wa o sɔvɛ wo cho ni maa, waŋnda haa cho suliŋnda iMɛlɛkayalaŋ nɔɔ, nduyɛ ma wa “wana chieeyɛi sɛnɛiye” chuɛɛnɔŋndo. (Kolo. 3:​8-10) Mi a bɔɔbɔɔ mal kaa ihini nɔɔlɛiyo, niilu latandaa, kaa hɛliaa a duuviaalaŋ. Waŋnda haa cho huului dimiŋ o Aisaya 2:​4 niŋndo peeloo kanifuule, a ‘wou lɛ laba o chɔu’ niŋ te. Te ŋ tosa pɛ wallo kalaŋ le wana chieeyɛi sɛnɛiye chuɛɛnɔŋndo, keŋ cho tosa mi waŋnda hiŋ o kɔɔna Chɛhowaa niŋ, nduyɛ miŋ chɔm kpendekele maa ŋ cho simlachinɔ naa Chiisu Kiliti tolɔɔ kɔɔli. (Chɔŋ 13:​35; 1 Pitɛ 2:​12) Le yɛɛ hei kpou cho yɛ yɔŋnɔŋndo? I cho yɔŋnɔŋndo kanifuule, Chiisu cho naa mala naŋ yeema wo kioo.

9. A mɛɛ Maatiu 24:​45-47 dimi yɛ, yɛɛ Chiisu ndoo dimi yɛ maa o cho yɔŋnɔŋ o palɛi mɛɛlɛi niŋ?

⁹ Nuawɔ Maatiu 24:​45-47. Mi Chiisu dimi maa, o palɛi mɛɛlɛi niŋ o cho “buɛi cho sakpo, nduyɛ mbo wa buɛi taasi wo” yulɔɔ isu, le wanaa nduaa nyɛm mala nda le pɛɛkoo a Mɛlɛka okɔɔ woŋ kioo. Nduyɛ buɛiyo hoo cho wali Chiisu ke ndu koŋ ndo tosaa kalaŋ o palɛi nɛi niŋ. Hei cho tonya kanifuule, simlachinɔ naa cho kunda pɔmbɔɔ soliŋndo kpeku, le wanaa Mɛlɛkaa a wanaa nɔ yeemɛiya ‘nyɛdiaa kioo a teleŋndo kinɛi.’ Nduyɛ puaa cho o kunda koŋ choo wa, Chɛhowa pɔya nda ni a nyina ndɔ diandaa. Puaa haa chɔm maa ŋmasa le nda cho le laalaŋnda acheleŋnda le. (2 Kɔliŋ. 1:​24) Kɛ a sina maa, Chiisu Kiliti cho simlachinɔɔ le wanaa Mɛlɛkaa ni, nduyɛ ndu cho nda ‘bolleŋ’ ni.—Aisaya 55:​4.

10. A mɛɛ ŋ cho chɔɔ o fotueiyo choo yɛ, yau kuɛɛ ŋ pɛɛku yɛ ma sina Finya naa kaalaa cho o choo choo niŋndo, nduyɛ ma kaala ndu?

 ¹⁰ Chɔŋ a wɔsi 1919, buɛi cho sakpo wo bii niŋ yaula yɛ yɛlaŋ toosiaa le wanaa nɔ yeemɛi le pɛɛkoo a Mɛlɛka okɔɔ wa. A wɔsi 1921, mi buɛiyo hoo toosiaa yauwo hoo, “The Harp of God,” le wanaa ndaa nɔ yeemɛiya malaa ma pɛɛku tonyala cho o Baabuiyo niŋndaŋ. Mɛɛ sɔɔŋ kua fau a siŋgaŋndo o chieeŋndo niŋ yɛ, lende koni nda kua a yaula sɛnɛilaŋ solioo ni. Yau kuɛɛ ŋ pɛɛku yɛ ma sina Finya naa kaalaa cho o choo choo niŋndo, nduyɛ ma kaala ndu? Baa yauwo hoo, “Let God Be True,” (Tonyaa Mɛlɛka Dimi Ni) “The Truth That Leads to Eternal Life,” (Tonyaa o yaa o Yoomu Fɛɛŋndoo) “You Can Live Forever in Paradise on Earth,” (A Tiuba Ma Wa Achal o Kpele Hɛnɛkiɔɔ Niŋ Lefafɛɛŋ) “Knowledge That Leads to Everlasting Life,” (Kɔl Kalu Yaa Wana o Yoomu Fafɛɛŋndo Wo) Yɛɛ Kpeekpei Baabuiyo Pɛɛku Yɛ?, Yɛɛ Baabuiyo Pɛɛku yɛ Naa?, ɔɔ Tuei Yoomoo Yeela lefafɛɛŋ! yau naa sɛnɛiyo? Yaulaŋ ndaŋ kpou laa toosiaŋ le waŋnda malaa ma simnuŋ buɛiyaa Chiisuaa. Nduyɛ a teleŋndo kinɛi nda toosiaa laŋ ni.

11. Le yɛɛ i cho yɛ suɛi sɔvɛ, le mi naa kpou sɔla nyɛm mala naa le pɛɛkoo a Mɛlɛka okɔɔ woŋ?

¹¹ O cho ko wanaa sɛnɛiya le nɔ ma sɔla nyɛdiaa sikpaa le. Kɛ naa kpou. Mi kiilanɔɔ Pɔɔl poonyiaa aa: “Le kaasoŋnda nyɛdiaa sikpaa cho ni.” Mbo chɔɔlu dimi maa, te ŋ dɔu pɛ nyɛ naŋ pɛɛku o Baabuiyo niŋndo o wali niŋ, keŋ mala naa miŋ sina “yɛ yiɔɔ o kɛndɔɔ tɛɛŋ a o wɔɔŋndo.” (Hibu. 5:​14) Suŋ suŋ, mi i wa ikala le sawala Chɛhowalaŋ diikɔŋndo kanifuule, wanaa bɔɔbɔɔ nɔ balaŋ o kaala nɔɔlɛilaŋ niŋ. Kɛ Chiisu cho tosa a sabu le miŋ sɔla nyɛm mala naa le laalaŋ naa kindioo poŋ ndo. O Diom Mɛlɛkaa choo nyɛm mala naa le pɛɛkoo a Mɛlɛka okɔɔ woŋ tɔlnuŋ ni. Sanaa a nɛi chɔmaa Chiisu wo, mi buɛi cho sakpo wo toosiaa  nyɛm mala naa le pɛɛkoo a Mɛlɛka okɔɔ woŋ, nduyɛ mbo tosa a sabu le miŋ sɔla muŋ.

12. Maa Chiisu, vɛɛ naŋ che yɛ diola Mɛlɛkalaŋ?

¹² Maa Chiisu, ŋ nɔ bɛɛleŋ tau le diola Mɛlɛkalaŋ. (Chɔŋ 17:​6, 26) Le tamaseliiyo, a wɔsi 1931, miŋ sɔla diola tɔlnuŋ o Baabuiyo choo laŋ aa, Seiyaa Chɛhowaa. Nduyɛ mi hei sɔɔŋguu naa Finya naa cho o choo choo niŋndo ikɛi kpɛɛluŋ. (Aisaya 43:​10-12) O faŋaŋ okoŋ kɔɔli, chɔŋ a Saa o wɔsi koŋ niŋ, mi diola Mɛlɛkalaŋ la kandu fulaa o Bandu Mɛŋgɛlaa kɔɔ. Le handɔɔ lechoo, o New World Translation of the Holy Scriptures niŋ, ma miŋgi diola Mɛlɛkalaŋ pila o foofo la wa paandu o Baabuila masindɛlaŋ niŋndo. Ŋ cho teŋgeŋ a kaaŋii cheleŋnde kanifuule, kaaŋnde ipum poonyiaa diola Mɛlɛkalaŋ o Baabuila nda hivi laŋ niŋ te.

13. Yɛɛ ke yɛ num tiindaŋndo maa Chiisu cho hau “buɛi cho sakpo, nduyɛ mbo wa buɛi taasi wo” soliŋndo kpeku? (Chɔŋ 6:​68)

¹³ O palɛi nɛi niŋ, mi Chiisu kila kɔɔnaa o chieeŋndo choo le piɛile tonyaleŋ tooloo, sanaa a “buɛi cho sakpo, nduyɛ mbo wa buɛi taasi wo.” Vɛɛ ŋ yiyaŋ yɛ a kɔɔna Chiisu kila hoo wo okɔɔ? Le nyunaa hoo mulioo, naapum ma yiyaŋ a diomnda kiilanɔɔ Pitɛ dimi le Chiisu nyunaa laŋ. Mbo nyuna ndu aa: “Mi o nɛɛnɛ lo naŋ kuɛ yɛ? Sɔɔŋ ŋ dimi woŋ tosa mi wana sɔla yoomu fafɛɛŋndo.” (Chɔŋ 6:​68) Kuɛɛ naa pumnda wa yɛ wa hau, te naŋ luei o kɔɔna Chɛhowaa niŋ te? Sanaa a kɔɔnaa hoo, Kiliti cho tosaa a sabu, le miŋ sɔla nyɛm mala naa le miŋ lo o laalaŋ naa choo wo. O cho vɛlɛ naa pɛɛkoo le miŋ chaa yooŋgu kɛndɔɔ dimioo nyɛkɛndɛi. Le handɔɔ lechoo, mbo mala naa le miŋ “wounuŋ wana chieeyɛi sɛnɛiye,” le halikpeŋ miŋ nɛŋi Chɛhowa kɔl.—Ɛfi. 4:​24.

14. Vɛɛ ŋ sɔla yɛ niŋ tɔnɔɔ a teleŋ naa Kolonaa hoo, le mɛɛ ŋ cho o kɔɔna Chɛhowaa niŋ yɛ?

¹⁴ Mi Chiisu ke naa nɛila chɔmaalaŋ o teleŋnda  kala kalalaŋ niŋ. A teleŋ naa Kolonaa, miŋ cha kpendekele mɛɛ naŋ sɔla tɔnɔɔ o nɛila chɔmaala ndɔlaŋ niŋ yɛ. Mɛɛ naa hoo del o chieeŋndo niŋ kpou, wanaa bɔɔbɔɔ ndaa sina nyɛ ndaa nɔ ma tosa wo le. Kɛ mi Chiisu tosa a sabu, le miŋ sɔla nɛila chɔmaalaŋ, la mala naa miŋ manda yoomula naalaŋ ndo. Ma dɛɛniaa naa le miŋ wa kanda miliŋndaŋ wounɔŋndo te ŋ wa pɛ waŋnda tɛɛŋ, nduyɛ miŋ fafaŋ holi holiaŋndo. Ma dimul bɛnduaa le ma wa wanaa cho o kundaa niŋnda hɔlteŋ choo teleŋ o teleŋ, le sinaa nyɛm nda hauba woŋ vɛlɛ a nyɛm mala nda ma sɔɔŋguu Chɛhowa ikɛi kpɛɛluŋndoŋ. (Aisaya 32:​1, 2) Sanaa a konala sɛnɛila Dialii Kuumbaŋ Choo Ve, miŋ sɔla kɔl dɛɛniaa a nɛi chɔmaa.

15. Nɛila chɔmaala kuɛɛ naŋ sɔla yɛ niŋ, le bɔŋaŋndaŋ biyɔɔ a yooŋgu kɛndɔɔ dimioo o teleŋ naa Kolonaa niŋ, nduyɛ fulamakɔɔlila kuɛɛ naŋ sɔla yɛ niŋ?

¹⁵ Mɛɛ naa Kolonaa del, miŋ sɔla vɛlɛ nɛila chɔmaalaŋ a mɛɛ naŋ nɔ miŋ bii bɔŋaŋnda naalaŋ yɛ, vɛlɛ a mɛɛ naŋ nɔ miŋ tosa wali dimiaa yooŋgu kɛndɔɔ yɛ. Nyɔɔ viu bɛɛ le, miŋ kandu bɔŋaŋndaŋ, bɔŋaŋnda ibuŋgalaŋ, a bɔŋaŋnda bɛndaŋ biyɔɔ o nyɛm mapuuloŋ choo. Miŋ kandu yooŋgu kɛndɔɔ dimioo o foŋndaŋ choo vɛlɛ a yaulaŋ poonyiaa chieeŋndo balɔɔ silɔ. Chɛhowa dɔu niŋ sɛmbɛ naa sala tau. Lɛuwuŋ bɔɔbɔɔ yɔŋgu niŋ konalaŋ maa, wanaa dimiaa yooŋgu kɛndiaa cho handɔŋndo lechoo o lɛŋii ndɛi niŋ. Nduyɛ pɛŋ, wanaa bɔɔbɔɔ poonyial niŋ lɛuwoŋ a sɔɔŋ yɔŋnaŋ kɔl dɛɛniaŋ nda sɔla niŋndoŋ okɔɔ.—Tofa kɔfoo hoo, “ Mi Chɛhowa Dɔu Yooŋgu Kɛndɛ Naŋ Dimi Wo Sala.”

16. Tiindaŋ yɛɛ naŋ nɔ yɛ miŋ nɔ?

¹⁶ Mi waŋnda apum yiyaŋ dɔɔ maa, kɔɔnaa cho hiuwo ba a nɛila chɔmaalaŋ yɔŋgoo a naa Kolonaa hoo okɔɔ. Kɛ mɛɛ teleŋndo wa hiouwɔɔ fau, mi wana o wana sina maa nɛila chɔmaala taasilaŋ kɔɔnaa wa yɔŋgoo ni. (Maa. 11:​19) A tonya, Chiisu cho chilaŋ chuaa o nɛi kaalaa niŋ. Yiyaŋndo o hei choo tosa miŋ nɔ tiindaŋndo maa, mɛɛ mɛɛ sɔɔŋ hiou lachi a kaloo o chilaŋ niŋ, Chɛhowa nda Po ndɔ kaalaa cho wa a naa latulu.—Nuawɔ Hibuluiya 13:​5, 6.

17. Vɛɛ ŋ yiyaŋ yɛ le wallo tosaa o nɛi chɔmaa Chiisu wo bɛŋgu?

¹⁷ Ŋ cho bɔɔ a kɔl kɛndɛ le waa wallo o nɛi chɔmaa Chiisu wo bɛŋgu! Ŋ cho o kɔɔna naamulaŋ, lɛŋndeŋ a suɛi maŋgalɛi piɔu naa tɛɛŋ te wo niŋ. Ŋ cho nyɛm mala naa le pɛɛkoo a Mɛlɛka okɔɔ woŋ sɔlaa teleŋ o teleŋ. Nduyɛ, ŋ cho pɛɛkoo sɔlaa le chaa yooŋgu kɛndɔɔ dimioo nyɛkɛndɛi. Naa a pilɛŋ pilɛŋnda cho malaa sɔlaa le wana chieeyɛi sɛnɛiye chuɛɛnɔŋndo. Ŋ cho vɛlɛ pɛɛkoo le kaaliaŋndo vellaa velle. Ŋ nɔ sabulaŋ tau le miŋ wa a kɔl kɛndɛ kanifuule, Chiisu cho simlachinɔ naa ni!