Yooŋgu kɔl nyuloo Chiisu ndoo dimul waŋnda ni. Kɛ teleŋ pilɛ mbo dimul buɛiyaa nduaa aa: “La yiyaŋ nuaa maa kɔl nyuloo le ya hiŋ o chieeŋndo choo le. O cho kɔl nyulu le ya hiŋ te. I hiŋ le piɔuwaŋndo lueiyo waŋnda tɛɛŋ. Poo simul niŋ finya ndɔ, mi chuaa simul kala ndɔ, nduyɛ mi lanɔɔ simul kalalɛi ndɔ.” (Maa. 10:​34, 35) Yɛɛ Chiisu ndoo yiyaŋ yɛ?

Chiisu ndoo yeema mbo luei piɔuwaŋndo o yuŋgulaŋ niŋ te. Kɛ mbo sina maa, nyɛ o wa waŋnda pɛɛkoo wo wa tosa mi piɔuwaŋndo luɛi o yuŋgulaŋ lapum niŋ. Le hei, wana o wana yeema pɛ mbo simnuŋ buɛi Kiliti wo nduyɛ mbo sɔla yiŋɔɔ, mɛɛ o nɔ mbo kɛsiŋ o kɔl maa waŋnda atiŋ o yuŋgu ndɔɔ niŋ ve niŋ a kɔl kɛndɛ le. Te wana naŋ cho o nɔɔ niŋndo ɔɔ wanaa cheleŋ o yuŋgoo niŋ simul naa pɛ le mɛɛ naŋ cho buɛiyaa Kiliti wa yɛ, mi i wa ikala le loo o laalaŋ naa choo.

Baabuiyo dɛɛniaa Kilisiɔŋnda le ma ‘tosa nyɛ o nyɛ nda tiuba le mi kɔl nyuloo wa nda tɛɛŋ nda wana o wana.’ (Luomaŋ. 12:​18) Kɛ lepum, mi pɛɛkula Chiisulaŋ la luei “piɔuwaŋndo” o yuŋgulaŋ lapum niŋ. Mi hei yɔŋnuŋ te waŋndo opilɛ o yuŋgu koŋ niŋ chɛl pɛ le simnɔŋndo buɛi Chiisu wo, mi acheleŋnda o yuŋgoo niŋ kɛɛ le simnɔŋndo buɛiyaa Chiisuaa. O hei niŋ, mi wanaa kaŋ simnuŋ ‘yaamɔɔwa’ le wana chɛl koŋ le simnɔŋndo buɛi Chiisoo wo.—Maa. 10:​36.

Lepum, mi sɔɔŋ pum komal buɛiyaa Kilitiaa cho o yuŋgula waa nuaa niŋnda, ŋ tosa mi kaala ndaa le Chɛhowa a Chiisu luɛi o tofaa bɛŋgu wo. Le tamaseliiyo, mi wanayaŋ ndaŋ cho Chɛhowa piɛi le woŋ kindiŋ le nda baŋɔɔ le ma biilu palɛi bɛnduii lekaaŋnde. Te hei yɔŋnuŋ pɛ, nɛɛ nda nɔ yɛ ma nɛŋi kɔl? Mi Chiisu dimi aa: “Wana o wana kaala finya ndɔ ɔɔ kala ndɔ mbo hiou kaala o nɔ le ya wo pɛ, mɛɛ o suliŋ le mbo wa buɛi ni le.” (Maa. 10:​37) O kpeekpei niŋ, o cho dimi le Chiisu wa maa te waŋndo simnuŋ pɛ buɛi ndɔɔ, o nɔ lɛ kaala bɔɔ le yuŋgu ndɔɔ le le. Kɛ pɛɛkoo o wa ni maa, ŋ nɔ miŋ tosa kɛɛsiaa le nyɛ hiou wa o sɔvɛ o yoomu naa niŋndo. Te wanayaŋ naŋ cho Chɛhowa piɛi le woŋ simul naa pɛ le mɛɛ naŋ cho Chɛhowa piɛiyo yɛ, ŋ nɔ miŋ hiou lachi a ndu kaalaa. Nduyɛ, ŋ nɔ miŋ kɛsiŋ o kɔl maa kaala naŋ nɔ le Mɛlɛka wo cho nyɛ tasoo o yoomu naa niŋ ni.

O kpeekpei niŋ, te yuŋgula naalaŋ la simul naa pɛ, miŋ tambu kɔl tau. A koŋ kpou, ŋ nɔ miŋ kɛsiŋ diomnda Chiisulaŋ o kɔl. Mbo dimi aa: “Wana o wana ve o bɛɛndiaŋ mbo chua yɔm ya chua wo, nduyɛ mbo tol la kɔɔli le, o suliŋ le mbo wa buɛi ni le.” (Maa. 10:​38) O dimi niŋ, simul wanayaŋ naŋ simul naa wo cho o sɔɔŋ Chiisu dimi maa ŋ nɔ miŋ biunuŋ ndoŋ tɛɛŋ. Nduyɛ, ŋ nɔ miŋ nɔ tiindaŋndo maa, kaa naa kɛndɔɔ cho tosa ma siŋga yiyaŋnda ndalaŋ, vɛlɛ ma chɛl tonya Baabuiyo.—1 Pitɛ 3:​1, 2.