1-2. (a) Yɛɛ Chɛhowa cha yɛ te waŋnda o miiliɔŋndaŋ niŋ chuuŋgiaŋ pɛ le Nyɛdiaa Ichɔl Salamanɔɔ? (Tofa fotueiyo o kɔɔ.) (b) Yɛɛ naŋ cho yɛ yaasiaa o buŋgɛi hei niŋ?

YIYAŊNDƆ a nyɛ Chɛhowa cha wo te waŋnda o miiliɔŋndaŋ niŋ chieeŋndo balɔɔ silɔ chuuŋgiaŋ pɛ le Nyɛdiaa Ichɔl Salamanɔɔ. O cho ko faŋga bɛndu chuuŋgiaŋ le bɔŋaŋndo hoo wo le o tofa le, kɛ mbo tofa wana o wana kuɛ o bɔŋaŋ koŋ. Le taamaseliiyo, mbo che wanaa duau sɛmbɔɔ iwɔsi o wɔsi le kɔlaŋ o bɔŋaŋ koŋndo. Naapum, mi wanaa nda cho nyɛkindilaa handɔɔ choo wa bɛɛ wa waŋnda haa tɛɛŋ le bɔŋaŋndo hoo biyɔɔ. Waŋnda apum hiŋ lɔɔlɔɔ o bɔŋaŋnda naŋ biilaŋ te, kɛ a che hunɔɔ o Loonuŋyaa maa nyɛ sɔvɛ bɛndu nda nɔ ma tosa wo o cho ni. Mi Chɛhowa che vɛlɛ wanaa huŋ o Loonuŋyaa hunɔɔ tasoo wa, naapum a huŋ le chɔɔ kinɛiya.

² A tonya, Chɛhowa naŋ kɔl tau te o wa pɛ mi wanaa bɔɔbɔɔ hiŋ o Loonuŋyaa. (Luku 22:​19) Kɛ o wa bɛɛ lende, o cho faŋga bɛndu huŋndo le Chɛhowa cho tofaa le. Kɛ yeemɛi nduɛi kpeekpeiye cho sabu nda huŋndo ni, nduyɛ Chɛhowa che sabu waŋnda huŋ o Loonuŋyaa wo nyɛ sɔvɛ bɛndu. O buŋgɛi hei niŋ, ŋ cho nyuna sɔviɔɔ hoo yaasiaa. Le yɛɛ o wa ko Loonuŋyaa le naŋ kua wɔsi o wɔsi le, kɛ miŋ wa vɛlɛ kɔlaŋ o bɔŋaŋnda naŋ bii o lɔɔ o lɔɔ bɛŋgu laŋ la Chɛhowa bɛɛndiaa le wanaa kaala ndu wa?

3-4. (a) Le yɛɛ naŋ kua yɛ o bɔŋaŋnda naalaŋ? (b) Yɛɛ kɔlaŋ o bɔŋaŋnda naalaŋ chɔm yɛ a naa okɔɔ? (c) A mɛɛ Kɔliŋtiaŋ Tasoo 11:​23-26 dimi yɛ, le yɛɛ naŋ nɔ yɛ miŋ bendu Loonuŋyaa le?

³ Sabu kpeekpei naŋ kua o bɔŋaŋnda naalaŋndo cho le Chɛhowa Mɛlɛka piɛiyo ni. Ŋ kua vɛlɛ o bɔŋaŋnda naalaŋ kanifuule, loŋ naŋ sɔla pɛɛkoo Chɛhowa o ba ni. Mi wanaa  heelaŋnda kɛɛ maa a nɔ ma sɔla pɛɛku o pɛɛku le. (3 Chɔŋ 9) Kɛ le teŋgeŋndo chɔmndo, naŋ cho a yeemɛi le mi Chɛhowa vɛlɛ a kɔɔna o cho soliŋndo kpeku wo pɛɛku naa.—Aisaya 30:​20; Chɔŋ 6:​45.

⁴ Kɔlaŋ o bɔŋaŋnda naalaŋ chɔm maa ŋ cho wanaa tusiaŋ, nduyɛ maa ŋ yeema miŋ sɔla pɛɛkoo. O nyuma Loonuŋyaa a piɔm Chiisoo okɔɔ choo, miŋ kuɛ o bɔŋaŋ sɔviɔɔ hoo o cho le mɛɛ naŋ nɔ le ndi tosaa yɛ le, kɛ le mɛɛ naŋ tusiŋ nduyɛ miŋ wa sawa Chiisoo diikɔŋndo yɛ aa, “La wa hei tosaa le loonɔŋndo a ya.” (Nuawɔ Kɔliŋtiaŋ Tasoo 11:​23-26.) Bɔŋaŋ koŋ kindi tiindaŋ naa le chilaŋ, nduyɛ mbo yiyalaŋ naa mɛɛ kpɛ Chɛhowa kaala naa yɛ. Kɛ, Chɛhowa sina maa ŋ yeema kɔl dɛɛniaa vɛlɛ a dialluŋ kalaŋ o cho ko lepilɛ o wɔsioo niŋ te. Lelaŋ, mbo ke naa bɔŋaŋndaŋ le biyɔɔ o lɔɔ o lɔɔ bɛŋgu, nduyɛ mbo dɛɛniaa naa le miŋ wa kɔlaŋ o laŋ. Tusiŋndo nyindu naa le miŋ diikuŋ. Miŋ chua hawɛilaŋ tau o lɔɔ o lɔɔ bɛŋgu le toosiaŋndo le bɔŋaŋndaŋ ndaŋ vɛlɛ a kɔlaŋ o laŋ.

5. Le yɛɛ wanaa tusiaŋnda chɛllɛ veelu Chɛhowaa?

⁵ Wɔsi o wɔsi, mi Chɛhowa veelu wanaa bɔɔbɔɔ le mbo pɛɛku nda, nduyɛ mi wanaa tusiaŋaa bɔɔbɔɔ chɛl veelu ndɔɔ. (Aisaya 50:​4) Mi waŋnda haa tuei kɔlaŋ o Loonuŋyaa yeela, nduyɛ okoŋ kɔɔli, ma kandu kɔlaŋ o bɔŋaŋnda naala cheleŋ. (Sɛka. 8:​20-23) Mi naŋ cho o tonyaa niŋnda vɛlɛ a wanaa sɛnɛiya haa wa a kɔl kɛndɛ tau le pɛɛkoo vɛlɛ a nɛi chɔmaa sɔlaa Chɛhowa, “wana mala” naa nduyɛ, mbo “chiindiaa” naa wo o ba. (Sam 40:​17) O kpeekpei niŋ, yɛɛ cheleŋ cho yɛ o yeelɛi ɔɔ mbo hiau wa o sɔvɛ le veeloo chɛlɔɔ mi Chɛhowa a Chiisu, Po ndɔ o kaala kaala bɛndoo wo pɛɛku naa?—Maa. 17:​5; 18:​20; 28:​20.

6. Vɛɛ tusiŋndo mala yɛ laŋunɔ pilɛ mbo kua o Loonuŋyaa?

⁶ Wɔsi o wɔsi, miŋ dɔu sɛmbɔɔ tau le wanaa bɔɔbɔɔ veeloo le ma hiŋ o Loonuŋyaa a piɔm Chiisoo okɔɔ. Wanaa tusiaŋaa bɔɔbɔɔ sɔla niŋ tɔnɔɔ le veelu naa hoo chɛlɔɔ. Ŋ tofaŋndɔ taamaseliiyo hoo. O wɔsila bɔɔbɔɔ hiou laŋ niŋ, mi laŋunɔ pilɛ sɔla yau veelaa le kɔlaŋ o Loonuŋyaa, kɛ mbo dimul puaapilɛnɔ ke ndu yau veelaa wo maa o cho lakɔ le. Kɛ o nyuma Loonuŋyaa choo, mi kɔndɔfillo bii puaapilɛnɔɔ hoo mɛɛ o che laŋunɔ koŋ luɛiyɔɔ o Toŋgo leMasaa niŋ. Nduyɛ mi kaamaa bii laŋunɔɔ hoo tau a mɛɛ puaapiliaa yil ndu o nɛi kaalaa niŋ yɛ, okoŋ mbo kandu kɔlaŋ o bɔŋaŋnda naŋ bii o lɔɔ o lɔɔ bɛŋgu laŋ. O wɔsioo pilɔɔ niŋ, bɔŋaŋndaŋ layaa kpe o bendu ni le wɔsioo kpou. Yɛɛ mala yɛ ndu mbo tosa kɛɛsiaa le waa kɔlaŋ o bɔŋaŋnda naalaŋ kpou? O wa bɔɔ wana tusiaŋ, nduyɛ mbo siŋga yiyaŋ ndɔɔ. Mi puaapilɛnɔ veelu ndu wo dimi aa, “O cho bɔɔ laŋunɔ tusiaŋ bɛndu.” Chɛhowa kpeekpei veelu laŋunɔɔ hoo ni le ndu piɛiyo, nduyɛ suŋ suŋ niŋ o cho niŋ puaapilɛnɔ yiŋndo.—2 Saam. 22:​28; Chɔŋ 6:​44.

7. Vɛɛ nyɛ naŋ pɛɛku o bɔŋaŋndaŋ vɛlɛ a nyɛ naŋ veelu diomndaŋ o Baabuiyo niŋndo mala yɛ naa miŋ wa wanaa tusiaŋ?

⁷ Nyɛ naŋ pɛɛku o bɔŋaŋndaŋ ndo vɛlɛ a nyɛ naŋ veelu diomndaŋ o Baabuiyo niŋndo mala naa miŋ wa wanaa tusiaŋ. Le lɔɔla biŋgi la lo tuupa mi Loonuŋyaa fuuluu wo, miŋ pɛɛku sɔɔŋ tau o bɔŋaŋnda naalaŋ niŋ a taamasi Chiisoo vɛlɛ a tusiŋ o chɔm mbo yɔŋgu yoomu ndɔɔ le naa baŋaa wo. Nduyɛ o palɛi biŋgii lo tuupa mi Loonuŋyaa fuuluu wo niŋ, miŋ sɔla dɛɛniaa le diomndaŋ veeloo o Baabuiyo niŋ a sɔɔŋ yɔŋnuŋ a piɔm Chiisoo vɛlɛ a fulasɛiniŋ ndɔɔ okɔɔ wo. Nyɛ naŋ pɛɛku o bɔŋaŋnda waa naa wo, vɛlɛ a nyɛ naŋ veelu diomndaŋ o Baabuiyo niŋ a sɔɔŋ yɔŋnuŋ a piɔm Chiisoo okɔɔ wo, tosa miŋ chɔɔlu balika melaa nɔ le sala Chiisu soliŋ le naa wo. Nduyɛ, mi hei nyindu naa le taamasi ndɔ tusiaŋndo tolɔɔ kɔɔli, vɛlɛ a hɛnaŋ Chɛhowaa tosaa o yɔŋ bɛɛ mbo wa ikala le naa.—Luku 22:​41, 42.

8. Vɛɛ Chiisu ndoo chɔm yɛ kɔl sikpaa?

⁸ Miŋ kindiŋ vɛlɛ le taamasi Chiisoo tolɔɔ kɔɔli le kɔl sikpaa chɔmndo. Yiyaŋndɔ a kɔl sikpa o chɔm o palɛi ndii lo tuupa mbo sɔla piɔmndo wo. Ndoo sina kpendekele maa yaamɔɔwaa nduaa wa ndu suŋ siɔmbulaŋ tusi, ma lɔɔ ndu, nduyɛ ma dii ndu. (Maa. 20:​17-19) A koŋ kpou, mbo chɛl le mbo sɔla piɔmndo. Mɛɛ teleŋndo fuuluu le mbo sɔla piɔmndo, mbo dimul buɛiyaa nduaa laalaŋaa wa a ndu latulu o Kɛsɛmani niŋnda aa, “La chɔŋ ŋ kɔŋnuŋ. A che wana cho ya pisioo wo hunɔɔ.” (Maa. 26:​36, 46) Mɛɛ sovɛiya hiŋ le ndu biyɔɔ, mbo fula nda lachi okoŋ mbo chɔɔmuŋ ndupila. Nduyɛ, mbo dimul sovɛiyaa kaŋ le ma mal buɛiyaa nduaa ma kuɛŋnuŋ. (Chɔŋ 18:​3-8) Nuawɔ se kɔl sikpa bɛndu Chiisu chɔmndo! Hau, Kilisiɔŋaa pɔyaŋnda vɛlɛ a saa cheleŋnda cho kindiŋndo le taamasi Chiisoo tolɔɔ kɔɔli le kɔl sikpaa chɔmndo. Vɛɛ nda cho yɛ hei tosaa?

9. (a) Le yɛɛ naŋ yeema yɛ kɔl sikpaa le kɔlaŋ o bɔŋaŋndaŋ lɔɔlɔɔ? (b) Vɛɛ taamasi naa piiliaŋ yɛ puaapiliaa naa cho o chiɛila manyumndaŋ niŋ le laalaŋ ndaa wa?

⁹ Le miŋ wa o bɔŋaŋndaŋ lɔɔlɔɔ, naapum ŋ nɔ miŋ chɔm kɔl sikpaa o nyɛ kindilaa bɛŋgu. Mi puaapiliaa a ndepiliaa naa apum kuɛ o bɔŋaŋndaŋ mi che bɛɛ a cho a mɔnɛi, kɔlta tambɛilaŋ, ɔɔ a naa. Nduyɛ, mi apum chɔm kɔl sikpaa le kɔlaŋ o bɔŋaŋndaŋ mi che bɛɛ a cho nyɛ kindilaa sɔlaa yuŋgula ndalaŋ ɔɔ masaleŋ o ba. Yiyaŋndɔ le teleŋ biŋgi mɛɛ taamasi naa piiliaŋ puaapiliaa naa cho o chiɛila manyumndaŋ niŋ le tiindaŋ ndaa wo. (Hibu. 13:​3) Te a tuei pɛ maa ŋ cho hiouwɔɔ lachi a Chɛhowa piɛiyo mi che bɛɛ ŋ cho tɔɔndaŋndaŋ sɔlaa, ma sɔla yoomuaŋ le hiouwɔ lachi a tiindaŋndo, kɔl sikpaa, vɛlɛ a pimbi nda simiaa chɔmndo. Mi suɛi waa naa yɔŋnuŋ Pɔɔl, wana Chiisu vem hɔlte ndɔ wo. Teleŋ o wa o chiɛi manyumndo niŋ Luomndo, mi ndoo naŋ kɔl tau teleŋ o teleŋ ndoo tuei pɛ maa puaapiliaa nduaa wa hiouwɔɔ lachi a Mɛlɛka piɛiyo o laalaŋndo choo. (Filipi. 1:​3-5, 12-14) Tuupa ma soli Pɔɔl ɔɔ mɛɛ nda soli ndɔɔ ndu o chiɛi manyumndo niŋ, mbo poonyial Hibuluiya yauwo. Nduyɛ o yau koŋ niŋ, mbo dɛɛniaa Kilisiɔŋaa laalaŋaa kaŋ aa, “la hiou lachi a kaaliaŋndo vellaa velle” nduyɛ maa fɛɛŋ bɛɛ a mal chuuŋgiaŋndo diompilɛ le.—Hibu. 10:​24, 25; 13:​1.

10-11. (a) Nɛɛ waa naŋ nɔ yɛ miŋ veelu le Loonuŋyaa? (b) Sabu kuɛɛ Ɛfisiaŋnda 1:​7 chɔm yɛ le hei tosaa?

¹⁰ Ŋ chɔm kɔl sikpaa te ŋ veelu pɛ wanayaŋ naŋ, wanaa naŋ tosa wallo latulu wa, vɛlɛ a wanaa naŋ chiɛɛliaŋnda le Loonuŋyaa. Le yɛɛ naŋ veelu yɛ wanaa waa naa? Kanifuule, ŋ nɔ balika melaa tau le nyɛ Chɛhowa nda Chiisu tosal naa wo, nduyɛ maa ŋ yeema mi acheleŋnda bɛɛ wa o Loonuŋyaa. Ŋ yeema mi nda bɛɛ sɔla tɔnɔɔ o ‘kɛndɛi bɛndu bɛnduii’ Chɛhowa chɔm naa ve niŋ sanaa a sala baŋaa.—Nuawɔ Ɛfisiaŋnda 1:​7; Sɔɔŋ. 22:​17.

¹¹ Te ŋ chɔm pɛ kɔl sikpaa le waa bɔŋaŋndaŋ biyɔɔ diompilɛ, miŋ chɔm vɛlɛ suliŋ kɛndɛ cheleŋ, o Mɛlɛka nda Po ndɔɔ chɔm niŋ o nɛila kɔndɔfiltaŋ niŋndo.

12. (a) Vɛɛ bɔŋaŋnda naalaŋ la yiŋgila yɛ kaala naa le Chɛhowa vɛlɛ a Chiisu? (b) Yɛɛ Kɔliŋtiaŋ Diiŋ Ndɔɔ 5:​14, 15 dɛɛniaa yɛ naa le tosaa le taamasi Chiisoo tolɔɔ kɔɔli?

¹² Kaala naŋ nɔ le Chɛhowa vɛlɛ a Chiisu wo nyindu naa ni miŋ kuɛ o bɔŋaŋndaŋ. Nduyɛ, nyɛ naŋ pɛɛku o bɔŋaŋndaŋ ndo tosa mi kaala naa le Chɛhowa vɛlɛ a Po ndɔɔ chɔɔlu yiŋgila. Teleŋ o teleŋ, miŋ sɔla loonɔŋndo o bɔŋaŋndaŋ a nyɛ nda tosal naa niŋndo okɔɔ. (Luomaŋ. 5:​8) Nduyɛ o kpeekpei niŋ, Loonuŋyaa yiyalaŋ naa a kaala yiŋgoloŋ nda nɔ le naa, vɛlɛ a wanaa sina wɔ bɛɛ sɔvɛyɛi sala baŋaa le wa. Le mɛɛ naŋ nɔ balika melaa yɛ, miŋ kindiŋ le taamasi Chiisoo tolɔɔ kɔɔli lepaa o lepaa o yoomula naalaŋ niŋ. (Nuawɔ Kɔliŋtiaŋ Diiŋ Ndɔɔ 5:​14, 15.) Nduyɛ le handɔɔ lechoo, mi kɔl naa nyindu naa le Chɛhowa saŋgalaa le mɛɛ o ke naa sala baŋaa yɛ. Nɛiyo opilɛ o naŋ saŋgala ndu wo cho mulilaŋ yɔŋgoo a kɔl naa kpou o bɔŋaŋnda naalaŋ ni.

13. Vɛɛ naŋ chɔm yɛ kaala naa yiŋgoloŋndo le Chɛhowa vɛlɛ a Po ndɔɔ? Tɛɛsiaawɔ.

¹³ Ŋ chɔm kaala naa yiŋgoloŋndo le Chɛhowa nda Po ndɔɔ, te ŋ yɔŋguŋ pɛ wulee le salaa soliŋndo le nda. Nduyɛ lepum, miŋ soliŋ salala bɔɔbɔɔ le halikpeŋ miŋ kuɛ o bɔŋaŋnda naalaŋ. Mi kundala bɔɔbɔɔ bii bɔŋaŋndo opilɛ o paale walteŋ choo naapum a paale delaaleŋ, teleŋ naa bɔɔbɔɔ wa a saŋgɛiya wo. Nduyɛ, ma bii vɛlɛ bɔŋaŋ cheleŋ o lɔɔ mɛɛlulaŋ teleŋ acheleŋnda wa pɛŋgioo wo. Baa Chɛhowa cha pa naa o bɔŋaŋnda naalaŋ o yɔŋ bɛɛ miŋ wa a saŋgɛiya? Ei, mbo che naa! Nduyɛ pɛɛŋ, mɛɛ naŋ soliŋ sala fau le kɔlaŋ o bɔŋaŋnda naalaŋ yɛ, lende koni Chɛhowa chɔm balika melaa le kaala naŋ chɔm ndu wo ni.—Maki 12:​41-44.

14. Vɛɛ Chiisu kɛsullɛ naa taamaselii sɔviɔɔ le kaala sala soliaŋndo chɔmndo?

¹⁴ Chiisu kɛsul naa taamaseliiyo le kaala sala soliaŋndo chɔmndo. O ve ko o yɔŋgaŋ le mbo vi le buɛiyaa nduaa le, kɛ lepaa o lepaa mi ndoo handu yeemaŋ ndaŋ nyɛ tasoo ŋ ndɔŋ lachi. Le taamaseliiyo, mi Chiisu ndoo chuuŋgiaŋ a buɛiyaa nduaa latulu, mi che bɛɛ ndoo wa lepum o saŋgɛiyo ɔɔ o nyɛ kindilaa bɛŋgu. (Luku 22:​39-46) Nduyɛ, o cho o nyɛ Chiisu ndoo sɔla acheleŋnda o ba wo le ndoo handu kɔllo choo le, kɛ o nyɛ ndoo tiuba le nda kioo wo choo. (Maa. 20:​28) Te kaala naa le Chɛhowa a puaapiliaa naa wa pɛ o kala poŋ, keŋ cho naa nyindɔɔ le tosaa nyɛ o nyɛ naŋ tiuba le  halikpeŋ miŋ kuɛ o Nyɛdiaa Ichɔl Salamanɔɔ vɛlɛ a bɔŋaŋnda naala cheleŋ.

15. Nɛɛ waa kpeekpei naŋ buulaŋ yɛ le malaa?

¹⁵ Ŋ cho o tonyaa niŋ naa chaaŋaa naa Kilisiɔŋnda kpou. Nduyɛ, miŋ tuei yeela tau le teleŋ naa soliŋndo kpeku le acheleŋnda veeloo ma huŋ wa a naa latulu. Kɛ o wa bɛɛ lende, “chaaŋaa naa wanaa laalaŋnda” a pɛŋgi kɔlaŋ o bɔŋaŋndaŋ ɔɔ o wali pollo niŋnda naŋ landuŋ kɔl tau le malaa ni. (Kalee. 6:​10) Ŋ chɔm kaala naa le nda te ŋ wa nda pɛ dɛɛniaa le kɔlaŋ o bɔŋaŋndaŋ, taama taama o Loonuŋyaa. Maa Chɛhowa nda Chiisu, miŋ naŋ kɔl tau te wana pɛŋgi kɔlaŋ o bɔŋaŋndaŋ ɔɔ o wali pollo niŋndo miiŋgu pɛ Chɛhowa, Finya naa kaalaa a Wana Mandaa Lasaa o ibuŋ.—Maa. 18:​14.

16. (a) Vɛɛ naŋ dɛɛniaŋ yɛ vellaa velle, nduyɛ yɛɛ bɔŋaŋnda naalaŋ la tosallɛ naa? (b) Le yɛɛ teleŋndo hoo o wɔsioo niŋ cho yɛ teleŋ kɛndɛ le loonɔŋndo a diomnda Chiisulaŋ o Chɔŋ 3:​16 niŋ?

¹⁶ O lɔɔla cho hunɔɔ laŋ niŋ, veelu waŋnda mɛɛ o mɛɛ ŋ nɔla yɛ le ma wa o Loonuŋyaa choo Chimɛiyo ichɔllo Nyaakuɛiyo 19, 2019. (Tofa kɔfoo hoo, “ A Cho Nda Pa Veelu?”) Chɔŋ a hau mbo kuɛ kɛ, maa i wa yiyaŋ naa le hiouwɔɔ lachi a dɛɛniaŋndo vellaa velle a mɛɛ naŋ kua teleŋ o teleŋ o bɔŋaŋnda Chɛhowa kɛɛsiaa le naalaŋ yɛ. A mɛɛ mɛɛlula chieeŋndo hoo la cho niŋ sɔɔŋgoo kpɛɛluŋ yɛ, bɔŋaŋnda naalaŋ la cho naa mala miŋ hiou lachi a tusiŋndo, kɔl sikpaa, vɛlɛ a kaalaa chɔmndo. (1 Tɛsa. 5:​8-11) Maa ŋ chɔmnuŋ kaala naa le Chɛhowa nda Po ndɔɔ a kɔl naa kpou le mɛɛ nda kaala naa tau yɛ!—Nuawɔ Chɔŋ 3:​16.