BUŊGƐI PƐƐKƐI 1
“La Buulaŋ Te, Kanifuule Ya Cho Mɛlɛka Nyaa Ni”
“La yɔŋ isiooŋ te, kanifuule, I cho nya kɔɔli. La buulaŋ te, kanifuule ya cho Mɛlɛka nyaa ni. I cho nya dialluŋ kalaŋ ke, nduyɛ mi mala nya.”—AISAYA 41:10, NW.
CHONDII 7 Chɛhowa Cho Kpaaya Naa Ni
SƆƆŊ KULLOŊ O BUŊGƐI HEI NIŊ *
1-2. (a) Vɛɛ yooŋgu cho o Aisaya 41:10 niŋndo piiliaŋ yɛ yema Yosiko? (b) Le tɔnɔ nɛɛnɛ Chɛhowa tosa yɛ a sabu ma manda yooŋgu koŋ?
MI NDEPILƐNƆ pilɛ cho Mɛlɛka piɛiyo o laalaŋndo choo wo diolaŋ Yosiko sɔla yooŋgu wɔɔŋndo. Mi wana ndɔ chiɔuwaa dimul ndu maa paŋguŋ biŋgi koni o nɔ le waa yoomu ni. Yɛɛ o tosa yɛ? Mi Yosiko loonuŋ bolle Baabuile o kaala tau leŋ, Aisaya 41:10. (Nuawɔ.) Lelaŋ, mbo bii kɔllo, okoŋ mbo dimul wana ndɔ chiɔuwaa maa o ve a isiooŋ te, kanifuule ba Chɛhowaa wa ndu choo. * Yooŋgu kɔl dɛɛniaa cho o bolle Baabuile leŋ niŋndo mala yema naa ni mbo duau tiindaŋndo o Chɛhowa niŋ a kɔllo kpou. Bolle Baabuileŋ ndeŋ le mala vɛlɛ naa miŋ bii kɔllo o yɔŋ bɛɛ miŋ wa o simulta kala kalalaŋ bɛŋgu. Le miŋ bii bila mɛɛ le mala naa yɛ, ŋ yaasiaŋ ndɔ fɛŋ le sabu Mɛlɛka yɔŋgu Aisaya yooŋgu koŋndo.
2 O kandɔŋndo, mi Chɛhowa dimul Aisaya le mbo poonyiaa diomnda laŋ le Chuuwaa ndaa kua niŋ o biyɔɔ niŋ Babilɔŋnda kɔllo dɛɛniaa. Kɛ mi Chɛhowa tosa a sabu ma manda yooŋgu koŋ o ve ko le tɔnɔ Chuuwaa wa o biyɔɔ niŋnda le, kɛ le wanaa nduaa chɔŋ a teleŋ koŋ. (Aisaya 40:8; Luomaŋ. 15:4) Hau, ŋ cho o palɛi “nyɛ palaa” niŋ. Lelaŋ, ŋ yeema kɔl dɛɛniaa cho o yau Aisaya wo niŋndo mbo hiau teleŋ kɛ kɛ.—2 Timo. 3:1.
3. (a) Diomnda mɛyaala kuɛɛ cho yɛ o Aisaya 41:10 niŋ, bolle Baabuile hɛliŋ le wɔsi 2019? (b) Le yɛɛ naŋ yeema yɛ diomnda mɛyaalaŋ ndaŋ?
3 O buŋgɛi hei niŋ, ŋ cho yaasiaa diomnda Chɛhowa mɛi o Aisaya 41:10 niŋndo. (1) Chɛhowa cho naa kɔɔli, (2) ndu cho Mɛlɛka naa ni, nduyɛ (3) o cho naa mala. Naa kpou yeema diomnda mɛyaala waa naa kanifuule, maa Yosiko, miŋ sɔla simultaŋ o yoomoo niŋ. Nduyɛ, miŋ sɔla vɛlɛ kpɔkɔsilaŋ le sɔɔŋ wɔɔŋ yɔŋnuŋ o chieeŋndo niŋndoŋ. Naa pumnda cho pɛɛŋ kota masɛi cho naa tusioo choo wo biuwɔŋndo. Ŋ yaasiaŋndɔ diomnda mɛyaala yaalaŋ ndaŋ la pilɛŋ pilɛŋ. *
“I CHO NYA KƆƆLI”
4. (a) Yɛɛ cho yɛ diomnde mɛyaale tasele naŋ cho yaasiaa leŋ? (Tofa vɛlɛ tɛɛsiaa amatou.) (b) O nɛila kuɛɛ choo Chɛhowa chɔm yɛ mɛɛ o yiyaŋ a naa okɔɔ yɛ? (c) Vɛɛ diomnda Mɛlɛka dimi laŋ la piiliaŋ yɛ num?
4 Mi Chɛhowa kandu naa kɔltaŋ dɛɛniaa a diomnda mɛyaalaŋ ndaŋ aa, “La yɔŋ isiooŋ te, kanifuule, I cho nya kɔɔli.” * Mi Chɛhowa chɔm maa o cho naa kɔɔli a mɛɛ o kɛsi naa hɔlteŋ choo vɛlɛ a naa kaalaa chɔmndo yɛ. Tofawɔ mɛɛ Chɛhowa chɔm maa o nɔ kaala yiŋgoloŋndo le naa yɛ. Mbo dimi aa, “La cho wanaa kpeekpei ya o hɔl, I nɔ bɛɛleŋ le nya, nduyɛ mi kaala nya.” (Aisaya 43:4) Nyɛ o nyɛ cho mbo kɛɛlu Chɛhowa wanaa cho ndu piɛiyo wa kaalaa chɔmndo le. Lo lechoo ndɔɔ o naalo hiiluŋ te. (Aisaya 54:10) Kaala ndɔɔ vɛlɛ a chaŋyɛi naŋ nɔ a ndu ve ke naa kɔl sikpaa. Nduyɛ, o cho naa hau manda mɛɛ o manda Ebilam (Ebilaham) chaŋ ndɔ yɛ. Mi Chɛhowa dimul ndu aa, “Ebilam, yɔŋ isiooŋ te. Ya cho wana manda num ndo ni.”—Chɛ. 15:1.
A mala Chɛhowaa, ŋ nɔla miŋ nɔ kɔl sikpaa nduyɛ miŋ sɔla batiuwaa le tɔɔndaŋ kɛ kɛ biuwɔŋndo, o yɔŋ bɛɛ mi tɔɔndaŋ koŋ wa maa pee bɛndu ɔɔ maa leyiŋ (Tofa pɛlta 5-6) *
5-6. (a) Vɛɛ naŋ looku yɛ sina maa Chɛhowa nɔ yeemɛi le naa malaa te simultaŋ la komal naa pɛ? (b) Yɛɛ naŋ pɛɛku yɛ o suɛi yɔŋnaŋii Yosiko ve niŋ?
5 Ŋ sina maa Chɛhowa nɔ yeemɛi le naa malaa a simulta komal naa pilɛŋ pilɛŋnda laŋ kanifuule, o ke wanaa nduaa diomnde mɛyaaleŋ aa, “A yɔŋ bɛɛ mi la keeku o mɛŋma yiŋgilɛiyaŋ niŋ, I wa niŋ a nya latulu. La keeku bɛɛ o mɛŋndaŋ niŋ le peelaŋ taŋɔɔ, wana pilɛ bɛɛ o lo niŋ o peelo le. La keeku bɛɛ o yiŋndeŋ niŋ la ŋue le, yiŋndeŋ le tɛɛmbuu nya le.” (Aisaya 43:2) Yɛɛ diomndaŋ ndaŋ la sim yɛ?
6 Chɛhowa mɛi lediom le simulta komal naa o yoomoo niŋndaŋ faŋaa le. Kɛ, o chɛl mi bahawɛila komal naalaŋ la tiu naa ba, nduyɛ mi la kɛɛlu naa ndu piɛiyo ɔɔ tɛɛmbuu naa lefafɛɛŋ te. O mɛi lediom maa o cho wa a naa latulu le naa malaa miŋ “keeku” o simulta laŋ niŋ. Yɛɛ Chɛhowa cho yɛ tosa? O cho naa mala miŋ bii Aisaya 41:13) Mi Yosiko naŋ soo suŋ a ndu okɔɔ wo saaluŋ maa keŋ cho tonya. Mi chua ndɔɔ dimi aa, “Mi kɔndɔfillo bii naa mɛɛ naŋ che mɛɛ kala naa ndoo kɛsi kɔllo yɛ. Miŋ cha kpendekele maa mi Chɛhowa ke ndu kɔl nyulu kpeekpeiyo. Haaa a paale o vi leŋ, o wa suɛi a Chɛhowa okɔɔ vɛlɛ a mɛila ndɔlaŋ o wanaa ndaa huŋ le dandaa wa lo, a wanaa chiɔuwaa.” Yɛɛ naŋ pɛɛku yɛ o suɛi yɔŋnaŋii Yosiko ve niŋ? Te ŋ dɔu pɛ tiindaŋ naa o diomnde Mɛlɛka mɛi leŋ ndeŋ niŋ maa “I wa niŋ a nya latulu,” naa bɛɛ cho nɔ kɔl sikpaa nduyɛ miŋ sɔla kpaayaa le tɔɔndaŋndaŋ biuwɔŋndo.
kɔllo le halikpeŋ miŋ hiou lachi a lo lechoo naa chɔmndo o ndu lo, o yɔŋ bɛɛ miŋ nɔ le piɔmndo sɔlaa. (“YA CHO MƐLƐKA NYAA NI”
7-8. (a) Ɔɔ diomnde mɛyaale diiŋndɔ le naŋ cho yaasiaa leŋ, nduyɛ yɛɛ le sim yɛ? (b) Le yɛɛ Chɛhowa dimullɛ Chuuwaa wa o biyɔɔ niŋnda aa, “La buulaŋ te”? (c) Diomnda kuɛɛ cho yɛ o Aisaya 46:3, 4 niŋ la mala wanaa Mɛlɛkaa le kɔlta ndalaŋ kɛsioo wo?
7 Tofawɔ diomnde mɛyaale diiŋndɔ le Aisaya poonyiaa leŋ. Mbo poonyiaa aa, “La buulaŋ te, kanifuule ya cho Mɛlɛka nyaa ni.” Yɛɛ dimioo hoo, la buulaŋ te sim yɛ? O bolle Baabuileŋ niŋ, diom kpeekpeiyo le “la buulaŋ te” cho suɛi a mɛɛ ŋ wa naa “tofaŋndo kɔɔli a siooŋnde maa waŋndo ɔɔ nyɛ cho num yɔŋul lɛ.” Ɔɔ “waa a siooŋnde mɛɛ waŋndo wa naa o kpundɔɔ niŋ yɛ.”
8 Le yɛɛ Chɛhowa ndoo dimullɛ Chuuwaa ndaa kua niŋ o biyɔɔ niŋ Babilɔŋnda maa la “buulaŋ te”? Kanifuule, ndoo sina maa wanaa wa o lɛŋii keŋ niŋnda wa wa a siooŋnde. Yɛɛ wa yɛ tosa mi ndaa wa a siooŋnde? O mɛɛlula wɔsila 70 Chuuwa wa o biyɔɔ niŋndaŋ, puaa chɔuwaa dialluŋ kalaa Mɛdo Paasiaa wa hunɔɔ Babilɔŋ delɔɔ choo a sɔŋgɔɔ. Chɛhowa wa puaa chɔuwaa kaŋ soliŋ kpeku le wanaa nduaa solioo o chɛleŋ niŋ Babilɔŋ. (Aisaya 41:2-4) Mɛɛ Babiloniaŋnda a wanaa wa o lɛŋii cheleŋnde niŋ a teleŋ koŋ nda che maa yaamɔɔwaa ndaa wa niŋ kpɛɛluŋ, ma kindiŋ le kɔl sikpaa ndaa chɔmndo. Okoŋ, ma dɛɛniaŋ vellaa velle aa, “Sɔla kɔl simulaa.” Nduyɛ, ma chɔɔlu vɛlɛ mɛlɛkaa piɔmnda toosiaa tau. Ma tiindaŋ maa mɛlɛkaa kaŋ wa nda manda. (Aisaya 41:5-7) Kɛ mi Chɛhowa tosa mi Chuuwa wa o biyɔɔ niŋnda kɛsi kɔltaŋ, nduyɛ mbo dimul nda aa, “Nya waŋnda Isɔluɛi, buɛiyaa niaa nya cho ni. . . . La tambu kɔl te, ya cho Mɛlɛka nyaa ni.” (Aisaya 41:8-10) Kɛsiŋ o kɔl maa mi Chɛhowa dimi aa, “Ya cho Mɛlɛka nyaa ni.” A diomndaŋ ndaŋ, mi Chɛhowa ke buɛiyaa nduaa wa lo lechoo wo chɔmndo wa tiindaŋndo maa o puɛɛŋ a nda le. Nduyɛ maa o wa wɔ Mɛlɛka ndaa, vɛlɛ maa nda bɛɛ wa wɔ wanaa ndɔ. Mbo dimul nda aa, “I cho nya manda nduyɛ mi chiindiaa nya.” Mi diomnda kɔl dɛɛniaalaŋ ndaŋ la luei Chuuwaa wa kaŋ o biyɔɔ niŋnda yoomuaŋ.—Nuawɔ Aisaya 46:3, 4.
9-10. Le sabu yɛɛ naŋ nɔ yɛ miŋ nɔ isiooŋ te? Chɔmndɔ taamaseliiyo.
9 Hau, waŋnda cho buulaŋndo mbo hiau teleŋ kɛ kɛ le sɔɔŋ wɔɔŋ cho hiouwɔɔ lachi a yɔŋnɔŋndo o chieeŋndo niŋndo. I cho tonya maa naa bɛɛ, mi bahawɛilaŋ ndaŋ la komal naa. Kɛ sabu o sabu cho miŋ yɔŋ isiooŋ te. Chɛhowa dimul naa aa, “Ya cho Mɛlɛka nyaa ni.” Le yɛɛ nyɛ Chɛhowa dimi hoo wo mala yɛ naa miŋ kɛsi kɔltaŋ?
10 Ŋ tofaŋndɔ taamaseliiyo hoo. Puaa a ŋiɔɔŋ Chim nda Bɛŋ wa kɔlaŋ o dɛndɛ choo niŋ, nduyɛ mi hueiyii bɛndu bɛnduei kandu hɔŋndo. Mɛɛ hueiye wa hiouwɔɔ lachi a dɛndɔɔ hiŋndo, mi wana wa kɔlaŋ a dɛndɛ choo wo yonda choo choo kpeleŋ aa, “Wana o wana yiinuŋ yaule cho o kpeŋgbei ŋ cho ichali choo wo peŋ. Kanifuule, hueiye cho wa dɛndɔɔ hiŋndo le teleŋ tiŋ.” Mi Chim kandu buulaŋndo tau. Kɛ mi wana wa kɔlaŋ a dɛndɛ choo wo chɔɔlu dimi aa, “La buulaŋ te. Wana cho kɔlaŋ a dɛndɔɔ wo cho suɛi ni.” O teleŋ koŋ bɛŋgu, mi Chim hiŋ bolleŋ, mbo dimi aa, “Ɔɔ tiindaŋ suu ŋ cho naa
hoo kioo wo?” Kɛ mbo saaluŋ maa Bɛŋ ve buulaŋ kposoŋ te. Mi Chim nyuna ndu aa, “Le yɛɛ ŋ challɛ kpɛ a cho buulaŋ te?” Mi Bɛŋ mam muɛɛŋ mbo dimi aa, “Kanifuule, I sina wana cho kɔlaŋ a dɛndɛ choo hoo wo nyɛkɛndɛi. Finya nuu o cho ni!” Okoŋ mi Bɛŋ dimi vɛlɛ aa, “I dimullɔɔ num a finya nuu okɔɔ. I laalaŋ maa te o yɔŋ pɛ ma sina ndu, nduyɛ ma sina mɛɛ o chaa kɔlaŋ a dɛndɛ choo yɛ, num bɛɛ cho kɔllo kɛsi.”11. Yɛɛ naŋ pɛɛku yɛ o taamaselii puaa ŋiɔɔŋaa wa kɔlaŋ o dɛndɛ choo niŋnda?
11 Yɛɛ naŋ pɛɛku yɛ o taamaseliiyo hoo niŋ? Maa Bɛŋ, ŋ buulaŋ kposoŋ te kanifuule, ŋ sina Chɛhowa, Finya naa cho o choo choo niŋndo nyɛkɛndɛi. Ŋ sina maa o cho naa mala le miŋ biunuŋ bahawɛila kala kalala komal naa o palɛi mɛɛlɛi hei niŋndaŋ. (Aisaya 35:4) Ŋ nɔ tiindaŋndo o Chɛhowa niŋ, lelaŋ ŋ nɔla miŋ kɛsi kɔlta naalaŋ o yɔŋ bɛɛ mi acheleŋnda o chieeŋndo niŋ wa a siooŋii bɛndu bɛnduei. (Aisaya 30:15) Nduyɛ, ŋ tosa maa Bɛŋ te ŋ wa pɛ wanaa naŋ chiɛɛliaŋnda chɔmndo sabula naŋ nɔ tiindaŋndo o Mɛlɛka niŋndo. Okoŋ, mi nda bɛɛ nɔ tiindaŋndo maa mɛɛ mɛɛ simultaŋ la komal nda, Chɛhowa cho nda mala.
“I CHO NYA DIALLUŊ KALAŊ KE, NDUYƐ MI MALA NYA”
12. (a) Diomnde mɛyaale yaa ndɔle kuɛɛ naŋ cho yɛ yaasiaa? (b) Yɛɛ dimioo hoo “a kpaaya ndɔ bɛndoo” yiyalaŋ yɛ naa a Chɛhowa okɔɔ?
12 Ŋ tofaŋndɔ diomnde mɛyaale yaa ndɔle Aisaya poonyiaa leŋ. Mbo poonyiaa aa, “I cho nya dialluŋ kalaŋ ke, nduyɛ mi mala nya.” Aisaya ndoo chii niŋ tɛɛsiaa mɛɛ Chɛhowa ndoo ke niŋ wanaa nduaa dialluŋ kalaŋ yɛ. Mbo dimi aa, “Mɛlɛka Yaawɛɛ Kpuluŋguma bɛndoo cho hunɔɔ a kpaaya bɛndoo. O cho hunɔɔ le waa Masaa ŋwaŋnda chiee kpou choo, a kpaaya ndɔ bɛndoo.” (Aisaya 40:10) Diomndaŋ ndaŋ la yiyalaŋ naa maa Masa kpaaya bɛndoo Chɛhowa cho ni. Mbo soliŋ kpaaya ndɔ bɛndoo kpeku le buɛiyaa nduaa mandaa o paandoo niŋ. Nduyɛ, o cho hau hiouwɔɔ lachi a wanaa dɔu tiindaŋ ndaa o ndu niŋ nda dialluŋ kalaŋ kioo, vɛlɛ a nda mandaa.—Ditɔnɔ. 1:30, 31; Aisaya 43:10.
Wolɔɔ o wolɔɔ chɔu cho mbo nɔla kpaaya bɛndu Chɛhowa soliŋ kpeku le naa mandaa wo yomɔɔ le (Tofa pɛlta 12-16) *
13. (a) A teleŋ kuɛɛ kpeekpei Chɛhowa peelu yɛ diomnde o mɛi le naa dialluŋ kalaŋ kioo wo? (b) Diomnde yɛɛ Chɛhowa mɛi yɛ le ke naa dialuŋ kalaŋ vɛlɛ a tiindaŋndo wo?
13 O bii fau te yaamɔɔwa wa naa nyɛpalaa tusioo choo pɛ, teleŋ koŋ kpeekpei Chɛhowa peelu diomnde o mɛi leŋ ni aa, “I cho nya dialluŋ kalaŋ ke.” O lɛŋnde ipum niŋ hau o chieeŋndo choo, yaamɔɔwaa naa cho kindiŋndo kpeekpei le naa kuunaa wali dimiaa yooŋgu kɛndɔɔ tosaa ɔɔ le kɔɔna naa kindaa. A koŋ kpou, buulaŋ cho naa tau a simulta waa lende le. Chɛhowa mɛi lediom le ke naa dialuŋ kalaŋ vɛlɛ a tiindaŋndo wo. O mɛi lediom aa, “Wolɔɔ o wolɔɔ chɔu cho mi waŋndo o chiŋalaŋ num a ndu mbo nɔla num yomɔɔ le.” (Aisaya 54:17) Diomndaŋ ndaŋ la yiyalaŋ naa a tonyala sɔvɛlaŋ layaa.
14. Le yɛɛ kɔndɔfili bii naa le te yaamɔɔwaa Mɛlɛkaa chiŋalaŋ naa pɛ?
14 O tasoo, ŋ sina maa le mɛɛ naŋ cho buɛiyaa Chiisuaa yɛ, waŋnda cho naa yɛleŋ tul. (Maa. 10:22) Mi Chiisu dimi maa waŋnda cho wa buɛiyaa nduaa nyɛpalaa tusioo choo tau o palɛi mɛɛlɛi hei niŋ. (Maa. 24:9; Chɔŋ 15:20) O diiŋndɔɔ, nyɛ Aisaya poonyiaa wo mala naa le sinaa maa yaamɔɔwaa naa cho naa ko yɛleŋ tul te, kɛ a cho wolɔɔla chɔu suu o suu soliŋ kpeku le naa chiŋalaŋndo. Naapum, mi yaamɔɔwaa naa kpɛlɛkiaa choola nda dimi laŋ mbo wa naŋ chaa tonyaa ni. Naapum, ma dimi choolaŋ a naa okɔɔ ɔɔ ma tusi naa pɛɛŋ nyɛpalaa wɔɔŋ wɔɔŋndo choo. (Maa. 5:11) Pesiŋ bɛɛ Chɛhowa kuuna yaamɔɔwaa naa le kiɔɔ wolɔɔla chɔulaŋ ndaŋ soliŋndo kpeku le naa chɔulabaa le. (Ɛfi. 6:12; Sɔɔŋ. 12:17) Kɛ siooŋii nɔ mii bii naa le. Le yɛɛ?
15-16. (a) Tonya yaandɔ kuɛɛ naŋ nɔ yɛ miŋ loonuŋ, nduyɛ vɛɛ Aisaya 25:4, 5 toolu yɛ hei? (b) Vɛɛ Aisaya 41:11, 12 chɔm yɛ kpendekele nyɛ wa niŋ fulamakɔɔlioo le wanaa cho naa chɔulabaa wa?
15 Ŋ tofaŋndɔ tonya yaandɔ naŋ nɔ miŋ loonuŋndo. Mi Chɛhowa dimi aa, “wolɔɔ o wolɔɔ chɔu cho” ma soliŋ ndu kpeku le naa chiŋalaŋndo ‘mbo nɔla naa yomɔɔ le.’ Mɛɛ o mɛɛ chiɛiyo manda naa yɛ te hueiyii kpaayɛi Aisaya 25:4, 5.) Fɛɛŋ bɛɛ yaamɔɔwaa naa sɔla batiuwaa le naa nyɛpalaa fafɛɛŋndo handɔɔ choo le.—Aisaya 65:17.
bɛnduei wa pɛ hɔŋndo, lende koni Chɛhowa manda naa “wanaa kɔl vesɛiyaa bɛnduaa” o ba ni. (Nuawɔ16 Mi Chɛhowa chɔɔlu tiindaŋ naa kindi o ndu niŋ, a mɛɛ o chɔm kpendekele nyɛ cho hunɔɔ yɔŋnɔŋ ‘wanaa dɔɔnuŋ tumbe’ a naa wa wo. (Nuawɔ Aisaya 41:11, 12.) Mɛɛ mɛɛ yaamɔɔwaa naa kindiŋ le naa chɔulabaa ɔɔ mɛɛ mɛɛ chɔuwo kiondu, fulamakɔɔli pilɔɔ kpe wa niŋ ni. Ndu cho ni, yaamɔɔwaa wanaa Mɛlɛkaa kpou “cho simnɔŋ nyɛ fondo fuu waŋnda o hɔl, nduyɛ ma sɔla piɔmndo.”
MƐƐ NAŊ CHƆƆLU TIINDAŊ NAA DƆWƆƆ O CHƐHOWA NIŊ YƐ
Ŋ chɔɔlu tiindaŋ naa dɔwɔɔ o Chɛhowa niŋ te ŋ wa pɛ diomndaŋ veeloo lɔɔlɔɔ a ndu okɔɔ o Baabuiyo niŋ (Tofa pɛlta 17-18) *
17-18. (a) Vɛɛ diomndaŋ veeloo o Baabuiyo niŋ chɔɔlu yɛ tiindaŋ naa o Mɛlɛka niŋ? Chɔmndɔ taamaseliiyo. (b) Vɛɛ yiyaŋndo o bolle Baabuile hɛliŋ le wɔsi 2019 choo mala yɛ naa?
17 Ŋ chɔɔlu tiindaŋ naa dɔwɔɔ o Chɛhowa niŋ te ŋ sina ndu pɛ nyɛkɛndɛi. Nduyɛ, nɛi kpeekpei naŋ sina a Mɛlɛka okɔɔ wo kinɛi cho diomndaŋ veeloo o Baabuiyo niŋ, vɛlɛ a yiyaŋndo o nyɛ naŋ veelu diomndaŋ choo wo ni. Baabuiyo nɔ sɔɔŋ tau ŋ chɔm mɛɛ Chɛhowa manda wanaa nduaa o paandoo niŋ yɛ. Nduyɛ, sɔɔŋ muŋ ke naa tiindaŋndo maa suŋ suŋ bɛɛ o cho naa manda.
18 Tofawɔ taamasi kɛndɛ Aisaya soliŋ kpeku le chɔmndo mɛɛ Chɛhowa manda naa yɛ. Mbo dimi maa Chɛhowa cho wana mandaa lasaa ni, nduyɛ maa wanaa Mɛlɛkaa cho saa ni. Mi Aisaya dimi a Chɛhowa okɔɔ aa, “A cho maa saa fɔŋndɔ wa, o cho nda hunɔɔ chuuŋgiaa naa pilɛ, nduyɛ mbo naŋnuŋ nda ikɛi.” (Aisaya 40:11) Te ŋ sinaŋ pɛ mɛɛ Chɛhowa kɔmaŋ naa a bala ndɔla kpaayalaŋ yɛ, miŋ che kɛsɛ maa ŋ cho o mandaa bɛŋgu nduyɛ miŋ kɛsi kɔllo. Le naa malaa miŋ kɛsi kɔltaŋ o yɔŋ bɛɛ mi bahawɛilaŋ la wa naa choo, buɛi cho sakpo nduyɛ mbo wa buɛi kɔl kalu wo hɛli Aisaya 41:10 maa bolle Baabuile naale wɔsioo le wɔsi 2019. Le dimi aa, “La buulaŋ te, kanifuule ya cho Mɛlɛka nyaa ni.” Yiyaŋ o diomnda kɔl dɛɛniaalaŋ ndaŋ choo. La cho num dialluŋ kalaŋ ke le simulta cho lachi laŋ.
CHONDII 38 O Cho Num Kpaaya Ke
^ pɛl. 5 Bolle Baabuile hɛliŋ le wɔsi 2019 ke naa sabulaŋ layaa le sabu naŋ nɔ miŋ bii kɔllo wo o yɔŋ bɛɛ mi sɔɔŋ wɔɔŋndoŋ yɔŋnuŋ o chieeŋndo niŋ ɔɔ miŋ komal naa. Buŋgɛi hei cho sabulaŋ ndaŋ yaasiaa, nduyɛ i cho naa mala ŋ hiu buulaŋ te, kɛ miŋ chɔɔlu tiindaŋndo dɔwɔɔ o Chɛhowa niŋ. Yiyaŋ o bolle Baabuile hɛliŋ le wɔsioo wo choo. Kɛsiŋ ndeŋ o kɔl te a tiu pɛ ba. Le cho num yoomuaŋ luei le kpɔkɔsila cho num komal o chilaŋ niŋndo.
^ pɛl. 1 Tofa Bandu Mɛŋgɛlaa Suɛɛsɔɔ 2016, peele 18. O puuluei niŋ.
^ pɛl. 3 TƐƐSIAA LE DIOMNDO: Diomnde mɛyaaleŋ le cho diomnde tonya chɔm kpendekele maa nyɔɔ nɔ le yɔŋnɔŋndo wo ni. Diomnda Chɛhowa mɛi laŋ la tosa ŋ buulaŋ tau a bahawɛila naŋ cho sɔla o yoomoo niŋndaŋ te.
^ pɛl. 4 TƐƐSIAA AMATOU: Dimioo hoo aa, “La yɔŋ isiooŋ te” cho haaa bɛmbɔɔ leyaa o Aisaya 41:10, 13, a 14 niŋ. Teleŋnda bɔɔbɔɔ mi bolii Baabuiye hei soliŋ diomndo hoo kpeku “I” (le chɔmndo maa Chɛhowa wa suɛi ni). Le yɛɛ Chɛhowa dimullɛ Aisaya le mbo soliŋ “I” kpeku teleŋnda bɔɔbɔɔ? Le mbo kindila suɛi kulii kpeekpeiye maa, ŋ nɔla miŋ mal siooŋnde te o yɔŋ pɛ miŋ dɔu tiindaŋ naa o Chɛhowa niŋ.
^ pɛl. 52 TƐƐSIAA LE FOTUEIYO: Wanaa cho o yuŋgoo niŋnda sɔla simultaŋ o wallo niŋ, a kɛndiaa ndaa okɔɔ, o wali pollo niŋ, vɛlɛ a o sukuu.
^ pɛl. 54 TƐƐSIAA LE FOTUEIYO: Seiyaa Chɛhowaa cho bɔŋaŋndo biyɔɔ o chiɛi waŋndo niŋ, mi polisiiya luɛi nda choo a yekpaŋndaŋ, kɛ a cho a isiooŋ te.
^ pɛl. 56 TƐƐSIAA LE FOTUEIYO: Pɛɛku leYuŋgoo tosaa lɔɔlɔɔ kindi naa poŋ le biuwɔŋndo.