O FONDAŊ nda kɛsi Nyɛm Masindɔŋ Chulusalɛm ndo, a nɔ pou paandu paandoo loŋ a poonyiaa lechoo. O wɔsiŋ 700 a 600 ndoŋ tɛɛŋ tuupa mi Chiisu vialuŋ nda poonyiaa o pou koŋ choo ni. A saaluŋ pou paandoo hoo o buulu ndaa kumbu waŋnda Hibulɔŋ o Isɔluɛi niŋndo. Pou koŋ nɔ poonyiaa lechoo aa: “Maa Yaawɛɛ Sabaot handu num sendioo choo. Num Hakafi, po Hakavi wo.” Vɛɛ poonyiaa nda saaluŋ hoo wo toolu yɛ nyɛ Baabuiyo dimi wo? Poonyiaa hoo chɔm maa o sindɔɔ niŋ, mi ndaa soliŋ diola Mɛlɛkalaŋ Yaawɛɛ kpeku teleŋ o teleŋ. O chomulta maHibuluilaŋ ndaŋ niŋ ndaa poonyiaa laŋ ni “YHWH.” Nduyɛ pɛŋ, o buulula cheleŋnda waŋnda ndaa kua vioŋnɔŋndo ɔɔ chuuŋgiaŋndo laŋ niŋ bɛɛ, poonyiaala cheleŋ la wa loŋ. Wanaa ndaa kua kaŋ loŋ nda ndaa poonyiaa diola kpeekpeila Mɛlɛkalaŋ a diola cheleŋnda o nɔ laŋ ni.

Mi wana sinaa dɛnɛ pilɛ diolaŋ Dr. Rachel Nabulsi dimi a poonyiaala masindɛlaŋ ndaŋ okɔɔ aa: “Mi ndaa soliŋ diolaŋ ndaŋ “YHWH” kpeku teleŋ o teleŋ. . . . Hei chɔm maa diolaŋ ndaŋ la wa la sɔvɛ le Isɔluɛiya a waŋnda Chuda.” Nyɛ o dimi hoo wo toolu nyɛ Baabuiyo dimi wo. Kanifuule, diola Mɛlɛkalaŋ o chomulta maHibuluilaŋ niŋ “YHWH,” la cho o waalaŋ niŋ o Baabuiyo niŋ. Diola bɔɔbɔɔ o teleŋ masindɔɔ niŋ laa nɔ diola Mɛlɛkalaŋ leniŋ.

Diomndaŋ ndaŋ “Yaawɛɛ Sabaot” o pou masindɔɔ hoo choo sim ni, “Mɛlɛka Yaawɛɛ nɔ kpaayaa kpou wo.” Hei sim ni maa o cho ko diola Mɛlɛkalaŋ te waŋnda ndaa soliŋ kpeku tau le, kɛ mi ndaa soliŋ vɛlɛ diomnda cheleŋ kpeku mɛɛ “Mɛlɛka Yaawɛɛ nɔ kpaayaa kpou wo” cho naa yɛ. Hei toolu vɛlɛ Baabuiyo kanifuule, diomndaŋ ndaŋ “Mɛlɛka Yaawɛɛ nɔ kpaayaa kpou wo” la cho bɛmbɔɔ 283 o yaula maHibuluilaŋ niŋ. O yau Aisaya, Chɛluimaya, a Sɛkalaya wo niŋ wana saaluŋ ndaŋ tau ni.