1-2. Sɔɔŋ kindilaŋ kuɛɛ komallɛ buɛiyaa laalaŋaa Chɛhowaa?

 TE SƆƆŊ kpundɔŋ komal naa pɛ, mi yoomu naa siŋgaŋ o lepilɛ niŋ kpe. Le tamaseliiyo, mi wana chiɔuwaa dimul puaapilɛnɔ pilɛ diolaŋ Luwisi a maa o nɔ naa kaŋsɛiyo. Mbo dimul ndu vɛlɛ maa paŋgoŋ nyɛɛmbɔ koni o nɔ ni le waa yoomu. Mɔnika nda pɔnɔ ndɔ wa a tuandaŋ o walta iMɛlɛkayalaŋ niŋ. Kɛ paale pilɛ, mi Mɔnika saaluŋ maa, mi che bɛɛ pɔnɔ ndɔ wa bɛndu kundaa, kɛ o wa balaŋ o kaala nɔɔlɛilaŋ niŋ le wɔsiŋ bɔɔbɔɔ. Ndepilɛnɔ yembu pilɛ diolaŋ Oliviaa ndoo nɔ mbo mal fondaŋ ndɔɔ kanifuule, hueiyii bɛndu bɛnduei ndii nɔ le hɔŋndo loŋ. Mɛɛ o miiŋgu, mbo saaluŋ maa mi hueiyii bɛnduii keŋ tɛɛmbuu chiɛi ndɔɔ. O lepilɛ niŋ kpe, mi yoomula waŋnda haa siŋgaŋ. A nɔla pa ma yiyaŋ mɛɛ nda wa sinaŋndo yɛ? Nyɛ yɔŋnuŋ num niŋ pa o siŋga yoomu numndo o lepilɛ niŋ kpe wo?

² Mi che bɛɛ buɛiyaa laalaŋaa Chɛhowaa naŋ cho ni, kɛ mi kpɔkɔsilaŋ a naala paaliaŋ acheleŋnda laŋ la piiliaŋ naa kpou. Ŋ nɔ vɛlɛ miŋ biunuŋ nyɛkindilaa wanaa tul wanaa Mɛlɛkaa leyɛ wa tusi naa choo wo. Nduyɛ mi che bɛɛ Chɛhowa kuuna sɔɔŋ muŋ naa yɔŋnɔŋndo le, kɛ o mɛi lediom le naa malaa. (Aisaya 41:10) Sanaa a mala ndɔɔ, ŋ nɔla miŋ hiou lachi a waa a kɔl kɛndɛ, miŋ tosa kɛɛsiaala kɛndɛlaŋ, vɛlɛ miŋ lo o laalaŋ naa choo mɛɛ mɛɛ sɔɔŋ kindilaŋ komal naa. O buŋgɛi hei niŋ, ŋ cho pɛɛku nɛilaŋ lahiɔɔlu, la Chɛhowa soliŋ kpeku le naa malaa laŋ, te kpundɛlaŋ ndaŋ la komal naa pɛ o yoomoo niŋ. Ŋ cho vɛlɛ pɛɛku nyɛ naŋ nɔ miŋ tosa le miŋ sɔla tɔnɔɔ o mala Chɛhowaa niŋndo.

 CHƐHOWA CHO NUM MANDA

3. Te suɛi kpundɛi komal naa pɛ, yɛɛ wa yɛ ikala naa o ba le tosaa?

³ Simullo. Te suɛi kpundɛi komal naa pɛ, miŋ che ndi ikala le miŋ yiyaŋ nyɛkɛndɛi vɛlɛ miŋ tosa kɛɛsiaala kɛndɛlaŋ. Le yɛɛ naŋ dimi yɛ lende? Kanifuule, miŋ wa sinaŋndo nyɛ nɛiyaa kala kalaa o kɔllo niŋ, nduyɛ mi buulaŋndaŋ la pɛ naa o kɔl cha. Miŋ sinaŋ naŋ chaa o nɛi bɛndoo choo naŋ cho kɔlaŋ ni, kɛ ŋ sina kpeŋgii naŋ nɔ miŋ kuɛ choo ve le. Tofawɔ mɛɛ ndepiliaa ŋiɔɔŋaa naŋ laŋga soo a nda okɔɔ wa wa sinaŋndo yɛ, teleŋ nyɛkindilaa wa nda choo wo. Mi Oliviaa dimi aa, “Mɛɛ hueiyii bɛndui keŋ tɛɛmbuu chiɛi nuu, mi tambu kɔllo tau nduyɛ yaa sina nyɛ o nyɛ yaa tosa le.” Mi Mɔnika dimi a pɔnɔ ndɔ lo o lediom te wo okɔɔ aa: “Mi hiau ba a kɔllo tambei. I wa ko naŋ chaa a muɛi ndaa chuku ya ni. I wa ikala le mi yaa tosa walta pɔmbɔla yaa tosa lepaa o lepaa laŋ. Mi nyɛ ya ve kɔl maa o cho ya komal te wo komalla.” Vɛɛ Chɛhowa mɛi yɛ lediom le naa malaa te ŋ tambu kɔl pɛ?

4. A mɛɛ Filipiaŋnda 4:​6, 7 dimi yɛ, yɛɛ Chɛhowa mɛi yɛ lediom le naa kioo?

⁴ Nyɛ Chɛhowa tosa wo. O mɛi lediom le naa “kɔl nyulu [o] yɔŋgu wo” kioo. (Nuawɔ Filipiaŋnda 4:​6, 7.) Mi kɔl nyuloo hoo tosa miŋ sinaŋ nyɛkɛndɛi, nduyɛ miŋ kɛsi kɔllo le mɛɛ naŋ cho o chaŋyɛi niŋ a ndu yɛ. Kɔl nyuloo hoo, ‘wanachiee nɔla bɛɛ mbo sina ndu pɛŋgu’ le. O mala naa mbo hiou pɛŋ mɛɛ naŋ yiyaŋ yɛ. Baa a sinaŋ niŋ pa nyɛkɛndɛi mɛɛ ŋ chii piɛileŋ o Chɛhowa lo? Te lende i cho ni, mɛɛ kɔndɔfili nɔ mbo bii num te kanifuule, “kɔl nyulu Mɛlɛka yɔŋgu wo” tosa ni ma sinaŋ lende.

5. Vɛɛ kɔl nyulu Mɛlɛka yɔŋgu wo manda yɛ kɔlta naalaŋ a yiyaŋnda naalaŋ?

⁵ Bolle Baabuile pilɛleŋ ndeŋ le dimi maa, mi kɔl nyulu Mɛlɛka yɔŋgu wo ‘manda kɔlta naalaŋ a yiyaŋnda naalaŋ.’ Diom kpeekpei nda hivi le diomndo hoo ‘mandaa’ wo sim, mɛɛ sovɛiya manda nuaa chiee bɛndoo yɔŋii wanaa wɔɔŋnda huŋ del ndu choo yɛ. Mi wanaa wa o chiee koŋ niŋnda lɔl o kɔl nyulu niŋ kanifuule, a sina maa wanaa mandaa cho o dio. O nɛi pilɛ koŋ choo, te kɔl nyulu Mɛlɛka yɔŋgu wo wa pɛ yiyaŋnda naalaŋ a kɔlta naalaŋ mandaa, miŋ kɛsi kɔllo kanifuule, ŋ sina maa ŋ cho o manda Mɛlɛkaa bɛŋgu. (Sam 4:8) Maa Hana, o yɔŋ bɛɛ mi bahawɛi naa siŋgaŋ o foofo koŋ choo le, ŋ tiuba miŋ wa o kɔl nyulu niŋ. (1 Saam. 1:​16-18) Nduyɛ te ŋ kɛsi pɛ kɔllo, miŋ che ndi tɛtɛlɛ le miŋ yiyaŋ nyɛkɛndɛi vɛlɛ miŋ tosa kɛɛsiaala kɛndɛlaŋ.

6. Yɛɛ naŋ nɔ yɛ miŋ tosa le miŋ sɔla tɔnɔɔ o kɔl nyulu Mɛlɛka yɔŋgu wo niŋ? (Tofa vɛlɛ fotueiyo.)

⁶ Nyɛ naŋ nɔ miŋ tosa wo. Te a tambu pɛ kɔllo, a nyuna Chɛhowa le mbo mala num. Vɛɛ ŋ  tosa yɛ keŋ? Piɛi haaa ma sinaŋ kɔl nyulu Mɛlɛka wo. (Luku 11:9; 1 Tɛsa. 5:17) Mi Luwisi naŋ soo suŋ a ndu okɔɔ wo tɛɛsiaa nyɛ mala ndu nda laa ndɔ Ana le ma biunuŋ ndo, mɛɛ wana chiɔuwaa dimul ndu maa paŋgoŋ nyɛɛmbɔ koni o nɔ ni le waa yoomu. Mbo dimi aa: “O teleŋ waa nuaa bɛŋgu, i wa ikala kpoke le kɛɛsiaalaŋ tosaa a kɛndiaa okɔɔ vɛlɛ a sɔɔŋ cheleŋ. Kɛ miŋ sɔla kɔl nyulu Mɛlɛka yɔŋgu wo a teleŋ kala kalaa hoo kanifuule, miŋ piɛi o ndu lo.” Mi Luwisi nda laa ndɔ dimi maa, ma piɛi a kɔllo kpou le teleŋnda bɔɔbɔɔ, le mi Chɛhowa ke nda kɔl nyuloo, ma kɛsi kɔltaŋ, vɛlɛ ma nɔ taasioo le ma tosa kɛɛsiaala kɛndɛlaŋ. Nduyɛ ma sɔla mala ndɔɔ. Te suɛi kɔl tambɛiye komal num pɛ, piɛi o Chɛhowa lo le teleŋnda bɔɔbɔɔ. Okoŋ, a cho chɔ mi kɔl nyulu o yɔŋgu wo manda kɔl numndo a yiyaŋnda numndaŋ.—Luomaŋ. 12:12.

CHƐHOWA CHO TOSA MA SIM YI

7. Vɛɛ naŋ sinaŋ yɛ te ŋ wa pɛ o nyɛkindilaa bɛŋgu?

⁷ Simullo. Te ŋ wa pɛ o nyɛkindilaa bɛŋgu, mɛɛ naŋ sinaŋ yɛ, mɛɛ naŋ yiyaŋ yɛ, vɛlɛ a mɛɛ naŋ tosa sɔɔŋ yɛ ve lɛ maa paandu le. Miŋ sinaŋ mɛɛ dɛndɔɔ wa nuaa o mɛŋndaŋ choo mi hueiye wa ndu hiŋndo yɛ. Mi Ana naŋ soo suŋ a ndu okɔɔ wo dimi maa, mi sɔɔŋ kɔl tambɛiyoŋ komal ndu tau mɛɛ Luwisi pɔnɔ ndɔ sɔla piɔmndo. Mbo dimi aa: “Te yaa kandu pɛ yiyaŋndo maa wana fondoo fuu ya cho ni, mi yaa tambu kɔl tau nduyɛ mi mɔnɛi ndii bii ya le yapila. Mi yaa tuulu vɛlɛ kɔl tau le mɛɛ pɔnɔ nuu ndoo hɛluŋ ya yɛ.” Teleŋnda cheleŋ, mi Ana ndoo sinaŋ wanapilɛyɛi. Mi ndoo tambu vɛlɛ kɔl le mɛɛ ndoo nɔ mi ndoo tosa kɛɛsiaalaŋ a sɔɔŋ pum okɔɔ a ba ndɔ, la Luwisi pɔnɔ ndɔ ndoo tosa nyɛkɛndɛi laŋ yɛ. Lepum, mi ndoo sinaŋ maa o cho o hueiyii bɛnduii wa hɔŋndo o pee bɛndoo choo ve niŋ. Vɛɛ Chɛhowa mala yɛ naa te sɔɔŋ kɔl tambɛi waa nuaa komal naa pɛ?

8. A mɛɛ Aisaya 33:6 dimi yɛ, diomnde yɛɛ Chɛhowa mellɛ naa?

⁸ Nyɛ Chɛhowa tosa wo. O mɛi lediom maa o cho naa mala miŋ sim yi. (Nuawɔ Aisaya 33:6.) Te dɛndɛ mamɛŋndo wa pɛ kɔlaŋ mi hueiyii bɛnduei wa hɔŋndo, mi keŋ tosa mbo kandu hiilɔŋndo woku woku. Le hei, dɛndɛla mamɛŋnda bɔɔbɔɔ nɔ chiliŋndoŋ lebɛŋgu le laŋ malaa mi la sim yi. Mi hei tosa dɛndɔɔ hiiluŋ tau le, nduyɛ mi wanaa wa leniŋ nda sinaŋ nyɛkɛndɛi, okoŋ a del lɛ o kpundɛ niŋ te. Kɛ le mi chiliŋuŋ simi dɛndɔɔ woŋ tosa wallo nyɛkɛndɛi, mɛɛ mi dɛndɔɔ wa hiouwɔɔ lachi a kɔlaŋ. O nɛi pilɛ koŋ choo, Chɛhowa cho naa mala miŋ sim yi, te ŋ hiou pɛ lachi a ndu piɛiyo o laalaŋndo choo o teleŋnda nyɛkindilaa bɛŋgu.

9. Vɛɛ nyɛm waliŋ naŋ tosa yaasiaa woŋ mala yɛ naa miŋ sim yi o laalaŋndo choo? (Tofa vɛlɛ fotueiyo.)

 ⁹ Nyɛ naŋ nɔ miŋ tosa wo. Te a wa pɛ o nyɛkindilaa bɛŋgu, tosa o ŋ tiuba wo le ma hiou lachi a sɔɔŋ ŋMɛlɛkayaŋ tosaa. I cho tonya maa, a nɔla niŋ ma tosa mɛɛ num aa tosa paandu yɛ le. Kɛ loonuŋ maa, Chɛhowa cho num kɔl le ma tosa nyɛ ŋ tiuba le wo le. (Tuuwɔ Luku 21:​1-4.) O teleŋ ŋ chua le sɔɔŋ ŋMɛlɛkayaŋ tosaa niŋndo, kɛsi teleŋndo le pɛɛkɔŋ ipilayaa tosaa a yiyaŋndo o nyɛ ŋ cho pɛɛku wo choo. Le yɛɛ naŋ dimi yɛ lende? Sanaa a kɔɔna ndɔɔ, Chɛhowa ke naa yaulaŋ a vidueila mala naa le miŋ lo o laalaŋ naa choo wo, te sɔɔŋ palaŋ komal naa pɛ. Le nyɛ ŋ yeema wo saalɔŋndo, a soliŋ nyɛm waliŋ naŋ tosa yaasiaa woŋ kpeku o suɛi maŋgalɛi numnde niŋ, mɛɛ JW Library, Watch Tower Publications Index, a Yau Yaasiaa ŋSɔɔŋ le Seiyaa Chɛhowaa cho nuaa yɛ. Mi Mɔnika naŋ soo suŋ a ndu okɔɔ wo dimi maa, mbo soliŋ nyɛm waliŋ naŋ tosa yaasiaa woŋ kpeku teleŋ o teleŋ o tambu pɛ kɔl. Le tamaseliiyo, mbo poonyiaa diomndaŋ ndaŋ “kɔl tuuwo,” le yaasiaa tosaa a laŋ okɔɔ. A teleŋnda cheleŋ, mi ndoo poonyiaa diomndaŋ ndaŋ, “kiɔɔ loo o lediom” ɔɔ “lo lechoo wo,” okoŋ mbo tosa yaasiaa a laŋ okɔɔ. Mi ndoo veelu diomndaŋ haaa mbo sinaŋ nyɛkɛndɛi. Mbo dimi aa: “Te yaa wa pɛ yaasiaa tosaa, o tasela ndɔ, yaa bii bila tau le. Kɛ mɛɛ yaa veelu diomndaŋ fau, lende koni yaa sinaŋ ni maa Chɛhowa cho ya kɔɔmiaŋndo ni.” Te ŋ sɔla mala waa nuaa Chɛhowa o ba pɛ, mi keŋ tosa miŋ sim yi o laalaŋndo choo vɛlɛ miŋ kɛsi kɔllo.—Sam 119:​143, 144.

CHƐHOWA CHO NUM TOOLU

10. Te suɛi kɔl tambɛiye komal naa pɛ, vɛɛ naŋ sinaŋ yɛ?

¹⁰ Simullo. Te suɛi kɔl tambɛiye komal naa pɛ, miŋ vi ŋdial vɛlɛ miŋ tambu kɔllo le palɛi bɔɔbɔɔ. Nduyɛ miŋ sinaŋ mɛɛ wana ndoo nyaanuŋ nyaanɔŋ labɛɛlaa o paandoo niŋndo ndoo sinaŋ yɛ, te ndoo yɔŋuluŋ pɛ. Mi i wa niŋ ikala naa o ba le sɔɔŋ naŋ tosa paandu chɔ chɔ woŋ tosaa. Maa Ilaacha, mi i wa ikala naa o ba le sɔɔŋ tosaa maa paandu. Nduyɛ luaaŋ kinɛi naŋ yeema ni. (1 Masaa. 19:​5-7) Yɛɛ Chɛhowa mɛi yɛ lediom le naa tosallo te dialloŋ vi naa pɛ?

11. O nɛi kuɛɛ choo Chɛhowa toolu yɛ naa? (Sam 94:18)

¹¹ Nyɛ Chɛhowa tosa wo. O mɛi lediom le naa tooloo. (Nuawɔ Sam 94:18.) Mɛɛ wana nyaanaŋ yɔŋuluŋndo ndoo yeema nuaa tooloo le mbo hiou lachi a nyaanɔŋndo yɛ, lende koni naŋ yeema tooloo ni le miŋ hiou lachi a tosaa tau o Chɛhowa piɛiyo niŋ. O teleŋnda waa  lende bɛŋgu, Chɛhowa dimul naa aa: “Ya cho Mɛlɛka Yaawɛɛ Mɛlɛka nyaa, o cho nya mandaa wo ni. I dimul nya aa, ‘La yɔŋ isiooŋ te. I cho nya mala.’” (Aisaya 41:13) Mi Masaa Deeve cha hei kpendekele, mɛɛ sɔɔŋ kindilaŋ wa ndu komallo, nduyɛ mi yaamɔɔwaa nduaa wa ndu chɔulabaa. Mbo dimul Chɛhowa o piɛileŋ niŋ aa: “Ba numndo cho ya choo, nduyɛ mbo wa ya mandaa.” (Sam 18:35) Kɛ vɛɛ Chɛhowa toolu yɛ naa?

12. Nɛɛ waa Chɛhowa soliŋ yɛ kpeku le naa tooloo te ŋ vi ŋdial pɛ?

¹² Mi Chɛhowa toolu naa sanaa a acheleŋnda nyindɔɔ le naa malaa. Le tamaseliiyo, teleŋ pilɛ mɛɛ Deeve vi ŋdial, mi chaaŋ ndɔ Chonataŋ kua o ndu lo le ndu yoomuaŋ lueiyo a ndu diomnda kɔl dɛɛniaalaŋ dimullo. (1 Saam. 23:​16, 17) O nɛi pilɛ koŋ choo, mi Chɛhowa hɛli Ilaasia le mbo mala Ilaacha. (1 Masaa. 19:​16, 21; 2 Masaa. 2:2) Hau bɛɛ, lepum mi Chɛhowa soliŋ yuŋgula naalaŋ, chaaŋaa naa, ɔɔ bɛnduaa kundaa kpeku le naa tooloo. A koŋ kpou, naapum miŋ yeema le waŋnɔŋndo kpeele te ŋ wa pɛ o nyɛkindilaa bɛŋgu. Nduyɛ ŋ yeema mi wana o wana wa naa ikɛi le. Mi hei yɔŋnuŋ wana o wana. Yɛɛ naŋ nɔ yɛ miŋ tosa le mi Chɛhowa toolu naa?

13. Yɛɛ naŋ nɔ yɛ miŋ tosa le miŋ sɔla tɔnɔɔ o toolu Chɛhowa cho naa kioo wo niŋ? (Tofa vɛlɛ fotueiyo.)

¹³ Nyɛ naŋ nɔ miŋ tosa wo. Kindiŋ le waa numpilɛ kpeele le. Te ŋ fafaŋ pɛ acheleŋnda, a naapila okɔɔ kinɛi naŋ wa niŋ yiyaŋndo ni vɛlɛ a bahawɛila cho naa choo laŋ. Mi yiyaŋnda waa nuaa la paaliaŋ kɛɛsiaala naalaŋ. (Pulɔ. 18:1) I cho tonya maa, lepum miŋ yeema le waŋnɔŋndo kpeele, taama taama te sɔɔŋ kindilaŋ komal naa pɛ. A koŋ kpou, te o yɔŋ pɛ miŋ fafaŋ acheleŋnda le teleŋ vilɛi miŋ wa kpeele, mɛɛ nɛi Chɛhowa cho soliŋndo kpeku le naa tooloo wo naŋ cho koŋ kiɔɔ ni. Lelaŋ, mɛɛ mɛɛ sɔɔŋ palaŋ wa num choo, chɛl mala yɔŋgu numndo, chaaŋaa numnda, a bɛnduaa kundaa cho num kioo wo. Chua nda maa, nɛi Chɛhowa cho soliŋndo kpeku le num malaa wo cho koŋ ni.—Pulɔ. 17:17; Aisaya 32:​1, 2.

CHƐHOWA CHO NUM DƐƐNIAA

14. Sɔɔŋ kuɛɛ tosa yɛ lepum mi siooŋnde bii naa?

¹⁴ Simullo. Lepum, mi sɔɔŋ komal naa o yoomoo niŋ, ŋ luei naa siooŋnde woŋ. O Baabuiyo niŋ, mi buɛiyaa laalaŋaa Mɛlɛkaa a tiŋ suaa a sɔɔŋ palaŋ wa nda choo miŋ luei nda siooŋnde woŋ okɔɔ, mɛɛ yaamɔɔwaa ndaa a sɔɔŋ kindilaŋ cheleŋndoŋ cho nuaa yɛ. (Sam 18:4; 55:​1, 5) O nɛi pilɛi koŋ choo, mi simultaŋ la  komal naa o sukuu, o wallo niŋ, yuŋgula naalaŋ, ɔɔ masaleŋ o ba. Lepum yɛ, te bahawɛi kɛndiaa komal naa pɛ, miŋ yiyaŋ maa ŋ cho piɔmndo sɔla. A teleŋnda waa nuaa, ŋ wa ko maa chuaambɔ pɔmbɔ, nduyɛ ŋ nɔla nyɛ o nyɛ tosa a ba naa le. Vɛɛ Chɛhowa mala yɛ naa a teleŋnda waa nuaa?

15. Tiindaŋ kuɛɛ Sam 94:19 ke yɛ naa?

¹⁵ Nyɛ Chɛhowa tosa wo. Mbo dɛɛniaa naa kɔllo, nduyɛ mbo luei naa yoomuaŋ. (Nuawɔ Sam 94:19.) Bolle Baabuileŋ ndeŋ le tosa miŋ yiyaŋ a mɛɛ siooŋnde bii nuaa chuaambɔ pɔmbɔɔ, te hueiyii bɛndu bɛnduei wa pɛ hɔŋndo, mbo kɛɛ le luaŋ yɛ okɔɔ. Kɛ te finya ndɔ huŋ chua ndu pɛ, mbo bii ndu o balaŋ choo haaa mbo hiou o luaaŋ, mi keŋ tosa mbo sinaŋ nyɛkɛndɛi mi che bɛɛ hueiyii keŋ cho wɔ hɔŋndo. O nɛi pilɛ koŋ choo, te tɔɔndaŋnda luei naa siooŋnde laŋ la komal naa pɛ, o dimi niŋ, ŋ yeema mi Finya naa o choo choo niŋ bii naa o balaŋ choo haaa mi siooŋii keŋ fula naa o kɔl. Vɛɛ naŋ sɔla yɛ kɔl dɛɛniaa suu waa nuaa Chɛhowa o ba?

16. Yɛɛ naŋ nɔ yɛ miŋ tosa le miŋ sɔla tɔnɔɔ o kɔl dɛɛniaa Chɛhowa cho naa kioo wo niŋ? (Tofa vɛlɛ fotueiyo.)

¹⁶ Nyɛ naŋ nɔ miŋ tosa wo. Wa suukaŋndo a Chɛhowa teleŋ o teleŋ o piɛileŋ niŋ nduyɛ ma wa diomndaŋ veeloo o Diom ndɔɔ niŋ. (Sam 77:​1, 12-14) Okoŋ, te suɛi palɛi komal num pɛ, naapum nyɛ tase cho num hunɔɔ o kɔllo cho muliŋndo o Finya num cho o choo choo niŋndo lo ni. Chɔm ndu buulaŋnda numndaŋ a nyɛ cho num siooŋnde lueiyo wo. Chɛl mbo soo o numndo, nduyɛ mbo dɛɛniaa num kɔllo sanaa o Diom ndɔɔ niŋ. (Sam 119:28) Naapum a cho saalɔŋ buŋgaŋ ŋpum o Baabuiyo niŋ, ŋ dɛɛniaa num kɔllo woŋ, te siooŋnde bii num pɛ. Le tamaseliiyo, kɛlɛŋgaa a cho kɔl dɛɛniaa sɔla o yaulaŋ ndaŋ niŋ, mɛɛ Choobu, Sam, Pulɔwaa a diomnda Chiisu laŋ o Maatiu bolle 6 niŋ cho nuaa yɛ. Te a piɛi pɛ o Chɛhowa lo, nduyɛ ma veelu diomndaŋ o Baabuiyo niŋ, a cho kɔl dɛɛniaa sɔla.

17. Tiindaŋ yɛɛ naŋ nɔ yɛ miŋ nɔ?

¹⁷ Ŋ nɔ miŋ nɔ tiindaŋndo maa, Chɛhowa cho wa a naa latulu a teleŋnda kala kalalaŋ o yoomu naa niŋ. Fɛɛŋ bɛɛ ŋ cho wa kpeele le. (Sam 23:4; 94:14) O mɛi lediom maa o cho naa manda, mbo tosa miŋ sim yi o laalaŋ naa choo, mbo toolu naa, nduyɛ mbo dɛɛniaa naa kɔllo. Mi Aisaya 26:3 dimi a ndu okɔɔ aa: “Wanaa duau haa kɔlta ndalaŋ o numndo wa, le teleŋ o teleŋ kɔl nyulu kpeekpeiyo ŋ ke nda ni, fondole le mɛɛ nda tiindaŋ num yɛ.” Lelaŋ, dɔu tiindaŋ numndo o Chɛhowa niŋ, nduyɛ ma kindiŋ o nɛi o nɛi niŋ le ma sɔla tɔnɔɔ o mala o cho num kioo wo niŋ. Te a tosa keŋ pɛ, a cho miiŋgu yoomuaŋ sɔla o yɔŋ bɛɛ ma wa o teleŋnda kala kalalaŋ niŋ.