A Sina Pa?
O nyɛ nyaanaŋ suu kuɛɛ niŋ po Itoopiaanɔɔ wa yɛ kɔlaŋ mi Filipi sɔɔŋguu ndu ikɛi?
DIOMNDA nda hivi o New World Translation niŋ le diomndaŋ ndaŋ “nyɛ nyaanaŋndo” wo sim, le nyɛla nyaanaŋ ndaŋ suulaŋ yɛ yɛ. (Walta. 8:28, 29, 38) Kɛ, wana che pɛ maa, nyɛ nyaanaŋ po Itoopiaanɔɔ wa kɔlaŋ niŋndo ndoo hiou nyɛ nyaanaŋ puaa chɔuwa ndaa soliŋ kpeku wo. Ŋ tofaŋndɔ sabulaŋ latiŋ le nyɛ naŋ dimi lende wo.
Po Itoopiaanɔɔ hoo ndoo nɔ wali sɔviɔɔ o chiɛi lemasaa niŋ, nduyɛ mbo buli tiŋ vilɛiyo le kɔlaŋ Chulusalɛm. “Ndoo nɔ foofo bɛndoo Kandesi o ba bɛŋgu, masa laandoo le lɛŋnde Itoopiaaleŋ. Ndu ndoo manda nyɛsɔlaa ndɔɔ kpou ni.” (Walta. 8:27) Fondaŋ Itoopiaa wa o sindɔɔ niŋndo nda veelu suŋ suŋ ni aa Sudaŋ. Nduyɛ Ichipi batouwo bɛɛ cho o fondaŋndo hoo choo. Mi che bɛɛ o cho nyɛ nyaanaŋ pilɔɔ kpe le o soliŋ kpeku le kɔlaŋ ndaŋ te, kɛ wana che pɛ maa ndoo nɔ wolɔɔlaŋ tau. O nyɛm nyaanaŋ waŋnda ndaa soliŋ kpeku o wɔsiŋ kɛmɛ tasoŋ niŋ le waŋnda vilioo laŋ tɛɛŋ, nyɛm nyaanaŋ muŋ nɔ peloŋ ŋhiɔɔlu vɛlɛ a nyɔɔ o kumbaa lechoo woŋ wa tɛɛŋ. Mi yau masindɛ pilɛ soo a yau Walta Kiilaa okɔɔ wo dimi aa: “Mi nyɛla nyaanaŋnda waa nuaa laa chua wolɔɔlaŋ tau, vɛlɛ mi laa tosa wana saŋga tau o kɔlaŋ niŋ te. Nduyɛ mi laa tosa ndi tɛtɛlɛ le kɔlaŋ o tiŋnda vilɛilaŋ niŋ.”
Po Itoopiaanɔɔ wa diomndaŋ veeloo, mi Filipi sɔɔŋguu ndu ikɛi. Baabuiyo dimi aa: “Mi Filipi nyaanuŋ mbo sɔɔŋguu ndu ikɛi. Mbo tuɛi [ndu] diomndaŋ veeloo o nyɛ Aisaya, wana ndoo suaa le Mɛlɛka wo poonyiaa wo niŋ.” (Walta. 8:30) Nyɛm nyaanaŋ ndoŋ muŋ, muŋ nyeenuŋ tau le. Mi hei mala po Itoopiaanɔɔ le mbo veelu diomndaŋ teleŋ nda wa kɔlaŋ ndo. Nduyɛ mi i mala vɛlɛ Filipi le mbo nyaanuŋ nyɛ nyaanaŋ koŋ kɔɔli, okoŋ mbo bendal ndu.
Mi po Itoopiaanɔ koŋ “dimul Filipi le mbo hel o nyɛ nyaanaŋndo niŋ mbo chal ndu ikɛi.” (Walta. 8:31) O nyɛla nyaanaŋnda kpeekpei laŋ niŋ, isisi wanaa ndaa kua a laŋ nda ndaa wa ni. Kɛ o nyɛla nyaanaŋnda laa chua wolɔɔlaŋ a waŋnda laŋ niŋ, fondaa wa le challe. Nduyɛ naapum fondaŋ koŋ po Itoopiaanɔɔ nda Filipi soliŋ kpeku ni.
A mɛɛ Walta Kiilaa bolle 8 vɛlɛ a sɔɔŋ masindɔŋ chɔm yɛ, o teleŋnda laŋga hiou laŋ niŋ, mi yaula naalaŋ la chɔm po Itoopiaanɔɔ ichali o nyɛ nyaanaŋ ndoo hiou nyɛla nyaanaŋnda puaa chɔuwa ndaa soliŋ kpeku laŋ niŋ.