1. Tɔɔndaŋ kuɛɛ ndoo komallɛ Chɔŋ, wana Chiisu vem hɔlte ndɔ wo a wɔsiŋ kɛmɛ tasoŋ C. E. mɛɛlulaŋ?

A MƐƐLULA wɔsiŋ kɛmɛ tasoŋ C.E., Chɔŋ, wana Chiisu vem hɔlte ndɔ wo wa o tɔɔndaŋ kala kalaa niŋ. Ndoo yuuwa niŋ, nduyɛ o wa vɛlɛ o biyɔɔ niŋ o lɛŋnde Patimɔɔleŋ niŋ, lɛŋnde mɛŋndaŋ ma balu leŋ. Kɛlɛŋgaa o wanaa Chiisu vem hɔlte ndɔ wa tɛɛŋ kpou, ndu koni wa niŋ yoomu ni. (Sɔɔŋ. 1:​9) Ndoo sina maa wanaa simul piɛile tonyaleŋ nda wa hunɔɔ a pɛɛkula lachoowalaŋ o kunda leKilisiɔŋndo niŋ, nduyɛ ma wa puaapiliaa piɔuviaŋndo lueiyo tɛɛŋ. A teleŋ koŋ, mii yɔŋnuŋ maa Kilisiɔŋaa tonyaa ve lɛ niŋ kposoŋ te.—Chudi 4; Sɔɔŋ. 2:​15, 20; 3:​1, 17.

2. A mɛɛ Sɔɔŋ Chɔɔmaŋndoŋ 7:​9-14 dimi yɛ, yilaŋii kɔl dɛɛniaa kuɛɛ Mɛlɛka ndoo ke yɛ Chɔŋ? (Tofa fotueiyo o kɔɔ.)

² A teleŋ simulta kala kalalaŋ ndaŋ la wa Chɔŋ choo wo Mɛlɛka ke ndu yilaŋii kɔl dɛɛniɛi le nyɛ ndoo yɔŋnuŋ niŋ o chilaŋ niŋndo ni. O yilaŋnde hei niŋ, mi Chɔŋ tuɛi ma dimul maalikɛiya le ma saa hueiyii hɔŋ niŋ a teleŋ nyɛpalaa bɛndoo ve, haaa mi buɛiyaa Mɛlɛkaa apum sɔla fanda nda mɛɛlaa. (Sɔɔŋ. 7:​1-3) Buɛiyaa kaŋ cho ŋwaŋ 144, 000 ni. Nda kua niŋ choo choo le waa o masaleŋ choo a Chiisu latulu ni. (Luku 12:​32; Sɔɔŋ. 7:​4) Okoŋ kɔɔli, mi Chɔŋ suaa vɛlɛ a kunda cheleŋ okɔɔ. Mbo dimi aa: “Mi cha waŋnda faŋga bɛndu bɛndoo. A wa faŋga haaa, nda aa chuu chɔm te. Nda aa fula o lelɛŋ o lelɛŋ, a lekaa o lekaa, a waŋnda suu o suu, a isɔɔ o isɔɔ maŋgalaa. A wa . . . isisi o kpeŋgbei lemasaa, a Saa Fɔŋndɔɔ lachi.” Mɛɛ Chɔŋ dimi maa “a wa faŋga haaa,” naapum kɔndɔfillo pila ndoo bii ndu a kunda o che hoo wo ni. (Nuawɔ Sɔɔŋ Chɔɔmaŋndoŋ 7:​9-14.) Yiyaŋndɔ a mɛɛ Chɔŋ wa a kɔl kɛndɛ yɛ le sinaa maa waŋnda waalaŋ o waalaŋ niŋ huŋ niŋ ma piɛi Mɛlɛka o nɛi tonyaa choo!

3. (a) Le yɛɛ yilaŋii Chɔŋ che ve nɔ yɛ mii kindi tiindaŋ naa? (b) Yɛɛ naŋ cho yɛ pɛɛku o buŋgɛi hei niŋ?

 ³ A tonya, mi yilaŋnde hei kindi tiindaŋ Chɔŋ ndo poŋ. Kɛ naa i hiau tiindaŋ naa kindi kanifuule, ŋ cho ndi hau chɔɔ o peelɔŋndo! Ŋ cho niŋ hau chɔɔ waŋnda hunɔɔ o miiliɔŋndaŋ niŋ le Chɛhowa piɛiyo. Waŋnda haa nɔ tiindaŋndo le pioŋɔɔ sɔlaa o nyɛpalaa bɛndoo niŋ nduyɛ ma wa achal lefafɛɛŋ o lɛŋndeŋ choo. Chɛhowa mala niŋ hau wanaa nduaa le sinaa wanaa cho wa o faŋga bɛndoo hoo niŋnda. O hiou niŋ hau wɔsilaŋ 80 chɔŋ a teleŋ o chɔm nda tonyaa hoo wo. O buŋgɛi hei niŋ, ŋ cho pɛɛku a mɛɛ o mala nda le tonyaa hoo biyɔɔ bila yɛ. Okoŋ, miŋ yaasiaa sɔɔŋ ŋmuuŋ a faŋga bɛndu koŋ okɔɔ: (1) Mɛɛ o looku kui yɛ, a (2) fondaŋ wanaa cho leniŋ nda cho fulaa wo. Sɔɔŋ sala tiɔɔŋndoŋ muŋ cho kindi tiindaŋ wanaa cho nɔ salaa le waa o kundaa hoo choo wa.

4. Pɛɛku tonya kuɛɛ cho yɛ o Baabuiyo niŋ o kaaŋii cheleŋnde dema le biyɔɔ bila wo, nduyɛ teŋgeŋ yɛɛ wa yɛ nda tɛɛŋ a Sukuwaa Pɛɛkaa Baabuiya?

⁴ Baabuiyo dimi maa wanaa diikuŋ Mɛlɛka wa cho wa o chieeŋndo hoo choo lefafɛɛŋ. Kaaŋii cheleŋnde pɛɛku waŋnda tonyaa hoo kposoŋ te. (2 Kɔliŋ. 4:​3, 4) Hau, mi kaaŋii bɔɔbɔɔ pɛɛku waŋnda maa te wanaa tosa o kɛndɔɔ wa vi dɔɔ pɛ, choo choo nda kpou cho lakɔ ni. Kɛ Sukuwaa Pɛɛkaa Baabuiyaa wa Bandu Mɛŋgɛlaa solioo a wɔsi 1879 ndaa nɔ laalaŋ koŋ te. Ma bii bila o pɛɛku ndaa niŋ maa Mɛlɛka cho Kpele Hɛnɛkiɔɔ miŋgi o lɛŋndeŋ choo. Nduyɛ maa wanaa diikuŋ Mɛlɛka wa o miiliɔŋndaŋ niŋ cho wa o lɛŋndeŋ choo naŋ lefafɛɛŋ, kɛ o cho o choo choo niŋ te. Kɛ a koŋ kpou, mbo chua nda teleŋndo tau le sinaa wanaa diikaŋaa wa niŋ kaŋ o lɛŋndeŋ choo wa.—Maa. 6:​10.

5. Laalaŋ kuɛɛ Sukuwaa Pɛɛkaa Baabuiya ndaa nɔ yɛ a ŋwaŋ 144,000 okɔɔ?

⁵ Kɛ mi Sukuwaa Pɛɛkaa Baabuiya bii vɛlɛ bila maa Mɛlɛka cho hɛli waŋnda apum “ŋwaŋnda chiee tɛɛŋ” le ma kɔ wa a Chiisu latulu o choo choo niŋ. (Sɔɔŋ. 14:​3) Ndaa laalaŋ maa wanaa o cho kaŋ hɛli wa a cho wa 144,000. Nduyɛ maa Kilisiɔŋaa yɔŋguŋ o Mɛlɛka lo ma tosa hɛnaŋ ndɔɔ o chieeŋndo hoo choo, haaa a yoomu ndaa mɛɛlulaŋ nda waŋnda haa wa niŋ ni. Kɛ laalaŋ yɛɛ ndaa nɔ yɛ a wanaa faŋga bɛnduaa okɔɔ?

6. Laalaŋ yɛɛ Sukuwaa Pɛɛkaa Baabuiya ndaa nɔ yɛ a wanaa faŋga bɛnduaa okɔɔ?

⁶ Mi Chɔŋ cha waŋnda faŋga bɛndoo “isisi o kpeŋgbei lemasaa, a Saa Fɔŋndɔɔ lachi” o yilaŋii nduɛi niŋ. (Sɔɔŋ. 7:​9) Nyɛ dimiŋ hoo wo ke Sukuwaa Pɛɛkaa Baabuiya yiyaŋndo ni maa wanaa faŋga bɛnduaa bɛɛ cho wa o choo choo niŋ nda ŋwaŋ 144,000. Kɛ te o yɔŋ pɛ mi ŋwaŋ 144,000 a wanaa faŋga bɛnduaa kpou kuɛ o choo choo niŋ, mɛɛ teŋgeŋ yɛɛ cho yɛ kundala tiɔɔŋ ndaŋ tɛɛŋ? Sukuwaa Pɛɛkaa Baabuiya ndaa yiyaŋ ko maa wanaa faŋga bɛnduaa cho Kilisiɔŋaa ve Mɛlɛka diikɔŋ a kɔl ndaa kpou teleŋ nda wa o lɛŋndeŋ choo le wa ni. Maa mi che bɛɛ a wa sawala cho o Baabuiyo niŋndaŋ lapum biyɔɔ, kɛ naapum a bɔɔbɔɔ wa wɔ kɔlaŋ o kaaŋii cheleŋnde niŋ. Mi Sukuwaa Pɛɛkaa Baabuiya dimi maa waŋnda haa ndaa nɔ kaalaa le Mɛlɛka kɛ o ve letuu le ma wa o masaleŋ choo a Chiisu latulu le. Nduyɛ maa le mɛɛ ndaa nɔ kaala yiŋgoloŋ le Mɛlɛka le yɛ, wanaa faŋga bɛnduaa cho lakɔ choo choo le simndaŋ kpeŋgbei lemasaa lachi, kɛ o cho le ma kɔ chal o kpeŋgbeila lemasa choo le.

7. Nɛɛ yaa Sukuwaa Pɛɛkaa Baabuiya ndaa laalaŋ yɛ maa a cho wa o lɛŋndeŋ choo teleŋ Chiisu cho wa masaa le Wɔsilaŋ Waa Pilɛ wo, nduyɛ laalaŋ yɛɛ ndaa nɔ yɛ a wanaa laalaŋaa vi tuupa mi Kiliti huŋndo okɔɔ?

⁷ Nɛɛ yaa ndaa nɔ yɛ niko le waa o lɛŋndeŋ choo? Sukuwaa Pɛɛkaa Baabuiya ndaa laalaŋ vɛlɛ maa te ŋwaŋ 144,000 a wanaa faŋga bɛnduaa kpou kuɛ pɛ choo choo, wanaa cheleŋ cho wa o miiliɔŋndaŋ niŋ a wa niŋ o chieeŋndo choo wa. Nduyɛ maa nda sɔla niŋ tɔnɔlaŋ teleŋ Chiisu cho wa o Masaleŋ choo le Wɔsilaŋ Waa Pilɛ wo ni. Sukuwaa Pɛɛkaa Baabuiya  ndaa laalaŋ vɛlɛ maa tuupa mi Masale Chiisuleŋ le kanduŋ, wanaa cho haa wa o chieeŋndo choo o miiliɔŋndaŋ niŋnda sina wɔ niŋ Chɛhowa le. Kɛ maa, waŋnda haa cho pɛɛku a Chɛhowa okɔɔ teleŋ Chiisu cho wa o Masaleŋ choo le Wɔsilaŋ Waa Pilɛ wo. Te Wɔsila Waa Pilɛlaŋ la chuu pɛ, wanaa tol pɛɛkula Chɛhowalaŋ kɔɔli wa cho yoomu fafɛɛŋndo sɔla o lɛŋndeŋ choo, kɛ mi wanaa tul taŋ kɔɔli le wa sɔla tambei le fɛɛŋ a fɛɛŋ. Sukuwaa Pɛɛkaa Baabuiya ndaa laalaŋ vɛlɛ maa naapum wanaa wa niŋ ‘puaa masaa’ o chieeŋndo choo a teleŋ koŋ nda cho lakɔ choo choo te wɔsila Waa Pilɛ la Chiisulaŋ la chuu pɛ. Nduyɛ maa, puaa a waŋlaanduaa laalaŋaa vi tuupa mi Kiliti huŋ kɛ ma sɔla fulasɛiniŋndo wa bɛɛ cho lakɔ.—Sam 45:​16.

8. Kundala sala yaa kuɛɛ Sukuwaa Pɛɛkaa Baabuiya ndaa laalaŋ yɛ maa la cho?

⁸ O hei niŋ, Sukuwaa Pɛɛkaa Baabuiya ndaa laalaŋ maa waŋnda cho kundalaŋ layaa: (1) Ŋwaŋ 144,000 cho wa o masaleŋ choo latulu a Chiisu wa, (2) wanaa faŋga bɛnduaa, nda cho yɛ Kilisiɔŋaa ve Mɛlɛka diikɔŋ a kɔl ndaa kpou le wa ni. Maa nda cho wa isisi kpeŋgbei lemasa Chiisu wo lachi o choo choo niŋ ni. Nduyɛ (3) waŋnda o miiliɔŋndaŋ niŋ a cho wa o lɛŋndeŋ choo le pɛɛkoo a Chɛhowa okɔɔ teleŋ Chiisu cho wa o Masaleŋ choo le Wɔsilaŋ Waa Pilɛ wo. * Kɛ mi Chɛhowa mala wanaa nduaa le biyɔɔ tonya Baabuiyo hoo bila nyɛkɛndɛi mɛɛ teleŋ tiŋ hiou.—Pulɔ. 4:​18.

9. (a) O nɛi kuɛɛ choo wanaa faŋga bɛnduaa cho o lɛŋndeŋ choo wa nɔla yɛ ma sim “kpeŋgbei lemasaa, a Saa Fɔŋndɔɔ lachi”? (b) Le yɛɛ Kɔl kaloo cho yɛ o sinapɛŋgu sɔlaŋ hoo o Sɔɔŋ Chɔɔmaŋndoŋ 7:​9 wo niŋ?

⁹ O wɔsi 1935 niŋ, mi Seiyaa Chɛhowaa bii yilaŋii Chɔŋ nde bila a faŋga bɛndoo okɔɔ. Ma sina maa o cho naa maa mɛɛ mi wanaa faŋga bɛnduaa kuɛ fɛŋ choo choo malaŋ nda sim “kpeŋgbei lemasaa, a Saa Fɔŋndɔɔ lachi” le. Kɛ maa nyɛ simnda ndalaŋ la sim lewundu ni. Mi che bɛɛ a cho wa o lɛŋndeŋ choo, wanaa faŋga bɛnduaa nɔla ma sim “kpeŋgbei lemasaa . . . lachi.” A tosa hei te o yɔŋ pɛ ma chɛl maa Chɛhowa nɔ dioo ni le mbo wa nda choo masa nduyɛ ma diikuŋ ndu. (Aisaya 66:​1) A nɔla ma sim “Saa Fɔŋndɔɔ lachi” te a chɔm pɛ kɛsɛ maa a nɔ tiindaŋndo o sala baŋaa Chiisu wo niŋ. Le hei tuuwo, o Maatiu 25:​31, 32 niŋ, Baabuiyo dimi maa kiilaa Mɛlɛkaa cho hunɔɔ “chuuŋgiaa waŋnda kpou o chieeŋndo niŋ,” hali a wanaa dɛnɛ wɔɔŋnda bɛɛ ni, o kpeŋgbei kɛndɛ lemasa Chiisu wo lachi. I cho kpendekele maa o cho choo choo le waŋnda haa cho le, kɛ o lɛŋndeŋ choo. Kɔl kaloo cho bɔɔ o sinapɛŋgu sɔlaŋ hoo wo niŋ. Kanifuule, Baabuiyo dimi naa maa mi wanaa faŋga bɛnduaa kua choo choo le. Kɛ maa, a wa isisi kpeŋgbei lemasaa a Saa Fɔŋndɔɔ lachi. Kundaa opilɛ kpe Mɛlɛka dimi ni maa o cho lakɔ choo choo. Ndu cho ŋwaŋ 144,000 “wa niŋ masaa ŋwaŋnda chiee choo o chieeŋndo choo” a Chiisu latulu wa ni.—Sɔɔŋ. 5:​10.

10. Le yɛɛ o bɛnda yɛ mi wanaa faŋga bɛnduaa pɛɛku fɛŋ a Chɛhowa okɔɔ tuupa mi Masale Wɔsila Waa Pilɛ Chiisuleŋ le kanduŋ?

¹⁰ Chɔŋ niŋ a wɔsi 1935, Seiyaa Chɛhowaa bii niŋ yilaŋii Chɔŋ che wanaa faŋga bɛnduaa ve bila. Maa nda cho Kilisiɔŋaa laalaŋaa nɔ tiindaŋndo le waa o lɛŋndeŋ choo lefafɛɛŋ nda ni. A nɔ fɛŋ ma pɛɛku a Chɛhowa okɔɔ nduyɛ ma piɛi ndu tuupa mi Masale Wɔsila Waa Pilɛ Chiisuleŋ le kanduŋ, malaŋ nda sɔla pioŋɔɔ a teleŋ nyɛpalaa bɛndoo. A nɔ ma nɔ tiindaŋ kala kalaa “le hiɔlɔŋndo o sɔɔŋ cho muŋ hunɔɔ” yɔŋnɔŋ tuupa mi Masale Chiisuleŋ le kanduŋ ndo.—Luku 21:​34-36.

11. Le yɛɛ Sukuwaa Pɛɛkaa Baabuiya apum ndaa laalaŋ yɛ maa naapum waŋnda apum nɔ le kɔlaŋ choo choo te Masale Wɔsila Waa Pilɛ Chiisuleŋ le chuu pɛ?

¹¹ Ɔɔ niŋ laalaŋ ndaa nɔ maa wanaa kɛsi taamasi kɛndɔɔ wa apum cho lakɔ choo choo te Masale Wɔsila Waa Pilɛ Chiisuleŋ le chuu pɛ wo? Ndaa poonyiaa niŋ laalaŋ koŋ le teleŋ vilɛi o Bandu Mɛŋgɛlaa niŋ Doŋdoŋndo 15, 1913.  Le laalaŋndo hoo tooloo, mi apum ndaa yiyaŋ okoŋ maa nyuna aa, ‘Le yɛɛ wanaa lo o tiindaŋ ndaa choo sindɛ haaa ma wu wa sɔla yɛ fandaa le waa o lɛŋndeŋ choo, kɛ mi Kilisiɔŋaa ndaa nɔ bɛɛ pɛŋ tiindaŋ maa nda le wa kuɛ choo choo?’ Laalaŋ ndaŋ la tiɔɔŋ laa ke nda yiyaŋ waa naa ni, nduyɛ laŋ kpou la ve tonya le. O tasoo, maa wanaa faŋga bɛnduaa cho lakɔ choo choo. O diiŋ ndɔɔ, maa Kilisiɔŋaa ve Mɛlɛka diikɔŋ a kɔl ndaa kpou le wa cho wana faŋga bɛnduaa kaŋ ni.

12-13. Yɛɛ Kilisiɔŋaa pɔyaŋnda a wanaa faŋga bɛnduaa kpou sina yɛ a fanda ndaa okɔɔ?

¹² A mɛɛ naŋ yaasiaa yɛ, chɔŋ niŋ a wɔsi 1935, Seiyaa Chɛhowaa sina niŋ wanaa cho wanaa faŋga bɛnduaa Chɔŋ che o yilaŋnde niŋnda. Nda cho wanaa cho pioŋɔɔ sɔla o chɔu Amakɛdɔŋndo niŋnda ni. O lɛŋndeŋ choo naŋ nda cho wa ni ma “fula o nyɛ palaa bɛndoo niŋ.” Nduyɛ, a cho wa dimioo “choo choo aa, ‘Saŋgalaa cho o Mɛlɛka naa lo, o cho ichali o kpeŋgbei lemasaa choo wo, nda Saa Fɔŋndɔɔ le piŋi nda piŋi naa wo.’” (Sɔɔŋ. 7:​10, 14) Le handɔɔ lechoo, Baabuiyo pɛɛku naa vɛlɛ maa fanda wanaa cho fulasɛiniŋndo sɔla le kɔlaŋ choo choo wa “hiou bɛnda” a o wanaa lo o tiindaŋ ndaa choo sindɛ haaa ma wu wa. (Hibu. 11:​40) Mɛɛ sinapɛŋgoo hoo sɔlaŋ, mi puaapiliaa naa kandu niko sɛmbɔɔ dɔwɔɔ le waŋnda veeloo le ma huŋ piɛi Chɛhowa a tiindaŋndo le waa o lɛŋndeŋ choo lefafɛɛŋ.

¹³ Wanaa cho o faŋga bɛndoo hoo niŋnda naŋ kɔl tau a tiindaŋ nda nɔ hoo wo. A sinapɛŋgu maa Chɛhowa nɔ ni mbo kɛɛsiaa naa wanaa nduaa cho ndu piɛiyo o laalaŋndo choo wa nɔ le waa wa, te o choo choo niŋ ni ɔɔ o lɛŋndeŋ choo naŋ ni. Kilisiɔŋaa pɔyaŋnda a wanaa faŋga bɛnduaa kpou sina maa kɛndɛi bɛndui Chɛhowɛi sanaa a sala baŋaa Chiisu Kiliti wo nyindu ndu ni le nda fandaa.—Luomaŋ. 3:​24.

14. Mɛɛ wɔsi 1935 hiou, kɔndɔfili yɛɛ wa yɛ a bɔɔbɔɔ a huului wanaa faŋga bɛnduaa okɔɔ?

¹⁴ Mɛɛ wanaa Chɛhowaa sɔla sinapɛŋgu walaŋndo hoo o wɔsi 1935 niŋ, kɔndɔfillo wa wɔ a bɔɔbɔɔ le sinaa mɛɛ wanaa nɔ tiindaŋndo le waa o lɛŋndeŋ choo wa looku niŋ simnɔŋ faŋga bɛndu yɛ. Le taamaseliiyo, Lonad Pakiŋ wa wɔsilaŋ 12 mi sinapɛŋgoo sɔlaŋ a faŋga bɛndoo okɔɔ. “A teleŋ koŋ, wanaa dimiaa yooŋgu kɛndiaa 56, 000 wa chieeŋndo balɔɔ silɔ ni.” Nyɛ o loonuŋndo cho hoo ni. Mbo hiau lachi a dimioo aa: “Naapum wanaa pɔyaŋnda a bɔɔbɔɔ wa pɛŋ ni. Wanaa faŋga bɛnduaa haa ve mɛɛ ndii dimiŋ yɛ le.”

15. Yɛɛ tosa yɛ mi wanaa faŋga bɛnduaa wa hiouwɔɔ lachi a kuiyo?

¹⁵ O wɔsila wa lachi laŋ niŋ, ma yɔŋ misiɔnalueiya o lɛŋii bɔɔbɔɔ niŋ. Mi hei tosa mi Seiyaa Chɛhowaa hiau lachi a kuiyo tau. Okoŋ kɔɔli, mi kɛɛsiaa tosaŋ o wɔsi 1968 niŋ le yauwo  hoo, The Truth That Leads to Eternal Life soliŋndo kpeku le pɛɛkula Baabuilaŋ kandɔɔ. Yauwo hoo ndoo tɛɛsiaa bɔɔ tonya cho o Baabuiyo niŋndo o nɛi tɛtɛlɔɔ niŋ. Mi hei tosa mi wanaa tusiaŋaa bɔɔbɔɔ sɔɔŋguu Chɛhowa ikɛi. O wɔsilaŋ la hiɔɔlu kpe bɛŋgu, wanaa sɛnɛiya hiouwɔɔ walaŋ kɛmɔɔ le ŋuɛɛnu sɔla yiŋɔɔ ni. Mɛɛ kpaaya Katolikiiya ndaa nɔ o Latiŋ Amɛlika a o lɛŋii cheleŋnde niŋndo yɔŋyɔla, mi waŋnda hiau lachi a yiŋɔɔ sɔlaa o miiliɔŋndaŋ niŋ. Nduyɛ mi keŋ yɔŋnuŋ vɛlɛ mɛɛ nda chɛl naa niko le wali naa tosaa o Yulopi Ba Paaleŋ le chaŋ ndo, a o fondalaŋ lapum o Afilika niŋ. (Aisaya 60:​22) O wɔsila laŋga hiou laŋ niŋ, kɔɔna Chɛhowaa toosiaa niŋ vɛlɛ yaula kɛndɛla bɔɔbɔɔ le waŋnda malaa ma pɛɛku tonya cho o Baabuiyo niŋndo. I cho niŋ kpendekele maa wanaa faŋga bɛnduaa sɔlaŋ niŋ hau hiouwɔɔ miiliɔŋndaŋ la ŋɔmaa.

16. Kuɛɛ wanaa faŋga bɛnduaa cho yɛ fulaa?

¹⁶ Mɛɛ Chɔŋ wa yilaŋnde hei poonyiaa, mbo dimi maa wanaa faŋga bɛnduaa nɔ le fulaa “o lelɛŋ o lelɛŋ, a lekaa o lekaa, a waŋnda suu o suu, a isɔɔ o isɔɔ maŋgalaa” niŋ. Mi Sɛkalaya wana ndoo suaa le Mɛlɛka wo bɛɛ dimi nyɛ waa naa tuupa mi Chɔŋ poonyiaa hei. Mbo poonyiaa aa: “A teleŋ koŋ, waŋnda a fula niŋ ŋwaŋ tɔ a sim le lɛŋnde kpou a kaalaŋ kpou wa, ma huŋ saa Chuunɔɔ opilɛ domaa a makɔɔ, ma  dimul ndu aa, ‘Yandii, ŋ kɔŋnuŋ latulu naa nyaa naa ŋ cho kɔlaŋ nda, fondole, ŋ tuei maa Mɛlɛka cho nya Chuuwa kɔɔli.’”—Sɛka. 8:​23.

17. Yɛɛ kɔɔna Chɛhowaa cho yɛ hau tosaa le wanaa fula o lekaa o lekaa, a isɔɔ o isɔɔ maŋgalaa niŋnda malaa ma piɛi Chɛhowa?

¹⁷ Mi Seiyaa Chɛhowaa chiikuu vɛlɛ maa le mi waŋnda o isɔɔ o isɔɔ maŋgalaa niŋ wa o wanaa faŋga bɛnduaa haa tɛɛŋ, mɛɛ mi yooŋgu kɛndɔɔ dimiŋ o sɔɔŋ maŋgalaa bɔɔbɔɔ niŋ. O hiou niŋ suɛi wɔsila 130 chɔŋ a teleŋ naŋ kandu yaula pɛɛkaala Baabuilaŋ hivioo wo. Kɛ sɔɔŋ maŋgalaŋ naŋ cho niŋ hau yaula naalaŋ hivioo leniŋ ndoŋ, hiou ŋ naŋ wa paandu hivioo woŋ poloŋ poloŋ. A tonya, ŋ dimi maa kaamaa kɛsi Chɛhowa cho hoo tosaa o palɛi nɛi hei niŋ le wanaa faŋga bɛnduaa chuuŋgiaa fulaa o lekaa o lekaa niŋ ni. Mi che bɛɛ waŋnda haa nɔ kɔɔlima pilɛ le, kɛ nyɛm mala nda le pɛɛkoo a Mɛlɛka okɔɔ woŋ cho nda malaa le ndu piɛiyo o diompilɔɔ niŋ. Nduyɛ waŋnda sina hau kaala cho Seiyaa Chɛhowaa tɛɛŋndo a yooŋgu kɛndɛ nda dimi wo. Hei cho bɔɔ suɛi kindi tiindaŋ naa!—Maa. 24:​14; Chɔŋ 13:​35.

18. (a) A mɛɛ Aisaya 46:​10, 11 dimi yɛ, le yɛɛ naŋ laalaŋ yɛ kɛsɛ maa Chɛhowa peelu huului dimiŋ a wanaa faŋga bɛnduaa okɔɔ ve? (b) Le yɛɛ wanaa nɔ tiindaŋndo le waa o lɛŋndeŋ choo wa yiyaŋ naa maa kafalaŋ te Mɛlɛka tosal nda le?

¹⁸ Huului dimiŋ hei a faŋga bɛndoo okɔɔ ve nɔ mii chuu naa hau nyaaloo! Ŋ che niŋ kpendekele maa Chɛhowa peelu huului keŋ o nɛi kɔndɔfili niŋ. (Nuawɔ Aisaya 46:​10, 11.) Wanaa nɔ le waa o faŋga bɛndoo hoo niŋnda bɛɛ cho a kɔl kɛndɛ le tiindaŋ Chɛhowa ke nda hoo wo. Pesiŋ bɛɛ a yiyaŋ naa maa Mɛlɛka tosal nda kafalaŋ mbo kɛɛlu nda kɔlaŋ choo choo le waa o masaleŋ choo a Chiisu latulu le. Wanaa bɔɔbɔɔ cho o Baabuiyo niŋ a nyina Mɛlɛkaa wa kɔɔli wa. Kɛ waŋnda haa cho o kunda ŋwaŋ 144, 000 choo le. Chɔŋ Wana Yiŋaa cho waŋndo opilɛ o waŋnda haa tɛɛŋ. (Maa. 11:​11) Wana cheleŋ cho vɛlɛ Deeve ni. (Walta. 2:​34) Wanaa ŋiɔɔŋ nda haa a acheleŋaa bɔɔbɔɔ nɔ le fulasɛiniŋndo sɔlaa le waa o kpele hɛnɛkiɔɔ niŋ o lɛŋndeŋ choo. Nda a wanaa faŋga bɛnduaa cho fondaa sɔla le lo lechoo ndaa chɔmndo o Chɛhowa lo a masale ndɔleŋ.

19. Vɛɛ peelɔŋ yilaŋnde hei mala yɛ naa le sinaa maa ŋ cho niŋ hau o mɛɛlula chieeŋndo ikɛi kpɛɛluŋ?

¹⁹ Teleŋ tasoo cho hoo ni le mi Mɛlɛka chuuŋgiaa waŋnda o miiliɔŋndaŋ niŋ fulaa o kɔɔlima yɛ yiaŋ niŋ le ndu piɛiyo. O yɔŋ bɛɛ aa le kɔlaŋ choo choo ɔɔ le waa o lɛŋndeŋ choo naŋ nɔ tiindaŋndo ni, ŋ nɔ miŋ hiou lachi a waŋnda malaa le ma suliŋ le waa o faŋga bɛndu nɔ ‘saa cheleŋnda’ wo choo. (Chɔŋ 10:​16) Chɛhowa cho suŋ hunɔɔ a nyɛpalaa bɛndu dimiŋ ndo. Nyɛpalaa bɛndoo hoo cho hunɔɔ masɛi waŋchieeya a piɛiyii lachoowɛi cho hau waŋchieeya saaŋgiaa wo tɛɛmbuu ni. Dikeŋnaŋ bɛndoo pila wanaa cho o faŋga bɛndoo hoo niŋnda nɔ le hunɔɔ Chɛhowa piɛiyo o lɛŋndeŋ choo lefafɛɛŋ ni!​—Sɔɔŋ. 7:14.