Bolle Baabuile hiŋ a nyunaa hoo leŋ le dimi aa: “Te a che pɛ mi wanaa nɔ kpaayalaŋ nda a wa wanaa tambɛiya nyɛ palaa tusioo choo o lɛŋndeŋ niŋ, o koŋ kɔɔli, ma che ma wa waŋnda kafalaŋ tosallo, nduyɛ ma tuŋ waŋnda dila ndalaŋ o sɔɔŋ niŋ, kɔndɔfili bii num te. Waŋ bɛnduaa cho sɔɔŋ muŋ tosaa wa nda bɛɛ a nɔ waŋ bɛnduaa nɔ nda hɔlteŋ choo ma wa nda mandaa wa. Nduyɛ waŋ bɛnduaa cho nda kaŋ mandaa wa bɛɛ a nɔ waŋ bɛnduaa nɔ nda hɔlteŋ choo ma wa nda mandaa wa.”—Ikili. 5:​8.

Te ŋ veelu pɛ diomndaŋ o bolle Baabuileŋ niŋ, miŋ kuɛ le dimi maa a masaa waŋchieeya okɔɔ kinɛi le cho suɛi ni. Kɛ o cho ko a nda okɔɔ le le cho suɛi le. Le mala naa le sinaa tonyaa pum a Chɛhowa okɔɔ. Tonyaa hoo nɔla mbo dɛɛniaa naa nduyɛ mbo ke naa tiindaŋndo.

Ikilisiaatii 5:​8 soo a masaa cho wanaa tambɛiya nyɛpalaa tusioo choo, nduyɛ ma wa nda kafalaŋ tosallo o sɔɔŋ niŋnda. Le dimi maa a nɔ ma loonuŋ maa wana nɔ foofo bɛndoo mbo hiau nda wo o cho nda nuaa. Nduyɛ pɛŋ, wanaa cheleŋ cho a nɔ kpaayaa ma hiau wana nɔ koŋ foofo bɛndoo nda choo wo. Kɛ lepum o masale wanachioo niŋ, mi wanaa nɔ haa foofola teŋgeŋ teŋgeŋndaŋ nda kpou simnuŋ wanaa lakafa. Nduyɛ, mi waŋnda saŋga tau o masale ndaleŋ bɛŋgu.

Lepum, wanaa tambɛiya sɔla wana soo le nda o masale wanachioo niŋ te. Kɛ o wa bɛɛ lende, bolle Baabuileŋ ndeŋ le ke naa kɔl dɛɛniaa maa Chɛhowa nɔ hɔlteŋ masaa haa choo. Lelaŋ te a wa naa pɛ kafalaŋ tosallo, ŋ nɔ miŋ mal Mɛlɛka sɔɔŋ o ba. (Sam 55:​22; Filipi. 4:​6, 7) Ŋ sina maa “hɔlte Mɛlɛka Yaawɛɛ leŋ le cho ba o ba fee o chieeŋndo choo. Nduyɛ, wanaa cho ndu o hɔl sakpo ma tosa nyɛ o dimul nda wo wa, dialuŋ kalaŋ o ke nda ni.”—2 Kolo. 16:​9.

Mɛɛ o hei niŋ, Ikilisiaatii 5:​8 chɔm naa tonya cho a masaa waŋchieeya okɔɔ wo. Ndu cho ni maa, masa o masa fee nɔ masa nɔ kpaayaa mbo hiau ndu wo. I hiou kpou ve, bolle Baabuileŋ ndeŋ le mala naa le sinaa maa Chɛhowa cho Masa Filioŋ nɔ kpaayaa mbo hiau nda kpou wo ni. O chii niŋ Chiisu Po ndɔ ke kpaayaa le mbo wa Masaa o Masale ndɔleŋ choo. Mɛlɛka Kpou Kpou cho hoo Masaa waŋ chieeya kpou hɔlteŋ choo wo cho wana lakafa le. Nduyɛ, mɛɛ o cho yɛ Po ndɔɔ bɛɛ cho ni.