1. Tiindaŋ yɛɛ Mata ndoo nɔ yɛ le yema ndɔ? (Tofa fotueiyo o peeleŋ ndeŋ choo.)

MATA, chaŋyɛi kpɛɛluŋ Chiisu ve, a buɛi ndɔɔ wa mɔnɛi biyɔɔ. Lasalɔɔ yema ndɔ ndoo vi ni. Baa nyɛ o nyɛ wa pa le ndu kɔllo dɛɛniaa? Ei. Mi Chiisu chuel ndu buŋgɛi aa, “Yema num cho miiŋgu yoomu.” I cho tonya maa diomndaŋ ndaŋ la feŋa kɔl tambɛi Mata wo kpou le. Kɛ mi Mata laalaŋ buŋgɛi Chiisu chuel ndu ve. Okoŋ mbo dimi aa, “I sina maa o cho miiŋgu yoomu o paale mɛɛlaaleŋ choo.” (Chɔŋ 11:​20-24) Ndoo nɔ laalaŋndo maa fulasɛiniŋndo cho wa o chilaŋ niŋ. Kɛ okoŋ kɔɔli, mi Chiisu tosa kaamaa. Mbo miŋgi Lasalɔɔ yoomu o paale leŋ choo.

2. Le yɛɛ ŋ yeema yɛ ma nɔ tiindaŋ suu Mata ndoo nɔ wo?

² Ŋ nɔ sabu o sabu le waa kɔl maa Chiisu ɔɔ Finya ndɔ cho wanaa naŋ kaala ma wu wa miŋgi yoomu suŋ suŋ te. Kɛ a nɔ pa tiindaŋ suu Mata ndoo nɔ wo, maa fulasɛiniŋndo cho wa o chilaŋ niŋ le wanaa ŋ kaala wa? Kɛlɛŋgaa pɔnɔ num ɔɔ laa num, kala num, finya num, finya num ɔɔ kala num mama ŋ kaala wo, ɔɔ chua num ŋ kaala tau wo vi. Yeemɛi cho num tau le nda demullo, suukaŋndo, nduyɛ mi la mam latulu nya wanaa ŋ kaala kaŋ nda. Maa Mata, a nɔ sabula sɔvɛlaŋ le  dimioo a kɔl kɛndɛ aa, ‘I sina maa wana ya kaala wo cho miiŋgu yoomu.’ Kɛ, i cho suɛi sɔvɛ le mi Kilisiɔŋnɔ kɛ kɛ yiyaŋ a sabula tosa miŋ nɔ tiindaŋ waa naa wo.

3, 4. Yɛɛ Chiisu ndoo mɛɛlu yɛ tosa? Nduyɛ vɛɛ keŋ ndii kindi yɛ tiindaŋ Mata wo?

³ Chulusɛlɛm ikɛi Mata wa ni. Kɛlɛŋgaa ndoo chi teleŋ Chiisu miŋgi po chua ndoo vii pɔnɔɔ wo yoomu Neiŋ chiee lekɔɔ o Kalili niŋndo le. Kɛ, mbo tuɛi a ndi okɔɔ. Naapum mi ndoo tuɛi vɛlɛ maa mi Chiisu miŋgi chuaambɔ Chaaliɔɔ wo yoomu. Mi wana o wana wa o chuaambɔ koŋ ndo chiɛiniŋ “sina maa o vi.” Kɛ, mi Chiisu saa ndu baa mbo dimi aa, “Chuaambɔɔ, chɔŋ”! O lepilɛ niŋ kpe, mi chuaambɔɔ chaŋ. (Luku 7:​11-17; 8:​41, 42, 49-55) Mata nda pɔmbɔ ndɔ ndaa sina maa mi Chiisu ndoo chiɔu wanaa lanaa wa. Lelaŋ, ndaa laalaŋ maa te Chiisu ndoo wa loŋ pɛ, Lasalɔɔ ve wu le. Kɛ mɛɛ Lasalɔɔ vi, yɛɛ Mata wa yɛ niko kɔl? Loonuŋ maa mi Mata dimi maa Lasalɔɔ cho miiŋgu yoomu o chilaŋ niŋ, “o paale mɛɛlaaleŋ choo.” Le yɛɛ ndoo nɔ yɛ tiindaŋ kala waa naa? Nduyɛ le yɛɛ ŋ nɔ yɛ tiindaŋndo maa o chilaŋ niŋ, wanaa ŋ kaala ma wu wa cho wa o wanaa cho miiŋgu yoomu wa tɛɛŋ?

⁴ Sabula sɔvɛlaŋ la cho le tiindaŋndo dɔwɔɔ o fulasɛiniŋndo niŋ. Ŋ cho niko isɔɔ a laŋ okɔɔ. Kɛlɛŋgaa a cho sɔɔŋ saalɔŋ o Diom Mɛlɛkaa niŋ ŋ yiyaŋ pɛŋ a muŋ okɔɔ le woŋ. Nduyɛ sɔɔŋ muŋ cho tiindaŋ numndo kindi, maa a cho vɛlɛ chɔ wanaa ŋ kaala ma wu wa.

5. Le yɛɛ Mata ndoo laalaŋ yɛ maa Lasalɔɔ cho miiŋgu yoomu?

⁵ Loonuŋ maa Mata ndoo dimi naa aa, ‘I nɔ tiindaŋndo maa yema nuu cho miiŋgu yoomu le.’ Mbo dimi aa, “I sina maa o cho miiŋgu yoomu.” Le yɛɛ Mata ndoo nɔ yɛ tiindaŋ kala waa naa? Kanifuule, ndoo sina fulasɛiniŋnda yɔŋnuŋ o paandoo niŋndaŋ. Mi ndoo pɛɛku a laŋ okɔɔ o chiɛi Chuuwa ndaa piɛi Mɛlɛka wo niŋ. Ŋ cho niko yaasiaa a fulasɛiniŋnda laŋ la yaa okɔɔ, la cho o Diom Mɛlɛkaa niŋndaŋ.

6. A fulasɛiniŋ kuɛɛ okɔɔ Mata ndoo pɛɛku yɛ?

⁶ Mi fulasɛiniŋ tasoo yɔŋnuŋ a boondii Mɛlɛka wa Ilaacha, wana ndoo suaa le Mɛlɛka wo kpaayaa kioo le kaamaalaŋ tosaa wo. O kpeŋgii baluaŋndo o Isɔluɛi niŋ, o chioo Foniisia o Saluɛfati niŋ, chua tambɛi pum wa loŋ o vii pɔnɔɔ nduyɛ mbo tosal wana ndoo suaa le Mɛlɛka wo kɛndɛiyo. Okoŋ, mi Chɛhowa tosa kaamaa. Mi Chɛhowa tosa a sabu maa kolo beedii ndɔɔ a chuɛima nduaŋ ma chuu le. Le halikpeŋ mi ndu nda po ndɔɔ wa achal. (Masaa Bɛnduaa Tasiaa 17:​8-16) Okoŋ kɔɔli, mi po ndɔɔ naa nduyɛ mbo wu. Kɛ mi Ilaacha mala ndu. Mɛɛ Ilaacha pilaŋ poombɔɔ, mbo piɛi o Chɛhowa lo aa, “Oo Mɛlɛka Yaawɛɛ, Mɛlɛka nuu, yandii miŋgi poombɔɔ hoo yoomoo o miliŋ.” Nduyɛ mii yɔŋnuŋ! Mi Mɛlɛka yaŋ Ilaacha nilaŋ, nduyɛ mi poombɔɔ miiŋgu yoomu. Fulasɛiniŋ tase Baabuiyo soo a ndu okɔɔ wo wa koŋ ni. (Nuawɔ Masaa Bɛnduaa Tasiaa 17:​17-24.) A tonya, Mata ndoo sina a suɛi kaamɛi ndii yɔŋnuŋ keŋnde okɔɔ.

7, 8. (a) Vɛɛ Ilaasia ke yɛ wana chiee po ndɔɔ vi wo kɔl dɛɛniaa? (b) Yɛɛ kaamaa Ilaasia wo chɔm yɛ a Chɛhowa okɔɔ?

⁷ Wana ndoo suaa le Mɛlɛka wo Ilaasia, tosa kaamaa diiŋ ndɔɔ a fulasɛiniŋndo  okɔɔ o Baabuiyo niŋ ni. Wana lanɔ Isɔluɛinɔɔ ndoo vilu chua kposoŋ te wo wa o chiee ndoo nɔ diolaŋ Siɔnem ndo. Le kɛndɛi bɛnduii ndoo tosal Ilaasia ve, mi Mɛlɛka duau ndu nda pɔnɔ ndɔ yuwɛiyo sala ma vialu poo. Mɛɛ wɔsioŋ hiou ŋtiŋ, mi poombɔ koŋ wu. Yiyaŋndɔ a mɛɛ kala ndɔ ndoo bii mɔnɛi yɛ. Mɛɛ mɔnɛi bii ndu tei mbo buli tiŋ vilɛiyo kilolaŋ 30 (mɛɛliilaŋ 19) le Ilaasia nuuviaa o pembii Kamɛlve. Mi Ilaasia viam buɛi ndɔɔ Kɛhasi nda lachi le mbo kɔ miŋgi poombɔ koŋ yoomu. Kɛ Kɛhasi tiuba le. Okoŋ, mi kala ndɔ wa a kɔl tambɛiyo wo huŋ nda Ilaasia o ndu lo bɛɛ.—Masaa Bɛnduaa Diiŋ Nduaa 4:​8-31.

⁸ Mi Ilaasia luɛi chiɛiniŋ naa poombɔɔ wa ihini o vilɛiyo wa, mbo piɛi. Mi Chɛhowa muli piɛile Ilaasia leŋ. Nduyɛ o nɛi kaamaa niŋ, mbo miŋgi poombɔɔ yoomu. Mɛɛ kala ndɔ che ndu yoomu, mbo hiau ba a kɔllo naŋɔɔ. (Nuawɔ Masaa Bɛnduaa Diiŋ Nduaa 4:​32-37.) Naapum mi ndoo loonuŋ piɛile Hana leŋ. Hana ndoo vilu chua le haaa mɛɛ mi Chɛhowa duau ndu sala malaŋ o vialu poo, Saamiɛɛ. Mi Hana saŋgala Chɛhowa kanifuule “o nɔla mbo yɔŋ waŋndo o sɛiyo niŋ, nduyɛ o nɔla vɛlɛ mbo miŋgi wana koŋ yoomu.” (Saamiɛɛ Tasoo 2:​6, NW) Mɛɛ o miŋgi poombɔ koŋ Siɔnem chiee yoomu, mi Mɛlɛka chɔm kpendekele maa o nɔ kpaayaa le wana vi wo miŋgioo yoomu.

9. Tɛɛsiaa wɔ fulasɛiniŋ yaa ndɔ cho o Baabuiyo niŋndo?

⁹ Mi suɛi kɔndɔfili cheleŋ yɔŋnuŋ o piɔm Ilaasia wo kɔɔli. Mbo tosa wallo maa wana suaa le Mɛlɛka wo hiouwɔɔ wɔsioŋ 50, okoŋ mbo “naa naa pila. Nduyɛ o naa kpoŋ niŋ o vi ni.” Mi teleŋ vilɛi hiau, nyɛ ndoo lo niŋ Ilaasia kinɛiyo wa paala ndɔlaŋ ni. Paale pilɛ, Isɔluɛiya pum wa poo kumbɔɔ. Okoŋ ma cha yaamɔɔwaa ndaa hunɔɔ. Mi Isɔluɛiya haa kindiŋ le ma nyaanuŋ chɔ chɔ, okoŋ ma wuu po vilɛiyo hoo o sɛi ɔɔ buulu nda kumbu Ilaasia wo niŋ. Mi Baabuiyo dimi aa, “Dimioo nuaa mi wana vilɛiyo hoo o kɔ kunduŋ paala Ilaasia laŋ, mi poo hoo miiŋgu yoomu mbo chaŋ mbo sim.” (Masaa Bɛnduaa Diiŋ Nduaa 13:​14, 20, 21) Konalaŋ ndaŋ la ke Mata tiindaŋndo ni maa Mɛlɛka nɔ kpaayaa piɔmndo choo. La tiuba mi la ke num tiindaŋndo maa kpaaya Mɛlɛkaa cho o bɛndu nduyɛ o nɔ lamɛɛlu le.

10. Vɛɛ Pitɛ mala yɛ ndepilɛnɔ Kilisiɔŋnɔ ndoo vi wo?

¹⁰ Yaula maKilikiilaŋ bɛɛ la nɔ konalaŋ a fulasɛiniŋndo okɔɔ la buɛiyaa laalaŋaa Mɛlɛkaa ndaa tosalaŋ. Ŋ soo niŋ a fulasɛiniŋ Chiisu ndoo tosa Neiŋ chiee lekɔɔ wo, a hoo o chiɛi Chaaliɔɔ wo. Mɛɛ teleŋndo hiou nyɛɛmbɔ, mi Pitɛ wana Chiisu vem hɔlte ndɔ wo miŋgi Dɔkasi, o ndaa veelu vɛlɛ aa Tabita wo yoomu. Mi Pitɛ luɛi o lumui o wa ihini o vilɛiyo, mbo piɛi, nduyɛ mbo dimi aa, “Tabita, chɔŋ”! O foofo koŋ choo mbo miiŋgu yoomu,  nduyɛ mi Pitɛ miŋgi ndu Kilisiɔŋaa cheleŋ wa loŋnda “o ba.” Hei tosa ni mi wanaa bɔɔbɔɔ o chiee koŋ niŋ “laalaŋ a Masanɔɔ Mɛlɛka.” Mi tol kɔɔliaa sɛnɛiya haa tiuba ma dimul acheleŋnda yooŋgu kɛndɔɔ a Chiisu okɔɔ, nduyɛ ma dimul vɛlɛ wana o wana a kpaaya Mɛlɛka nɔ le waŋnda miŋgioo yoomu wo.—Walta Wanaa Chiisuaa 9:​36-42.

11. Yɛɛ Luku ndoo saaluŋ yɛ a po feleŋgɔnɔ dello, nduyɛ vɛɛ suɛi keŋ ndii piiliaŋ yɛ acheleŋnda?

¹¹ Seiya wa vɛlɛ isisi ma cha fulasɛiniŋ cheleŋ. Teleŋ pum, Pɔɔl wana Chiisu vem hɔlte ndɔ wo wa o bɔŋaŋ pilɛ o chiɛi choo choo wo niŋ Towaa, o nda veelu niŋ hau aa Tɔki kpeŋgii baluaŋndo ve. Mi Pɔɔl lo suɛi tei mi ditɛɛŋndo fuuluu. Po feleŋgɔnɔɔ diolaŋ aa Yutikɔɔ wa ichali o wundɛiyo mbo wa nilaŋ yaŋɔɔ. Kɛ mbo hiaŋ o luaŋ pum mbo fula o chiɛi choo choo helɔɔ le yaa, mbo del lɛŋ kpɔl. Naapum Luku fɛŋ fuuluu naa Yutikɔɔ del la. Maa wana chiɔuwaa, mbo sina maa o cho ko yɔŋulɔŋndo le po feleŋgɔnɔɔ hoo ndoo yɔŋuluŋ te, ɔɔ mbo kɛɛ wa o ndupila niŋ te le. Mbo wu pɛ! Mi Pɔɔl bɛɛ tual amatou. Mbo tunduŋ ndu choo mbo kɔmaŋ ndu, mbo dimul waŋnda suɛi kɔndɔfille aa, “O cho yoomu.” Mi kaamaa hoo piiliaŋ wanaa wa loŋ ma cha nyɛ ndoo yɔŋnuŋndo. Sinaa maa po feleŋgɔnɔɔ hoo wa o vilɛi nduyɛ mbo miiŋgu yoomu, “mi waŋnda naŋ kɔl tau le mɛɛ o miiŋgu yoomu yɛ.”—Walta Wanaa Chiisuaa 20:​7-12.

12, 13. A fulasɛiniŋnda naŋ soo niŋ okɔɔ laŋ, nyunala suu kuɛɛ ŋ yeema yɛ naapum le nyunaa?

¹² Fulasɛiniŋnda naŋ yaasiaa laŋ ndaŋ la ke num tiindaŋ pilɛ kpe Mata ndoo nɔ wo. Ŋ nɔ tiindaŋndo maa Mɛlɛka naa yɔŋgu yoomoo wo tiuba mbo miŋgi wana vi wo yoomu. I cho suɛi sɔvɛ le sinaa maa mi Mɛlɛka ke Ilaacha, Chiisu, a Pitɛ kpaayaa le waŋnda miŋgioo yoomu. Mi hei yɔŋnuŋ a teleŋ Chɛhowa wa kaamaalaŋ tosaa wo. Mɛɛ wanaa vi yɛ niŋ a teleŋ Mɛlɛka ve lɛ la kaamaa tosa  le wo yɛ? Baa waŋpiaanduaa a waŋlaanduaa laalaŋnda nɔ pa o kɔl maa Mɛlɛka cho wanaa vi wa miŋgi yoomu o chilaŋ niŋ? Waŋnda haa nɔ pa tiindaŋndo maa Mata a mɛɛ o dimi yɛ aa, “I sina maa o cho miiŋgu yoomu o paale mɛɛlaaleŋ choo”? Le yɛɛ ndoo laalaŋ yɛ maa fulasɛiniŋndo cho yɔŋnɔŋ o chilaŋ niŋ, nduyɛ le yɛɛ num bɛɛ nɔ yɛ ma nɔ tiindaŋ waa lende?

¹³ Konala bɔɔbɔɔ cho o Diom Mɛlɛkaa niŋ mi la chɔm maa buɛiyaa laalaŋaa Mɛlɛkaa sina maa fulasɛiniŋndo cho wa o chilaŋ niŋ. Ŋ soonuŋndɔ a lapum okɔɔ.

14. Vɛɛ bundɛi Ebilahamnde pɛɛku yɛ naa a fulasɛiniŋndo okɔɔ?

¹⁴ Yiyaŋndɔ nyɛ Chɛhowa ndoo dimul Ebilaham le mbo tosal Aase, po ndɔ o wa chumndo le teleŋ vilɛiyo. Mi Chɛhowa dimul ndu aa, “Chua po num pilɔɔ hoo, ndu yɔnuŋ maa Aase ni, o ŋ kaala hoo tau wo, ma kuɛ a ndu o lɛŋnde Moliaaleŋ niŋ, ma kɔ yɔŋgu ndu naa ya . . . chua maa sala luamaa.” (Chɛnɛsee 22:​2) O yiyaŋ numndo niŋ, vɛɛ Ebilaham ndoo yiyaŋ yɛ mɛɛ o tuei nyɛ nda dimul ndu hoo wo? Mi Chɛhowa mɛi lediom maa o chuauwaa Ebilahamnda niŋ sanaa kaalaŋ o chieeŋndo choo kpou sɔla niŋ salaa ni. (Chɛnɛsee 13:​14-16; 18:​18; Luomaŋnda 4:​17, 18) Mi Chɛhowa dimi vɛlɛ maa o duau niŋ waŋnda sala sanaa “o Aase niŋ.” (Chɛnɛsee 21:​12) Kɛ vɛɛ keŋ ndii yɔŋnuŋ yɛ niŋ te Ebilaham ndoo soli pɛ po ndɔɔ salaa? Mi Mɛlɛka ke Pɔɔl nyina ndɔɔ le tɛɛsiaa maa Ebilaham ndoo nɔ tiindaŋndo maa Mɛlɛka tiuba mbo miŋgi Aase yoomu. (Nuawɔ Hibuluiya 11:​17-19.) Kɛ Baabuiyo dimi naa maa mi Ebilaham yiyaŋ maa Aase cho miiŋgu yoomu o foofo koŋ choo, naapum o lɛɛlɛla biŋgi bɛŋgu, paaleŋ lepilɛ ɔɔ lɔɔ opilɛ bɛŋgu le. Ebilaham ndoo sina teleŋ po ndɔɔ miiŋgu niŋ yoomu wo le. Kɛ ndoo nɔ tiindaŋndo maa Chɛhowa cho Aase miŋgi yoomu.

15. Tiindaŋ yɛɛ wana laalaŋndo Choobu ndoo nɔ yɛ?

¹⁵ Mi wana laalaŋndo Choobu bɛɛ sina maa fulasɛiniŋndo cho wa o chilaŋ niŋ.  Mbo sina maa te a kelu pɛ yɔmndo, o cho vɛlɛ piɔl o chiiye nduyɛ mbo simnuŋ yɔm sɛnɛiyo. Kɛ keŋ yɔŋnuŋ a wana chioo le. (Choobu 14:​7-12; 19:​25, 26) Te wana chioo vi pɛ, o nɔla mbo miŋgi ndupila yoomu le. (Sam 89:​48; 146:​3, 4) Kɛ koŋ chɔm naa maa Mɛlɛka cho wana vi koŋ ndo miŋgi yoomu le le. Mi Choobu yiyaŋ pɛŋ maa Chɛhowa cho ndu loonɔŋ. (Nuawɔ Choobu 14:​13-15, NW.) Choobu ndoo sina teleŋ hei nɔ le yɔŋnɔŋndo o chilaŋ niŋndo le. Kɛ ndoo nɔ wɔ tiindaŋndo kɛ maa wana toosiaa wana chioo wo nɔla nduyɛ o cho hunɔɔ loonɔŋ a ndu nduyɛ mbo miŋgi ndu yoomu.

16. Kɔl dɛɛniaa yɛɛ maalikɛinɔɔ ndoo ke yɛ Daaniɛɛ?

¹⁶ Yiyaŋndɔ vɛlɛ a wana laalaŋ cheleŋ okɔɔ, Daaniɛɛ. Buɛi ndoo chɔm lo lechoo wo o Chɛhowa lo wo o wa ni. O teleŋ pum niŋ, mi maalikɛinɔɔ dimul Daaniɛɛ aa, “Mɛlɛka kaala num bɔɔ” nduyɛ mbo dimul ndu aa, “wa a kɔl nyulu” nduyɛ ma “nɔ dialluŋ kalaŋ.”—Daaniɛɛ 9:​22, 23; 10:​11, 18, 19.

17, 18. Diomnde mɛyaale kuɛɛ Chɛhowa mel lɛ Daaniɛɛ?

¹⁷ Mɛɛ Daaniɛɛ wa niŋ le fuuloo wɔsioŋ 100 o yoomu ndɔɔ mɛɛlulaŋ, naapum mi ndoo yiyaŋ a nyɛ cho ndu yɔŋnɔŋndo. Baa Daaniɛɛ ndoo wa kɔl le waa vɛlɛ achal? Eiyoo! O yau Daaniɛɛ wo mɛɛlulaŋ, diomnde mɛyaaleŋ ndeŋ Mɛlɛka mel ndu ni aa, “Lelaŋ num Daaniɛɛ, lo o tiindaŋ numndo choo haaa, ma fuuluu o mɛɛlulaŋ. A cho hunɔɔ wu.” (Daaniɛɛ 12:​13) Daaniɛɛ ndoo sina maa te wana chioo vi dɔɔ pɛ, “o miiŋgu o puuloo niŋ. Paale o cho wu leŋ, tuula ndɔlaŋ kpou la mɛɛlu.” (Sam 146:​4) Kɛ, keŋ ve mɛɛlula Daaniɛɛ laŋ te. Mi Chɛhowa mel ndu lediom a chila sɔvɛlaŋ okɔɔ.

¹⁸ Mi maalikɛinɔɔ dimul Daaniɛɛ aa, “kɛ te palɛi mɛɛlɛi le chieeŋndo i huŋ fuuluu pɛ, a cho miiŋgu yoomu nduyɛ ma sɔla fandaa.” Daaniɛɛ ndoo sina teleŋ kpeekpei keŋ ndii nɔ le yɔŋnɔŋndo wo le. Mbo bii ndi bila maa o cho wu nduyɛ mbo kɔ pɛŋgi. Kɛ mi Daaniɛɛ tuɛi diomnde mɛyaaleŋ maa, “a cho miiŋgu yoomu nduyɛ ma sɔla fandaa.” Mbo bii ndi bila maa o cho fulasɛiniŋndo sɔla o chilaŋ niŋ. Keŋ ndii nɔ le yɔŋnɔŋndo teleŋ vilɛi o piɔm ndɔɔ kɔɔli, “te palɛi mɛɛlɛi le chieeŋndo i huŋ fuuluu pɛ.”

19, 20. (a) Yɛɛ sɔɔŋ naŋ yaasiaa woŋ muŋ nɔ yɛ le tosaa a diomnde Mata dimul Chiisu leŋ? (b) Yɛɛ naŋ cho yɛ yaasiaa o buŋgɛi cho lachi ve niŋ?

¹⁹ A tonya, Mata ndoo nɔ sabula kɛndɛlaŋ le tiindaŋndo nɔɔ maa Lasalɔɔ yema ndɔ laalaŋndo, “cho miiŋgu yoomu o paale mɛɛlaaleŋ choo.” Diomnde mɛyaale Chɛhowa ke Daaniɛɛ leŋ, nduyɛ a tiindaŋ kala kala Mata ndoo nɔ le fulasɛiniŋndo o chilaŋndo ke naa hau tiindaŋndo. Fulasɛiniŋndo cho yɔŋnɔŋ.

²⁰ Ŋ pɛɛku a fulasɛiniŋnda kpeekpeila yɔŋnuŋ o sindɔɔ niŋ ndaŋ okɔɔ. Hei chɔm maa waŋvilɛiya cho vɛlɛ miiŋgu yoomu. Ŋ pɛɛku maa waŋpiaanduaa a waŋlaanduaa piɛi Chɛhowa paandu a tiindaŋndo wa ndaa nɔ o kɔl maa fulasɛiniŋndo cho wa o chilaŋ niŋ. Kɛ nyɛ cho pa mbo chɔm maa fulasɛiniŋndo tiuba mbo yɔŋnuŋ o yɔŋ bɛɛ mbo chua teleŋndo tau? Te o wa lende pɛ, mɛɛ hei chɔɔlu naa sabulaŋ ke le miŋ nɔ o kɔl maa fulasɛiniŋndo cho wa o chilaŋ niŋ. Kɛ teleŋ kuɛɛ keŋ wa yɛ niŋ? Ŋ cho sɔɔŋ muŋ yaasiaa o buŋgɛi cho lachi ve niŋ.