1-3. (a) Ɔɔ laalaŋnda naala kpeekpeilaŋ opilɛ? (b) Le yɛɛ fulasɛiniŋndo cho yɛ nyɛ sɔvɛ bɛndu? (Tofa fotueiyo o peeleŋ ndeŋ choo.)

TE WAŊNDO nyuna num pɛ le sɔɔŋ taseŋ ŋ pɛɛku a tiindaŋ numndo okɔɔ woŋ, yɛɛ ŋ cho yɛ dimi? O kpeekpei niŋ, a cho wana koŋ dimul maa a laalaŋ maa Chɛhowa cho Wana Toosiaa ni, nduyɛ maa ndu ke naa yoomoo ni. Kɛlɛŋgaa a cho ndu vɛlɛ dimul maa a laalaŋ o Chiisu Kiliti niŋ, o vi le naa baŋaa wo. O kɛsɛ kɛsɔɔ niŋ, kɛlɛŋgaa a cho isɔɔ a Kpele Hɛnɛkɛ cho wa o lɛŋndeŋ choo o chilaŋ niŋndo, naa wanaa Mɛlɛkaa cho wa achal lefafɛɛŋ nda. Kɛ a cho pa isɔɔ a fulasɛiniŋndo okɔɔ, maa laalaŋnda numnda ŋ kaala laŋ opilɛ cho koŋ ni?

² Ŋ nɔ sabula sɔvɛlaŋ maa fulasɛiniŋndo cho laalaŋnda naala kpeekpeilaŋ opilɛ ni, o yɔŋ bɛɛ miŋ nɔ tiindaŋndo le pioŋɔɔ sɔlaa a teleŋ nyɛpalaa bɛndoo nduyɛ miŋ wa achal o lɛŋndeŋ choo lefafɛɛŋ. Mi Pɔɔl, wana Chiisu vem hɔlte ndɔ wo chɔm le sabu fulasɛiniŋndo cho nyɛ sɔvɛ bɛndu wo. Mbo dimi aa, “Te o wa pɛ lende maa wanaa wu wa a miiŋgu lɛ yoomu le, mɛɛ Kiliti pila bɛɛ o miiŋgu yoomu le wa.” Te Chiisu  ndoo miiŋgu yoomu le, o ve wa Masaa o choo choo niŋ te, nduyɛ yooŋgu kɛndɛ naŋ cho dimioo wo wa simnɔŋ nyɛ fondoo fuu. (Nuawɔ Kɔliŋtiaŋ Tasoo 15:​12-17, 19.) Kɛ ŋ sina maa mi Chiisu sɔla fulasɛiniŋndo. Le mɛɛ naŋ laalaŋ o fulasɛiniŋndo niŋ yɛ, ŋ cho maa Sadusiiyaa Chuuwa le, a kɛɛ kpoŋ le laalaŋndo maa waŋvilɛiya cho lɛ miiŋgu yoomu le wa. Nduyɛ o yɔŋ bɛɛ mi acheleŋnda mam naa, tiindaŋ naa maa Mɛlɛka cho waŋvilɛiya miŋgi yoomu cho o kala poŋ.—Maki 12:​18; Walta Wanaa Chiisuaa 4:​2, 3; 17:​32; 23:​6-8.

³ Mi Pɔɔl dimi maa pɛɛkoo “a mɛɛ Mɛlɛka cho waŋnda miŋgi yoomu yɛ” wa “sɔɔŋ taseŋ nda pɛɛku” a Kiliti okɔɔ woŋ ni. (Hibuluiya 6:​1, 2) Mbo kindila maa fulasɛiniŋndo wa nyɛ ndoo dɔu tiindaŋndo o ndu niŋndo ni. (Walta Wanaa Chiisuaa 24:​10, 15, 24, 25) Mi che bɛɛ naa sɔɔŋ taseŋ naŋ pɛɛku o Diom Mɛlɛkaa niŋndo fulasɛiniŋndo cho ni, kɛ ŋ nɔ wɔ miŋ pɛɛku nyɛkɛndɛi a fulasɛiniŋndo okɔɔ. (Hibuluiya 5:​12) Le sabu yɛɛ?

4. Nyunala kuɛɛ naŋ nyuna yɛ lepum a fulasɛiniŋndo okɔɔ?

⁴ Te waŋnda kandu pɛ Baabuiyo pɛɛkoo, ma pɛɛku a fulasɛiniŋnda yɔŋnuŋ o sindɔɔ niŋndaŋ okɔɔ, mɛɛ fulasɛiniŋ Lasalɔɔ wo cho naa yɛ. Ma pɛɛku vɛlɛ maa Ebilaham, Choobu, a Daaniɛɛ ndaa nɔ tiindaŋndo maa waŋvilɛiya cho vɛlɛ miiŋgu yoomu o chilaŋ niŋ. Kɛ yɛɛ ŋ cho yɛ dimi te waŋndo nyuna num pɛ le chɔmndo o Baabuiyo niŋ le sabu naŋ nɔ miŋ tiindaŋ o fulasɛiniŋ Mɛlɛka mɛi lediom o wɔsila kɛmɛla bɔɔbɔɔ hiou laŋ niŋndo? Nduyɛ Baabuiyo chɔm pa teleŋ fulasɛiniŋndo cho yɔŋnɔŋ o chilaŋ niŋndo? Mulila nyunalaŋ ndaŋ la cho tiindaŋ naa kindi.

5. A yɛɛ okɔɔ fɛŋ naŋ cho yɛ isɔɔ?

⁵ O wa tɛtɛlɛ le miŋ yiyaŋ maa ma mi-ŋgi waŋndo yoomu te o vi dɔɔ pɛ. (Chɔŋ 11:​11; Walta Wanaa Chiisuaa 20:​9, 10) Kɛ ŋ nɔla pa miŋ laalaŋ o diomnde mɛyaale cho maa wana vi niŋ le wɔsilaŋ hiouwɔɔ o kɛmɛlaŋ niŋndo cho miiŋgu yoomu o chilaŋ niŋ? Ŋ nɔla pa miŋ laalaŋ maa wana vi niŋ le teleŋ vilɛiyo ɔɔ wana laŋga wu wo cho miiŋgu yoomu? O kpeekpei niŋ, a nɔ niŋ laalaŋndo o fulasɛiniŋ ndoo yɔŋnuŋ o sindɔɔ niŋndo, mi che bɛɛ mbo chua wɔsioŋ o kɛmɛlaŋ niŋ malaŋ o yɔŋnuŋ. Fulasɛiniŋ kuɛɛ wa yɛ koŋ? Nduyɛ yɛɛ hei nɔ yɛ mii tosa a tiindaŋ ŋ nɔ le fulasɛiniŋndo o chilaŋ niŋndo?

6. Vɛɛ Sam 118 sɔla yɛ vɛlɛ peeluŋndo o Chiisu niŋ?

⁶ Kɛlɛŋgaa Deeve ndoo poonyiaa Sam 118 ni. Ŋ cho bolle Baabuileŋ soliŋ kpeku le yaasiaa fulasɛiniŋ ndoo dimiŋ le wɔsila bɔɔbɔɔ maa o cho yɔŋnɔŋndo. Bolle Baabuileŋ le nɔ diomndaŋ aa, ‘Oo Mɛlɛka Yaawɛɛ, yandii kiindiaa naa.’ Le dimi vɛlɛ aa, “Mɛlɛka Yaawɛɛ o dɔu wana o vem hoo mbo wa hunɔɔ wo sala.” Mi waŋnda soliŋ bolle Baabuile soo leŋ a Mɛsaya okɔɔ leŋ kpeku. Ndoo lo niŋ palɛi nyɛɛmbɔ le mi ndaa dii Chiisu, mbo huŋ Chulusalɛm o sofɛlɔɔ choo a Nisaŋ 9. (Sam 118:​25, 26; Maatiu 21:​7-9) Kɛ vɛɛ Sam 118 piiliaŋ yɛ vɛlɛ fulasɛiniŋ nɔ le yɔŋnɔŋndo le wɔsila bɔɔbɔɔ o chilaŋ niŋndo? Nyɛ cheleŋ Sam dimi wo cho hoo ni, “Pou wanaa taŋgulaa a kɛɛ wo, ndu simnuŋ pou saa taŋgullo wo ni.”—Sam 118:​22.

7. Vɛɛ Chuuwa ndaa kɛɛ yɛ Chiisu?

⁷ “Wanaa taŋgulaa” ndaa kɛɛ Mɛsayanɔɔ wa wa simlachiaa Chuuwa ni.  A mɛɛlu ko o Chiisu kiɔɔ maa ndu le cho Kiliti le. Mi Chuuwa bɔɔbɔɔ kɛɛ ndu nduyɛ ma dimul Paile le mbo dii ndu. (Luku 23:​18-23, NW) A tonya, nda tɔɔyaŋ piɔm Chiisoo wa o lebol ni.

8. Vɛɛ Chiisu looku yɛ simnɔŋ “pou saa taŋgullo wo”?

⁸ Ma kɛɛ Chiisu nduyɛ ma dii ndu. Vɛɛ o cho yɛ niŋ looku simnɔŋ “pou saa taŋgullo wo”? Keŋ ndii nɔla mii yɔŋnuŋ te ndoo sɔla pɛ fulasɛiniŋndo. Mi Chiisu chɔm keŋ kpendekele mɛɛ o dimi bundɛi a wana ndoo nɔ kpeloo wo okɔɔ. Mi wana kpeloo hoo viam buɛiya o wanaa wa wallo le ndu o kpele koŋ niŋnda lo. Mi wanaa wa ndu wallo tosallo wa bii wanaa o vem nda biyɔɔ wɔɔŋndo. O mɛɛlulaŋ kpɔŋ, mi wana kpeloo viam po ndɔɔ, a tiindaŋndo maa wanaa wa ndu wallo tosallo wa cho po ndɔɔ nilaŋ yaŋɔɔ. Kɛ ma dii po ndɔɔ. Mɛɛ Chiisu dimi bundɛi hei, mbo chɔm nyɛ dimiŋ o Sam 118:​22 niŋndo. (Luku 20:​9-17) Mi Pitɛ, wana Chiisu vem hɔlte ndɔ wo soliŋ bolle Baabuile pilɛleŋ ndeŋ kpe kpeku mɛɛ o wa suɛi o Chuuwa “wanaa ndaa bɛnduaa, a laŋgbaa ndaa kalla, a wanaa pɛɛku waŋnda sawala Mɛlɛkalaŋ nda, a chuugiaŋ Chulusɛlɛm chiee” wa lo. Mbo suaa a “Chiisu Kiliti fula Naasaluɛiyo, o nda dii o yɔmndo choo, kɛ mi Mɛlɛka miŋgi ndu yoomu wo” okɔɔ. Okoŋ mbo dimi aa, “A Chiisu okɔɔ Yau Mɛlɛkaa dimi ni maa, pou nya wanaa taŋgulaa kɛɛ maa o niŋ te wo ndu simnuŋ niŋ pou kpeekpei saa taŋgullo wo ni.”—Walta Wanaa Chiisuaa 4:​5-11, NW; 3:​15; Pitɛ Tasoo 2:​5-7.

9. Suɛi kɛndɛ kuɛɛ dimiŋ yɛ o Sam 118:​22 niŋ?

⁹ A tonya, Sam 118:​22 soo a fulasɛiniŋ ndoo nɔ le yɔŋnɔŋndo le wɔsilaŋ hiouwɔɔ o kɛmɛlaŋ niŋndo. A wa Mɛsayanɔɔ kɛɛ nduyɛ mi ndaa dii ndu. Kɛ Mɛlɛka wa ndu vɛlɛ soli o sɛiyo niŋ nduyɛ mi ndoo simnuŋ pou saa taŋgullo wo. Mɛɛ Chiisu sɔla fulasɛiniŋndo, mbo simnuŋ waŋndo opilɛ kpe o sɔla diolaŋ “le mi ŋ sɔla pioŋɔɔ o ndu niŋ” ndo.—Walta Wanaa Chiisuaa 4:​12; Ɛfisiaŋnda 1:​20.

10. (a) Yɛɛ Sam 16:​10 ndoo soo yɛ? (b) Le yɛɛ naŋ nɔ yɛ miŋ laalaŋ maa o cho a Deeve okɔɔ le Sam 16:​10 soo le?

¹⁰ Ŋ yaasiaŋndɔ a bolle Baabuile cheleŋ soo a fulasɛiniŋndo okɔɔ wo. Mi fulasɛiniŋndo hoo yɔŋnuŋ le wɔsilaŋ hiouwɔɔ waa pilɛ chɔŋ a teleŋ nda soo a ndu okɔɔ wo. Hei nɔla mii ke naa tiindaŋndo maa fulasɛiniŋndo nɔla mbo yɔŋnuŋ o yɔŋ bɛɛ mbo viou. O Sam 16 niŋ, mi Deeve dimi aa, “Num Mɛlɛka a mel la mi lo o Sɛiyo niŋ te. A mel buɛi num cho num piɛiyo wo mbo lo o sooŋndo niŋ te.” (Sam 16:​10, NW) Deeve ve kindiŋ le  dimioo maa kposoŋ bɛɛ o vi niŋ mbo wa o Sɛiyo niŋ te le. Mi Diom Mɛlɛkaa dimi kpendekele maa mi Deeve yuuwa kudɛɛ nduyɛ mbo wu. Okoŋ, “ma chɔ ndu [nda finyaa nduaa mamaa, NW] o Deeve lo chiee.” (Masaa Bɛnduaa Tasiaa 2:​1, 10) A nɛɛ okɔɔ bolle Baabuileŋ ndeŋ le cho yɛ suɛi?

11. Teleŋ kuɛɛ Pitɛ ndoo tɛɛsiaa yɛ nyɛ Sam 16:​10 dimi wo?

¹¹ Le wɔsilaŋ hiouwɔɔ waa pilɛ chɔŋ a teleŋ Deeve poonyiaa diomndaŋ ndaŋ ndo, mi Pitɛ tɛɛsiaa wana Sam 16:​10 wa suɛi o ndu okɔɔ wo. Mɛɛ lɔɔla biŋgi hiou o piɔm Chiisoo kɔɔli a fulasɛiniŋ ndɔɔ, mi Pitɛ suaa o Chuuwa lo a wanaa ve ŋChuu le wa o waalaŋ niŋ. (Nuawɔ Walta Wanaa Chiisuaa 2:​29-32.) Mbo loonuŋ nda maa Deeve vi nduyɛ mbo sɔla kumbɔɔ. Baabuiyo dimi naa maa ma sɛɛŋgiaa nyɛ Pitɛ dimi wo le. Mbo dimi vɛlɛ pɛŋ maa mi Deeve dimi aa, “Mɛlɛka mel ndu, mbo wa o sɛiyo niŋ te wo, o wa mawaa suɛi waa lachi dimioo” a Mɛsaya okɔɔ.

12. Vɛɛ Sam 16:​10 ndoo peeluŋ yɛ? Nduyɛ vɛɛ keŋ chɔm yɛ maa fulasɛiniŋndo cho tonya?

¹² Mi Pitɛ soliŋ diomnda Deeve laŋ o Sam 110:​1 kpeku le nyɛ o wa dimioo wo tooloo. (Nuawɔ Walta Wanaa Chiisuaa 2:​33-35.) Mi Pitɛ soliŋ Diom Mɛlɛkaa kpeku le mi faŋga bɛndoo laalaŋ maa Chiisu Mɛlɛka “siiŋguu Masanɔɔ ni. Mbo siiŋguu ndu Kiliti” (Walta Wanaa Chiisuaa 2:​36) Mi waŋnda sina maa mi nyɛ Sam 16:​10 dimi wo peeluŋ mɛɛ Chiisu sɔla fulasɛiniŋndo. Okoŋ kɔɔli, mi Pɔɔl, wana Chiisu vem hɔlte ndɔ wo soliŋ nyɛ pilɛ kpe Pitɛ dimi wo kpeku teleŋ o soo o Chuuwa lo Aŋtiɔɔ chiee o Pisidiaa niŋndo. Mi hei pilaŋ nda kɔllo tau, nduyɛ ndaa yeema ma chɔɔlu tueiyɔɔ. (Nuawɔ Walta Wanaa Chiisuaa 13:​32-37, 42.) Naa bɛɛ, hei tosa miŋ laalaŋ maa sɔɔŋ Baabuiyo dimi muŋ a fulasɛiniŋndo okɔɔ o chilaŋ niŋndo wa tonya mi che bɛɛ miŋ peeluŋ mɛɛ wɔsioŋ o kɛmɛlaŋ niŋ hiou.

13. Nyunala kuɛɛ naŋ nyuna yɛ lepum a fulasɛiniŋndo okɔɔ?

¹³ I cho suɛi kɔl dɛɛniaa le sinaa maa fulasɛiniŋndo cho yɔŋnɔŋ o yɔŋ bɛɛ mbo chua wɔsioŋ o kɛmɛlaŋ niŋ chɔŋ a teleŋ Mɛlɛka dimi wo. Kɛ mi apum nyuna wɔ aa, ‘Koŋ sim ni maa I nɔ mi chum le teleŋ vilɛi le wana ni ya kaala wo chɔɔ? Teleŋ kuɛɛ fulasɛiniŋndo cho yɛ yɔŋnɔŋ?’ Mi Chiisu dimul wanaa o vem hɔlte ndɔ wa maa ndaa sina sɔɔŋ pum te, nduyɛ a ve muŋ sina le. Sɔɔŋ yiŋgoloŋ ndoŋ pum wa ‘a teleŋndaŋ kɛlɛŋgaa boondoŋ’ okɔɔ ŋ ‘Finya ndɔ ndu pilɛ kpe nɔ kpaayaa le ŋ waa lende kɛɛsiaa’ wo. (Walta Wanaa Chiisuaa 1:​6, 7; Chɔŋ 16:​12) Kɛ, ŋ nɔ konalaŋ lapum a teleŋ fulasɛiniŋndo cho yɔŋnɔŋndo.

14. Vɛɛ fulasɛiniŋ Chiisoo wa yɛ teŋgeŋ a wanaa cheleŋaa nda miŋgi yoomu ndu lachi wa?

¹⁴ Kona sɔvɛ sɔvɛ cho o Baabuiyo niŋ a fulasɛiniŋndo okɔɔ wo cho fulasɛiniŋ Chiisoo ni. Te Mɛlɛka ndoo soli ndu o sɛiyo niŋ te, naa kpou ve tiindaŋ nɔ le wanaa naa vi wa chɔɔ vɛlɛ le. Wanaa ndaa sɔla fulasɛiniŋndo Chiisu lachi wa, mɛɛ wanaa Ilaacha nda Ilaasia miŋgi yoomu wa cho naa yɛ lo achal lefafɛɛŋ te. Ma wu vɛlɛ nduyɛ ma simnuŋ puuloo o sɛiyo niŋ. Kɛ mi “Mɛlɛka miŋgi Kiliti yoomu.” O “vi lɛ kposoŋ te. Kpaaya o kpaaya piɔmndo o nɔ lɛ ndu choo le.” Chiisu cho achal o choo choo niŋ “le fɛɛŋ a  fɛɛŋ.”—Luomaŋnda 6:​9; Sɔɔŋ Chɔɔmaŋndoŋ 1:​5, 18; Kolosiaŋnda 1:​18; Pitɛ Tasoo 3:​18.

15. Le yɛɛ Baabuiyo dimi yɛ maa Chiisu “fɛɛŋ miiŋgu yoomu”?

¹⁵ Chiisu fɛŋ sɔla fulasɛiniŋndo o inyinaya le kɔlaŋ choo choo, nduyɛ ndu wa fulasɛiniŋ sɔvɛ sɔviɔɔ ni. (Walta Wanaa Chiisuaa 26:​23) Kɛ, o ve ko ndu pilɛ le sɔla fulasɛiniŋndo le kɔlaŋ choo choo le. Mi Chiisu mɛi lediom maa wanaa laalaŋaa o vem hɔlte ndɔ wa cho wa o masaleŋ choo o ndu latulu o choo choo niŋ. (Luku 22:​28-30) Kɛ a cho fandaa hoo sɔla te a vi pɛ. Nduyɛ maa Chiisu, a cho fulasɛiniŋndo sɔla a dialuŋ inyinayaŋ. Okoŋ, mi Pɔɔl dimi maa wanaa cheleŋnda cho miiŋgu yoomu nduyɛ ma kuɛ o choo choo niŋ. Mbo dimi aa, “Kɛ nduyɛ, muŋ kpou a miiŋgoo yoomu okɔɔ ŋ nɔ le yɔnuŋndo o nɛi kpɛ kpɛ mɛɛ ŋ nɔ le yɔnuŋndo yɛ. Kiliti fɛɛŋ miiŋgu yoomu. O koŋ kɔɔli, [“teleŋ Chiisu cho o masaleŋ choo wo,” NW] lɔɔ o cho vɛlɛ hunɔɔ wo, boondii keŋ wanaa laalaŋ a ndu wa, nda bɛɛ lende Mɛlɛka miŋgi niŋ nda yoomu ni.”—Kɔliŋtiaŋ Tasoo 15:​23.

16. Pemale yɛɛ naŋ sɔla yɛ a teleŋ fulasɛiniŋndo cho kandɔŋ le kɔlaŋ o choo choo niŋndo?

¹⁶ Diomnda Pɔɔl laŋ la pel naa pemaleŋ le sinaa teleŋ fulasɛiniŋndo le kɔlaŋ o choo choo niŋ cho yɔŋnɔŋndo. O cho yɔŋnɔŋ teleŋ Chiisu cho o masaleŋ choo wo. Le wɔsiŋ bɔɔbɔɔ niŋ, Seiyaa Chɛhowaa chɔm o Baabuiyo niŋ maa teleŋ Kiliti “cho o masaleŋ choo wo” kanduŋ o wɔsi 1914 niŋ. Ŋ cho wɔ o teleŋ o “cho o masaleŋ choo wo” niŋ, nduyɛ mɛɛlula chieeŋ dɛnɛ wɔɔŋndo hoo cho niŋ kpɛɛluŋ.

17, 18. Yɛɛ cho yɛ yɔŋnɔŋ a boondii Kiliti cho o masaleŋ choo wo?

¹⁷ Baabuiyo chɔɔlu tɛɛsiaa a fulasɛiniŋndo le kɔlaŋ o choo choo niŋ okɔɔ. “Ŋ hɛnaŋ mi la sina pɛŋgu te waŋndo vi pɛ nyɛ yɔnuŋ a ndu wo. . . . Ŋ laalaŋ kpeekpei maa mɛɛ Chiisu vi mi Mɛlɛka miŋgi ndu yoomu. Hei chɔm maa te Chiisu wa hunɔɔ pɛ, Mɛlɛka cho tosa mi wanaa dɔu tiindaŋndo o Mɛlɛka niŋ, kɛ mi nda aa wu wa, . . . maa naa ŋ lo niŋ yoomu mbo lo o koŋ mi Masanɔɔ . . . hiŋ nda, ŋ hiu niŋ wanaa laalaŋnda a vi wa lachi le. A boondii keŋ, Mɛlɛka pila cho isɔɔ choo choo kpeleŋ, . . . o koŋ, wanaa dɔu tiindaŋ ndaa o Mɛlɛka niŋ fɛɛŋ malaŋ nda wu wa, nda fɛɛŋ cho miiŋgu yoomu. Te a miiŋgu yoomu pɛ, naa ŋ cho wa yoomu boondii keŋ nda, Mɛlɛka tosa naa kpou ŋ chuuŋgiaŋ diom pilɛ choo choo le Masanɔɔ . . . bɔŋaa o halaa niŋ. Okoŋ kɔɔli, naa kpou mi ŋ wa latulu a Masanɔɔ . . . le fɛɛŋ a fɛɛŋ.”—Tɛsaloniaŋ Tasoo 4:​13-17.

¹⁸ Kɛlɛŋgaa mi fulasɛiniŋ tasoo kanduŋ mɛɛ teleŋ Kiliti chal o masaleŋ choo wo hiou. Kilisiɔŋaa pɔyaŋaa cho wa yoomu a teleŋ nyɛpalaa bɛndoo wa cho ‘chuuŋgiaŋ’ naapilɛ. (Maatiu 24:​31) Yɛɛ koŋ sim yɛ? Wanaa cho kaŋ ‘chuuŋgiaŋ’ nda “vi lɛ le.” Koŋ cho ni, a cho lo a vilɛi le teleŋ vilɛi le. Kɛ te a vi pɛ, ‘bulu nɔ le suɛi o mɛɛlulaŋ ndo cho isɔɔ. Te buloo soo pɛ, wanaa cho wa yoomu wa ni a wanaa vi niŋ nda . . . kpou cho maŋgalaŋ. O lepilɛ niŋ kpe i yɔnuŋ niŋ ni, mɛɛ waŋndo biaŋ nuaa yɛ.’—Kɔliŋtiaŋ Tasoo 15:​51, 52.

19. Fulasɛiniŋ kuɛɛ hiou yɛ bɛnda?

¹⁹ Hau, Kilisiɔŋaa bɔɔbɔɔ nɔ tiindaŋndo o Mɛlɛka niŋnda cho a pɔyaŋ te nduyɛ a hɛli nda le waa a Chiisu latulu o masaleŋ choo o choo choo niŋ te. Kɛ, a cho lehɔl o nɛi le “paale Masanɔɔ Mɛlɛka” cho chieeŋ dɛnɛ wɔɔŋndo hoo tɛɛmbuu wo. Wana o wana sina teleŋ  mɛɛlulaŋ ndaŋ la cho hunɔɔ wo le. Kɛ taamasilaŋ la chɔm maa paale leŋ le cho niŋ kpɛɛluŋ. (Tɛsaloniaŋ Tasoo 5:​1-3) Te chieeŋ sɛnɛi Mɛlɛkaa hiŋ pɛ, fulasɛiniŋ cheleŋ cho yɔŋnɔŋ. A teleŋ koŋ, waŋnda cho fulasɛiniŋndo sɔla le waa o lɛŋndeŋ choo, nduyɛ a cho tiindaŋndo nɔ le simnɔŋndo walaŋ a vi lɛ le. Fulasɛiniŋndo hoo cho wa o sɔvɛ mbo hiou wanaa ndaa sɔla fulasɛiniŋndo o sindɔɔ niŋ kɛ ma wu vɛlɛ okoŋ kɔɔli wo.—Hibuluiya 11:​35.

20. Le yɛɛ naŋ nɔ yɛ tiindaŋndo maa fulasɛiniŋndo cho wa o kɔɔnaa?

²⁰ Baabuiyo dimi maa fulasɛiniŋ wanaa cho lakɔ o choo choo niŋnda cho “yɔnuŋndo o nɛi kpɛ kpɛ mɛɛ ŋ nɔ le yɔnuŋndo yɛ.” (Kɔliŋtiaŋ Tasoo 15:​23) Lelaŋ, ŋ nɔ tiindaŋndo maa fulasɛiniŋndo o lɛŋndeŋ choo bɛɛ cho wa o kɔɔnaa. Kɛlɛŋgaa mi keŋ nyindu naa le nyunaa aa, baa wanaa laŋga wu wa cho fulasɛiniŋndo sɔla o Wɔsila Waa Pilɛ Kiliti Cho Wa o Masaleŋ Choo Laŋ kandɔŋndo, nduyɛ mi wanaa sina nda wa demul nda? Baa waŋpiaanduaa ndaa dɔu sindɛ tiindaŋndo o Mɛlɛka niŋ nduyɛ ma wa simlachiaa kɔl kaluaa wa cho ke-leŋa miiŋgu yoomu nduyɛ ma mala le wanaa Mɛlɛkaa kɔɔnaa o chieeŋ sɛnɛiyo niŋ? Yɛɛ cho yɛ yɔŋnɔŋ a wanaa ndaa piɛi Chɛhowa le wa? Teleŋ kuɛɛ nduyɛ kuɛɛnɛ nda cho yɛ fulasɛiniŋndo sɔla? Nyunalaŋ la cho tau a hei okɔɔ. Kɛ ŋ nɔ miŋ buulaŋ a sɔɔŋ muŋ okɔɔ suŋ suŋ te. O bɛnda miŋ chum le chɔɔ nyɛ cho yɔŋnɔŋndo. Ŋ nɔ tiindaŋndo maa ŋ cho kɔllo naŋɔɔ a mɛɛ Chɛhowa cho hunɔɔ sɔɔŋ tosa yɛ.

21. Yɛɛ cho yɛ tiindaŋ numndo?

²¹ Haaa mi teleŋ koŋ fuuluu, ŋ nɔ miŋ kindi tiindaŋ naa o Chɛhowa niŋ. O mɛi lediom a Chiisu sanaa maa o cho loonɔŋndo a waŋvilɛiya okɔɔ, nduyɛ maa a cho vɛlɛ miiŋgu yoomu. (Chɔŋ 5:​28, 29; 11:​23) Le chɔɔloo sinaa maa Chɛhowa cho waŋvilɛiya miŋgi yoomu, mi Chiisu dimi teleŋ pilɛ maa Ebilaham, Aase, a Chekɔpu maa “wanaa cho yoomu” o Mɛlɛka lo wa nda cho ni. (Luku 20:​37, 38) Ŋ che kpendekele maa ŋ nɔ sabula sɔvɛlaŋ le dimioo maa Pɔɔl, wana Chiisu vem hɔlte ndɔ wo. Mbo dimi maa o nɔ tiindaŋndo o Mɛlɛka niŋ maa “wana o wana vi a cho vɛlɛ miiŋgu yoomu.”—Walta Wanaa Chiisuaa 24:​15.