Wana che pɛ maa o cho laalaŋ koŋ te o wa kilaa le. Masa Nyinaa Wɔɔŋnda dimul Ifi naa maa te o de yɔm Mɛlɛka kuuna ndu dioo wo pɛ, dialloŋ ko cho wu ni, kɛ mi nyɛ cheleŋ ndu niŋ (o waŋnda veelu hau a nyinaa wo), ndu kɔ wa achal naa cheleŋ te. Kɛ nyɛ o dimul ndu teleŋ o soliŋ kɛuwo kpeku le suɛi o ndu lo wo wa ni maa, te o de pɛ komɔɔ yɔm koŋ ‘o vi niŋ kposoŋ te.’ Mbo dimul ndu choolaŋ maa hali mbo ve bɛɛ o ba Mɛlɛkaa bɛŋgu le, o cho wa achal lefafɛɛŋ nduyɛ mbo tuei yoomoo yeela o chieeŋndo hoo choo.—Chɛ. 2:​17; 3:​3-5.

Kɛ te o yɔŋ pɛ aa o cho o kpeloo Idɛŋ niŋ te laalaŋ lachoowaa hoo kilaŋ te, mɛɛ lɔɔ kuɛɛ o kilaŋ yɛ niŋ? Ŋ sina lɔɔ kpeekpei o kilaŋ ndo le. Nyɛ naŋ sina kinɛiyo cho ni maa, mi piɛiyii lachoowɛi wa o chieeŋndo choo ve sɔla tambei mɛɛ Mɛŋma Koŋgi Bɛnduaŋ ma hiŋ o palɛi Nuuwa ve niŋ. Mi laalaŋnda lachoowa waŋnda ndaa nɔ o teleŋ koŋ niŋ ndaŋ kpou la mɛɛlu, kanifuule, wanaa wa o piɛile tonyaleŋ niŋnda kinɛi sɔla pioŋɔɔ ni. Waŋnda haa wa yɛ Nuuwa a yuŋgu ndɔɔ ni.

Mɛɛ ŋ dimi maa laalaŋ waŋnda nɔ hau maa te wanachioo vi pɛ nyina ndɔɔ fulaŋ o kɔ wa achal naa cheleŋndo, kanduŋ mɛɛ Mɛŋma Koŋgi Bɛnduaŋ ma hiou. Mɛɛ Mɛlɛka laasiaa sɔɔŋ maŋgalaŋ wanaa wa taŋgullo chioo Babɛɛl la, “ma saŋnuŋ o chieeŋndo niŋ kpou.” Naapum waŋnda haa ndaa nɔ niŋ laalaŋndo maa wanachioo nɔ nyɛ vi le wo ndu niŋ nduyɛ, ma tiu dɔɔ laalaŋndo hoo naa nda saŋnuŋ nda kpou. (Chɛ. 11:​8, 9) O yɔŋ bɛɛ miŋ sina lɔɔ kpeekpei laalaŋ lachoowaa hoo kilaŋ ndo le, nyɛ naŋ sina wo cho ni maa wana “viam waŋnda choolaŋ dimioo” wo Setana, Masa Nyinaa Wɔɔŋnda tosa ni mbo kilaŋ. Nduyɛ, ndu nuuviaa nɛilaŋ ni mi laalaŋndo hoo pɛŋgɛlaŋ o chieeŋndo choo kpou.—Chɔŋ 8:​44.