BUŊGƐI PƐƐKƐI 51
Vɛɛ Kpɛ Ŋ Sina yɛ Chɛhowa?
“Mɛlɛka Yaawɛɛ, wanaa sina wana ŋ cho wo wa, tiindaŋndo nda duau o num niŋ ni. Wana o wana hiŋ naa num chua pɛ le malaa, a kɛɛ ndu le.”—SAM 9:10.
CHONDII 56 Siiŋguu Tonyaa Nyɛ Num
SƆƆŊ KULLOŊ O BUŊGƐI HEI NIŊ *
1-2. A mɛɛ naŋ che o taamasi Anchɛlito wo niŋ yɛ, yɛɛ naa kpou nɔ yɛ miŋ tosa?
BAA Seiyaa Chɛhowaa wanaa velu numnda cho ni? Te lende i cho ni, mɛɛ kɛsiŋ o kɔl maa a simnuŋ chaaŋ o Chɛhowa le mɛɛ nda cho Seiyaa Chɛhowaa yɛ le. O yɔŋ bɛɛ aa wanaa velu naa wa cho Chɛhowa piɛiyo ɔɔ a cho ndu piɛi le, naapila i cho kuee ni le chaŋyɛi kpɛɛluŋnde tosaa a ndu.
2 Yiyaŋndɔ a taamasi puaapilɛnɔ pilɛ diolaŋ aa Anchɛlito. Seiyaa Chɛhowaa yuŋgu ndɔɔ kpou cho ni. Kɛ teleŋ o wa o pɔmbɔ wo, ndoo nɔ chaŋyɛi kpɛɛluŋ a Mɛlɛka le. Mbo dimi aa, “I wa Chɛhowa piɛiyo kanifuule yaa yeema mi tosa nyɛ yuŋgu nuu wa tosaa wo.” Kɛ, mi Anchɛlito kɛɛsiaa le mbo chua teleŋndo tau le waa diomndaŋ veeloo o Baabuiyo niŋ vɛlɛ a yiyaŋndo lechoo. Nduyɛ teleŋ o teleŋ, mi ndoo piɛi niŋ tau o Chɛhowa lo. Yɛɛ wa yɛ fulamakɔɔlioo? Mi Anchɛlito dimi aa, “I che niŋ kɛsɛ maa le mi sɔɔŋguu Finya ni kaalaa Chɛhowa ikɛi, mɛɛ mi sina ndu a ba ni.” Taamaselii Anchɛlito wo tosa miŋ yiyaŋ a nyunala sɔvɛlaŋ lapum okɔɔ: Teŋgeŋ yɛɛ cho yɛ sɔɔŋ tiŋ sinaa a Chɛhowa okɔɔ tɛɛŋ a ndu sinaa nyɛkɛndɛi? Nduyɛ, yɛɛ naŋ nɔ yɛ miŋ tosa le Chɛhowa sinaa nyɛkɛndɛi?
3. Teŋgeŋ yɛɛ cho yɛ sɔɔŋ tiŋ sinaa a Chɛhowa okɔɔ tɛɛŋ a ndu sinaa nyɛkɛndɛi?
3 Naapum, miŋ yiyaŋ maa ŋ sina Chɛhowa nyɛkɛndɛi le mɛɛ naŋ sina diola ndɔlaŋ ɔɔ sɔɔŋ o dimi niŋ paandu mbo tosa woŋ
yɛ. Kɛ o cho ko sɔɔŋ muŋ sinaa le chɔm maa ŋ sina Chɛhowa le. Ŋ nɔ miŋ chua teleŋndo le pɛɛkoo a Chɛhowa okɔɔ nduyɛ miŋ sina suliŋnda ndɔlaŋ. Hei kinɛi tosa ni miŋ sina nyɛ nyindu ndu le dimioo ɔɔ tosaa sɔɔŋ pum ndo. Hei mala naa vɛlɛ le sinaa te Chɛhowa hini pɛ kɔl a yiyaŋnda naalaŋ, kɛɛsiaala naalaŋ, vɛlɛ a sɔɔŋ naŋ tosa woŋ. Te ŋ pɛɛku pɛ a Chɛhowa okɔɔ miŋ sina nyɛ o yeema naa miŋ tosa wo, ŋ nɔ miŋ tosa nyɛ o hɛnaŋndo.4. Vɛɛ taamaseliila naŋ pɛɛku o Baabuiyo niŋndaŋ la mala yɛ naa?
4 Mi waŋnda apum mam naa le mɛɛ naŋ yeema Chɛhowa piɛiyo yɛ. Nduyɛ te ŋ kandu pɛ kɔlaŋ o bɔŋaŋndaŋ, ma kindiŋ pɛŋ le naa kuunaa. Kɛ te ŋ dɔu pɛ tiindaŋndo o Chɛhowa niŋ, fɛŋ bɛɛ o mel naa le. Kɔlaŋ o bɔŋaŋndaŋ mala naa ni miŋ kandu chaŋyɛi wa niŋ lefafɛɛŋnde kilaa a Chɛhowa. Baa ŋ tiu pa ba miŋ nɔ chaŋyɛi waa lende a Chɛhowa? Ei, ŋ tiuba! Taamaseliila wanaa lahakiaa mɛɛ Muuse a Masaa Deeve cho naa yɛ chɔm kɛsɛ maa ŋ tiuba. Te ŋ pɛɛku pɛ a sɔɔŋ nda tosa woŋ okɔɔ, ŋ cho mulioo sɔla le nyunalaŋ latiɔɔŋ: Vɛɛ nda looku yɛ Chɛhowa sina? Nduyɛ yɛɛ naŋ pɛɛku yɛ o taamaseliila ndalaŋ niŋ?
MI MUUSE CHA “MƐLƐKA, O ŊWAŊNDA CHIEE A CHO HOO CHƆ LE WO”
5. Yɛɛ Muuse ndoo kɛɛsiaa yɛ le tosaa?
5 Mi Muuse kɛɛsiaa le Mɛlɛka piɛiyo. Mɛɛ Muuse fuuluu wɔsilaŋ 40, mbo kɛɛsiaa le wanaa Mɛlɛkaa, Hibuluiya holnɔŋndo. Mbo kɛɛ le ma veelu ndu aa, “Masaa Ichipi, po chua ndɔɔ.” (Hibu. 11:24) Mi Muuse kɛɛ foofo bɛndoo. Muuse ndoo sina maa Felo cho dɔunɔŋ tumbe tau te o holnuŋ pɛ Isɔluɛiyaa wa o chɛleŋ niŋ Ichipi wa. Masa kpaaya bɛndoo pila Felo wa ni nduyɛ, mi Ichipiaŋnda chua ndu pɛŋ maa mɛlɛka. Nyɛ Muuse tosa koŋ ndo chɔm ni kɛsɛ maa ndoo nɔ tiindaŋndo! Tiindaŋndo hoo tosa ni mbo lo o chaŋyɛi kpɛɛluŋnde niŋ a Chɛhowa haaa a yoomu ndɔɔ mɛɛlulaŋ.—Pulɔ. 3:5
6. Yɛɛ naŋ pɛɛku yɛ o taamasi Muuse wo niŋ?
6 Yɛɛ naŋ pɛɛku yɛ o hei niŋ? Maa Muuse, naa kpou nɔ kɛɛsiaa le tosaa. Baa ŋ cho pa kɛɛsiaa le Mɛlɛka piɛiyo nduyɛ miŋ holnuŋ wanaa nduaa? Naapum, mɛɛ miŋ soliŋ sala le Mɛlɛka piɛiyo. Nduyɛ le hei, mi wanaa sina Chɛhowa le wa tusi naa nyɛpalaa choo. Kɛ te ŋ tiindaŋ pɛ Finya naa cho o choo choo niŋndo, nyɛ o nyɛ hiiluu naa le!
7-8. Yɛɛ Muuse ndoo hiou yɛ lachi a pɛɛkoo?
7 Mi Muuse hiau lachi a pɛɛkoo a suliŋnda Chɛhowalaŋ okɔɔ, nduyɛ mbo tosa hɛnaŋ ndɔɔ. Le taamaseliiyo, mɛɛ Chɛhowa dimul Muuse le mbo kɔ soli Isɔluɛiya Ichipi, ndoo nɔ tiindaŋ te, nduyɛ mbo dimul Chɛhowa maa o suliŋ te. Mi Mɛlɛka chɔm Muuse nyiɛɛye a mɛɛ o mulul ndu yɛ, nduyɛ mbo mala ndu. (Ɛsɔ. 4:10-16) Fulamakɔɔlioo wa ni, mi Muuse tiuba le simndaŋ Felo lachi le ndu yooŋgu Mɛlɛkaa dimullo. Mi Muuse cha mɛɛ Chɛhowa soliŋ kpaaya ndɔɔ kpeku le Isɔluɛiya piŋioo yɛ, kɛ mbo dii Felo a puaa nduaa chɔuwa o Pee Mɛŋma Siaŋaa niŋ.—Ɛsɔ. 14:26-31; Sam 136:15.
8 Mɛɛ Muuse soli Isɔluɛiya o chɛleŋ niŋ Ichipi, a wa ŋɔɔchiaŋndo teleŋ o teleŋ. A teleŋ koŋ bɛɛ, mi Muuse cha mɛɛ kpɛ Chɛhowa biunuŋ wanaa nduaa o soli o chɛleŋ niŋnda yɛ. (Sam 78:40-43) Mi Muuse cha vɛlɛ maa Chɛhowa cho wana tusiaŋ a teleŋ o nyɔɔlu ndu maa o tɛɛmbuu Isɔluɛiya le wo.—Ɛsɔ. 32:9-14.
9. Vɛɛ Hibuluiya 11:27 chɔm yɛ maa Muuse ndoo nɔ chaŋyɛi kpɛɛluŋnde a Chɛhowa?
9 Mi Muuse chɔɔlu chaŋyɛi kpɛɛluŋnde nɔ a Chɛhowa mɛɛ o fula a Isɔluɛiya o chɛleŋ niŋ Ichipi. Mii yɔŋnuŋ naŋ chaa o wa Finya Hibuluiya 11:27.) Baabuiyo chɔm mɛɛ kpɛ Muuse ndoo nɔ chaŋyɛi kpɛɛluŋnde a Chɛhowa yɛ mɛɛ o dimi aa: “Mɛlɛka Yaawɛɛ ndu oo wa suɛi naa Muuse chua pɛ, suɛi naa ndu chua mɛɛ waŋndo suaa nuaa naa chaaŋndɔ chua, ma wa chanaŋndo hɔlla a hɔlla yɛ.”—Ɛsɔ. 33:11.
ndɔ cho o choo choo niŋndo chɔɔ. (Nuawɔ10. Le Chɛhowa sinaa nyɛkɛndɛi, yɛɛ naŋ nɔ yɛ miŋ tosa?
10 Yɛɛ naŋ pɛɛku yɛ o hei niŋ? Le miŋ sina Chɛhowa nyɛkɛndɛi, ŋ nɔ ko miŋ pɛɛku a suliŋnda ndɔlaŋ okɔɔ le, kɛ ŋ nɔ vɛlɛ miŋ tosa hɛnaŋ ndɔɔ. Hɛnaŋ Chɛhowaa hau cho ni, le mi “waŋnda kpou a sɔla pioŋɔɔ, nduyɛ, ma sina tonya cho a ndu okɔɔ wo.” (1 Timo. 2:3, 4) Nɛiyo opilɛ o naŋ tosa hɛnaŋ Mɛlɛkaa wo cho waŋnda pɛɛkoo a ndu okɔɔ ni.
11. Te ŋ wa pɛ waŋnda pɛɛkoo a Chɛhowa okɔɔ, vɛɛ naŋ sina yɛ ndu nyɛkɛndɛi?
11 Teleŋnda bɔɔbɔɔ, acheleŋnda pɛɛkoo a Chɛhowa okɔɔ mala naa ni miŋ chɔɔlu ndu sina nyɛkɛndɛi. Le taamaseliiyo, miŋ che nyɛiyii Chɛhowa nɔ le waŋnda ve te o mala naa pɛ miŋ saaluŋ wanaa yeema ma simnuŋ chaaŋaa nduaa wa. (Chɔŋ 6:44; Walta. 13:48) Miŋ che vɛlɛ maa Diom Mɛlɛkaa nɔ kpaayaa te ŋ che pɛ wanaa naŋ pɛɛku Baabuiyo wa kaala ndala wɔɔŋndaŋ malɔɔ okoŋ ma wounuŋ wana chieeyɛi sɛnɛiye. (Kolo. 3:9, 10) Nduyɛ, miŋ che vɛlɛ biuwɔŋ Mɛlɛka nɔ le wanaa cho o tanda naa niŋnda kanifuule, mbo yɔŋ naa o nda lo lɔɔlɔɔ le nda malaa ma pɛɛku a ndu okɔɔ le ma huŋ sɔla pioŋɔɔ.—Luomaŋ. 10:13-15.
12. A mɛɛ Ɛsɔdɔɔ 33:13 dimi yɛ, yɛɛ Muuse ndoo nyuna yɛ Chɛhowa le ndu, nduyɛ le yɛɛ?
12 Muuse pisul a chaŋyɛi ndoo nɔ a Chɛhowa ve le. Mi che bɛɛ mi Chɛhowa soliŋ ndu kpeku le kaamalaŋ tosaa tau, kɛ mi Muuse nyuna vɛlɛ ndu le mbo chɔɔmuŋ ndu. (Nuawɔ Ɛsɔdɔɔ 33:13.) Muuse ndoo hiou niŋ wɔsilaŋ 80 a teleŋ o nyuna Chɛhowa le heiyo. Ndoo sina maa o nɔ wɔ mbo pɛɛku tau a Finya ndɔ cho o choo choo niŋndo okɔɔ.
13. Ɔɔ nɛiyo opilɛ o naŋ chɔm maa ŋ che chaŋyɛi nɛi a Mɛlɛka i sɔvɛ wo?
13 Yɛɛ naŋ pɛɛku yɛ o hei niŋ? Mɛɛ mɛɛ naŋ viou niŋ Chɛhowa piɛiyo, ŋ nɔ miŋ pisul a chaŋyɛi naŋ nɔ a ndu ve le. Nɛila naŋ chɔm maa ŋ che chaŋyɛi nɛi a Mɛlɛka i sɔvɛ wo opilɛ cho suɛi o ndu lo o piɛileŋ niŋ ni.
14. Le yɛɛ piɛileŋ le mala yɛ naa miŋ chɔɔlu Mɛlɛka sina tau?
14 Suukaŋ kɛndɔɔ tosa mi chaŋyɛi kpɛɛluŋnde wa waŋnda tɛɛŋ. Lelaŋ, wa piɛileŋ lɔɔlɔɔ o Mɛlɛka lo le ma sɔɔŋguu ndu ikɛi. Siooŋii wa num le ndu yiyaŋnda numndaŋ chɔmndo le. (Ɛfi. 6:18) Mi Kilista cho o lɛŋnde Tɔkileŋ niŋndo dimi aa: “Teleŋ o teleŋ ya chɔm pɛ Chɛhowa yiyaŋ nuu o piɛileŋ niŋ nduyɛ mbo mala ya, mi chɔɔlu ndu kaala nduyɛ mi chɔɔlu tiindaŋndo nɔ o ndu niŋ. Te I che pɛ mɛɛ Chɛhowa muli piɛile nileŋ yɛ, mi keŋ mala ya mi che ndu maa Finya nuu a Chaaŋ nuu o cho ni.”
WANA CHƐHOWA NDOO HINI KƆL A NDU WO
15. Yɛɛ Chɛhowa ndoo dimi yɛ a Masaa Deeve okɔɔ?
15 O kaale wa le yɔŋgaŋ o Chɛhowa Mɛlɛka lo leŋ niŋ Masaa Deeve ndoo veluŋ ni. Kɛ o cho le mɛɛ yuŋgu ndɔɔ wa Mɛlɛka piɛiyo yɛ le ndu bɛɛ piɛi ndu le. Mbo taŋgul chaŋyɛi nduɛi a Chɛhowa nduyɛ mi Chɛhowa kaala ndu tau. Mi Chɛhowa pila dimi maa Deeve “cho wana [o] hini kɔl lo ni.” (Walta. 13:22) Vɛɛ Deeve looku yɛ chaŋyɛi kpɛɛluŋnde taŋgul a Chɛhowa?
16. Yɛɛ Deeve pɛɛku yɛ a Chɛhowa okɔɔ mɛɛ o mɛɛndaŋ nyɛm o toosiaa woŋ?
16 Mi nyɛm Chɛhowa toosiaa woŋ mala Deeve le pɛɛkoo a ndu okɔɔ. Teleŋ Deeve wa o pɔmbɔ wo, yondoo niŋ ndoo wa teleŋnda Sam 19:1, 2) Mɛɛ Deeve yiyaŋ a mɛɛ Chɛhowa toosiaa waŋchieeyaa o nɛi kɔndɔfili niŋ yɛ okɔɔ, mbo cha mɛɛ kpɛ Chɛhowa nɔ taasioo yɛ. (Sam 139:14) Mɛɛ Deeve yiyaŋ a nyɛm Chɛhowa toosiaa woŋ okɔɔ, mbo sina maa wana pɔmbuii naa o cho Chɛhowa o hɔl ni.—Sam 139:6.
bɔɔbɔɔ ni le saa finya ndɔ wa mandaa. Naapum a teleŋnda laŋ o kandu yiyaŋndo a nyɛm Chɛhowa toosiaa woŋ okɔɔ ni. Le taamaseliiyo, kɛlɛŋgaa te Deeve ndoo mɛɛndaŋ pɛ halaa ichɔl, o cho ko looŋ te ndoo cha o waalaŋ niŋ te. Kɛ mi ndoo yiyaŋ dɔɔ vɛlɛ a suliŋnda wana toosiaa muŋ ndo. Mi hei nyindu Deeve le poonyiaa aa: “Halaa o chɔm kɔndɔfiliyɛi Mɛlɛkɛi, o cho dimioo a walta Mɛlɛka tosa a bala ndɔlaŋ ndaŋ okɔɔ.” (17. Yɛɛ cho yɛ yɔŋnɔŋ te ŋ yiyaŋ pɛ a nyɛm Chɛhowa toosiaa woŋ okɔɔ?
17 Yɛɛ naŋ pɛɛku yɛ o hei niŋ? Nɔ yeemɛi o nyɛm Chɛhowa toosiaa woŋ niŋ. Te a chua pɛ teleŋndo le mɛɛndaŋndo chieeŋ sɔvɛ Chɛhowa toosiaa hoo wo, kɔndɔfillo cho num biyɔɔ! Lepaa o lepaa, wa yiyaŋndo a nyɛm Chɛhowa toosiaa miŋ wa num ikɛiyoŋ okɔɔ mɛɛ yɔmnde, visiaa, a waŋchieeya cho naa yɛ. Muŋ kpou nɔla miŋ pɛɛku num tau a Chɛhowa okɔɔ. Te a tosa hei pɛ, a cho nɔ sɔɔŋ tau le pɛɛkoo a Finya num kaalaa okɔɔ lepaa o lepaa. (Luomaŋ. 1:20) Nduyɛ, keŋ tosa mi kaala ŋ nɔ le ndu wo chɔɔluŋ.
18. A mɛɛ Sam 18 dimi yɛ, yɛɛ Deeve ndoo sina yɛ?
18 Mi Deeve sina maa Chɛhowa wa ndu malaa ni. Le taamaseliiyo, mɛɛ Deeve kiindiaa saa finya ndɔ wa a teleŋ kpɔkuŋndo a sulukoo hiŋ nda biyɔɔ wo, mbo sina maa Chɛhowa mala ndu ni mbo nɔla visiaa biyaa haa diyɔɔ. Mɛɛ Deeve yem kuubanɔ chɔu bɛndoo Koolaya, mbo sina vɛlɛ kɛsɛ maa Chɛhowa wa ndu mandaa ni. (1 Saam. 17:37) Mɛɛ Deeve hɛluŋ vɛlɛ Masaa Sɔɔ a teleŋ o wa ndu nuuviaa le ndu diyɔɔ wo, o hei niŋ bɛɛ, mbo sina maa Chɛhowa piŋi ndu ni. (Sam 18, tofa poonyiaa cho o bolle Baabuileŋ choo wo) Mi wana heelaŋndo lisaŋ tau te o sɔla pɛ batiuwaa waa naa o yoomoo niŋ. Kɛ o cho wana heelaŋ te Deeve wa le. Mbo sina maa Chɛhowa wa ndu lɔɔlɔɔ kɔɔli ni.—Sam 138:6.
19. Yɛɛ naŋ pɛɛku yɛ o taamasi Deeve wo niŋ?
19 Yɛɛ naŋ pɛɛku yɛ o hei niŋ? O cho ko nyunaa le naŋ nɔ miŋ nyuna Chɛhowa le malaa le. Kɛ ŋ nɔ miŋ sina teleŋ o mala naa wo a mɛɛ kpɛ o mala naa niŋ yɛ. Te ŋ wa pɛ wanaa tusiaŋ, ŋ cho sina maa o cho sɔɔŋ kpou le naŋ tiuba le tosaa a banaa le, nduyɛ maa Chɛhowa mala naa ni miŋ tosa o naŋ tiuba le wo. Nduyɛ teleŋ o teleŋ naŋ che pɛ mɛɛ Chɛhowa mala naa yɛ, koŋ tosa mi chaŋyɛi nɛi naa ndaa chɔɔlu kalu poŋ. Mi Aase, puaapilɛnɔ cho niŋ Chɛhowa piɛiyo le wɔsila bɔɔbɔɔ o lɛŋnde Fichileŋ niŋndo cha maa hei cho tonya. Mbo dimi aa: “Te I yiyaŋ pɛ a mɛɛ yoomu nuu wa paandu yɛ, mi sina kɛsɛ maa Chɛhowa mala ya bɔɔ chɔŋ a teleŋ ya kandu Baabuiyo pɛɛkoo wo mbo huŋ bii a hau. Lelaŋ, Chɛhowa cho bɔɔ wana sɔvɛ o yoomu nuu niŋ.”
20. Yɛɛ naŋ pɛɛku yɛ o chaŋyɛi wa Deeve tɛɛŋ nda Chɛhowa ve niŋ?
20 Mi Deeve chua suliŋnda Chɛhowalaŋ. Le mɛɛ Chɛhowa toosiaa naa o velaŋ ndɔɔ niŋ yɛ, ŋ nɔla miŋ chua suliŋnda ndɔlaŋ. (Chɛ. 1:26) Mɛɛ naŋ pɛɛku fau a suliŋnda Chɛhowalaŋ okɔɔ, lende koni naŋ hiau lachi a taamasi ndɔɔ tolɔɔ kɔɔli ni. Sina Deeve sina Finya ndɔ kaalaa cho o choo choo niŋ nyɛkɛndɛiyo mala ndu ni le taamasi ndɔɔ tolɔɔ kɔɔli le acheleŋnda chaa biyɔɔ. Ŋ tofaŋndɔ taamaseliiyo opilɛ. Mi Deeve tosa hakioo a Chɛhowa mɛɛ o suunda a Baasiɛba nduyɛ mbo tosa ma dii pɔnɔ ndɔ. (2 Saam. 11:1-4, 15) Kɛ mi Chɛhowa chɔm Deeve nyiɛɛye le mɛɛ ndu bɛɛ ndoo chɔm acheleŋnda nyiɛɛye yɛ. Le mɛɛ Deeve ndoo nɔ chaŋyɛi kɛndɛi a Chɛhowa yɛ, mi Isɔluɛiya kaala ndu tau nduyɛ, mi Chɛhowa soliŋ ndu kpeku maa taamasi le suɛi a masaa kɛndiaa keeku o Isɔluɛi niŋnda okɔɔ.—1 Masaa. 15:11; 2 Masaa. 14:1-3.
21. A mɛɛ Ɛfisiaŋnda 4:24 a 5:1 dimi yɛ, yɛɛ wa yɛ fulamakɔɔlioo te ŋ ‘chua pɛ kaala Mɛlɛkalaŋ’?
21 Yɛɛ naŋ pɛɛku yɛ o hei niŋ? Ŋ nɔ miŋ ‘chua kaala Mɛlɛkalaŋ.’ Te ŋ chua pɛ kaala Mɛlɛkalaŋ, o cho ko tɔnɔɔ le naŋ cho sɔla le kɛ keŋ mala naa miŋ pɛɛku tau a ndu okɔɔ. Te o yɔŋ pɛ miŋ chua suliŋnda Mɛlɛkalaŋ, mɛɛ koŋ cho chɔm kɛsɛ maa chuauwaa nduaa naŋ cho ni.—Nuawɔ Ɛfisiaŋnda 4:24; 5:1.
KINDIŊ MA SINA CHƐHOWA NYƐKƐNDƐI
22-23. Yɛɛ cho yɛ yɔŋnɔŋ te ŋ dɔu pɛ nyɛ naŋ sina a Chɛhowa okɔɔ wo o wali niŋ?
22 A mɛɛ naŋ yaasiaa yɛ, ŋ nɔla miŋ sina Chɛhowa nyɛkɛndɛi te ŋ wa pɛ nyɛm o toosiaa woŋ mɛɛndaŋndo nduyɛ miŋ wa Baabuiyo pɛɛkoo. Taamaseliila wanaa piɛi Mɛlɛka o laalaŋndo choo wa mɛɛ Muuse a Deeve cho naa yɛ, la cho tau o Baabuiyo niŋ. Ŋ nɔla miŋ tol taamasi waŋnda haa kɔɔli. Chɛhowa chii kpeŋgii nduɛi tosa. Naa bɛɛ nɔ miŋ tosa kumbui nɛi le miŋ yɔŋguŋ a kɔl naa kpou le pɛɛkoo a ndu okɔɔ.
23 Fɛŋ bɛɛ ŋ nɔla miŋ chii sɔɔŋ cho a Chɛhowa okɔɔ woŋ sina le. (Ikili. 3:11) Kɛ o cho mɛɛ kpɛ naŋ sina a ndu okɔɔ yɛ le cho suɛi sɔvɛ le, kɛ mɛɛ kpɛ naŋ cho nyɛ naŋ sina a ndu okɔɔ wo dɔwɔɔ o wali niŋ yɛ. Te ŋ dɔu pɛ nyɛ naŋ sina a ndu okɔɔ wo o wali niŋ nduyɛ miŋ kindiŋ le taamasi Finya naa kaalaa tolɔɔ kɔɔli, o cho hiouwɔɔ lachi a naa sɔɔŋguu wo ikɛi kpɛɛluŋ. (Chemi. 4:8) O dimul naa o Diom ndɔɔ niŋ maa fɛŋ bɛɛ o feŋaŋ wanaa cho kindiŋndo le ndu sinaa nyɛkɛndɛiya kɔɔli le.
CHONDII 80 Tofa Ma Che Mɛɛ Chɛhowa Cho Wana Kɛndɛ Yɛ
^ pɛl. 5 Wanaa bɔɔbɔɔ laalaŋ kɛsɛ maa Mɛlɛka cho, kɛ a sina kpeekpei wana suu o cho wo le. Yɛɛ Chɛhowa sinaa sim yɛ, nduyɛ yɛɛ naŋ pɛɛku yɛ o taamasi Muuse nda Masaa Deeve wo niŋ a nyɛ naŋ nɔ miŋ tosa le chaŋyɛi kpɛɛluŋnde nɔɔ a Chɛhowa wo okɔɔ? Buŋgɛi hei cho nyunalaŋ ndaŋ muli.