Baa ma veelu pa diomndaŋ nyɛkɛndɛi o buŋgaŋ Bandu Mɛŋgɛlaa niŋ le wɔsioo hoo? Te lende i cho ni, mɛɛ kindiŋ ndɔ le nyunalaŋ ndaŋ mulioo:

Chemisi 5:​11 dimi maa, “wana inyiɛɛyo a wana ikɛndɔɔ Chɛhowa cho ni.” Tiindaŋ yɛɛ hei ke yɛ naa?

Ŋ sina maa le mɛɛ Chɛhowa cho wana inyiɛɛ yɛ o mal naa haki ni. Chemisi 5:​11 ke naa tiindaŋndo maa Chɛhowa cho vɛlɛ o bɛɛndiaŋ le naa mala naŋ yeema wo kioo. Le hei, ŋ nɔ miŋ tol tamasi ndɔɔ kɔɔli.—w21.01, peele 21.

Le yɛɛ Chɛhowa tosa yɛ kɛɛsiaa le mi waŋnda apum wa chilaŋ chuaa?

Le mɛɛ o kaala naa yɛ o tosa kɛɛsiaa hoo ni. Kɛɛsiaa hoo tosa mi wanaa cho o yuŋgu ndɔɔ niŋnda wa o kɔl nyulu niŋ, nduyɛ sɔɔŋ ve laasi laasi le. Te wana o wana cho o yuŋgoo niŋ tol pɛ kɛɛsiaa Chɛhowa tosa a yuŋgoo okɔɔ wo kɔɔli, keŋ mala nda ma sina wana nɔ mbo tosa kɛɛsiaa mɛɛlaa o yuŋgoo niŋ, nduyɛ mbo sim kɛɛsiaa koŋ lachi le mbo tosaŋndo.—w21.02, peele 3.

Le yɛɛ Kilisiɔŋnda nɔ yɛ ma mandaŋ te a wa pɛ nyɛm mapuuloŋ soliŋndo kpeku le yooŋgulaŋ yɔŋndo?

Te Kilisiɔŋnɔɔ wa pɛ nyɛm mapuuloŋ soliŋndo kpeku le yooŋgulaŋ yɔŋndo, o nɔ mbo mandaŋ a chaŋyaŋ suu o hɛli woŋ. Mi hei wa ikala te o yɔŋ pɛ mi chaŋyaŋ ndɔŋ kila kundaa o intanɛtiiyo choo a waŋnda tau leniŋ. (1 Timo. 5:​13) Kpundɛ cheleŋ cho vɛlɛ le nɛiyo hoo soliŋndo kpeku wo cho ni, mi waŋnda apum soliŋ nyɔɔŋ muŋ kpeku le choolaŋ pɛŋgɛlaa a le puaapiliaa a ndepiliaa ndaa nyɔɔŋ piondɔɔ o ba vɛlɛ a le pisioo.—w21.03, peele 31.

Ɔɔ sabulaŋ latiŋ la Mɛlɛka chɛl mi Chiisu saŋga, nduyɛ mbo sɔla piɔmndo wo?

Sabu tasoo cho ni, le mi Chiisu ndoo soli Chuuwa o sendi nda wa wo bɛŋgu. (Kalee. 3:​10, 13) O diiŋ ndɔɔ, pɛɛkoo Chɛhowa wa ndu ni le mbo huŋ simnuŋ Masa Wanaa Soliaa Lasalaa o chilaŋ niŋ. O yaa ndɔɔ, mi Chiisu lo o laalaŋ ndɔɔ choo haaa mbo sɔla piɔmndo, nduyɛ mi keŋ chɔm maa waŋnda chieeya tiuba ma lo o laalaŋ ndaa choo o yɔŋ bɛɛ mi tɔɔndaŋ kala kalaa komal nda. (Choobu 1:​9-11)—w21.04, peele 16-17.

Yɛɛ ŋ nɔ yɛ ma tosa te a wa pɛ yooŋgu kɛndɔɔ dimioo o tanda i wa ikala le waŋnda komallo o la ndalo bɛɛ wo niŋ?

A kindiŋ le ma miiŋgu o ndalo a teleŋnda nda wa o la ndalo bɛɛ wo. A kindiŋ vɛlɛ le ma siŋga fondaŋnda ŋ dimi yooŋgu kɛndɔɔ laŋ, nduyɛ ma soliŋ nɛila cheleŋ kpeku mɛɛ yaulaŋ poonyiaa cho nuaa yɛ.—w21.05, peele 15-16.

Yɛɛ Pɔɔl ndoo yiyaŋ yɛ mɛɛ o dimi aa: “O sabu sawaa niŋ, mi sɔla piɔmndo le sawaa”? (Kalee. 2:​19)

Mi sawala Mɛlɛka ndoo ke Muuselaŋ la chɔɔmuu yɔŋnda wɔɔŋnda waŋnda chieeya, nduyɛ mi la mala mi Isɔluɛiya sina Kiliti. (Kalee. 3:​19, 24) Mi hei tosa mi Pɔɔl chɛl tonya o tuei a Kiliti okɔɔ wo. Nduyɛ mi keŋ tosa mbo “sɔla piɔmndo le sawaa.” Hei sim maa, o ve lɛ o sawala laŋ bɛŋgu le.—w21.06, peele 31.

Vɛɛ Chɛhowa kɛsullɛ naa tamaseliiyo te o hiŋ pɛ a biuwɔŋndo okɔɔ?

Chɛhowa biunuŋ niŋ tɔɔ wɔɔŋ cho o diola ndɔlaŋ choo wo, di o nɔ le waa masa wo simullo, simul chuauwaa nduaa apum simul ndu wo, choola Setana cho hiouwɔɔ lachi a dimioo laŋ, saŋga buɛiyaa nduaa o kaala wa cho hau niŋndo, te chaaŋaa nduaa o kaala wa vi pɛ, nyɛpalaa wanaa dɛnɛ wɔɔŋnda cho waŋnda tusioo choo wo, a tɛɛmbuu waŋnda chieeya cho chieeŋndo wo.—w21.07, peele 9-12.

Tamasi kɛndɛ kuɛɛ Choosɛ kɛsullɛ naa te o hiŋ pɛ a biuwɔŋndo okɔɔ?

Mi che bɛɛ mi bɛndaa nduaa bii ndu biyɔɔ wɔɔŋndo, kɛ mbo biunuŋ. Mi nyɛ bɛndaa nduaa tosa wo tosa ma nyiinduu ndu choolaŋ choo, nduyɛ ma duau ndu o chiɛi manyumndo niŋ Ichipi le wɔsiŋ bɔɔbɔɔ.—w21.08, peele 12.

A hiiluu suu kuɛɛ okɔɔ Hakai 2:​6-9, 20-22 soo yɛ?

Mi che bɛɛ mi wanaa bɔɔbɔɔ kɛɛ yooŋgu kɛndɛ naŋ dimul nda wo nilaŋ yaŋɔɔ, kɛ mi apum yaŋ naa nilaŋ nduyɛ ma hiŋ o tonyaa niŋ. O teleŋ biŋgi bɛŋgu, Chɛhowa cho lɛŋnde kpou hiiluu a teleŋ o cho hunɔɔ chieeŋndo tɛɛmbuu wo.—w21.09, peele 15-19.

Le yɛɛ ŋ nɔ miŋ vi ŋdial le yooŋgu kɛndɔɔ dimioo le?

Mi Chɛhowa che sɛmbɛ naŋ duau le yooŋgu kɛndɔɔ dimioo wo, nduyɛ mi keŋ nɛŋi ndu kɔllo. Te ŋ vi ŋdial te, ŋ cho yoomu fafɛɛŋndo sɔla.—w21.10, peele 25-26.

Vɛɛ Lɛvitikɔɔ 19 mala yɛ naa miŋ dɔu silaa hoo o wali niŋ: “Nya bɛɛ nɔ mi la wa a diandaa o kaala nyalaŋ niŋ”? (1 Pitɛ 1:​15)

Naapum nyɛ dimiŋ o bolle Baabuileŋ niŋndo fula o Lɛvitikɔɔ 19:​2 niŋ. Nduyɛ Lɛvitikɔɔ 19 chɔm naa tamasila bɔɔbɔɔ, la mala naa miŋ dɔu nyɛ 1 Pitɛ 1:​15 dimi wo o wali niŋ lepaa o lepaa wo.—w21.12, peele 3-4.