1-2. (a) Yɛɛ Mɛlɛka ndoo dimullɛ kiilaa Chiisu wa a yaa le ma tosa, nduyɛ yɛɛ nda tosa yɛ? (b) Yɛɛ naŋ cho yɛ yaasiaa o buŋgɛi hei niŋ?

MƐƐ nda chii Nyɛdiaa Hiouwɔɔ Choo Wo dio a wɔsi 32 boondii Chiisu ve, mi kiilanɔɔ Pitɛ, Chemisi a Chɔŋ cha yilaŋii kɔndɔfille. Mi kiilaa haa kua a Chiisu o pembii vilɛi pum choo, nduyɛ loŋ nda wa ni mi Mɛlɛka tosa mi Chiisu maŋgaŋ nda o hɔl. Baabuiyo dimi aa: “Hɔlla wa ndu wolioo maa lepala. Nduyɛ mi nyɛla wa ndu lekɔɔ laŋ la yɔŋnuŋ ŋɛlɛŋgi ŋɛlɛŋgi maa nyɛ teŋgaa.” (Maa. 17:​1-4) O mɛɛlula yilaŋii kɔndɔfille hei, mi kiilaa haa tuɛi diom Mɛlɛkaa aa: “Po nuu cho hoo ni. I kaala ndu, nduyɛ I hini kɔl a ndu. La tuei ndu diom.” (Maa. 17:​5) Mi kiilaa yaa wa haa chɔm o yoomula ndalaŋ niŋ maa ma yaŋ Chiisu nilaŋ, nduyɛ ŋ nɔ miŋ tol tamasi ndaa kɔɔli.

² O buŋgɛi naŋ hiou ve niŋ, miŋ pɛɛku maa le miŋ tuei Chiisu diom, mɛɛ miŋ pɛŋgi sɔɔŋ pum tosaa. Nduyɛ o buŋgɛi hei niŋ, ŋ cho yaasiaa sɔɔŋ ŋmuuŋ ŋ Chiisu dimul naa le miŋ tosa woŋ.

3. A mɛɛ Maatiu 7:​13, 14 dimi yɛ, yɛɛ naŋ nɔ yɛ miŋ tosa?

³ Nuawɔ Maatiu 7:​13, 14. O bolle Baabuileŋ niŋ, mi Chiisu suaa a diolaŋ la tiɔɔŋ okɔɔ. Nduyɛ diola tiɔɔŋndaŋ ndaŋ, o nɛila yɛ yɛlaŋ la yaa wana ni. Nɛi “tuaŋgaa” a nɛi ‘kendu lakɔ’ wo. Nɛi yaa ndɔ cho le. Naapila nɔ ni miŋ hɛli nɛi naŋ yeema le kɔlaŋ choo wo. Kɛɛsiaa sɔvɛ sɔvɛ naŋ nɔ miŋ tosa wo cho hoo ni kanifuule, nɛiyo opilɛ kpe yaa naa o yoomu fafɛɛŋndo ni.

4. Vɛɛ ŋ tɛɛsiaa yɛ nɛi “tuaŋgaa”?

⁴ Ŋ nɔ miŋ kɛsiŋ o kɔl teŋgeŋ cho nɛila tiɔɔŋndaŋ ndaŋ tɛɛŋndo. Wanaa bɔɔbɔɔ cho kɔlaŋ o nɛi “tuaŋgaa” choo kanifuule, o kindu lakɔ le. I cho suɛi imɔnɔ le sinaa maa, wanaa  bɔɔbɔɔ cho kɔlaŋ o nɛiyo hoo choo wa yeema ma tosa sɔɔŋ mɛɛ a tuaa cho tosaa yɛ. Nduyɛ a kɛɛ le sinaa maa, Setana Masa Nyinaa Wɔɔŋnda cho kindiŋndo ni le waŋnda nyindɔɔ le ma kuɛ o nɛiyo hoo choo. Nduyɛ wanaa cho kɔlaŋ o nɛiyo hoo choo wa, cho mɛɛlu piɔmndo sɔla.—1 Kɔliŋ. 6:​9, 10; 1 Chɔŋ 5:​19.

5. Yɛɛ wanaa bɔɔbɔɔ tosa yɛ le kɔlaŋ o nɛi ‘kendu lakɔ’ wo choo?

⁵ O faŋaŋndɔ o nɛi “tuaŋgaa” kɔɔli, mi Chiisu suaa vɛlɛ a nɛi cheleŋ okɔɔ. Ndu cho nɛi ‘kendu lakɔ’ wo ni, nduyɛ waŋnda nyɛɛmbɔ koni cho kɔlaŋ lechoo ni. Le yɛɛ? I cho suɛi sɔvɛ le miŋ sina maa, mi Chiisu sila buɛiyaa nduaa o Maatiu 7:​15 niŋ maa a mandaŋ a wanaa lachoowaa dimi maa le Mɛlɛka nda suaa ni wa. (Maa. 7:​15) Kaaŋnde o waalaŋ niŋ cho hau dimioo maa, tonyaa nda cho waŋnda pɛɛkoo ni. Wanaa bɔɔbɔɔ cho hau a kɔl tambɛiyo kanifuule, a sina nɛi yaa nda le yoomoo sɔlaa wo le. Kɛ a nɔla ma saaluŋ nɛiyo hoo. Mi Chiisu dimi aa: “Te la hiou pɛ lachi a nyɛ ya dimi wo tosaa, mɛɛ buɛiyaa niaa lekɛndɛi nya cho ni. La cho tonyaa sina, nduyɛ mi tonyaa soli nya o chɛleŋ niŋ.” (Chɔŋ 8:​31, 32) I cho bɔɔ suɛi sɔvɛ le mɛɛ ŋ tul faŋgaa kɔɔli le yɛ. Kɛ ma nuuviaa tonyaa, ma kandu pɛɛku yiŋgoloŋndo tosaa o Diom Mɛlɛkaa niŋ le sinaa nyɛ o yeema num ma tosa wo, nduyɛ ma yaŋ pɛɛkula Chiisulaŋ nilaŋ. O sɔɔŋ ŋ pɛɛku woŋ tɛɛŋ, ma pɛɛku maa Chɛhowa yeema num ma fafaŋ piɛiyii lachoowɛi, nduyɛ ma pɛŋgi balaŋ wouwo o palɛi bɛnduei biiloo niŋ. Ma sina vɛlɛ maa, i ve bɛɛŋ bɛɛŋ le sɔɔŋ nɛŋi Chɛhowa kɔllo woŋ tosaa le. (Maa. 10:​34-36) I ve bɛɛŋ bɛɛŋ le yɛlɛmiaala yeemaŋ ndaŋ tosaa le. Kɛ le mɛɛ ŋ nɔ kaalaa le Finya num cho o choo choo niŋndo yɛ, ma kindiŋ le nyɛ nɛŋi ndu kɔllo wo tosaa. Nduyɛ ŋ sina maa mi hei nɛŋi ndu kɔllo tau.—Pulɔ. 27:​11.

6. A mɛɛ Sam 119:​9, 10, 45, 133 dimi yɛ, yɛɛ mala yɛ naa miŋ lo o nɛi kendu lakɔ wo choo?

⁶ Te ŋ kandu pɛ kɔlaŋ o nɛi kendu lakɔ wo choo, yɛɛ mala yɛ naa miŋ lo lechoo? Ŋ tofaŋndɔ tamaseliiyo hoo. O lɛŋnde ipum niŋ, mi waŋnda toosiaa kpakioo o nɛiyo daŋgala, le malaa wanaa kua a nyɛm nyaanaŋndoŋ nda ma sina maa kpoloŋndo cho o fondaŋ koŋ. Keŋ mala nda ma fafaŋ luɛiyɔɔ o kpundɔɔ niŋ. O cho wanaa kua a nyɛm nyaanaŋndoŋ nda kpou le ŋɔɔchiaŋ a hei okɔɔ le. Nɛila chɔmaala Chɛhowalaŋ o Baabuiyo niŋ, la cho ko maa kpaki nda toosiaa koŋ o nɛiyo daŋgala wo. Nduyɛ la mala naa le miŋ lo o nɛi kendu lakɔ wo choo.—Nuawɔ Sam 119:​9, 10, 45, 133.

7. Vɛɛ feleŋguaa nɔ yɛ ma che nɛi kendu lakɔ wo?

⁷ Feleŋguaa, baa mi la yiyaŋ pa lepum maa sawala Chɛhowalaŋ la kendu bɔɔ diikɔŋ? Yiyaŋ waa nuaa kpeekpei Setana yeema nya ni mi la nɔ. O yeema nya mi la handu kɔllo o nyɛ wanaa cho kɔlaŋ o nɛi tuaŋgaa choo wa cho tosaa wo choo, nduyɛ mi la che maa wanaa kaŋ cho bɔɔ yoomoo tueiyɔɔ yeela. Mbo soliŋ nyɛ chaaŋaa nyaa nya kua o sukuu wa dimi wo, nduyɛ a sɔɔŋ nya cha o intanɛtiiyo choo woŋ kpeku, le nya chɔmndo maa la cho yoomoo tueiyɔɔ yeela mɛɛ chaaŋaa nyaa cho ndu tueiyɔɔ yeela yɛ le. Mbo tosa mi la yiyaŋ maa o kpeekpei niŋ, te la bii pɛ sawala Chɛhowalaŋ, la tui niŋ yoomoo yeela le. * Kɛ la kɛsiŋ o  kɔl maa, Setana yeema mi wanaa cho kɔlaŋ o nɛi ndɔɔ choo wa sina naa nɛi koŋ yaa niŋ nda wa le. O baa pilɔɔ choo, Chɛhowa chɔm naa tɔnɔla naŋ cho sɔla laŋ te ŋ lo pɛ o nɛi ‘kendu lakɔ’ wo choo.—Sam 37:​29; Aisaya 35:​5, 6; 65:​21-23.

8. Yɛɛ feleŋguaa pɛɛku yɛ o tamasi Olaf wo niŋ?

⁸ Ŋ tofaŋndɔ suɛi yɔŋnaŋii puaapilɛnɔ feleŋgɔnɔ pilɛ diolaŋ Olaf, nduyɛ miŋ che nyɛ naŋ pɛɛku leniŋndo. * Mi chaaŋaa nduaa o sukuu kindiŋ le ndu dɛɛniaa le kaa ihini nɔɔlɛiyo tosaa. Mɛɛ o tɛɛsial nda maa sawala Chɛhowalaŋ Seiyaa nduaa tual kɔɔli ni, mi chuaambuaa wa o toŋgo ndɔɔ niŋnda nuuviaa nɛila cheleŋ le halikpeŋ mbo wa a nda. Kɛ a tiu ndu ba le. O cho ko simullo hoo le ndoo sɔla le. Mbo dimi aa: “Mi wanaa niaa pɛɛkaa dimulla maa, te I kuɛ pɛ o sukuu bɛndoo niŋ, waŋnda cho ya bɛɛleŋ ke, nduyɛ mi wa wana sɔvɛ. Ma chɔɔlu dimi maa te I tosa keŋ te, I cho wali sɔvɛ sɔla le, nduyɛ I ve niŋ a kɔl kɛndɛ o yoomoo niŋ te.” Yɛɛ mala yɛ Olaf mbo sim yi o simultaŋ ndaŋ bɛŋgu? Mbo dimi aa: “Mi tosa chaŋyɛi kpɛɛluŋnde  a wanaa naŋ wa o kundaa niŋnda. Mi waŋnda haa simnuŋ maa yuŋgu nuu, nduyɛ mi kandu vɛlɛ Baabuiyo pɛɛkoo yiŋgoloŋ. Mɛɛ ya wa hiouwɔɔ lachi a pɛɛkoo, mi chɔɔlu laalaŋ kɛsɛ maa tonyaa kpeekpei cho hoo ni. Nduyɛ fulamakɔɔlioo wa ni, mi kɛɛsiaa le mi sɔla yiŋɔɔ.”

9. Yɛɛ wanaa yeema ma hiou lachi a kɔlaŋ o nɛi kendu lakɔ wo choo wa nɔ yɛ ma tosa?

⁹ Setana yeema ma faŋaŋ o nɛi yaa wana o yoomoo wo choo. O yeema num ma del faŋga bɛndoo a cho kɔlaŋ o nɛi tuaŋgaa “yaa wana o tambei” niŋnda choo. (Maa. 7:​13) Kɛ le ma hiou lachi a kɔlaŋ o nɛi kendu lakɔ wo choo, mɛɛ ma wa Chiisu diomndo tueiyɔɔ, nduyɛ ma che nɛiyo hoo maa nɛi sɔvɛ manda naa wo o cho ni. Ŋ yaasiaŋndɔ vɛlɛ nyɛ cheleŋ Chiisu dimul naa le miŋ tosa wo.

10. A mɛɛ Maatiu 5:​23, 24 dimi yɛ, yɛɛ Chiisu dimullɛ naa le miŋ tosa?

¹⁰ Nuawɔ Maatiu 5:​23, 24. O bolle Baabuileŋ niŋ, mi Chiisu suaa a suɛi sɔvɛi pum okɔɔ, le Chuuwaa wa ndu diomndo tueiyɔɔ wa. Yiyaŋndɔ maa waŋndo kuɛ le salaa solioo o maaŋndo niŋ, nduyɛ mi teleŋ ndɔɔ fuuluu le mbo ke wana soliaa lasalaa chɔlu ndɔɔ le salaa solioo. Kɛ a teleŋ koŋ kinɛi, mbo loonuŋ maa puaapilɛnɔ ndɔɔ nɔ suɛi nduɛi o kɔl. Ndoo nɔ mbo mɛi chɔlu ndɔ koŋ loŋ, okoŋ mbo “miiŋgu” pila o puaapilɛnɔ koŋ ndo. Le yɛɛ? Kanifuule, nyɛ cheleŋ wa o sɔvɛ Chɛhowa o hɔl mbo hiau salaa solioo. Mi Chiisu dimi aa: “Mɛiyɔ sala num koŋ o bandoo hɔlndɔ, ma miiŋgu naa [puaapilɛnɔ numndo] chua mi la kɔ toosiaŋ tɛɛŋ.”

11. Tɛɛsiaawɔ nyɛ Chekɔpu tosa le mi kɔl nyuloo miiŋgu nda tɛɛŋ nda bɛ ndɔ wo.

¹¹ Ŋ nɔla miŋ pɛɛku suɛi sɔvɛi le kɔl nyuloo tosaa a puaapiliaa naa, te ŋ tofa pɛ nyɛ yɔŋnuŋ Chekɔpu wo. Le wɔsilaŋ 20 Chekɔpu ve o ndu lo chiee le. A koŋ kpou, mi Mɛlɛka dimul ndu sanaa a maalikɛinɔɔ maa, o miiŋgu naa o veluŋnda. (Chɛ. 31:​11, 13, 38) Kɛ bahawɛiyo wa. Iisɔ bɛ ndɔ ndoo yeema ndu diyɔɔ. (Chɛ. 27:​41) Mɛɛ Chekɔpu yiyaŋ a hei okɔɔ, “mi siooŋnde bii ndu tau, mbo kandu buulaŋndo” kanifuule ndoo nɔ o kɔl maa, bɛ ndɔ nɔ wɔ suɛi nduɛi nɛiyaŋnde o kɔl. (Chɛ. 32:​7) Yɛɛ ndoo tosa yɛ le mi kɔl nyuloo miiŋgu nda tɛɛŋ nda bɛ ndɔ? Nyɛ tase o tosa wo wa piɛileŋ tau o Chɛhowa lo a suɛi keŋ okɔɔ ni. Okoŋ kɔɔli, mbo tosal vɛlɛ bɛ ndɔ kɛndɛi. (Chɛ. 32:​9-15) O mɛɛlulaŋ kpɔŋ, mɛɛ nda bɔŋaŋ nda bɛ ndɔ, mbo ke ndu bɛɛleŋ. Mbo beŋ Iisɔ wulaŋ o cho lepilɛ ɔɔ le diiŋ te, kɛ bɛmbɔɔ le ŋɔmmɛu. Mɛɛ o chɔm bɛɛle yiŋgoloŋndeŋ a kaa tusiaŋndo, mi kɔl nyuloo miiŋgu nda tɛɛŋ.—Chɛ. 33:​3, 4.

12. Yɛɛ naŋ pɛɛku yɛ o tamasi Chekɔpu wo niŋ?

¹² Ŋ pɛɛku o tamasi Chekɔpu wo niŋ kanifuule, mbo bɛɛndiaŋ tuupa ma chiikaŋ nda Iisɔ bɛ ndɔ. Mbo nyuna Chɛhowa o piɛileŋ niŋ le mbo mala ndu. Mbo duau nyɛ o piɛi le ndu wo o wali niŋ, nduyɛ mbo kindiŋ o nɛi o nɛi niŋ le mi kɔl nyuloo miiŋgu nda tɛɛŋ. Mɛɛ nda chiikaŋ, o suu a wana nɔ dioo ɔɔ wana wɔu o suɛi keŋ niŋndo okɔɔ le. Ndoo yeema mi kɔl nyuloo miiŋgu nda tɛɛŋ nda bɛ ndɔ. Vɛɛ naŋ tuallɛ tamasi ndɔɔ kɔɔli?

13-14. Te ŋ sina pɛ maa ŋ tɛɛmbuu chaaŋ naa laalaŋndo kɔllo, yɛɛ naŋ nɔ yɛ miŋ tosa?

¹³ Te ŋ yeema pɛ miŋ hiou lachi a kɔlaŋ o nɛi yaa wana o yoomoo wo choo, mɛɛ ŋ nɔ miŋ wa o kɔl nyulu niŋ a puaapiliaa naa. (Luomaŋ. 12:​18) Yɛɛ naŋ nɔ yɛ miŋ tosa te ŋ sina pɛ maa ŋ tɛɛmbuu chaaŋ naa laalaŋndo  kɔllo? Maa Chekɔpu, ŋ nɔ miŋ nyuna Chɛhowa o piɛileŋ niŋ a suɛi keŋ okɔɔ. Ŋ nyuna ndu le mbo dɔu kindi kindiŋ naŋ cho le mi kɔl nyuloo miiŋgu naa tɛɛŋ naa puaapilɛnɔ naa wo sala.

¹⁴ Ŋ nɔ vɛlɛ miŋ chua teleŋndo le yiyaŋndo o nyɛ naŋ nɔ miŋ tosa wo choo. Ŋ nɔ miŋ nyunaŋ nyunala waa nuaa. Laŋ la cho ni: ‘Baa I cho pa o bɛɛndiaŋ le mi chɛl biondɔŋ nuu le halikpeŋ mi kɔl nyuloo miiŋgu naa tɛɛŋ naa puaapilɛnɔ nuu? Vɛɛ Chɛhowa nda Chiisu sinaŋ yɛ te I chua pɛ chilaŋ le mi kɔl nyuloo miiŋgu naa tɛɛŋ naa puaapilɛnɔɔ ɔɔ ndepilɛnɔ nuu?’ Mulila naalaŋ le nyunalaŋ ndaŋ la cho naa nyindɔɔ le Chiisu nilaŋ yaŋɔɔ, nduyɛ miŋ tusiŋ le kɔlaŋ o puaapilɛnɔ naa lo le halikpeŋ mi kɔl nyuloo miiŋgu naa tɛɛŋ. O nɛiyo hoo choo, ŋ tiuba miŋ tol tamasi Chekɔpu wo kɔɔli.

15. Vɛɛ sawa mandaa cho o Ɛfisiaŋnda 4:​2, 3 niŋndo dɔwɔɔ o wali niŋ, mala yɛ naa mi kɔl nyuloo wa naa tɛɛŋ a puaapilɛnɔ naa?

¹⁵ Te Chekɔpu ndoo kindiŋ pɛ le dioo nuuviaa teleŋ o komal bɛ ndɔ Iisɔ wo, yɛɛ wa yɛ wa fulamakɔɔlioo? O ve fulamakɔɔli kɛndɛ sɔla le. Kaa tusiaŋndo mala naa ni te ŋ yeema pɛ suɛi cho naa tɛɛŋ naa puaapilɛnɔ naa ve toosiaa. (Nuawɔ Ɛfisiaŋnda 4:​2, 3.) Pulɔwaa 18:​19 dimi aa: “Wana numndo suɛi wɔɔŋnde tosallo, suɛi keŋ i kendu chuwɔɔ nya tɛɛŋ, o hiou mɛɛ i kendu nuaa le chiee nɔ saasalaŋ labalaa wo biyɔɔ yɛ. Mɛɛ saasaa wa nuaa waŋnda tɛɛŋ a diola ŋchiliŋndaŋ yɛ, lende sɔŋgɔɔ o piɔu waŋnda tɛɛŋ ni.” Puaapilɛnɔ suɛi wa naa tɛɛŋndo cho ko mɛɛ saasaa wa nuaa yɛ, kɛ te ŋ nyɔɔlu ndu pɛ, keŋ cho mala mi ndu bɛɛ chɛl le mi kɔl nyuloo miiŋgu naa tɛɛŋ.

16. Te ŋ wa pɛ kɔlaŋ suɛi toosiaa naa puaapilɛnɔ naa tɛɛŋ, a yɛɛ okɔɔ naŋ nɔ yɛ miŋ yiyaŋ, nduyɛ le yɛɛ?

¹⁶ Ŋ nɔ vɛlɛ miŋ yiyaŋ nyɛkɛndɛi a nyɛ naŋ cho lakɔ puaapilɛnɔ naa dimullo vɛlɛ a mɛɛ naŋ cho isɔɔ o ndu lo yɛ okɔɔ. Te ŋ kuɛ pɛ, ŋ nɔ miŋ kindiŋ kpoke le mi suɛi nɛiyaŋ cho ndu o kɔl a naa ve fula ndu o kɔl, nduyɛ miŋ miiŋgu o chaŋyɛi kɛndɛi niŋ. Naapum, mi sɔɔŋ o dimi o tasela ndɔ woŋ tɛɛmbuu naa kɔllo. Te keŋ yɔŋnuŋ pɛ, mii wa tɛtɛlɛ le miŋ tuulu kɔl ɔɔ miŋ kandu nɛilaŋ nuuviaa le dioo sɔlaa o suɛi keŋ niŋ. Baa keŋ tosa pa mi kɔl nyuloo miiŋgu naa tɛɛŋ? Sako. Loonuŋ maa, miiŋgoo o kɔl nyuloo niŋ a puaapilɛnɔ naa hiou wa o sɔvɛ a dioo sɔlaa.—1 Kɔliŋ. 6:​7.

17. Yɛɛ naŋ pɛɛku yɛ o taamasi Kilbɛ wo niŋ?

 ¹⁷ Mi puaapilɛnɔ pilɛ diolaŋ Kilbɛ tosa wallo kalaŋ le mi kɔl nyuloo wa ndu tɛɛŋ a acheleŋnda. Mbo dimi aa: “A teleŋ pilɛ, i wa ikala kpoke le mi yaa wa o kɔl nyulu niŋ a chua nuu. Le wɔsioŋ ŋmuuŋ, I wa sɛmbɔɔ dɔwɔɔ tau le suɛi o ndu lo o nɛi chaa niŋ le halikpeŋ mi naŋ miiŋgu o chaŋyɛi kɛndɛi niŋ.” Yɛɛ cheleŋ Kilbɛ ndoo tosa yɛ? Mbo chɔɔlu dimi aa: “Teleŋ o teleŋ tuupa mi yaa kuɛ le suukaŋndo a suɛi keŋ okɔɔ, mi yaa piɛi o Chɛhowa lo a ndi okɔɔ, nduyɛ mi yaa yiyaŋ yiŋgoloŋ a diomnda ya nɔ mi dimi le laŋ okɔɔ. Yaa nɔ mi wa o bɛɛndiaŋ le ndu malɔɔ haki. Mi cha maa o cho le dioo sɔlaa o suɛi keŋ niŋ te yaa nɔ mi kindiŋ te. Kɛ le halikpeŋ mi kɔl nyuloo ndoo miiŋgu naa tɛɛŋ.” Yɛɛ wa yɛ fulamakɔɔlioo? Mbo dimi aa: “Suŋ suŋ niŋ, I cho o kɔl nyulu niŋ a wana o wana cho o yuŋgu nuu niŋ, nduyɛ I nɔ chaŋyɛi kɛndɛi a nda.”

18-19. Te ŋ tɛɛmbuu pɛ chaaŋ naa laalaŋndo kɔllo, yɛɛ naŋ nɔ yɛ miŋ kɛɛsiaŋ o kɔl le tosaa, nduyɛ le yɛɛ?

¹⁸ Yɛɛ ŋ nɔ yɛ ma kɛɛsiaŋ o kɔl le tosaa te a sina pɛ maa a tɛɛmbuu chaaŋ num laalaŋndo kɔllo? Tol sila Chiisu wo kɔɔli le ma tosa mi kɔl nyuloo miiŋgu nya tɛɛŋ. Soo o Chɛhowa lo a ndi okɔɔ, nduyɛ ma tiindaŋ nyina ndɔ diandaa le num malaa ma wa wana tosa mi kɔl nyuloo miiŋgu waŋnda tɛɛŋndo. Te a tosa lende pɛ, a cho wa a kɔl kɛndɛ, nduyɛ a cho chɔm kpendekele maa a cho Chiisu diomndo tueiyɔɔ.—Maa. 5:​9.

¹⁹ Ŋ cho a kɔl kɛndɛ le mɛɛ Chɛhowa ke naa silala kɛndɛ kɛndɛlaŋ sanaa a Chiisu Kiliti, wana cho ‘kunda leKilisiɔŋndo bolleŋndo.’ (Ɛfi. 5:​23) Maa ŋ kɛɛsiaŋ o kɔl le ndu ‘diomndo tueiyɔɔ’ maa kiilanɔɔ Pitɛ, Chemisi a Chɔŋ. (Maa. 17:​5) O buŋgɛi hei niŋ, ŋ yaasiaa nyɛ naŋ nɔ miŋ tosa le miŋ miiŋgu o kɔl nyulu niŋ a chaaŋaa naa laalaŋnda wo te ŋ tɛɛmbuu nda pɛ kɔllo. Te ŋ tosa pɛ hei, nduyɛ miŋ hiou lachi a kɔlaŋ o nɛi kendu lakɔ wo choo, ŋ cho salalaŋ sɔla suŋ suŋ a o chilaŋ niŋ.