1-2. Yɛɛ naŋ pɛɛku yɛ o buŋgɛi hiou ve niŋ, nduyɛ yɛɛ naŋ cho yɛ pɛɛku o buŋgɛi hei niŋ?

O BUŊGƐI naŋ hiou ve niŋ, miŋ cha silala mala naalaŋ o Lɛvitikɔɔ 19 niŋ. Le tamaseliiyo, o sɔɔŋ 3 niŋ, mi Chɛhowa dimul Isɔluɛiya maa a nɔ ma ke wanaa velu nda wa bɛɛleŋ. Nduyɛ miŋ yaasiaa o buŋgɛi keŋ niŋ, mɛɛ naa bɛɛ duau sila koŋ o wali niŋ sanaa a wanaa velu naa wa nyɛm nda hauba woŋ kioo, dɛɛniaa nda, a nda malaa o Mɛlɛka piɛiyo niŋ. O bolle Baabuile pilɛle leŋ niŋ, mi Mɛlɛka loonuŋ wanaa nduaa le ma ke paale pɛŋgiaaleŋ bɛɛleŋ. Nduyɛ miŋ pɛɛku maa, mi che bɛɛ ŋ cho o sawaa le paale pɛŋgiaaleŋ bɛɛleŋ kioo bɛŋgu le, kɛ ŋ tiuba miŋ dɔu sawa mandaa cho leniŋndo o wali niŋ, le teleŋndo nuuviaa lepaa o lepaa le sɔɔŋ cho a Mɛlɛka okɔɔ woŋ tosaa. Te ŋ tosa pɛ sɔɔŋ muŋ, mɛɛ ŋ cho chɔm kpendekele maa ŋ cho kindiŋndo le miŋ wa a diandaa mɛɛ Lɛvitikɔɔ 19:​2 a 1 Pitɛ 1:​15 dimi yɛ.

² O buŋgɛi hei niŋ, ŋ cho hiouwɔɔ lachi a Lɛvitikɔɔ 19 yaasiaa. Yɛɛ bolle Baabuileŋ le pɛɛku yɛ naa, le wanaa cho a namtaleŋ nda chaa biyɔɔ, sandei chɔmndo o nyɛ o nyɛ niŋ, a wanaa naŋ chiɛɛliaŋnda kaalaa chɔmndo? Ŋ yeema miŋ wa a diandaa kanifuule, wana diandaa Mɛlɛka cho ni. Lelaŋ, ŋ tofaŋndɔ nyɛ cheleŋ naŋ pɛɛku vɛlɛ o bolle Baabuileŋ niŋndo.

3-4. A mɛɛ Lɛvitikɔɔ 19:​14 dimi yɛ, vɛɛ Chɛhowa ndoo yeema yɛ mi wanaa nduaa ndaa bii wanaa nila baŋulɛiya ɔɔ bobuaa a wanaa sumɛiya?

³ Nuawɔ Lɛvitikɔɔ 19:​14. Chɛhowa yeema miŋ chaa wanaa cho a namtaleŋ nda biyɔɔ. Le tamaseliiyo, Isɔluɛinɔɔ ndoo nɔ  mbo yei bobonɔɔ, ɔɔ wana nila baŋulɛiyo le. Naapum hei ndii sim ni maa, wana koŋ kɔŋgɔlaŋndo ɔɔ sɔɔŋ wɔɔŋndoŋ dimioo a ndu okɔɔ. Hei wa bɔɔ suɛi wɔɔŋ bɛndu kanifuule, wanaa waa nuaa tui nyɛ wana dimi a nda okɔɔ wo le. Nduyɛ le mɛɛ nda tui le yɛ, a tiuba ma suŋgu le ndapila le.

⁴ Le handɔɔ lechoo, sɔɔŋ 14 dimi maa, wanaa Mɛlɛkaa ndaa nɔ ma che “wana sumɛiyo hunɔɔ ma kɛsi ndu nyɔɔ lachi le mbo boŋ te.” Mi yau pilɛ soo a wanaa nɔ namtaleŋ nda okɔɔ wo dimi aa: “O Isɔluɛi niŋ, mi waŋnda ndaa bii wanaa nɔ namtaleŋ nda biyɔɔ wɔɔŋndo.” Naapum mi waŋndo ndoo kɛsi wana sumɛiyo nyɔɔ lachi le halikpeŋ mbo boŋ, okoŋ mbo del. Nuawɔ se suɛi wɔɔŋ bɛndu! Mɛɛ Chɛhowa ke wanaa nduaa sawaa hoo, mbo chɔm kpendekele maa, ndoo yeema nda ma tuiinuŋ wanaa nɔ namtaleŋ nda inyiɛɛ.

5. Vɛɛ naŋ tuiinuŋ yɛ namtaa nyiɛɛye?

⁵ Mi Chiisu tuiinuŋ namtaa nyiɛɛye. Yiyaŋndɔ a yooŋgu ndoo dimul buɛiyaa Chɔŋ nda le ma kɔ dimul ndu wo okɔɔ. Mbo dimi aa: “Wanaa sumɛiya cho niŋ chɔɔ, mi wanaa bɛvɛiya wa kɔlaŋ. Wanaa ŋlɛliaa cho sioŋgɔɔ, mi wanaa nila baŋulɛiya wa niŋ tueiyɔɔ. [Nduyɛ] wanaa vi wa cho miiŋgoo yoomu.” Mɛɛ waŋnda che kaamaala Chiisu wa tosaalaŋ, “mi nda kpou saŋgala Mɛlɛka.” (Luku 7:​20-22; 18:​43) Mi Kilisiɔŋnda wa a kɔl kɛndɛ le tamasi Chiisu wo tolɔɔ kɔɔli, te o hiŋ pɛ a mɛɛ nda bii namtaa yɛ okɔɔ. Miŋ tosal wanaa waa nuaa kɛndɛi, miŋ chɔm nda sinapɛŋgoo, nduyɛ miŋ biunuŋ nda. Mi che bɛɛ Chɛhowa ke naa kpaaya le miŋ tosa kaamaalaŋ te, kɛ o ke naa dikeŋnaŋndo le miŋ dimul wanaa cho o bahawɛila waa nuaa niŋnda a wanaa cho a sumɛi o ndu piɛiyo niŋnda yooŋgu kɛndɔɔ a kpele hɛnɛkiɔɔ okɔɔ. Nduyɛ o kpele hɛnɛkiɔɔ niŋ, wana o wana cho wa walaŋ, nduyɛ ma nɔ chaŋyɛi kɛndɛi a ndu. (Luku 4:​18) Yooŋgu kɛndɔɔ hoo cho tosaa mi wanaa bɔɔbɔɔ wa niŋ Mɛlɛka saŋgalaa.

6. Vɛɛ Lɛvitikɔɔ 19 chɔɔlu yɛ naa mala le Sawala Tɔlaŋ biyɔɔ bila?

⁶ Sɔɔŋ ŋpum o Lɛvitikɔɔ 19 niŋ, chɔɔlu isɔɔ a Sawala Tɔlaŋ okɔɔ. Le tamaseliiyo, mi sawa  ŋɔmaa wo dimi aa: “La yɔŋ levii le.” (Ɛsɔ. 20:​15) Naapum mi waŋndo ndoo yiyaŋ maa, te o chue nyɛ pila le, mɛɛ sawaa hoo o cho diikɔŋndo ni. Kɛ lepum mi wana koŋ tosa viileŋ o nɛila cheleŋ niŋ.

7. Sawa ŋɔmaa wo soo a viileŋ okɔɔ. Vɛɛ wana leyulaa kɛɛ yɛ sawaa hoo diikɔŋndo?

⁷ Lepum mi yulanɔɔ ndoo lɔɔŋ takpa maa, kani bɛɛ o tosa wɔ levii le kanifuule, o chue wɔ nyɛ pila le. Baa mbo chɔm pa sandei te o wa pɛ yulaleŋ tosaa a acheleŋnda? O Lɛvitikɔɔ 19:​35, 36 niŋ, mi Chɛhowa dimi aa: “La tosal waŋnda kafalaŋ o nda nyɔɔŋ tuulullo niŋ te, o wa nyɛ wana tuu o nyɛ niŋ, o wa nyɛ handaa o sekelei choo, ɔɔ nyɛ o nyɛ tuwaa. Te la wa waŋnda nyɔɔŋ tuulullo pɛ, o wa o sekelei, o wa nyɛ o nyɛ tuwaa nda tuu nyɛ, la wa sakpo o muŋ tuuwo niŋ.” Te o yɔŋ pɛ mi wana leyulaa yii sekelei ndɔ o tuu nyɔɔŋ ndo le wanaa piandu ndu o ba wa huiyo, mɛɛ viileŋ o cho leŋ tosaa niŋ. Te ŋ chɔɔlu pɛ sɔɔŋ cheleŋ tofa o Lɛvitikɔɔ 19 niŋ, ŋ cho chɔ maa hei cho tonya.

8. Vɛɛ sawala mandaala cho o Lɛvitikɔɔ 19:​11-13 niŋndaŋ la mala yɛ Chuuwa ma duau sawa ŋɔmaa wo o wali niŋ, nduyɛ tɔnɔ yɛɛ naŋ sɔla yɛ leniŋ?

⁸ Nuawɔ Lɛvitikɔɔ 19:​11-13. Diomnda tasela cho o Lɛvitikɔɔ 19:​11 niŋndaŋ la dimi aa: “Wana tosa levii le.” Mi sɔɔŋ 13 tuu viileŋ a kafala wana leyulaa tosalaŋ. Le dimi aa: “Wana tosal chaaŋ num kafalaŋ ɔɔ ma chiimbuu nyɛ ndɔ le.” Le saboo hoo te waŋndo wa pɛ kafalaŋ tosaa o yulaleŋ niŋ, mɛɛ viileŋ o cho leŋ tosaa ni. Mi che bɛɛ mi sawa ŋɔmaa wo suaa a viileŋ okɔɔ maa le niŋ te, kɛ mi sɔɔŋ dimiŋ o yau Lɛvitikɔɔ wo niŋndo mala Chuuwa ma bii bila sawa mandaa cho o sawaa hoo niŋndo, le ma chɔm sandei o nyɛ o nyɛ niŋ. Lelaŋ, i cho suɛi sɔvɛ le miŋ wa yiyaŋndo a mɛɛ Chɛhowa che kafalaŋ vɛlɛ a viileŋ yɛ okɔɔ. Naa kpou nɔ miŋ nyunaŋ aa: ‘Baa nyɛ dimiŋ o Lɛvitikɔɔ 19:​11-13 niŋndo piiliaŋ ya pa? Baa I nɔ pa mi tosa yɛlɛmiaalaŋ a mɛɛ ya tosa yulaleŋ ɔɔ wali nuu yɛ okɔɔ?’

9. Vɛɛ sawa cho o Lɛvitikɔɔ 19:​13 niŋndo, ndoo mala yɛ wanaa ndaa chua le wallo wa?

⁹ Nɛi cheleŋ cho vɛlɛ o Kilisiɔŋnɔ chua waŋnda le wallo wo nɔ mbo yiyaŋ choo le sandei chɔmndo wo. Mi Lɛvitikɔɔ 19:​13 mɛɛlu dimi aa: “Te a chua waŋndo le wali lepalaa pɛ, paawa ndɔɔ lɔl num kuee mɛɛ diima ndɔɔ le.” O Isɔluɛi niŋ, chiɔɔŋ wanaa bɔɔbɔɔ ndaa tosa ni. Nduyɛ te waŋndo ndoo chua pɛ waŋndo le wallo o chiɛi nduɛi niŋ, ndoo nɔ mbo paawa ndu a paale delaaleŋ. Te ndoo kɛɛ pɛ wana koŋ paawaa a paale delaaleŋ, mɛɛ wana koŋ ve nyɛsɔlaa nɔ le yuŋgu ndɔɔ nyɛdiaa kioo paaleleŋ te. Mi Chɛhowa tɛɛsiaa aa: “Wana [bala fondoo wana koŋ] cho ni, kanii keŋ o tiindaŋ ni le nyɛ ndɔ diaa.”—Ditɔnɔ. 24:​14, 15; Maa. 20:​8.

10. Suɛi sɔvɛ kuɛɛ naŋ pɛɛku yɛ vɛlɛ o Lɛvitikɔɔ 19:​13 niŋ?

¹⁰ Hau mi wanaa bɔɔbɔɔ chua waŋnda le wallo wa, paawa nda lepilɛ ɔɔ le diiŋ o paŋgei niŋ. Kɛ sawa mandaa cho o Lɛvitikɔɔ 19:​13 niŋndo cho wɔ o sɔvɛ. Mi wanaa bɔɔbɔɔ chua waŋnda le wallo wa, kɛɛ nda paawaa mɛɛ nda nɔ le nda paawaa yɛ. A sina maa wanaa nda chua le wallo wa cho o bahawɛiyo niŋ, lelaŋ mɛɛ mɛɛ nda paawa nda, a cho hiouwɔɔ lachi a wallo le nda. O dimi niŋ, a cho wanaa kaŋ paawa nda nɔ le sɔlaa wo ke le. Kilisiɔŋnɔ chua waŋnda le wallo wo nɔ mbo chɔm nda sandei. Ŋ tofaŋndɔ vɛlɛ nyɛ cheleŋ naŋ pɛɛku o Lɛvitikɔɔ 19 niŋndo.

11-12. Yɛɛ Chiisu kindila yɛ mɛɛ o soo a sawa cho o Lɛvitikɔɔ 19:​17, 18 niŋndo okɔɔ?

¹¹ Mɛlɛka dimul naa ko maa ŋ nɔ miŋ bii  waŋnda o nɛi kɛndɔɔ choo le, kɛ mbo dimi maa ŋ nɔ miŋ tosa tau mbo hiou lende. Hei cho kpendekele te ŋ tofa pɛ Lɛvitikɔɔ 19:​17, 18. (Nuawɔ.) Mi Chɛhowa dimi loŋ aa: “La kaala wanaa nya chiɛɛliaŋnda, mɛɛ nya kaala nya pila yɛ.” Kilisiɔŋnɔɔ nɔ mbo tosa hei le halikpeŋ mbo nɛŋi Mɛlɛka kɔllo.

¹² Tofawɔ mɛɛ Chiisu kindila sawa cho o Lɛvitikɔɔ 19:​18 niŋndo yɛ. Mɛɛ Falisiinɔɔ nyuna ndu teleŋ pilɛ aa: “Sawa kuɛɛnɛ hiou yɛ sawala Mɛlɛkalaŋ kpou?” Mi Chiisu mulul ndu maa, “sawa tasoo o hiou sawalaŋ kpou wo” cho sawaa le Chɛhowa kaalaa a kɔl naa kpou, yoomu naa kpou, nduyɛ a yiyaŋnda naalaŋ kpou ni. Okoŋ mi Chiisu suaa a nyɛ dimiŋ o Lɛvitikɔɔ 19:​18 niŋndo okɔɔ aa: “Sawa diiŋ ndɔɔ cho machuaa mɛɛ o tasoo cho yɛ. Ndu cho ni, ‘A nɔ ma kaala wana nya chiɛɛliaŋ ndo mɛɛ ŋ kaala numpila yɛ.’” (Maa. 22:​35-40) Nɛilaŋ la cho tau la naŋ chɔm wanaa naŋ chiɛɛliaŋnda kaalaa wo, nduyɛ ŋ nɔla miŋ pɛɛku a laŋ okɔɔ o Lɛvitikɔɔ 19 niŋ.

13. Vɛɛ Choosɛ dɔu yɛ sila cho o Lɛvitikɔɔ 19:​18 niŋndo o wali niŋ?

¹³ Nɛiyo opilɛ o naŋ chɔm wanaa naŋ chiɛɛliaŋnda kaalaa wo cho nyɛ Lɛvitikɔɔ 19:​18 dimi wo dɔwɔɔ o wali niŋ ni. Le dimi aa: “Te chaaŋ num o tosal num suɛi wɔɔŋnde pɛ, kindi le ndu maa miŋgul te, ɔɔ ma bii ndu o kɔl te.” Naa a bɔɔbɔɔ che niŋ wanaa bii suɛi wana nda kua o sukuu wo, wana nda tosa wallo wo, wanayaŋ ndɔŋ ɔɔ wana nda cho o yuŋgu pilɔɔ niŋndo o kɔl le wɔsiŋ bɔɔbɔɔ wo. Nyɛ waa ndoo tosa ni mi bɛndaa Choosɛ wa pisi ndu o chɛleŋ niŋ. (Chɛ. 37:​2-8, 25-28) Kɛ Choosɛ bii nda biyɔɔ wɔɔŋ te. Le mɛɛ o wa masa diiŋ ndɔɔ yɛ, ndoo nɔla mi ndoo miŋgul bɛndaa nduaa maa, kɛ o tosa lende le. Mbo tuiinuŋ nda inyiɛɛ, nduyɛ o kɛsiŋ suɛi ndɛi o kɔl te. Mbo kindiŋ le sila cho o Lɛvitikɔɔ 19:​18 niŋndo dɔwɔɔ o wali niŋ.—Chɛ. 50:​19-21.

14. Le yɛɛ naŋ nɔ yɛ miŋ hiou lachi a diikɔŋndo sawala mandaala cho o Lɛvitikɔɔ 19:​18 niŋndaŋ?

¹⁴ Kilisiɔŋaa yeema ma nɛŋi Mɛlɛka kɔllo wa, nɔ ma tol tamasi Choosɛ wo kɔɔli kanifuule, o bii bɛndaa nduaa o kɔl te. Kɛ mbo mal nda haki. Hei chɛlaŋ a piɛile Chiisu pɛɛku buɛiyaa nduaa leŋ. Mbo sila naa le miŋ mal wanaa tosal naa sɔɔŋ wɔɔŋndoŋ nda  haki. (Maa. 6:​9, 12) O nɛi pilɛ koŋ choo, mi kiilanɔɔ Pɔɔl sila Kilisiɔŋnda aa: “Chaaŋaa niaa, la wa wanaa miŋgiaa maa le.” (Luomaŋ. 12:​19) Mbo hiau lachi a nda dɛɛniaa aa: “La wa biuwaŋndo vellaa velle. Nduyɛ te isɔɔ keeku nya pɛ tɛɛŋ, la malnaŋ haki fasɛi.” (Kolo. 3:​13) Sawala mandaala Chɛhowalaŋ la siŋgaŋ te. Lelaŋ, ŋ nɔ miŋ diikuŋ sawa mandaa cho o Lɛvitikɔɔ 19:​18 niŋndo.

15. Tamaselii kuɛɛ mala yɛ naa miŋ bii nyɛ o sim le miŋ mal waŋndo haki, nduyɛ ŋ kɛsiŋ suɛi nduɛi nɛiyaŋ nde o kɔl te wo bila?

¹⁵ Ŋ tuunuŋ ndɔ ndi naa. Sɔɔŋ wɔɔŋ waŋnda tosal naa woŋ cho ko mɛɛ pauwo wa nuaa yɛ. Pauve ipum wa i pɔmbɔ kɛ ipum wa i bɛndu. Le tamaseliiyo, ŋ dimi wɔ maa waŋndo cho lam ndo kioŋndo mbo boliŋ nyɛɛmbɔ. I wa tɛtɛlɛ le mbo puɛɛnuŋ a pau koŋ okɔɔ kanifuule, te paaleŋ le pilɛ ɔɔ i ŋiiŋ hiou pɛ, o sina lɛ pɛŋ naa o boliŋ nda le. Kɛ te o wa yɛ mi waŋndo wa fɛɛyaa okoŋ mbo lɔwaŋ tau, nduyɛ maa mɛɛ mi wana chiɔuwaa sɔndu pau koŋ? O kpeekpei niŋ, o keleŋa keŋ puɛɛnɔŋ te, nduyɛ mbo wa yekeŋ yɔŋii o tindi pau koŋ. O nɛi pilɛ koŋ choo, sɔɔŋ waŋnda tosal naa woŋ ŋpum tɛɛmbuu naa ko kɔl tau le. Le tamaseliiyo, mi chaaŋ naa dimi ɔɔ tosa isɔɔ i tɛɛmbuu naa kɔllo ve, mii wa tɛtɛlɛ le miŋ mal ndu haki. Kɛ te o wa yɛ mbo tosal naa suɛi tɛɛmbuu naa kɔllo tau ve? Mi hei tosa miŋ wa yiyaŋndo teleŋ o teleŋ a mɛɛ suɛi o tosal naa ve tɛɛmbuu naa kɔllo yɛ, nduyɛ miŋ saŋga tau o kɔllo niŋ. O kpeekpei niŋ, mi wana kɛsiŋ sɔɔŋ nɛiyaŋ ndoŋ o kɔllo saŋga tau. Lelaŋ, i cho bɔɔ suɛi sɔvɛ le miŋ diikuŋ sila cho o Lɛvitikɔɔ 19:​18 niŋndo.

16. A mɛɛ Lɛvitikɔɔ 19:​33, 34 dimi yɛ, vɛɛ Chɛhowa ndoo yeema yɛ mi Isɔluɛiya ndaa bii mialaa wa nda tɛɛŋnda, nduyɛ yɛɛ naŋ pɛɛku yɛ o hei niŋ?

¹⁶ Mɛɛ Chɛhowa ke Isɔluɛiya sawaa le ma kaala chaaŋaa ndaa, ndoo yiyaŋ naa maa ndapila Isɔluɛiya tɛɛŋ kinɛi le ndaa nɔ ma chɔm kaalaa hoo le. Ndaa nɔ vɛlɛ mi ndaa kaala mialaa wa nda tɛɛŋnda. Hei chɛlaŋ a nyɛ dimiŋ o Lɛvitikɔɔ 19:​33, 34 niŋndo. (Nuawɔ.) Chɛhowa ndoo yeema mi ndaa bii wanaa lekaawa mɛɛ ndaa bii ‘ndapila Isɔluɛiya’ yɛ. Nduyɛ ndaa nɔ vɛlɛ mi ndaa ‘kaala nda’ mɛɛ ndaa kaala ndapila yɛ. Le tamaseliiyo, ndaa nɔ ma chɛl mi wanaa lekaawa a wanaa bala fonduaa wa nda tɛɛŋnda nuuviaa nyɛdiaa o chiɔɔŋ ndaŋ niŋ. (Lɛvi. 19:​9, 10) Naa Kilisiɔŋnda hau bɛɛ,  ŋ nɔ miŋ chɔm wanaa lekaawa kaalaa. (Luku 10:​30-37) Vɛɛ naŋ tosa yɛ hei? Waŋnda o miiliɔŋndaŋ niŋ cho hau lɛŋii ndɛi malɔɔ ma kua o fondaŋnda cheleŋ. Nduyɛ naapum apum cho num ikɛi. I cho bɔɔ suɛi sɔvɛ le miŋ chaa waŋnda haa biyɔɔ, nduyɛ miŋ ke nda bɛɛleŋ.

17-18. (a) Yɛɛ Lɛvitikɔɔ 19:​2 a 1 Pitɛ 1:​15 dɛɛniaa yɛ naa le tosaa? (b) Wali sɔvɛ sɔvɛ kuɛɛ kiilanɔɔ Pitɛ dɛɛniaa yɛ naa le tosaa?

¹⁷ Lɛvitikɔɔ 19:​2 a 1 Pitɛ 1:​15 dɛɛniaa wanaa Mɛlɛkaa kpou le ma wa a diandaa. Sɔɔŋ bɔɔbɔɔ cho o Lɛvitikɔɔ 19 niŋ, ŋ naŋ nɔ miŋ tosa le mi Chɛhowa naŋ kɔl a naa woŋ. Ŋ yaasiaa sɔɔŋ bɔɔbɔɔ o bolle Baabuileŋ niŋ, ŋ naŋ nɔ miŋ tosa woŋ a ŋ naŋ nɔ miŋ fafaŋndoŋ. * Bolii Baabui maKilikiiye bɛɛ chɔm naa maa, Chɛhowa yeema wɔ miŋ dɔu sawala mandaala cho o bolii Baabuiye hei niŋndaŋ o wali niŋ. Kɛ mi kiilanɔɔ Pitɛ chɔɔlu vɛlɛ nyɛ cheleŋ dimi.

¹⁸ Mi che bɛɛ ŋ cho Chɛhowa piɛiyo, nduyɛ miŋ tosal acheleŋnda sɔɔŋ kɛndɔŋ, kɛ mi Pitɛ dɛɛniaa naa vɛlɛ le miŋ tosa nyɛ cheleŋ. Tuupa mbo dɛɛniaa naa le miŋ wa a diandaa o kaala naalaŋ niŋ, mbo dimi aa: “La bɛɛndiaa kɔlta nyalaŋ le wallo.” (1 Pitɛ 1:​13, 15) A wali yɛɛ okɔɔ o wa yɛ suɛi? Mbo dimi maa pɔmbuaa Chiisuaa nɔ ma “dimul waŋnda ba o ba fee a mɛɛ [Mɛlɛka] cho wana kɛndɛ yɛ” okɔɔ. (1 Pitɛ 2:​9) Nduyɛ pɛŋ, Kilisiɔŋnɔ kɛ kɛ nɔ dikeŋnaŋndo le wali sɔvɛ sɔviɔɔ hoo tosaa. Nuawɔ se dikeŋnaŋ bɛndu naŋ nɔ le yooŋgu kɛndɔɔ dimioo a waŋnda pɛɛkoo teleŋ o teleŋndo! (Maki 13:​10) Te ŋ tosa pɛ o naŋ tiuba wo le sawala mandaala cho o Lɛvitikɔɔ 19 niŋndaŋ dɔwɔɔ o wali niŋ, mɛɛ ŋ cho chɔm maa ŋ kaala Mɛlɛka a wanaa naŋ chiɛɛliaŋnda. Nduyɛ ŋ cho vɛlɛ chɔm maa ŋ yeema miŋ wa a diandaa o kaala naalaŋ niŋ.