Mi Sɛɛti dimi aa, * “Naa laa nuu, mi wallo hialuŋ naa a teleŋ pilɔɔ kpe. Le wɔsilaŋ la tiɔɔŋ, yuŋgu naa wa naa nyɛm pɔm pɔmbɔŋ kioo, nduyɛ ŋ wa wali walileŋ keiyo tosaa. Yɛɛ wa yɛ fulamakɔɔlioo? Mi Pilisila laa ni tambu kɔllo tau, nduyɛ mi ya bɛɛ simnuŋ wana fondoo fuu.

“Vɛɛ naŋ looku yɛ biunɔŋ? Lɔɔlɔɔ mi Pilisila ndoo loonuŋ diomnda Chiisulaŋ o Maatiu 6:34 niŋ. Mi Chiisu dimi loŋ maa ŋ nɔ miŋ buulaŋ a siɔdii okɔɔ le, kanifuule, paale o paale nɔ buulaŋndo o ndɔɔ. Nduyɛ mi piɛile o wa o kɔllo niŋ di leŋ le ke ndu yoomuaŋ le hiowɔɔ lachi a biuwɔŋndo. Le ya ndu, Sam 55:22 dɛɛniaa ya kɔllo ni. Maa wana soliaa ŋchondoo, mi nyindu Chɛhowa buulaŋnda ni laŋ kpou choo. Nduyɛ mi cha maa mbo mala ya. Mi che bɛɛ I sɔla niŋ wallo, kɛ ŋ kɛsi yoomu naa tɛtɛlɛ, a mɛɛ Chiisu sila o Maatiu 6:20-22 niŋ yɛ. I hiou kpou ve, ŋ sɔɔŋguu Mɛlɛka ikɛi kpɛɛluŋ a naapila tɛɛŋ bɛɛ.”

Mi Chonataŋ dimi aa, “Mi buulaŋ tau a chilaŋ mɛɛ yulale pɔmbɔ yuŋgu naa le del. Le mɛɛ nyɛsɔlaa lepɛŋndo wa o lɛŋndeŋ niŋ yɛ, mi nyɛsɔlaa naŋ tosa wallo kekelee le wɔsilaŋ 20 ndo kuaŋnuŋ o hueiye niŋ. Mi naa wɛɛŋ nuu kandu sɛɛŋgiaŋndo a nyɛsɔlaa okɔɔ. Naŋ nɔla nyɛ piondɔɔ a kaadii wana piinduu nyɔɔŋ ndo le. Kanifuule, kanii ve lɛ o kaadii koŋ choo le.

“Kɛ mi Diom Mɛlɛkaa a nyina ndɔ diandaa mala naa le kɛɛsiaala kɛndɛlaŋ tosaa. Mi pɛɛku le wali o wali tosaa, nduyɛ miŋ pɛŋgi bɔnɔla fondolaŋ luɛiyɔɔ. Miŋ sɔla vɛlɛ malaa chaaŋaa naa Seiyaa Chɛhowaa o ba. Ma kuundiaa bɛɛle naaleŋ nduyɛ ma mala naa o teleŋ nyɔɔ ndoo kendu tau wo bɛŋgu.”

Mi Lakɛl dimi aa, “Mɛɛ pɔnɔ nuu kɛɛ ya, mi kɔllo tambu ya nduyɛ mi tuulu kɔl. Mi yɔŋnuŋ yɔluŋ bɛndoo pila. Kɛ mi sɔɔŋguu Mɛlɛka ikɛi kpɛɛluŋ nduyɛ mbo nyɔɔlu ya kɔllo. Mɛɛ ya wa muliŋndo o Mɛlɛka lo lɔɔlɔɔ o piɛileŋ niŋ, mi kɔl ndɔ nyuloo manda kɔl nuu. Mi cha ndi maa mbo dɛɛniaa kɔl ni laasiɛiyo.

“Nduyɛ kɛɛsɔla Diom ndɔɔ le, ndu cho ni maa Baabuiyo. O mala ya mi yam kɔl tuuwo a maa miŋgiaa. Mi kɛsiŋ nyɛ Pɔɔl dimi Luomaŋnda 12:21 wo o kɔl. Ndu cho ni, ‘La chɛl mi yɔŋ wɔɔŋndo yem nya le. La tosa dɛnɛ kɛndɔɔ le dɛnɛ wɔɔŋndo yomɔɔ.’”

“Mi chaaŋ ni kɛndɛ pilɛ mala ya le mi che yeemɛi le hiouwɔɔ lachi. Mbo chɔm ya Ikilisiaatii 3:6, nduyɛ mbo dimul la o lebɛɛ niŋ maa teleŋndo cho le mi ‘nyɛ o nyɛ laasiaŋ.’ Sila kala kalaa pila o wa ni, kɛ ndu yaa yeema ni. Suŋ suŋ niŋ I nɔ kpeleŋnda sɛnɛilaŋ o yoomu nuu niŋ.”

Mi Elisabɛɛ dimi aa, “Te nɔ numndo puusiaŋ pɛ, a yeema malaa. Mi sɔla chaŋyɛi kɛndɛi i ke ya mala koŋ lepaa o lepaa wo. Mbo chaŋ latulu a ya, mbo dɛɛniaa ya kɔllo, nduyɛ mi sina maa o kaala ya. I laalaŋ kɛsɛ maa Chɛhowa soliŋ ndu kpeku ni le boolɔŋnda nilaŋ siŋgioo ya o kɔl.”

Luwisi naŋ soo a ndu okɔɔ o buŋgɛi tasei niŋndo ndoo nɔ naa kɔl wɔɔŋ wɔɔŋndo. Nduyɛ mi piɔmndo biandu ndu bɛmbɔɔ le diiŋ. O nɔ niŋ mbo wa o maasii mala wana yoomoo wo bɛŋgu le havɛilaŋ 16 o paaleŋ niŋ. Mbo dimi aa, “Mɛɛ ya piɛi o Mɛlɛka lo, mi sinaŋ  maa nyina ndɔɔ ke ya kpaayaa. Piɛileŋ le ke ya kɔl sikpaa ni le biuwɔŋndo kanifuule, I nɔ laalaŋndo o ndu niŋ nduyɛ I sina maa o buulaŋ le ya.”

Mi wɛɛŋ pum diolaŋ Petila, o cho niŋ o wɔsila 80 laŋ niŋndo dimi aa, “I yeema mi tosa nyɔɔŋ tau, kɛ I tiu lɛ ba le. Yoomuma niaŋ chɔɔ dɔɔnaŋndo cho bɔɔ suɛi kala. Yoomuleŋ bɛɛ I nɔ lɛ le, koowaŋ kinɛi ya tiindaŋ niŋ ni. Lɔɔlɔɔ mi yiyaŋ a nyɛ Chiisu ndoo nyuna Finya ndɔ le tosaa wo, maa te o bɛnda pɛ, boondii kalɛi keŋ i hiou ndu choo. Kɛ mi Chɛhowa ke Chiisu yoomuaŋ. Nduyɛ ya bɛɛ mbo ke ya yoomuaŋ. Piɛileŋ le cho kooma ya mial lepaa o lepaa wo ni. Mi sinaŋ nyɛkɛndɛi te I soo pɛ o Mɛlɛka lo.”​—Maatiu 26:39.

Chuliaŋ wa chɔulabaa a naa manyɛsoo le suɛi wɔsila 30. Lende koni ndu bɛɛ yiyaŋ ni. Mbo dimi aa, “I siŋga kpeŋgbei lemasaa le kpeŋgbei namtaa. Kɛ yoomu nuu cho o sɔvɛ kanifuule, I yɔŋgu ndu le acheleŋnda malaa. Waŋnda nyɔɔŋ kioo dɔɔniaa num nyɛpalaa choo. Nduyɛ, Chɛhowa lo o lediom le naa yoomuaŋ kioo o teleŋ naŋ hau ba wo niŋ. Maa kiilanɔɔ Pɔɔl, I nɔla miŋ dimi kɛsɛ aa, ‘Kiliti ke ya kpaayaa le mi nɔla mi keeku o isɔɔ o isɔɔ niŋ.’”​—Filipiaŋnda 4:13.

Mi Antonioo dimi aa, “Mɛɛ mɔmbillo kundu finya nuu mbo wu, o tase ndɔɔ yaa laalaŋ te. Keŋ ve suɛi kɛndɛ kposoŋ te. Kɛkɛ ndoo nɔ di. O nɛi wanaa kua a ŋpelu wa choo o wa kɔlaŋ ni. Kɛ yaa nɔ nyɛ o nyɛ ya tosa le. O wa o sondo kumbaa niŋ le palɛi i ŋuɛɛnu tuupa mbo wu. Mi kɛɛ le chaŋndo kala nuu o hɔl. Kɛ te yaa wa pɛ yapilɛ kpeele, I buli a chaŋndo bu. Mi yaa lambaŋ yapila nyunaŋndo aa ‘Le yɛɛ hei yɔŋnuŋ yɛ? Le yɛɛ?’

“O boondii kɔl tambɛi keŋ bɛŋgu, mi lambaŋ Chɛhowa nyunaa le mbo mala ya mi tiu yiyaŋnda nilaŋ ba nduyɛ mbo ke ya kɔl nyuloo. Nduyɛ mi sinaŋ maa kɔllo kandu ya challe o pɔmpɔmbɔ. Mi loonuŋ nyɛ Baabuiyo dimi wo maa ‘suɛi naŋ ve kɔl tei’ yɔŋnuŋ naa kpou. Le mɛɛ Mɛlɛka dimi lachoo le yɛ, I nɔ tiindaŋndo maa I cho vɛlɛ finya nuu chɔ a teleŋ fulasɛiniŋndo.”​—Ikilisiaatii 9:11; Chɔŋ 11:25; Taitɔɔ 1:2.

Lɔbɔti naŋ soo a ndu okɔɔ o buŋgɛi tasei naŋ niŋndo bɛɛ, yiyaŋ pilɔɔ kpe ndoo nɔ ni. Mbo dimi aa, “Mi naa wɛɛŋ nuu sinaŋ kɔl nyulu Filipiaŋnda 4:6, 7 dimi wo naa o lakɔl. Piɛileŋ o Chɛhowa lo tosa ni miŋ sɔla ndu. Kɔl nyuloo hoo mala naa ni le suɛi o wanaa dimiaa lakonaa lo a tiindaŋ naŋ nɔ le fulasɛiniŋndo wo okɔɔ. Mi che bɛɛ naa mi dɛndɛ choo dii po naa, kɛ miŋ yiyaŋndɔ a teleŋnda kɛndɛ naŋ tosa sɔɔŋ diompilɛ laŋ. Miŋ kindiŋ le kɔllo handɔɔ o laŋ choo.

“Mɛɛ chaaŋaa naa Seiyaa Chɛhowaa dimul naa maa a che niŋ naa tiindaŋ naa tɛɛsiaa nyɛkɛndɛi o tɛlivisiɔŋndo choo, miŋ dimul nda maa o cho fuu le, ŋ yil nya nuwali le piɛile nya piɛi tau le naa wo. I laalaŋ kɛsɛ maa Chɛhowa wa naa malaa a diomnda kɔl dɛɛniaala nda wa naa dimullo laŋ.”

A mɛɛ tamasila naŋ hiou laŋ ndaŋ la chɔm yɛ, Mɛlɛka nɔla mbo dɛɛniaa wanaa bahawɛila teŋgeŋ teŋgeŋndaŋ la komal la. Kɛ num yɛ? Kpundɛ o kpundɛ komal num o yoomoo niŋ, kɔl dɛɛniaa cho o mala num ma biunuŋ nyɛ kindilaa wo. * Lelaŋ, vɛ a muliŋ o Chɛhowa lo le malaa le? Ndu cho Mɛlɛka “nyɔɔlu naa kɔltaŋ niŋ ndo ni.”​—Kɔliŋtiaŋ Diiŋ Ndɔɔ 1:3.