1, 2. A yɛɛ okɔɔ feleŋguaa cho Chɛhowa piɛiyo wa yiyaŋ yɛ lepum? Nduyɛ sila yɛɛ Baabuiyo ke yɛ nda?

NDEPILƐNƆ feleŋgɔnɔ pilɛ o Bilitiŋ niŋ, mi chaaŋ ndɔ nda cho o toŋgo pilɔɔ niŋ o sukuu w o dimul ndu aa, “A cho bɔɔ wana kɔl kalu le laalaŋndo o Mɛlɛka niŋ.” Mi puaapilɛnɔɔ o Chamani niŋ poonyiaa aa, “Wanaa niaa pɛɛkaa o sukuu che bundɛi Baabuiyo a nyɛm Mɛlɛka toosiaa woŋ maa bundɛi lachoowɛi i cho ni. Nduyɛ ma dimul sukuuwa le ma laalaŋ maa nyɔɔŋ a ba ndɔ ŋ hiŋ ni.” Mi ndepilɛnɔɔ o Filaŋsi niŋ dimi aa, “Kɔndɔfillo cho wɔ wanaa niaa pɛɛkaa o sukuu ya kua wo le mɛɛ nda che maa sukuuwa apum laalaŋ ndɔ o Baabuiyo niŋ yɛ.”

² Wanaa bɔɔbɔɔ hau a laalaŋ maa Mɛlɛka le toosiaa naa le. Te feleŋgɔnɔ cho Chɛhowa piɛiyo wo ŋ cho ni, ɔɔ pɛɛkoo ŋ cho wɔ a ndu okɔɔ ni, ma yiyaŋ lepum mɛɛ ŋ looku niŋ ma dimul nda maa ndu cho Wana toosiaa nyɔɔŋ ndo ni. Baabuiyo mala naa le miŋ wa yekeŋ a nyɛ naŋ tuɛiyo, ɔɔ nyɛ naŋ nua o yaulaŋ niŋndo, nduyɛ miŋ yiyaŋ lechoo. Diom Mɛlɛkaa dimi aa, “Kɔl kalu numndo a sina num pɛŋgoo, la wa niŋ num mandaa ni.” Vɛɛ hei yɔŋnuŋ yɛ? O mala num ma kɛɛ yiyaŋnda cho tonya le laŋ nduyɛ ma kindi tiindaŋ numndo o Chɛhowa niŋ.​—Nuawɔ Pulɔwaa 2:10-12.

3. Yɛɛ naŋ cho yɛ yaasiaa o buŋgɛi hei niŋ?

³ Le miŋ nɔ tiindaŋndo o kala poŋ o Chɛhowa niŋ, ŋ nɔ fɛŋ miŋ  sina ndu nyɛkɛndɛi. (Timoti Tasoo 2:4) Lelaŋ, te a wa pɛ diomndaŋ veeloo o Baabuiyo niŋ a yaula naalaŋ, i cho suɛi sɔvɛ le ma pɛŋgi tiŋ ma yiyaŋ a nyɛ dimiŋ koŋndo okɔɔ. Kindiŋ ma bii nyɛ ŋ cho nuaa wo bila. (Maatiu 13:23) Te a pɛɛku pɛ o nɛiyo hoo choo, a cho sɔɔŋ chɔ tau le chɔmndo maa Chɛhowa cho Wana Toosiaa nyɔɔŋ ndo ni, nduyɛ maa o ndu lo Baabuiyo chɛŋ ni. (Hibuluiya 11:1) Ŋ yaasiaŋndɔ mɛɛ naŋ tosa hei yɛ.

4. O nɛi kuɛɛ choo laalaŋndo maa nyɔɔŋ a ba ndɔ ŋ hiŋ a laalaŋndo maa Mɛlɛka toosiaa nyɔɔŋ ni cho yɛ nyɛ pilɛ? Lelaŋ, yɛɛ naa kpou nɔ yɛ miŋ tosa?

⁴ Mi waŋndo dimul num dɔɔ aa, “I laalaŋ maa nyɔɔŋ a ba ndɔ ŋ hiŋ ni kanifuule, wanaa sinaa dɛniaa bɛnduaa dimi maa tonya i cho ni. Vɛɛ ŋ laalaŋ yɛ o Mɛlɛka wana o wana chi wɔ hoo le wo niŋ?” Naa waŋnda apum yiyaŋ ni. Tonya, wana o wana chi wɔ Mɛlɛka le kɛlɛŋgaa niŋ te ma che ndu o nyɔɔŋ toosiaa. (Chɔŋ 1:18) Kɛ wanaa laalaŋ maa nyɔɔŋ a ba ndɔ ŋ hiŋ ni wa yɛ? Nda bɛɛ nyɛ nda chi le wo nda laalaŋ ni. Wana sinaa dɛnɛ bɛndoo ɔɔ wana chiee o wana chiee chi wɔ mi nyɛ yoomaa kɛ kɛ fula o nyɛ yoomaa cheleŋ niŋ te. Le tamaseliiyo, wana o wana chi wɔ mi kɛuwo maŋgalaŋ tɔmndo le. (Choobu 38:1, 4) Lelaŋ, naa kpou nɔ miŋ tofa nyɛ cho tonyaa wo, miŋ yiyaŋ nyɛkɛndɛi a ndu okɔɔ, okoŋ, miŋ kɛɛsiaa le o cho tonyaa wo. Wanaa bɔɔbɔɔ tofa niŋ nyɛm cho naa ŋ balaa woŋ, okoŋ ma “sina pɛŋgu” maa Mɛlɛka cho. Ma “sina walaŋ” maa Mɛlɛka cho Wana Toosiaa muŋndo ni, maa o nɔ kpaayaa, a suiliŋnda kɔndɔfiltaŋ tau.​—Luomaŋnda 1:20.

5. Nyɛm yaasiaa kuɛɛ mala yɛ naa le chɔɔloo sinaa a nyɛm Mɛlɛka toosiaa woŋ okɔɔ?

⁵ Te ŋ tofa pɛ nyɛm cho naa ŋ balaa woŋ nduyɛ miŋ yiyaŋ a muŋ okɔɔ nyɛkɛndɛi, miŋ che maa muŋ kpou o kɔndɔfili bɛndoo niŋ ŋ toosiaŋ ni. “Tiindaŋndo nɔɔ tosa ni mi ŋ bii ndi tonya” maa Wana Toosiaa cho, mi che bɛɛ ŋ chi ndu le. Miŋ sina maa o nɔ suiliŋnda kɛndɛ kɛndɛlaŋ a taasi bɛndoo. (Hibuluiya 11:3, 27) Ŋ chɔɔlu pɛɛku a nyɛm o toosiaa woŋ okɔɔ, te ŋ wa pɛ yaasiaa tosaa a nyɛm wanaa pɛɛku a nyɔɔŋ okɔɔ wa saaluŋ ndoŋ. Ŋ saaluŋ yooŋgulaŋ ndaŋ o nyɛm mala naa le yaasiaa woŋ niŋ. Ŋpum cho muŋ ni, vidueiyo yo hoo, “The Wonders of Creation Reveal God’s Glory”, buluchɔɔlaŋ ndaŋ, “Was Life Created?”, “The Origin of Life​—Five Questions Worth Asking”, a yauwo hoo, “Is There a Creator Who Cares About You?” O yaula “Tiondoo!” niŋ, lepum ma nyuuniaa wanaa sinaa dɛnɛ bɛnduaa a wanaa cheleŋnda leniŋ a tɛɛsiaa le sabu nda laalaŋ niŋ suŋ suŋ o Mɛlɛka niŋndo. Nduyɛ o buŋgaŋ ŋpum niŋ diolaŋ, “Was It Designed?” ma tɛɛsiaa a visiaa okɔɔ vɛlɛ a nyɛm cheleŋndoŋ, nduyɛ a mɛɛ wanaa pɛɛku a nyɔɔŋ okɔɔ wa kindiŋ niŋ le tuulaa mɛɛ nyɔɔŋ muŋ tosa wallo yɛ.

6. Vɛɛ wolɔɔla yaasiaalaŋ la mala yɛ num?

⁶ Mi puaapilɛnɔɔ o Amɛlika niŋ wɔsilaŋ 19 dimi a buluchɔɔla tiɔɔŋ naŋ laŋga soo okɔɔ laŋ aa, “Yaulaŋ ndaŋ la cho bɔɔ nyɛ sɔvɛ le ya. I pɛɛku niŋ ndaŋ daandi daandi.” Mi ndepilɛnɔɔ o Filaŋsi niŋ dimi aa, “Mi buŋgaŋ dimi muŋ aa ‘Was It Designed?’ ndoŋ luei ya kɔndɔfillo! Mi buŋgaŋ muŋ chɔm maa wanaa bɛnduaa toosiaa nyɔɔŋ nda, tuulaa koni nda tuula ni, kɛ fɛɛŋ bɛɛ nyɛm nda toosiaa woŋ nɔla miŋ sulaŋ a nyɛm kɔndɔfili Mɛlɛka toosiaa woŋ te.” Mi kalaŋ chuauwaa chuaambɔ  wɔsila 15 wo o Saut Afilika niŋ dimi aa, “Nyɛ tase chua naa nua o yau “Tiondoo!” niŋndo cho buŋgɛi soo a ‘Nyuuniaalaŋ’ okɔɔ ve ni.” Num bɛɛ yaulaŋ ndaŋ la mala num ma che tonyaa walaŋ maa Wana Toosiaa cho. Nduyɛ, a nɔla ma sina pɛɛkula lachoowalaŋ pɛŋgu, okoŋ, ma kɛɛ laŋ. Tiindaŋ numndo cho chɔɔlu kalu poŋ ma simnuŋ maa yɔm puunduŋ ndɔŋ luɛi lɛŋ di woŋ, nduyɛ o yɔŋ bɛɛ mi hueiyii fuku fukuei hɔŋ, o del te.​—Chɛluimaya 17:5-8.

7. Le yɛɛ Mɛlɛka yeema yɛ num ma soliŋ kɔl kalu numndo kpeku?

⁷ I cho pa suɛi wɔɔŋ le nyunaa aa, ‘Le yɛɛ ya laalaŋ yɛ nyɛ Baabuiyo dimi wo?’ Sako bɛɛ. Chɛhowa yeema num ma laalaŋ nyɔɔ le mɛɛ acheleŋ laalaŋ ndu yɛ le. O yeema num ma soliŋ kɔl kalu numndo kpeku le Baabuiyo sinaa, nduyɛ ma sina nyɛ chɔm maa o ndulo o fula ni wo. Mɛɛ ŋ sina nyɛ o dimi wo fau, lende koni tiindaŋ numndo o ndu niŋ chɔɔlu kalu ni. (Nuawɔ Luomaŋnda 12:1, 2; Timoti Tasoo 2:4.) Nɛiyo opilɛ le Baabuiyo sinaa cho ni, hɛlioo suɛi kulii ŋ yeema ma chɔɔlu sina a ndi okɔɔ ve, okoŋ, ma pɛɛku ndi.

8, 9. (a) A sɔɔŋ kuɛɛ okɔɔ apum yeema yɛ pɛɛkoo? (b) Vɛɛ apum sɔla yɛ tɔnɔɔ mɛɛ nda yiyaŋ o nyɛ nda pɛɛku wo choo?

⁸ Apum yeema pɛɛkoo a sɔɔŋ Baabuiyo dimi le yɔŋnɔŋndo woŋ okɔɔ. Te koŋ te, ma yeema tuuwo bundɔŋ Baabuiyoŋ a nyɛ wanaa pɛɛku a sɔɔŋ paandoŋ ɔɔ sɔɔŋ cho yɔŋnɔŋndo woŋ, wanaa pɛɛku a nyɔɔŋ okɔɔ wa, a wanaa tuau nyɔɔŋ lɛŋ nda dimi wo. Chua wɔ tamaseliiyo a Chɛnɛsee 3:15. Mɛɛ Adama nda Ifi tosal dɔɔ Chɛhowa nila kalulaŋ ma simul kpaaya ndɔ lemasaa, mi Chɛhowa dimi nyɛ cho o bolle Baabuileŋ ndeŋ niŋndo. O sɔɔŋ bɔɔbɔɔ Baabuiyo dimi le yɔŋnɔŋndo woŋ tɛɛŋ, ndi wa suɛi tasei ni. I mala naa le sinaa mɛɛ Masale Mɛlɛkaleŋ le chɔm maa Mɛlɛka cho masa kɛndɛ yɛ, nduyɛ a mɛɛ le cho hunɔɔ nyɛpalaa faŋa yɛ. Vɛɛ ŋ pɛɛku yɛ Chɛnɛsee 3:15? A poonyiaa bolii Baabui cheleŋ o yau choo i chɔɔlu tɛɛsiaa vɛ vɛ a mɛɛ suɛi hei nɔ le peelɔŋndo yɛ. Te a poonyiaa pɛ, yaasiaa vɛlɛ ma sina teleŋ bolii Baabui keŋ poonyiaŋndo, okoŋ, ma hɛɛnduu ndi chɛ chɛ o lepula. A cho suŋ sina maa wanaa poonyiaa Baabuiyo wa poonyiaa ndu o teleŋ pilɔɔ niŋ te. Kɛ maa mi nda kpou poonyiaa nyɛ tosa mi sɔɔŋ dimiŋ ndoŋ wa walaŋ walaŋndo. Hoo mala num ma sina maa nyina diandaa Chɛhowaa wa nda nɛiyo chɔmndo ni.—Pitɛ Diiŋ Ndɔɔ 1:​21.

⁹ Mi puaapilɛnɔɔ o Chamani niŋ yiyaŋ a mɛɛ yau o yau o Baabuiyo niŋ tɛɛsiaa vɛ vɛ Masale Mɛlɛkaleŋ yɛ. Mbo dimi aa, “Lende i cho ni, mi che bɛɛ puaa le 40 poonyiaa Baabuiyo ni. Nduyɛ a bɔɔbɔɔ ve o boondii pilɛi niŋ te. Ndaa siiniaŋ vɛlɛ vellaa velle le.” Mɛɛ ndepilɛnɔɔ o Ɔsiteliaa niŋ wa buŋgɛi o Bandu Mɛŋgɛlaa niŋ pɛɛkoo, mbo cha mɛɛ Hiou Ya Choo Wo a nyɛ Chɛnɛsee 3:15 dimi a Mɛsayanɔɔ okɔɔ wo cho nyɛ pilɛ yɛ.  ^[1] (Tofa diomnda chɔɔlaalaŋ.) Mbo poonyiaa aa, “Mi pɛɛku koŋ kumbi ya hɔltaŋ le sinaa mɛɛ Chɛhowa cho Mɛlɛka kɔndɔfili yɛ. Le mi waŋndo tosa kɛɛsiaa waa ndoo le Isɔluɛiya nduyɛ mbo peeluŋ o Chiisu niŋ pilaŋ ya bɔɔ kɔllo. Lepum mi challɔ kpɛ mi yiyaŋ mɛɛ nyɛdiaa Hiou Ya Choo Wo wa nyɛ kɔndɔfili yɛ!” Le yɛɛ ndepilɛnɔɔ hoo yiyaŋ yɛ lende? Mbo yiyaŋ yiŋgoloŋ a nyɛ o pɛɛku wo nduyɛ mbo bii ndu bila. Hoo mala ndu ni mbo kindi tiindaŋ ndɔɔ nduyɛ mbo sɔɔŋguu Chɛhowa ikɛi kpɛɛluŋ.​—Maatiu 13:23.

10. Vɛɛ sandii wanaa poonyiaa Baabuiyo wa kindi yɛ tiindaŋ naa o Baabuiyo niŋ?

¹⁰ Yiyaŋndɔ vɛlɛ a sandii wanaa poonyiaa Baabuiyo wa chɔmnde. Lɔɔlɔɔ tonyaa ndaa dimi ni, nduyɛ siooŋii ve nda le ndu dimi le. Wanaa poonyiaa o boondii keŋ niŋ, sɔɔŋ kɛndɔŋ kposoŋ ndaa poonyiaa a lɛŋnde ndaleŋ okɔɔ ni ɔɔ masaa ndaa. Kɛ wanaa ndaa suaa le Chɛhowa wa nda, o cho ko a sɔɔŋ kɛndɔŋ okɔɔ le nda poonyiaa le, kɛ ma poonyiaa vɛlɛ a sɔɔŋ wɔɔŋ waŋnda Isɔluɛi a masaa ndaa  tosa woŋ okɔɔ. (Koloniko Diiŋ Ndɔɔ 16:9, 10; 24:18-22) Ma poonyiaa pɛŋ a siɔwuŋ ndaŋ ndapilaŋ okɔɔ vɛlɛ a siɔwuŋ buɛiyaa Mɛlɛkaa cheleŋ. (Saamiɛɛ Diiŋ Ndɔɔ 12:1-14; Maki 14:50) Mi puaapilɛnɔ feleŋgɔnɔ pilɛ o Bilitiŋ niŋ dimi aa, “Sandii waa lende kendu chɔ. Hoo chɔɔlu naa laalaŋndo ke maa Chɛhowa lo kɛsɛ Baabuiyo fula ni.”

11. Vɛɛ nɛi chɔmaa naŋ sɔla o Baabuiyo niŋndo ke yɛ naa laalaŋndo maa o Mɛlɛka lo Baabuiyo chɛŋ ni?

¹¹ Te waŋnda chɛl pɛ mi Baabuiyo chɔm nda nɛiyo o yoomoo niŋ, ma che fulamakɔɔli kɛndɛ o nɔ wo. Mi hoo tosa ma laalaŋ maa o Mɛlɛka lo Baabuiyo chɛŋ ni. (Nuawɔ Sam 19:7-11.) Mi ndepilɛnɔ feleŋgɔnɔɔ o Chepaŋ niŋ poonyiaa aa, “Mɛɛ yuŋgu nuu wa silala Baabuiyo tolɔɔ kɔɔli, ŋ wa a nyaaloo tau. Kɔl nyuloo wa, diompilɔɔ, a kaalaa.” Baabuiyo mala niŋ wanaa bɔɔbɔɔ le sinaa maa sɔɔŋ ndaa laalaŋndoŋ ŋpum ve tonya le. (Sam 115:3-8) O mala waŋnda le ma dɔu tiindaŋndo o Chɛhowa niŋ, Mɛlɛka kpou kpou wo, nduyɛ o mɛi lediom le chila kɛndɛlaŋ. O baa opilɔɔ choo, apum a dimi maa Mɛlɛka cho le wa, siiŋguu nyɛm Mɛlɛka toosiaa woŋ mɛlɛkaa nda. Acheleŋnda nda dimi maa waŋchieeya nɔla ma tosa chila kɛndɛlaŋ. Kɛ te ŋ tofa pɛ nyɛ nda tosa niŋ ndo, a nɔla wɔ bahawɛilaŋ o chieeŋndo niŋ chii le.​—Sam 146:3, 4.

12, 13. Vɛɛ naŋ suaa yɛ o waŋnda lo a nyɛm Mɛlɛka toosiaa woŋ okɔɔ ɔɔ Baabuiyo?

¹² Te a wa pɛ suɛi a nyɛm Mɛlɛka toosiaa woŋ okɔɔ ɔɔ a Baabuiyo o acheleŋnda lo, kindiŋ fɛŋ ma sina nyɛ nda laalaŋ kpeekpeiyo. Kɛsiŋ o kɔl maa waŋnda apum a laalaŋ maa nyɔɔŋ a ba ndɔ ŋ hiŋ ni wa, laalaŋ vɛlɛ maa Mɛlɛka cho. A dimi maa ndu tosa ni mi nyɛm yoomaŋ kpou huŋ a ba ndɔ. Apum dimi maa nyɔɔŋ hunɔɔ a ba ndɔ tonya i cho ni kanifuule, ma pɛɛku ndi o sukuu. Nduyɛ mi a pum pɛŋgi laalaŋndo o Mɛlɛka niŋ kanifuule, a tambu kɔl a piɛiye. Lelaŋ, nyuna wɔ fɛŋ wana koŋ nyɛ o laalaŋ ndo nduyɛ le sabu o laalaŋ ndu wo. Okoŋ, ma yaŋ nilaŋ nyɛkɛndɛi o nyɛ o cho dimi wo. Te a tosa pɛ lende, o cho num chɔɔlu nilaŋ yaŋɔɔ.​—Taitɔɔ 3:2.

¹³ Te waŋndo dimul num pɛ aa diɔmndo ŋ cho ni le laalaŋndo maa Wana Toosiaa cho, vɛɛ ŋ cho yɛ muli? Nyuna wana kalaa a lebɛɛ mbo tɛɛsial num yiyaŋ ndɔɔ mɛɛ yoomoo kanduŋ yɛ. A dimul ndu maa te yoomoo ndoo maŋgaŋ pɛ, nyɛ yoomaa tasoo ndoo nɔla mbo kui a ba ndɔ. Nduyɛ, mi wana sinaa dɛnɛ pilɛ pɛɛku a nyɔɔŋ muuliaŋndo okɔɔ le nyɛ cheleŋ toosiaa wo dimi maa, nyɛ yoomaa koŋ ndoo nɔla mbo sɔla (1) kɔloo le ndu mandaa, (2) le kpaayaa sɔlaa mbo soliŋ ndu kpeku, (3) nyɛ mala ndu mbo naŋ nua nduyɛ mbo hindu wo, (4) le mbo tosa mi nyɛ koŋ kui. Mbo chɔɔlu dimi aa, “Mi kaamaa bii wana a mɛɛ nyɛ yoomaa taaniŋndo kendu bila biyɔɔ yɛ.”

14. Kɔl kalu tɛtɛlɛ kuɛɛ ŋ soliŋ yɛ kpeku te a wa pɛ suɛi a nyɛm Mɛlɛka toosiaa woŋ okɔɔ?

¹⁴ Te a wa pɛ suɛi a nyɛm toosiaŋ okɔɔ, a soliŋ kɔl kalu tɛtɛlɛ Pɔɔl soliŋ kpeku wo. Mbo poonyiaa aa, “Chiɛi o chiɛi cho o taŋgulaa, wana taŋgul ndu ni. Kɛ nduyɛ, Mɛlɛka yɛ, ndu toosiaa nyɛ o nyɛ fee ni.” (Hibuluiya 3:4) Tonya, chiɛi naŋ lɔl hoo leniŋndo, waŋndo tuu ndu ni mbo taŋgul ndu. Te o wa pɛ lende, mɛɛ a tonya kɛsɛ, nyaa yoomaa, a kendu toosiaa mbo hiau chiɛiyo wa, waŋndo tuu nda ni mbo toosiaa nda. A soliŋ vɛlɛ yaula naalaŋ kpeku. Mi ndepilɛnɔ pilɛ suukaŋ nda feleŋgɔnɔ pilɛ, o laalaŋ maa Mɛlɛka cho le wo. Mbo ke ndu buluchɔɔla naŋ soo okɔɔ suŋ ndaŋ. Mɛɛ lɔɔ opilɛ hiou, mi poo hoo dimi aa, “Suŋ suŋ niŋ I laalaŋ o Mɛlɛka niŋ.” Mi poo hoo kandu Baabuiyo pɛɛkoo. Okoŋ kɔɔli, mbo simnuŋ puaapilɛnɔ naa.

15, 16. Yɛɛ naŋ nɔ yɛ miŋ tosa tuupa miŋ tɛɛsial waŋndo maa o Mɛlɛka lo Baabuiyo chɛŋ ni? Nduyɛ yɛɛ naŋ nɔ yɛ miŋ kɛsiŋ o kɔl lɔɔlɔɔ?

¹⁵ Te waŋndo nɔ pɛ kiisaŋndo a Baabuiyo, vɛɛ ŋ suaa yɛ o ndu lo? A mɛɛ naŋ dimi o tase ndɔɔ yɛ, nyuna ndu fɛŋ nyɛ ndu laalaŋndo.  Nduyɛ, tosa ma sina nyɛ o hɛnaŋ ndo. (Pulɔwaa 18:13) Te a nyɔɔŋ okɔɔ o hɛnaŋ ni, chɔm ndu tamaseliiyo o Baabuiyo niŋ le sinaa maa nyɛ Baabuiyo dimi a nyɔɔŋ okɔɔ wo cho tonya. Te a sɔɔŋ paandoŋ ɔɔ sɔɔŋ cho yɔŋnɔŋndo woŋ okɔɔ o hɛnaŋ, a chɔm ndu suɛi ndii dimiŋ mii wa i poonyiaa o yaula ŋbundɔlaŋ niŋndo, nduyɛ ma chɔm ndu mɛɛ Baabuiyo ndoo dimi a suɛi keŋ okɔɔ sindɛ sindɛ niŋ tuupa mii yɔŋnuŋ yɛ. Mi wanaa cheleŋ yaŋ num nilaŋ te a chɔm nda pɛ o Baabuiyo niŋ nyɛ mala nda mi yoomu ndaa bɛnda wo, mɛɛ Pɛɛku Chiisoo o Pembei choo cho naa yɛ.

¹⁶ Loonuŋ maa ŋ yeema miŋ sɛɛŋgiaŋ a waŋnda le. Ŋ yeema nda ma tuei baltaŋ dɔuwɔɔ yeela a naa nduyɛ ma pɛɛku a Baabuiyo okɔɔ. Lelaŋ nyuna nda a lebɛɛ, okoŋ ma yaŋ nilaŋ yekeŋ. Te a wa pɛ laalaŋnda numndaŋ chɔmndo o waŋndo lo, tosa ndi a lebɛɛ, taama taama te wana koŋ cho num pɛ bɛndu. Te a ke pɛ acheleŋnda bɛɛleŋ, nda bɛɛ cho num bɛɛleŋ ke. Nyɔɔ cho nda hɛnaŋ tau le mɛɛ ŋ yiyaŋ fɛŋ yiŋgoloŋ a laalaŋ numndo okɔɔ yɛ mi che bɛɛ a cho wɔ chuaambɔ. Kɛ, te o wa pɛ aa sɛɛŋgiaa fondoo waŋndo yeema ni, ɔɔ le num mamɔɔ, a nɔ ma mulul ndu le.​—Pulɔwaa 26:4.

17, 18. (a) Yɛɛ mala yɛ num ma kindi laalaŋ numndo o Baabuiyo niŋ? (b) Nyuna kuɛɛ naŋ cho yɛ yaasiaa o buŋgɛi cho lachi ve niŋ?

¹⁷ Miŋ sina sɔɔŋ kulloŋ o Baabuiyo niŋ, kɛ ŋ nɔ miŋ chɔɔlu sɔɔŋ sina mbo hiou koŋ le tiindaŋ naa kindioo. Ŋ nɔ miŋ yaasiaa le miŋ saaluŋ tonya yiŋgoloŋndo o Baabuiyo niŋ, mɛɛ naŋ wa naa nyɛm baa kalaŋ touwɔɔ lɛŋ yɛ. (Pulɔwaa 2:3-6) Nɛi kɛndɛ kɛndɔɔ opilɛ o naŋ kindi tiindaŋ naa wo cho diomndaŋ veeloo o Baabuiyo niŋ kpou ni. Kɛlɛŋgaa a kindiŋ le ma chii diomndaŋ veeloo leniŋ o wɔsioo opilɛ bɛŋgu. Keŋ mala buɛi ibuŋga pilɛ ni mbo sɔɔŋguu Chɛhowa ikɛi kpɛɛluŋ teleŋ o wa o pɔmbɔ wo. Mbo dimi aa, “Nyɛ mala ya mi laalaŋ maa Baabuiyo Diom Mɛlɛkaa o cho ni wo cho diomndaŋ veeloo leniŋ kpou ni. Bundɔŋ Baabui ya pɛɛku teleŋ ya wa o pɔmbɔ wo, suŋ suŋ niŋ I che muŋ maa bundɔŋ kpeekpei yoŋ ŋ cho ni.” Nduyɛ, soliŋ wolɔɔla yaasiaa ŋ nɔ o suɛi maŋgalɛi numnde niŋndaŋ le ma bii nyɛ ŋ cho diomndaŋ veeloo wo bila. A tiuba ma sɔla Naa Bandu Mɛŋgɛlaa Kɛsi Yaulaŋ Nda o “DVD” yo choo, Naa Bandu Mɛŋgɛlaa Kɛsi Yaulaŋ O INTANƐTIIYO Choo Wa, “Watch Tower Publications Index”, ɔɔ “Research Guide for Jehovah’s Witnesses.”

¹⁸ Kalaŋ chuauwa, nya nɔ ni mi la pɛɛku chuauwaa nyaa a Chɛhowa okɔɔ, mbo hiau wana cheleŋ. Lelaŋ, vɛɛ nya mala yɛ nda ma nɔ tiindaŋndo o kala poŋ o ndu niŋ? Buŋgɛi cho lachi ve cho yaasiaa nɛilaŋ la tiŋ la nya tosa heiyo.