1, 2. Sɔŋga yɛɛ buɛiyaa Chɛhowaa cho yɛ?

BUƐIYAA laalaŋaa Mɛlɛkaa kpou a sɔŋga niŋ, chɔŋ a wana laalaŋndo Ebɛl mbo huŋ bii a wanaa chɔm hau lolechoo wo wa. Mi kiilanɔɔ Pɔɔl dimul Kilisiɔŋaa Hibuluiya maa ma ‘sɔla dɛnɛ palaa tau, kɛ, ma biuŋ.’ Mɛɛ nda kindiŋ le mi Chɛhowa hini kɔl a nda, mbo duau nda sala. (Hibuluiya 10:32-34) Mi Pɔɔl tuu sɔŋga Kilisiɔŋnda cho wo a pisulta maKilikiilaŋ sindɛ, mɛɛ nyaanɔŋndo cho naa yɛ, sɔŋga ŋbuŋndo, a sɔŋga la bɔtaa. (Hibuluiya 12:1, 4) Hau, ŋ cho nyaanɔŋndo le yoomoo. Nduyɛ, ŋ nɔ yaamɔɔwa a yeema ma hiŋ naa hɔlla wa, halikpe miŋ tambu kɔl suŋ suŋ, nduyɛ mi fanda cho le naa o chilaŋ niŋndo hɛluŋ naa.

² Sɔŋga kala kala naŋ cho wo cho a Setana vɛlɛ a chieeŋ ndɔɔ ni. (Ɛfisiaŋnda 6:12) I cho bɔɔ suɛi sɔvɛ le miŋ fafaŋ pɛɛkula chieeŋndo hoo, sɔɔŋ ndɔŋ kɔl kaloŋ, a sɔɔŋ wɔɔŋndoŋ, mɛɛ niilu nɔɔlɛiyo cho naa yɛ, sikɛɛtiiyo kolɔɔ, a kolɔɔ bɛɛ tambɛiyo,  ɔɔ kooma wana chua a ve o numpila niŋ te waŋ. Ŋ nɔ vɛlɛ miŋ hiou lachi a kɔl tambɛiyo chɔulabaa vɛlɛ a dialuŋ naŋ vilɛiyoŋ.​—Kɔliŋtiaŋ Diiŋ Ndɔɔ 10:3-6; Kolosiaŋnda 3:5-9.

3. Vɛɛ Mɛlɛka pɛɛku yɛ naa le yaamɔɔwaa naa chɔulabaa?

³ Ŋ nɔla pa kɛsɛ miŋ yem sɔŋga naŋ cho hoo a yaamɔɔwaa kpaayaa haa wa? Ei, kɛ i ve suɛi bɛɛŋ bɛɛŋ te! Mi Pɔɔl tuu ndupila a wana sɔŋga a bɔtalaŋ ndo aa, ‘Lende koni wana sɔŋga hoo sɔŋga labɔta la bɛɛlaa wo, o chɛl mbo wuu bɔtaa fondo le. Mɛɛ lende ya I cho ni.’ (Kɔliŋtiaŋ Tasoo 9:26) Mɛɛ wana sɔŋga a bɔtalaŋ ndo wa naa sɔŋgaa a chaaŋ ndɔ opilɔɔ yɛ, naa bɛɛ nɔ miŋ sɔŋga a yaamɔɔwaa naa. Chɛhowa mala naa nduyɛ mbo pɛɛku naa le keŋ tosaa. O Baabuiyo niŋ sanaa o tosa hei ni. O mala vɛlɛ naa o yaula naala Baabuilaŋ niŋ, bɔŋaŋnda leKilisiɔŋndaŋ, bɔŋaŋnda ibuŋgalaŋ, a la bɛndaŋ. A cho pa nɛila chɔmaala ŋ cho sɔlaa laŋ soliŋndo kpeku kpou? Te o ve lende le, a nɔla ma simul yaamɔɔnɔ numndo kpeekpei le, mɛɛ wana sɔŋga a bɔtalaŋ ndo wuu naa bɔtaa fondo fuu yɛ.

4. Vɛɛ naŋ kpakpala yɛ yɔŋ wɔɔŋndo o tiu naa ba le?

⁴ Ŋ nɔ miŋ wa lahɔl teleŋ o teleŋ. Le yɛɛ? Teleŋ naŋ ve kɔl te wo ɔɔ teleŋ naŋ wu ŋdiallo yaamɔɔwaa naa chiŋalaŋ naa ni. Baabuiyo ke naa silaa a kɔl dɛɛniaa aa, “La chɛl mi yɔŋ wɔɔŋndo yem nya le. La tosa dɛnɛ kɛndɔɔ le dɛnɛ wɔɔŋndo yomɔɔ.” (Luomaŋnda 12:21) Te ŋ hiou pɛ lachi a dɛnɛ wɔɔŋndo chɔulabaa, ŋ nɔla miŋ yem ndu! Kɛ te ŋ vi ŋdial pɛ miŋ pɛŋgi chɔulabaa, mɛɛ Setana, chieeŋ ndɔɔ, a dialuŋ naŋ vilɛiyoŋ cho naa ba tiu. Lelaŋ, fɛɛŋ bɛɛ wu ŋdial te. Tambu kɔl ma tuisi bala numndaŋ yɔsɔkɔlɔŋ te!​—Pitɛ Tasoo 5:​9.

5. (a) Yɛɛ naŋ nɔ yɛ miŋ loonuŋ le mi Mɛlɛka hini kɔl a naa nduyɛ mbo dɔu naa sala? (b) Wanaa kuɛɛ o Baabuiyo niŋ naŋ cho yɛ suukaŋ a nda okɔɔ?

⁵ Le miŋ yem, ŋ nɔ fɛŋ miŋ sina le sabu naŋ cho chɔulabaa wo. Ŋ yeema mi Chɛhowa hini kɔl a naa nduyɛ mbo dɔu naa sala. Hibuluiya 11:​6 dimi aa, “Lɔɔ pa mi waŋndo muliŋ naa Mɛlɛka chua mɛɛ mbo nɔ tiindaŋndo kpeekpei maa Mɛlɛka cho a tonya, nduyɛ, mbo nɔ tiindaŋndo maa wanaa huŋ naa Mɛlɛka chua wa Mɛlɛka cho nda hunɔɔ fandaa ke.” Tiindaŋndo nɔɔ kpeekpei maa Mɛlɛka cho, sim ni maa ŋ nɔ miŋ tosa wallo kekelee te ŋ yeema pɛ mbo hini kɔl a naa. (Walta Wanaa Chiisuaa 15:17) O Baabuiyo niŋ, tamaseliila kɛndɛlaŋ la cho tau a puaa vɛlɛ a waŋlaanduaa okɔɔ a tosa lende wa. Chekɔpu, Luechɛl, Choosɛ, a Pɔɔl, nda kpou mi sɔɔŋ komal nda ŋ kala kpoke o dialloŋ niŋ a o yiyaŋndaŋ niŋ. Kɛ ma sɔla batiuwaa. Tamaseliila ndalaŋ la chɔm maa te ŋ tosa pɛ wallo kekelee, naa bɛɛ nɔla miŋ sɔla sala Chɛhowaa. Ŋ tofaŋndɔ mɛɛ naŋ sɔla ndu yɛ.

6. Yɛɛ mala yɛ Chekɔpu mbo lambaŋ? Nduyɛ fanda yɛɛ o sɔla yɛ? (Tofa fotueiyo o peele naŋ kandu leŋ choo.)

⁶ Mi wana laalaŋndo Chekɔpu sɔŋga nduyɛ mbo biunuŋ kanifuule, ndoo kaala Chɛhowa nduyɛ mbo bii chaŋyɛi nda ndu tɛɛŋ a balaŋ la tiɔɔŋ. Mbo duau tiindaŋ kpeekpeiyo o mɛila Chɛhowalaŋ niŋ le mbo dɔu chuauwaa nduaa sala. (Chɛnɛsee 28:3, 4) Mɛɛ Chekɔpu wa le wɔsilaŋ 100, mbo sɔŋga a maalikɛinɔɔ le halikpe mi Mɛlɛka dɔu ndu sala. (Nuawɔ Chɛnɛsee 32:24-28.) Chekɔpu ndoo kendu pa ŋdial kpeekpei le sɔŋgaa a maalikɛinɔɔ hoo a ba ndɔ? Pɛ pɛ bɛɛ! Kɛ ndoo nɔ bɔɔ kɔl sikpaa, nduyɛ mbo chɔm maa o cho wallo tosa kekelee  le mbo sɔla salaa! Mi Chɛhowa duau Chekɔpu sala le lambaŋ ndɔɔ nduyɛ mbo ke ndu diolaŋ aa Isɔluɛi, koŋ sim ni, “Wana Lambaŋndo, ɔɔ Wana Sɔŋga a Mɛlɛka Wo.” Mi Chekɔpu sɔla fanda naa kpou cho nuuviaa wo, ndu cho ni, mi Chɛhowa hini kɔl a naa nduyɛ mbo dɔu naa sala.

7. (a) Suɛi kɔl tambɛi kuɛɛ ndii komallɛ Luechɛl? (b) Yɛɛ Luechɛl ndoo tosa yɛ, nduyɛ vɛɛ o sɔla yɛ salaa?

⁷ Lanɔ kaala Chekɔpu wo bɛɛ, Luechɛl, ndoo nɔ yeemɛi ikala kala le chɔɔ mɛɛ Chɛhowa cho lo o buŋgɛi o chuel pɔnɔ ndɔ ve choo yɛ. Kɛ bahawɛiyo wa. Luechɛl ndoo sɔla wɔ chua le. Nduyɛ o teleŋ koŋ niŋ, mi hei ndii tɛɛmbuu waŋlaanduaa kɔllo tau. Vɛɛ Luechɛl ndoo hiou yɛ lachi a sɔŋgaa mi che bɛɛ o wa a kɔl tambɛiyo? O vi ŋdial a tiindaŋ ndɔɔ le! Kɛ mbo lambaŋ sɔŋgaa, koŋ cho ni, piɛileŋ o piɛileŋ niŋ o Chɛhowa lo. Le saboo hoo o dimi ni aa, Mi “sɔŋga sɔŋgɔɔ pila, nduyɛ mi yam.”​—Chɛnɛsee 30:8, 20-24.

8. Simulta kuɛɛ komallɛ Choosɛ? Nduyɛ, vɛɛ o wa yɛ tamasi kɛndɛ le naa?

⁸ Mi tiindaŋ Chekɔpu nda Luechɛllo piiliaŋ dɔɔ Choosɛ po nda, nduyɛ ma mala ndu mɛɛ sɔɔŋ tuu woŋ wa ndu komallo. Mɛɛ Choosɛ wa wɔsilaŋ 17, mi yoomu ndɔɔ siŋgaŋ kpou. Mi bɛndaa nduaa wa ndu paŋalaa wa pisi ndu o chɛleŋ niŋ. O okoŋ kɔɔli, mbo chua wɔsilaŋ tau o chiɛi manyumndo niŋ Ichipi, mi che bɛɛ o tosa nyɛ o nyɛ le. (Chɛnɛsee 37:23-28; 39:7-9,  20, 21) Kɛ Choosɛ tembu kɔl ɔɔ mbo tuulu kɔl te. Nduyɛ, o kindiŋ le mbo miŋgi maa le. Le yɛɛ? Kanifuule, mi Choosɛ cha chaŋyɛi nduɛi a Chɛhowa nyɛ sɔvɛ nduyɛ mbo muli hɔlla o ndi choo a kɔl ndɔɔ kpou. (Lɛvitikɔɔ 19:​18; Luomaŋnda 12:17-21) Tamaselii Choosɛ wo nɔla mbo mala naa. O yɔŋ bɛɛ mi yoomu naa wa o kpundɔɔ nuŋ teleŋ naŋ wa o pɔmbɔ wo, ɔɔ miŋ che maa suŋ suŋ bɛɛ yoomu naa nɔ tiindaŋ kposoŋ te, ŋ nɔ miŋ hiou lachi a sɔŋgaa nduyɛ miŋ lambaŋ. Te ŋ tosa lende pɛ, ŋ cho tiindaŋndo nɔ maa Chɛhowa cho naa salaa dɔuwɔɔ.​—Nuawɔ Chɛnɛsee 39:21-23.

9. Vɛɛ naŋ tuallɛ tamasi Chekɔpu, Luechɛl, a Choosɛ wo kɔɔli?

⁹ Hau, naa bɛɛ nɔ miŋ biunuŋ simulta kala kalalaŋ. Kɛlɛŋgaa kafalaŋ, hɛliaŋndo, mamɔɔ, ɔɔ paŋalaa cho tosaa ma wa saŋgaa. Tuupa ma tambu kɔllo, loonuŋ nyɛ mala Chekɔpu, Luechɛl, a Choosɛ ma lambaŋ Chɛhowa piɛiyo a kɔl kɛndɛ wo. Mi Mɛlɛka ke nda yoomuaŋ nduyɛ mbo duau nda sala kanifuule, ma hini kɔl nyɛkɛndɛi a chaŋyɛi wa nda tɛɛŋ a Mɛlɛka ve. Ma hiau lachi a sɔŋgaa, nduyɛ ma duau piɛile ndaleŋ o wali niŋ. Le mɛɛ naŋ cho o palɛi mɛɛlɛi niŋ yɛ, i cho suɛi sɔvɛ le mi tiindaŋ naa le chilaŋ lo o kala poŋ! A cho pa o bɛɛndiaŋ le sɔŋgaa, koŋ cho ni, le wallo kalaŋ mi Chɛhowa hini kɔl a num?

10, 11. (a) Le yɛɛ naŋ nɔ yɛ miŋ sɔŋga le sala Mɛlɛkaa sɔlaa? (b) Yɛɛ mala yɛ naa miŋ tosa chuaŋ chuala kɛndɛlaŋ?

¹⁰ Le yɛɛ naŋ nɔ yɛ miŋ sɔŋga le sala Chɛhowaa sɔlaa? Nyɔɔ opilɛ cho ni, le mɛɛ naŋ cho wanaa lahakiaa yɛ, miŋ wa sɔŋgɔɔ a yeemaŋ wɔɔŋndoŋ ŋpum. Apum cho sɔŋgɔɔ le kaa kɛndɔɔ nɔɔ a wali pollo okɔɔ. Nduyɛ apum cho sɔŋgɔɔ a kɛndiaa lepɛŋndo ɔɔ wana pilɛyɛi. Apum yɛ a cho ndi chɔɔ ikala kpoke le wana pila nda tana wo malɔɔ haki. Mɛɛmɛɛ naŋ viou niŋ o Mɛlɛka piɛiyo niŋ, naa kpou nɔ miŋ chɔulaba a nyɛm tosa mii wa ikala kpoke le Mɛlɛka piɛiyo wo, wana fanda wanaa lo lechoo wa.

¹¹ O kpeekpei niŋ, i wa bɔɔ suɛi kala le waa Kilisiɔŋnɔɔ nduyɛ ma tosa chuaŋ chuala kɛndɛlaŋ, o bii fau te ŋ wa pɛ yiyaŋnda wɔɔŋndaŋ chɔulabaa. (Chɛluimaya 17:9) Te lende ŋ cho yiyaŋndo ni, mɛɛ piɛi o Chɛhowa lo nduyɛ ma nyuna ndu le nyina ndɔ diandaa. Piɛileŋ a nyina diandaa mala num le ma sɔla yoomuaŋ le o kɛndɔɔ tosaa, okoŋ, ma sɔla sala Mɛlɛkaa. Yiinuŋ yauleŋ ma tosa nyɛ ŋ cho piɛileŋ le ndu wo. Kindiŋ ma wa nuaa o Baabuiyo niŋ lepaa o lepaa, nduyɛ ma kɛsi teleŋndo le pɛɛkɔŋ ipilayaa a pɛɛku leyuŋgoo.​—Nuawɔ Sam 119:32.

12, 13. Vɛɛ Kilisiɔŋnda a ŋiɔɔŋ sɔla yɛ malaa le yeemaŋ wɔɔŋndoŋ tiuwo ba?

¹² Tamaseliilaŋ la cho tau mɛɛ Diom Mɛlɛkaa, nyina ndɔɔ, a yaula naala leKilisiɔŋndaŋ la mala niŋ puaapiliaa a ndepiliaa naa le yiyaŋnda wɔɔŋndaŋ tiuwo ba yɛ. Mi poombɔ feleŋgɔnɔ pilɛ nua o “Tiondoo!” hoo niŋ Yindimiiyo 8, 2003 o suɛi le bolle hei bɛŋgu, “Vɛɛ Ya Kpakpala yɛ Yeemaŋ Wɔɔŋndoŋ?” Yɛɛ ndoo tosa yɛ? Mbo dimi aa, “I cho chɔulabaa le mi tiu yiyaŋnda wɔɔŋndaŋ ba. Mɛɛ ya veelu diomndaŋ o buŋgɛi keŋ niŋ maa ‘wanaa bɔɔbɔɔ, cho chɔulabaa ketu ketu le yeemaŋ wɔɔŋndoŋ tiuwo ba,’ mbo tosa mi sina maa ya bɛɛ I cho puaapiliaa haa tɛɛŋ. Mi yiyaŋ maa I cho ya pilɛ le.” Mi feleŋgɔnɔɔ hoo sɔla vɛlɛ tɔnɔɔ o “Tiondoo!” hoo niŋ Saa 8, 2003. Suɛi lebolle aa, “Mɛlɛka Chɛl pa Kaa Mulu Mulaŋndo?” O buŋgɛi keŋ niŋ, mbo saaluŋ maa le apum, chɔulaba  koŋ nɔ lamɛɛlu le. O cho ko mɛɛ “yuɛi i huau nuaa waŋndo yɛ.” (Kɔliŋtiaŋ Diiŋ Ndɔɔ 12:7) Mi che bɛɛ ma wa hiouwɔɔ lachi a chɔulabaa le kaala ndalaŋ kɛsioo la diandaa, kɛ a nɔ tiindaŋ kɛndɔɔ le chilaŋ. Mbo dimi aa, “Le saboo hoo, I yiyaŋ maa lepaa o lepaa, I tiuba mi lo o laalaŋndo choo. I yil bɔɔ Chɛhowa balikaa le kɔɔna ndɔɔ soliŋndo kpeku le naa malaa mi paale o paale hiou naa choo kɛndiaa o chieeŋ dɛnɛ wɔɔŋndo hoo niŋ.”

¹³ Tofawɔ vɛlɛ tamasi ndepilɛnɔ pum o Amɛlika niŋ. Mbo poonyiaa aa, “I yeema mi mel nya balikaa lɔɔlɔɔ le naa nyɛdiaa naŋ hau ba le ndu wo kioo a teleŋndo kinɛi. Teleŋnda bɔɔbɔɔ mi yiyaŋ maa le ya kinɛi nda poonyiaa buŋgaŋ muŋ ni. Le wɔsila bɔɔbɔɔ, I wa chɔulabaa a yeemɛi kala kalɛi le nyɛ Chɛhowa tul leyɛ wo. Lepum, mi yeema le mi vi ŋdial a chɔulabaa. I sina maa Chɛhowa nɔ nyɛiye nduyɛ mbo mal haki. Kɛ le mɛɛ ya nɔ yeemɛi wɔɔŋnde hei nduyɛ I tul ndi leyɛ a kɔl nuu kpou le yɛ, mi yiyaŋ maa I nɔla mi sɔla mala ndɔɔ le. Chɔulaba lambaŋndo hoo paaliaŋ niŋ hau nyɛ o nyɛ o yoomu nuu niŋ. Mi nua buŋgɛi hei o Bandu Mɛŋgɛlaa hoo niŋ Fuoo 15, 2013. Suɛi lebolle aa, ‘A Nɔ pa Kɔllo le Chɛhowa Sinaa?’ Mɛɛ ya chii ndi nua, mi yiyaŋ maa Chɛhowa yeema kɛsɛ mbo mala ya.”

14. (a) Vɛɛ Pɔɔl ndoo yiyaŋ yɛ a sɔŋgɔ o wa tosaa wo? (b) Vɛɛ naŋ yam yɛ chɔulaba naŋ cho a dialuŋ naŋ vilɛiyoŋ ndo?

¹⁴ Nuawɔ Luomaŋnda 7:21-25. Mi Pɔɔl pila bɛɛ sina mɛɛ i cho suɛi kala le chɔulabaa yeemaŋ wɔɔŋndoŋ, a dialuŋ vilɛiyoŋ yɛ. Kɛ, ndoo nɔ tiindaŋndo maa o cho batiuwaa sɔla te o piɛi pɛ o Chɛhowa lo, mbo tiindaŋ ndu le malaa, nduyɛ mbo dɔu tiindaŋndo o sala soliaŋ Chiisoo niŋ. Kɛ naa yɛ? Ŋ nɔla pa miŋ yem dialuŋ naŋ vilɛi naŋ cho chɔulabaa woŋ? Ei, te ŋ tol pɛ tamasi Pɔɔllo kɔɔli le Chɛhowa tiindaŋndo a kɔl naa kpou, kɛ o cho kpaaya naa le, nduyɛ miŋ nɔ tiindaŋndo o sala baŋaa niŋ.

15. Vɛɛ Chɛhowa mala yɛ naa miŋ lo lechoo nduyɛ miŋ biunuŋ simultaŋ?

¹⁵ Lepum mi Mɛlɛka mal naa le miŋ chɔm mɛɛ naŋ cho buulaŋndo chɔm kɛsɛ o suɛi ipum niŋ yɛ. Le tamaseliiyo, te naapila ɔɔ wana naa o yuŋgoo niŋ del pɛ a naa wɔɔŋ wɔɔŋndo ɔɔ mbo boliŋ, vɛɛ naŋ cho yɛ tosa? Te ŋ tiindaŋ pɛ kɛsɛ o Chɛhowa niŋ, ŋ cho ndu nyɔɔlu mbo ke naa kpaaya naŋ yeema le loo o tiindaŋ naa choo wo, le miŋ hiou lachi a waa a kɔl kɛndɛ, nduyɛ le mi chaŋyɛi nɛi naa ndaa tɛɛŋ i kendu poŋ. (Filipiaŋnda 4:​13) Tamaseliila Kilisiɔŋaa bɔɔbɔɔ o sindɔɔ niŋ a hau, chɔm maa piɛileŋ le nɔla mi le ke naa kpaayaa, nduyɛ mi le ke naa kɔl sikpa naŋ yeema wo le halikpe miŋ hiou lachi a biuwɔŋndo.

16, 17. Yɛɛ ŋ tuu yɛ le tosaa a kɔl numndo kpou?

¹⁶ Nyina Wɔɔŋndo yeema num ma tambu kɔl, ma vi ŋdial, nduyɛ le ma saŋga a sɔŋgɔɔ ma fula lebɛŋgu. Nɔ kɔl sikpaa ma “chua isɔɔ o isɔɔ cho suɛi kɛndɛ.” (Tɛsaloniaŋ Tasoo 5:21) A nɔla ma yem chɔulaba nya cho nya Setana wo, chieeŋ ndɔ dɛnɛ wɔɔŋndo, a yeemɛi o yeemɛi wɔɔŋ! A tiuba ma yem te a tiindaŋ pɛ Mɛlɛka a kɔl numndo kpou maa o cho num kpaayaa ke nduyɛ mbo mala num.​—Kɔliŋtiaŋ Diiŋ Ndɔɔ 4:7-9; Kaleesiaŋnda 6:9.

¹⁷ Lelaŋ, lambaŋ chɔulabaa. Lambaŋ sɔŋgaa. Lambaŋ biuwɔŋndo. A cho tiindaŋ a kɔl numndo kpou maa Chɛhowa cho num salaa dɔuwɔɔ tei mbo hiou mɛɛ ŋ yeema yɛ.​—Malakai 3:10.