Mi kiilanɔɔ Pɔɔl tɛɛsiaa Chɛhowa * maa ndu cho “Mɛlɛka o nyɔɔlu naa kɔltaŋ [o nyɛ o nyɛ, NW] niŋ ndo ni. Ndu nyɔɔlu naa kɔltaŋ niŋ o dɛnɛ o dɛnɛ palaa niŋ ni.” (Kɔliŋtiaŋ Diiŋ Ndɔɔ 1:3, 4) Baabuiyo ke naa tiindaŋndo maa wana o wana cho mi Mɛlɛka kɛɛ ndu mala le. Nduyɛ, dɛnɛ o dɛnɛ palaa cho mbo hiou naa mayoomu mi Finya naa o choo choo niŋ bumba naa kɔllo dɛɛniaa le.

Kɛ ŋ nɔ miŋ tosa nyɛ te ŋ yeema pɛ mi Mɛlɛka dɛɛniaa naa kɔltaŋ. Vɛɛ wana chiɔuwaa mala yɛ naa te ŋ kue o chiɛi chiɔuwaa niŋ le ndu chɔɔ le. Lelaŋ diom Mɛlɛkaa dimul naa ni aa, “La sɔɔŋguu Mɛlɛka ikɛi. Ndu bɛɛ o cho nya sɔɔŋguu ikɛi.”​—Chemisi 4:8.

Vɛɛ naŋ looku yɛ miŋ laalaŋ maa Mɛlɛka cho naa sɔɔŋguu ikɛi. O tasoo, le mɛɛ o dimul naa daandi daandi maa o yeema mbo mala naa yɛ. (Tofa  kɔfoo  o peele 4 leŋ choo.) Nduyɛ o diiŋ ndɔɔ, le mɛɛ naŋ nɔ tamasila wanaa Mɛlɛka dɛɛniaa kɔltaŋ nda yɛ, waŋnda o teleŋ naa hoo niŋ a o sindɔɔ niŋ.

Mi Masaa Deeve nuuviaa malaa Mɛlɛka o ba teleŋ kpundɔɔ komal ndu wo. Nduyɛ lende koni wanaa bɔɔbɔɔ cho hau tosaa ni. Teleŋ pilɛ mbo nyɔɔlu Chɛhowa aa, “Te I wa num veeloo le ya malaa pɛ, yaŋ ya nilaŋ fɔ.” Mi Mɛlɛka ndoo muli ndu pa diom? Mi Deeve chɔɔlu dimi aa, “Ndu ya I tiindaŋ le malaa ni, nduyɛ mbo tosa mi naŋ kɔl.”​—Sam 28:2, 7.

Mi Mɛlɛka kɛɛsiaa maa Chiisu nɔ wallo kpeekpei ni le kɔl dɛɛniaa yɔŋgoo. O walta cheleŋnda Mɛlɛka dimul Chiisu le tosaa laŋ tɛɛŋ, mbo dimul ndu le mbo “nyɔɔlu wanaa cho a kɔlta tambɛilaŋ nda kɔltaŋ.” Nduyɛ mbo “mala wanaa kɔlta ndalaŋ la cho mɔnɛi biyɔɔ” wa. (Aisaya 61:1, 2) I wa i dimiaŋ maa, Chiisu ndoo nɔ yeemɛi teŋgeŋnde le wanaa wa “yɔkpaa a nyɛ palaa” wa.​—Maatiu 11:28-30.

Mi Chiisu dɛɛniaa waŋnda kɔltaŋ a mɛɛ ndoo sila nda yɛ, mɛɛ ndoo bii nda o nɛi lebɛɛ niŋ yɛ, nduyɛ teleŋndaŋ lapum pɛŋ mi ndoo siŋgi wanaa wa a naalaŋ nda. Paale pilɛ, mi wana ndoo nɔ naa ŋlɛlɔɔ wo nyɔɔlu Chiisu aa, “A nɔla ma siŋgi ya, te o wa pɛ ma chɛl.” Mi nyɛiye bii Chiisu le poo hoo mbo muli aa, “I chɛl mi siŋgi num. Lelaŋ, sioŋgu ma simnuŋ vɛlɛ o diandaa.” (Maki 1:40, 41) Nduyɛ mi po ŋlɛlɔɔ koŋ siaŋgu.

Hau, Po Mɛlɛkaa cho lɛŋ naŋ le naa kɔltaŋ dɛɛniaa le. Kɛ Finya ndɔ, Chɛhowa, o “nyɔɔlu naa kɔltaŋ niŋ o dɛnɛ o dɛnɛ palaa niŋ” ndo, cho hiouwɔɔ lachi a wanaa nɔ bahawɛilaŋ nda malaa. (Kɔliŋtiaŋ Diiŋ Ndɔɔ 1:3) Tofa wɔ sɔɔŋ kulloŋ ŋ hiɔɔlu ŋ Chɛhowa soliŋ kpeku le waŋnda kɔltaŋ dɛɛniaa wo.

• Baabuiyo. “Nyɛ o nyɛ poonyiaŋ sindɛ o Yau Mɛlɛkaa niŋ, a poonyiaa ndu le naa pɛɛkoo. Nduyɛ, la tosa mi ŋ sɔla kɔl biuwɔŋndo, nduyɛ mi la dɛɛniaa naa kɔltaŋ, o koŋ, mi la tosa mi ŋ wa lehɔl o nɛi.”​—Luomaŋnda 15:4.

• Nyina Diandaa Mɛlɛkaa. Mɛɛ Chiisu vi o viu bɛɛ le, mi kunda leKilisiɔŋndo luɛi o boondii kɔl nyuloo niŋ. Le yɛɛ? “Nda kpede nda aa ke Masanɔɔ Mɛlɛka bɛɛleŋ o nyɛ o nyɛ niŋ nda tosa.” (Walta Wanaa Chiisuaa 9:31) Nyina diandaa, ndu cho ni maa kpaaya Mɛlɛkaa, nɔ kpaayaa tau. Mɛlɛka soliŋ ndu kpeku le wana o wana dɛɛniaa o nyɛ o nyɛ niŋ.

• Piɛileŋ. Baabuiyo sila naa aa, “La nɔ buulaŋ o isɔɔ o isɔɔ niŋ te.” Kɛ mbo dimi aa, “Isɔɔ o isɔɔ nya wa Mɛlɛka piɛiyo le ndi pɛ, la chɔm ndu nyɛ nya hau ba le ndu wo. Nduyɛ, pɛŋgu o pɛŋgu nya wa ndu nyunaa le nyɛ o nyɛ pɛ, la mel ndu balikaa. O koŋ kɔɔli, kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo nɔla mbo manda kɔlta nyalaŋ, a yiyaŋnda nyalaŋ.”​—Filipiaŋnda 4:6, 7.

• Chaaŋaa Naa Laalaŋnda ke naa kɔl dɛɛniaa naŋ yeema o boondii nyɛ kindilaa bɛŋgu wo. Mi kiilanɔɔ Pɔɔl dimi a chaaŋaa nduaa okɔɔ maa ‘a mala ndu bɔɔ tau tau’ o teleŋ “dɛnɛla palaalaŋ” niŋ.​—Kolosiaŋnda 4:11; Tɛsaloniaŋ Tasoo 3:7.

Kɛ ma wa dɔɔ yiyaŋndo mɛɛ sɔɔŋ muŋ kpou nɔla miŋ yɔŋnuŋ yɛ. Ŋ tofaŋndɔ sɔɔŋ yɔŋnuŋ waŋnda apum ndoŋ nyɛkɛndɛi, a bahawɛila naŋ soo o buŋgɛi tasei niŋndaŋ. Maa nda, a cho saalɔŋ maa Mɛlɛka cho hiouwɔɔ lachi a buŋgɛi kɛndɛ o chua ve peeloo, ndi cho ni, “Mɛɛ kala chuaa o dɛɛniaa nuaa chɛlɛkpɛ ndɔɔ yɛ, lende ya I dɛɛniaa niŋ nya ni.”​—Aisaya 66:13.