SUƐI LEBOLLE O KƆƆ | KUƐƐ Ŋ SAALUŊ YƐ KƆL DƐƐNIAA?
Naa Kpou Ŋ Yeema Kɔl Dɛɛniaa
A loonuŋ pa teleŋ ŋ wa wɔ chuaambɔ pɔmbɔ ma dello? Kɛlɛŋgaa ma boli baa ɔɔ ma woosa wuleŋ. A loonuŋ pa mɛɛ kala num dɛɛniaa num kɔllo yɛ? Kɛlɛŋgaa mbo wɔɔsuu boliŋ koŋ, okoŋ, mbo yii ndu a yuuloo. Ma chaŋ, kɛ mi diomnda kɔlta dɛɛniaa o wa num dimullo laŋ a kɔmaŋ o wa numndo tosa ma sinaŋ tiŋ nyɛkɛndɛi. A teleŋ koŋ o yoomu numndo niŋ, kɔl dɛɛniaa ve num levil te.
Kɛ mɛɛ naŋ sul fau, lende ko yoomoo hiau lachi a kaloo ni. Mi bahawɛilaŋ la chɔɔlu kui, nduyɛ mii chɔɔlu kalu le kɔl dɛɛniaa saalɔŋndo. I cho suɛi imɔnɔ le sinaa maa bahawɛila kaasoŋnda la yiinuŋ a yuuloo le, nduyɛ kala kɔmaŋ ndaŋ mi la chuu le. Tofa wɔ tamaseliilaŋ lapum.
-
Baa a tambu niŋ pa kɔl le mɛɛ wallo hɛluŋ num yɛ? Mi Chuliaŋ dimi maa mɛɛ nda soli ndu o wallo niŋ, mi timi timi koŋ tosa mi kɔllo tambu ndu tau. Mbo nyunaŋ aa, ‘Vɛɛ ya cho yɛ looku yuŋgu nuu manda? A wali bɛndu ya tosa hoo o wɔsiŋ hiou woŋ niŋ kpou, le yɛɛ wanaa chua ya o baalaa niŋnda dimi yɛ maa wana fondoo ya cho ni?’
-
Kɛlɛŋgaa kɔllo cho num o tambɛi le mɛɛ nɔ numndo puusiaŋ yɛ. Mi Luakɛl dimi aa, “Mɛɛ pɔnɔ nuu kɛɛ ya o paŋguŋ 18 hiou woŋ niŋ, mi kɔl tambɛiyo mial la chɔŋgɔmu. Mi nyɔɔ yɔŋnuŋ ya naŋ chaa kɔl nuu piɔunuŋ tɛɛŋ ni. Nyɛ nɛiyaa wa ya o ŋdial a o kɔllo niŋ. Mi siooŋnde bii ya.”
-
Kɛlɛŋgaa a nɔ naa kala kalaa, kɛ a chi pɛŋ nyɛ chɔm maa o cho sioŋgɔɔ le. Mi teleŋndo opum fuuluu ma yiyaŋ maa finya naa mamaa Choobu. Mbo chaŋ aa, “I saŋga a yoomoo. I yeema lɛ mi wa yoomu fɛɛŋ a fɛɛŋ te.” (Choobu 7:16) Kɛlɛŋgaa mi num bɛɛ yiyaŋ maa Luwisi, po cho o wɔsila 80 laŋ niŋndo. Mbo dimi aa, “Lepum mi yiyaŋ maa piɔmndo koni ya chal niŋ chumndo ni.”
-
Te koŋ te, piɔm wana ŋ kaala wo tosa ni ma yeema kɔl dɛɛniaa. “Mi Lɔbɔti dimi aa, “Mɛɛ ya tuei maa po nuu vi o sulɛi dɛndɛ choo tosa ve, I laalaŋ ndi o tase ndɔ le. O koŋ kɔɔli, mi nyɔɔ tɛnda ya niŋ duu, mɛɛ nda chuku waŋndo naa a muɛi faŋnde yɛ, a mɛɛ Baabuiyo tuu nyɛ nɛiyaa yɛ.”—Luku 2:35.
Mi Lɔbɔti, Luwisi, a Chuliaŋ sɔla kɔl dɛɛniaa o boonduŋ kɔl tambɛi muŋ bɛŋgu. Ma saaluŋ Wana kpeekpeiyo le nda kɔltaŋ dɛɛniaa. O cho wana cheleŋ te, kɛ Mɛlɛka Kpou Kpou Wo. Vɛɛ o dɛɛniaa yɛ naa kɔltaŋ? O ke num niŋ pa kɔl dɛɛniaa ŋ yeema wo?
