Chieeŋ Sɛnɛiyo Cho Niŋ Kpɛɛluŋ!
Mɛlɛka toosiaa chieeŋndo le mi wanaa sandaa wa lechoo le fɛɛŋ a fɛɛŋ. (Sam 37:29) Mɛɛ Mɛlɛka toosiaa wanaa tasiaa, Adam nda Ifi, mbo wou nda o kpele kɛndɛ kɛndɔɔ niŋ Idɛŋ. Mbo dimul nda a chuauwaa ndaa vialu niŋnda kpou le ma wa wallo tosaa o chieeŋndo choo, nduyɛ ma wa ndu biyɔɔ nyɛkɛndɛi.—Chɛnɛsee 1:28; 2:15.
Chieeŋ naŋ cho hau niŋndo cho teŋgeŋ, a mɛɛ Mɛlɛka ndoo yeema mi ndoo wa Kpele Hɛnɛkiɔɔ yɛ. Kɛ sabu Mɛlɛkaa siŋgaŋ ndɔ le. Vɛɛ Mɛlɛka cho yɛ looku sabu ndɔɔ peelu? A mɛɛ buŋgaŋ naŋ hiou woŋ chɔm yɛ, o cho chieeŋndo kpeekpei le Mɛlɛka cho hunɔɔ tɛɛmbuu le. Kɛ o cho chɛlɔɔ mi wanaa laalaŋ o ndu niŋnda wa lechoo. Te Mɛlɛka huŋ peelu pɛ diomnde o mɛi leŋ, vɛɛnɛ sɔɔŋ cho yɛ wa o chieeŋndo choo?
Masaleŋ lepilɛ kpe le chieeŋndo kpou
Masale Mɛlɛkaleŋ le cho suŋ hunɔɔ kpaayaa nɔ waŋnda chieeya choo kpou. Okoŋ, mi chieeŋndo simnuŋ fondaŋ waŋnda wa niŋ o diompilɔɔ niŋ, nduyɛ ma wa walta kɛndɛlaŋ tosaa wo. Mɛlɛka yulu Chiisu isu le mbo wa masaa o chieeŋndo choo. Wanaa cho hau o masaleŋ choo wa, a bɔɔbɔɔ buulaŋ le wanaa ndaa le. Kɛ Chiisu cho nɔ buulaŋndo le wanaa o cho wa masaleŋ tosaa choo wa. O kaalaa choo masale ndɔleŋ le tɔlnuŋ ni. O cho nɔ kɛndɛi, nyiɛɛye, nduyɛ Masa sakpoo o wa niŋ ni.—Aisaya 11:4.
Diompilɔɔ o chieeŋndo choo kpou
Piɔuwaŋ lelɛŋ ɔɔ piɔuwaŋ lekaa ve lɛ niŋ wanaa cho wa o chieeŋndo choo wa tɛɛŋ te. Waŋnda chieeya kpou cho wa o diompilɔɔ niŋ. (Sɔɔŋ Chɔɔmaŋndoŋ 7:9, 10) Wanaa cho wa o chieeŋndo choo wa kpou cho nɔ kaalaa le Mɛlɛka vɛlɛ a wanaa nda chiɛɛliaŋnda. Nda kpou cho wallo tosa diompilɛ o kɔl nyulu niŋ, le sabu Mɛlɛkaa peeloo le chieeŋndo biyɔɔ nyɛkɛndɛi.—Sam 115:16.
Kpundɛ yɔŋnuŋ ndɛ niŋ te
Te Masale Mɛlɛkaleŋ le huŋ nɔ pɛ kpaayaa o chieeŋndo choo, Wana Toosiaa naa wo cho tosa chieeŋndo hiu niŋ tuulu le, nduyɛ o hiu niŋ nyulul te. (Sam 24:1, 2) Mɛɛ Chiisu kpaa hueiyii wɔɔŋ wɔɔŋnde teleŋ o wa o chieeŋndo choo wo, mbo chɔm kɛsɛ nyɛ o tiuba mbo tosa a kpaaya Mɛlɛka ke ndu wo. (Maki 4:39, 41) O masale Kiliti leŋ bɛŋgu, wana nɔ lɛ niŋ isiooŋ le la kpundɛ le. Masale Mɛlɛkaleŋ le cho tosa mi waŋnda chieeya wa o kɔl nyulu niŋ a visiaa, nduyɛ wana ve lɛ niŋ chieeŋndo tɛɛmbuu le.—Hoosiaa 2:18.
Kɛndiaa walaŋndo a nyɛdiaa o hɔbɛi
Wana o wana cho nɔ kɛndiaa walaŋndo. Wana nee lɛ niŋ te, yuuwɛi ve lɛ niŋ te, nduyɛ piɔm ve lɛ niŋ te. (Aisaya 35:5, 6) Waŋnda kpou cho wa o fondaŋ kɛndɛ kɛndɔɔ. A cho wa yoomoo tueiyɔɔ yeela mɛɛ Adam nda Ifi wa ndu tueiyɔɔ yeela o kpeloo Idɛŋ niŋ yɛ. O chieeŋ sɛnɛiyo niŋ, lɛŋndeŋ le cho tosa mi nyɛdiaa wa o hɔbɛi, maa o kpeloo niŋ Idɛŋ. Wanaa cho wa o chieeŋndo choo wa cho ndu wa sɔla tau tau. (Chɛnɛsee 2:9) Maa Isɔluɛiya sindɛ, wanaa cho wa o Kpele Hɛnɛkiɔɔ niŋnda, mɛɛ nda “yeema niŋ le dioo yɛ lende [nda] dia niŋ ni.”—Lɛvitikɔɔ 26:4, 5.
Kɔl nyulu kpeekpeiyo a hɛnɛkɛyɛi
O Masale Mɛlɛkaleŋ bɛŋgu, waŋnda kpou cho wa o kɔl nyulu niŋ, nduyɛ ma biyaŋ nyɛkɛndɛi. Chɔula ve lɛ niŋ te, waŋnda soliŋ ndɛ niŋ kpaaya ndaa kpeku o nɛi wɔɔŋndo choo le. Wana o wana cho nɔ nyɛm o hauba woŋ. Baabuiyo dimi aa: “Wana o wana o waŋnuŋ niŋ a kɔl nyulu, mbo de kpele ndɔ makilepiiyo, a kpele ndɔ mafikiiyo tɔnɔ. Wana o wana o dou lɛ niŋ wana isiooŋ te.”—Makal 4:3, 4.
Chiɛila kɛndɛlaŋ a wali kɛndɔɔ
Yuŋgu o yuŋgu cho nɔ chiɛi kɛndɔɔ. A ve lɛ niŋ a isiooŋ maa chiɛi ndaa cho nda hiɔlɔŋ te. Walta naŋ cho wa tosaa laŋ, ŋ cho wa tɔnɔɔ sɔlaa leniŋ. A mɛɛ Baabuiyo dimi yɛ, wanaa cho wa o chieeŋ sɛnɛi Mɛlɛkaa niŋnda, “wali o wali nda tosa [pɛ] o ve niŋ saŋga fondo le.”—Aisaya 65:21-23.
Dɛnɛ sinaa kpeekpeiyo
Baabuiyo dimi aa: “Sina pɛŋgu waŋnda nɔ niŋ a Mɛlɛka Yaawɛɛ okɔɔ wo o wa niŋ tau tau o chieeŋndo niŋ.” (Aisaya 11:9) Wanaa cho wa o Masale Mɛlɛkaleŋ bɛŋgu wa cho pɛɛku a taasi bɛndu Wana Toosiaa nda wo okɔɔ Chɛhowa, vɛlɛ a nyɛm kɛndɛ kɛndɛŋ o toosiaa woŋ. A soliŋ ndɛ niŋ kɔl kalu ndaa kpeku le yekpaŋndaŋ toosiaa ɔɔ acheleŋnda yɔŋullo le. (Aisaya 2:4) Kɛ a cho pɛɛku le waa o kɔl nyulu niŋ vellaa velle, a le chieeŋndo biyɔɔ nyɛkɛndɛi.—Sam 37:11.
Yoomu fafɛɛŋndo
Mi Mɛlɛka chua teleŋndo le chieeŋndo toosiaa nyɛkɛndɛi, le halikpeŋ miŋ wa yoomoo tueiyɔɔ yeela lepaa o lepaa. Ndoo yeema mi waŋnda wa o chieeŋndo choo lefafɛɛŋ. (Sam 37:29; Aisaya 45:18) Le sabu ndɔɔ hoo peeloo, Mɛlɛka cho hunɔɔ “kpaaya piɔmndo tɛɛmbuu” lefafɛɛŋ. (Aisaya 25:8) Baabuiyo dimi aa: “Piɔm ve lɛ niŋ te, chaŋ ve lɛ niŋ te, kɔl tambɛi ve lɛ niŋ te, kɛlɛŋgaa mi nyɛ nɛiyaa wa.” (Sɔɔŋ Chɔɔmaŋndoŋ 21:4) Wanaa Mɛlɛka cho piŋi teleŋ o cho hunɔɔ chieeŋ dɛnɛ wɔɔŋndo hoo tɛɛmbuu wo, a wanaa o cho miŋgi yoomu wa kpou, cho dikeŋnaŋndo sɔla le waa achal lefafɛɛŋ o chieeŋ sɛnɛiyo niŋ.—Chɔŋ 5:28, 29; Walta Kiilaa 24:15.
Kindiŋ ma chɔɔlu sina nyɛ ŋ nɔ ma tosa le ma huŋ sɔla pioŋɔɔ te chieeŋndo hoo sɔla pɛ tambei, nduyɛ ma wa achal o chieeŋ sɛnɛi Mɛlɛkaa niŋndo. Chɛl pɛɛku Baabui Seiyaa Chɛhowaa tosa a waŋnda a paawa nyɛ o nyɛ le wo, o yauwo hoo niŋ, Tuei Yoomoo Yeela Lefafɛɛŋ!