“La wa lahɔl, kanifuule la sina paaleŋ kɛlɛŋgaa hawɛiyo le.”—MAATIU 25:​13.

“La wa lahɔl. La wa o puɛɛnɔŋ niŋ te, kanifuule la sina teleŋ kpeekpeiyo le.”—MAKI 13:​33.

Wana o wana cho o chieeŋndo hoo choo mbo sina teleŋ kpeekpei chieeŋndo hoo cho tambei sɔla wo le. Kɛ Mɛlɛka kɛsi “teleŋ kpeekpeiyo,” paaleŋ, a hawɛiyo le chieeŋndo tɛɛmbuuwo. (Maatiu 24:​36) Baa hoo sim ni maa nɛi o nɛi cho le miŋ sina maa tambii chieeŋndo hoo cho niŋ kpɛɛluŋ te? Pɛ pɛ bɛɛ. Mi Chiisu chɔm buɛiyaa nduaa sɔɔŋ yɛ yɛŋ cho wa yɔŋnɔŋndo le chɔmndo maa tambii chieeŋndo cho niŋ kpɛɛluŋ ndo.

Sɔɔŋ muŋ cho sɔɔŋ cho wa yɔŋnɔŋndo woŋ ni le sinaa maa mɛɛlula chieeŋndo hoo la fuuluu. Mi Chiisu dimi aa: “Lɛŋndeŋ le cho sɔŋga a lɛŋndeŋ, mi masaleŋ le sɔŋga a masaleŋ. Yima bɛnduaŋ ma del niŋ, nduyɛ lɛŋnde nyiiyaaleŋ le wa niŋ o fondaŋnda bɔɔbɔɔ.” (Maatiu 24:​3, 7) Mbo dimi vɛlɛ maa “naala diu waŋnda laŋ” la cho wa. (Luku 21:​11) Baa a cho pa sɔɔŋ Chiisu dimi muŋ ndoŋ chɔɔ peelɔŋndo?

Chɔulaŋ, yima bɛnduaŋ, lɛŋnde nyiiyaaleŋ, a naala wɔɔŋ wɔɔŋndaŋ la cho hau waŋnda chieeya saaŋgiaa o chieeŋndo choo. Le tamaseliiyo, o wɔsi 2004 niŋ, mi lɛŋndeŋ le nyiiya o mɛŋndaŋ bɛŋgu o Iŋdiaa niŋ, okoŋ mi mɛŋndaŋ ma hel o kɔŋgɔ, mi ma dii waŋnda le 225,000. O wɔsila yaa hiou laŋ niŋ, mi Naa Kolonaa dii waŋnda le 6,900,000 chieeŋndo balɔɔ silɔ. Mi Chiisu dimi maa sɔɔŋ waa nuaa cho chɔm ni maa mɛɛlula chieeŋndo hoo la cho niŋ kpɛɛluŋ.

Baabuiyo veelu boondei tuupa mi chieeŋndo hoo sɔla tambei aa “palɛi mɛɛlɛi.” (2 Pitɛ 3:​3, 4) Timoti Diiŋ Ndɔɔ 3:​1-5 dimi maa o palɛi mɛɛlɛi niŋ, waŋnda chieeya ve niŋ sɔɔŋ tosa mɛɛ Mɛlɛka hɛnaŋ yɛ le. (Tofa kɔfoo hoo, “ Tuupa mi Chieeŋndo Sɔla Tambei.”) Baa a cho pa wanaa kaala ndapila wa, wanaa lepuluaa, wanaa kɔl vesɛiya, a wanaa kaala chaaŋaa ndaa le wa chɔɔ? Muŋ bɛɛ chɔm maa ŋ cho niŋ o palɛi mɛɛlɛi chieeŋndo hoo niŋ.

Le vɛɛ kpɛ palɛi mɛɛlɛi hei viau yɛ niŋ? A mɛɛ Baabuiyo dimi yɛ, ‘teleŋndo lo le o bɔɔ le.’ Nduyɛ Mɛlɛka cho hunɔɔ “wanaa cho chieeŋndo tɛɛmbuuwo wa” tɛɛmbuu.—Sɔɔŋ Chɔɔmaŋndoŋ 11:​15-18; 12:​12.

Mɛlɛka chii niŋ paaleŋ a hawɛi o cho hunɔɔ chieeŋ dɛnɛ wɔɔŋndo hoo tɛɛmbuuwo kɛsi. (Maatiu 24:​36) Kɛ yooŋgu kɛndɔɔ cho ni maa, Mɛlɛka “yeema mi wana o wana sɔla tambei le.” (2 Pitɛ 3:​9) O cho waŋnda chieeya teleŋndo kioo le ma pɛɛku a ndu okɔɔ, nduyɛ ma diikuŋ ndu. Le yɛɛ? Kanifuule, Mɛlɛka yeema naa miŋ huŋ sɔla pioŋɔɔ te chieeŋndo hoo huŋ sɔla tambei pɛ, nduyɛ miŋ wa achal o chieeŋ sɛnɛiyo niŋ teleŋ chieeŋndo kpou cho simnɔŋ kpele hɛnɛkiɔɔ wo.

Mɛlɛka cho tosaa o nɛi o nɛi niŋ le mi waŋnda kpou pɛɛku a ndu okɔɔ, le ma huŋ wa o chieeŋ sɛnɛiyo niŋ o Masale ndɔleŋ bɛŋgu. Mi Chiisu dimi maa, yooŋgu kɛndɔɔ a Masale Mɛlɛkaleŋ okɔɔ cho dimiŋ “ba o ba fee o chieeŋndo choo.” (Maatiu 24:​14) Chieeŋndo balɔɔ silɔ, mi Seiyaa Chɛhowaa tosa hawɛilaŋ o biiliɔŋndaŋ niŋ, le waŋnda yooŋgu kɛndɔɔ dimullo a nda yooŋgu cho o Baabuiyo niŋndo pɛɛkoo. Mi Chiisu dimi maa, wali dimiaa yooŋgu kɛndɔɔ hoo nɔ mbo tosaŋ ba o ba fee o chieeŋndo choo, tuupa mi chieeŋndo fuuluu o mɛɛlulaŋ.

Boondii masɛi waŋnda chieeya cho niŋ kpɛɛluŋ o mɛɛlulaŋ. Kɛ yooŋgu kɛndɔɔ cho ni maa, a tiuba ma huŋ sɔla pioŋɔɔ te chieeŋndo wa pɛ tambei sɔlaa. Okoŋ, ma huŋ luɛi o Kpele Hɛnɛkiɔɔ niŋ o chieeŋndo choo, o Mɛlɛka mɛi lediom ndo. Buŋgɛi cho lachi ve cho tɛɛsiaa nyɛ ŋ nɔ ma tosa le ma wa o chieeŋ sɛnɛi koŋ niŋndo.