“Mi cha kpeŋgbei lemasaa ɛchɛnɛ a waŋndo ichali lechoo. Wana wa koŋ ichali o kpeŋgbei lemasa koŋ choo wo, wana aa che ndu diondɔɔ iyeleŋgi yeleŋgiei pɛ aa mɛɛ wana cha nuaa kɔɔle chaakiileŋ a le siaŋaleŋ o pou ŋkanioo niŋ yɛ ni. O koŋ kɔɔli, mi cha niŋginaŋgaa o balaa kpeŋgbei lemasaa hoo. Wana aa che niŋginaŋgaa hoo pɛ aa, pou ŋkani ŋɛlɛŋgi ŋɛlɛŋgi nɔ kɔɔle chaakiileŋ ndo ni.”—Sɔɔŋ Chɔɔmaŋndoŋ 4:2, 3.

“Paŋgele bɛndoo o wa ndu o balaa kpɔkɔsu. Paŋgeloo hoo, mɛɛ piɔɔ o hel nuaa mi niŋginaŋgaa o hini yɛ, lende o wa ni. O koŋ, mi sina maa paŋgele chɔm naŋɔɔ bɛndu Mɛlɛka Yaawɛɛ wo wo, maa ndu ya wa koŋ chɔɔ ni.”​—Isikiaa 1:27, 28.

Yilaŋuŋ nda chɔm muŋ kiilanɔɔ Chɔŋ nda wana ndoo suaa le Mɛlɛka wo Isikiaa, chɔm naŋɔɔ Mɛlɛka Kpou Kpou Wo, Chɛhowa, a nyɛm naŋ nɔla miŋ che o kɔl niŋndoŋ. Muŋ cho ni, pouta ŋkani ŋɛlɛŋgi ŋɛlɛŋgi laŋ, a niŋginaŋgaa, a kpeŋgbei lemasa tɔɔmaa. A chɔm naa maa fondaŋ chalaa Chɛhowaa cho bɔɔ fonda kɔndɔfili bɛndu, o naŋ bɔɔ, nduyɛ naa ndu doŋ doŋ.

Nyɛm nda tɛɛsiaa muŋ Mɛlɛka woŋ chɛlaŋ a nyɛ wana soliaa ŋchondoo dimi wo. Ndu cho ni, “Mɛlɛka Yaawɛɛ o cho o bɛndu, o nɔ mbo sɔla saŋgala bɛndoo. O nɔ mbo sɔla bɛɛleŋ mbo hiou Mɛlɛkaa kpou. Kani fondole, mɛlɛkaa waŋnda o lɛŋnde niŋ a sooluu wa kinɛi, piɔmnda koni nda cho ni. Kɛ Mɛlɛka Yaawɛɛ ndu, ndu toosiaa chieeŋndo a nyɛ o nyɛ cho leniŋ ni. O cho wana lebɛɛ, nduyɛ mbo wa wana kpaaya bɛndu. Te wana luɛi dɔɔ o chiɛi ndɔɔ niŋ pɛ, a che kpaaya ndɔ bɛndoo a naŋɔɔ ndɔ bɛndoo.”​—Sam 96:4-6.

Mi che bɛɛ Chɛhowa cho filioŋ, kɛ o veelu naa le miŋ sɔɔŋguu ndu ikɛi o piɛileŋ niŋ, nduyɛ o ke naa tiindaŋndo maa mbo yaŋ naa nilaŋ. (Sam 65:2) Mɛlɛka kaala naa bɔɔ nduyɛ o buulaŋ le naa. Le sabu koŋ kiilanɔɔ Chɔŋ poonyiaa ni aa, “Wana kaalaa Mɛlɛka cho ni.”​—Chɔŋ Tasoo 4:8, NW.

“Nyina . . . Mɛlɛkaa wa Stiiviŋ kɔɔli tau. Mbo nua ɛchɛnɛ. Mɛɛ o nua, mbo cha diondɔɔ Mɛlɛkaa. Mbo cha Chiisu isisi o fondaŋ lebɛɛ bɛndoo Mɛlɛka ikɛi. Mbo dimi aa, “La tofa wɔ. I che mi dioo ɛchɛnɛ o kumbiŋ. I che wana nda veelu aa, Po Wana Pɔnɔɔ wo isisi o fondaŋ lebɛɛ bɛndoo Mɛlɛka ikɛi.””​—Walta Wanaa Chiisuaa 7:55, 56.

Boondii biŋgi hiouwɔɔ tuupa mi Stiiviŋ cha yilaŋnde hei, simlachiaa Chuuwaa Stiiviŋ wa suɛi hei dimullo wa ndaa dii niŋ Chiisu. Mi yilaŋii keŋ chɔm kɛsɛ maa Chiisu ndoo miiŋgu yoomu nduyɛ maa o fula o sɛiyo niŋ mbo sɔla bɛɛleŋ. Mi kiilanɔɔ Pɔɔl poonyiaa a hei okɔɔ aa, “Mɛlɛka miŋgi Kiliti yoomu . . . , mbo kɛsiŋ ndu ikɛi o fondaŋ lebiɔɔ o ba ndɔ kɛndɔɔ choo o fondaŋ Mɛlɛkaa choo choo. Loŋ Mɛlɛka ke ndu naa simaa ni, mbo hiau a kpaaya o kpaaya inyinaya cho o halaa niŋ. . . . naa simaa Kilitiaa nda hiou poloŋ poloŋ. Kpaaya Kilitioo hoo o cho ko le pɛŋgoo hoo le, kɛ mbo kuɛ bɛɛ a lachi kɛ.”​—Ɛfisiaŋnda 1:20, 21.

Baabuiyo chɔɔlu vɛlɛ foofo bɛndu Chiisu nɔ wo tɛɛsiaa. O chɔm naa maa Chiisu buulaŋ tau le waŋchieeya mɛɛ Chɛhowa bɛɛ buulaŋ le nda yɛ. Teleŋ  Chiisu wa wali ndɔ pollo tosaa o lɛŋndeŋ choo wo, mbo siŋgi wanaa wa a naalaŋ nda, a wanaa nɔla lɛ nyɛ tosa a ba nda le wa, nduyɛ mbo miŋgi wanaa ndaa vi wa yoomu. Piɔm sala soliaŋ o sɔla wo chɔm maa o kaala Mɛlɛka a waŋchieeya yiŋgoloŋ. (Ɛfisiaŋnda 2:4, 5) Mɛɛ Chiisu cho niŋ isisi o ba kɛndɛ Mɛlɛkaa yɛ, o cho suŋ kpaaya ndɔɔ soliŋ kpeku nduyɛ mbo hiŋ a tɔnɔlaŋ le wanaa tuisiaŋnda ba o ba fee.

“Mi cha ma kɛsi kpeŋgbeila lemasalaŋ. Mi wana cho kani masindɛ wo o huŋ mbo huŋ chal o kpeŋgbei ndɔɔ choo. . . . Mi cha waŋnda waalaŋ o waalaŋ niŋ ma wa ndu sooluuuwo. Nduyɛ mi cha vɛlɛ waŋnda miiliɔŋndaŋ kɛmɛ ma sim ndu lachi.”​—Daaniɛɛ 7:9, 10.

O yilaŋii Daaniɛɛ che hei a choo choo okɔɔ ve niŋ, o cho ko maalikɛinɔɔ opilɛ le o che le, kɛ maalikɛiya a hɔbɛi. Nuawɔ se yilaŋii kɔndɔfili bɛndu ndoo che ve! Nyaa yoomaa tɔɔmaa o inyinaya maalikɛiya cho ni. A nɔ kɔlkaloo tau nduyɛ kpaayaa pila nda nɔ ni. A pɛltaŋ maalikɛiya haa cho ni. Baabuiyo soo a maalikɛiya okɔɔ hiouwɔɔ bɛmbɔɔ 250.

O cho wanaa wa o chieeŋndo choo ma wu wa le maalikɛiya cho le. Tuupa mi Mɛlɛka toosiaa wanachioo, ndoo toosiaa niŋ fɛlɛŋ maalikɛiya le teleŋ vilɛi. Teleŋ Mɛlɛka wa chieeŋndo toosiaa wo, maalikɛiya wa tofaa ma deŋi a nyaaloo.​—Choobu 38:4-7.

Nɛiyo opilɛ o maalikɛiyaa laalaŋnda tosa wallo le Mɛlɛka wo cho ni, a yɔŋguŋ o wali sɔvɛ bɛndu cho tosaŋndo o chieeŋndo choo hau wo. Ndu cho ni, yooŋgu kɛndɔɔ dimioo a Masale Mɛlɛkaleŋ okɔɔ. (Maatiu 24:14) Mi kiilanɔɔ Chɔŋ cha yɔŋgɔŋ ndaa o wallo hoo niŋ o yilaŋnde niŋ. Okoŋ mbo poonyiaa aa, “O koŋ kɔɔli, mi cha kiilanɔ Mɛlɛka cheleŋ. O wa hunɔɔ o halaa niŋ choo choo pɔ pɔ. Ndu oo hiŋ a yooŋgu kɛndɔɔ o cho lefɛɛŋ fɛɛŋ ndo le mbo dimul wanaa cho o chieeŋndo choo wa, a waŋnda lelɛŋ o lelɛŋ, a lekaa o lekaa, a isɔɔ o isɔɔ maŋgalaa, a waŋnda suu o suu.” (Sɔɔŋ Chɔɔmaŋndoŋ 14:6) Mi che bɛɛ naa maalikɛiya suu lɛ hau o waŋchieeya lo mɛɛ ndaa tosa paandu yɛ le, kɛ ma mala wanaa dimi yooŋgu kɛndɔɔ wa le nda nɛiyo chɔmndo ma kuɛ o wanaa tuisiaŋnda lo.

“O lepilɛ niŋ kpe, mi chɔuwo kiolu ɛchɛnɛ. Mi Mɛlɛka kiilanɔ ndɔ bɛndoo Maikɛl, nda kiilaa Mɛlɛkaa a cho ndu o ba bɛŋgu wa, ma del tambalakaa hoo a kiilaa cho tambalakaa hoo o ba bɛŋgu wa choo a chɔuwo. Mi tambalakaa bɛɛ nda kiilaa nduaa a saa sɔŋgɔɔ a nda. Kɛ mi kiilaa Mɛlɛkaa a yam nda. Fondaŋ chalaa bɛɛ nda aa nɔ lɛ ɛchɛnɛ le. Tambalakaa bɛndoo hoo ma soli ndu ɛchɛnɛ po, nda kiilaa nduaa cho ndu o ba bɛŋgu wa, ma mal nda o chieeŋndo choo. Ndu yɔnuŋ ni maa,  kɛu paandu paandoo, o nda veelu aa, Masa Nyinaa Wɔɔŋnda wo, ma veelu ndu vɛlɛ aa, Setana. Ndu hui ŋwaŋnda chiee kpou ma tosa yɔŋ wɔɔŋndo ni.”​—Sɔɔŋ Chɔɔmaŋndoŋ 12:7-9.

Kɔl nyulu ve o choo choo niŋ te. Chɔŋ a teleŋ wanachioo kanduŋndo, maalikɛinɔɔ opilɛ ndoo nɔ yeemɛi ikala kala le mi waŋchieeya piɛi ndu. Le hei, mbo tosal Chɛhowa nila kalulaŋ, okoŋ mbo simnuŋ Setana, koŋ cho ni, “Wana Simulaa.” Mi maalikɛiyaa cheleŋ bɛɛ tual ndu kɔɔli le nilakalulaŋ tosaa, okoŋ, ma sɔla veelɔŋndo aa nyinaa wɔɔŋnda. A dɛnɛ wɔɔŋ wɔɔŋ ndaa, ma simul Mɛlɛka kpele kpele, nduyɛ ma tosa mi wanaa bɔɔbɔɔ kɛɛ le nɛi chɔmaa Chɛhowaa tolɔɔ kɔɔli.

Setana nda nyinaa nduaa wɔɔŋnda nɔ bɔɔ kaa nɔɔlɛiyo nduyɛ a nɔ bɔɔ dɛnɛ wɔɔŋndo. Yaamɔɔwaa waŋchieeya nda cho ni. Nduyɛ, nyɛpalaa bɛndu cho hau o chieeŋndo choo wo bala ndalaŋ la cho leniŋ. Le tamaseliiyo, Setana dii chɔluaa wana laalaŋndo Choobu a buɛiyaa nduaa ni. Okoŋ kɔɔli, mbo tosa mi “hueiyii tɔɔmɛi bɛnduei” i huaŋ mi chiɛi chuauwaa tɔ wa Choobuaa wa leniŋndo komba nda choo ma wu kpou. Koŋ faŋaŋndo, mi Setana tosa mi “pauve i tiu Choobu lekɔɔ chɔŋ a bolleŋ mbo tual a peloŋ di.”​—Choobu 1:7-19; 2:7.

Kɛ, Setana nɔ suŋ le tambei sɔlaa. Chɔŋ a teleŋ nda mal ndu o lɛŋndeŋ choo wo, o sina maa “teleŋ ndɔɔ cho niŋ o biŋgii naa.” (Sɔɔŋ Chɔɔmaŋndoŋ 12:12) Mbɔ Setana i nduɛi chuu, nduyɛ yooŋgu kɛndɔɔ pila cho hoo ni!

“Ma baŋa ŋwaŋnda chiee le Mɛlɛka sanaa a piɔm ŋ sɔla wo. Nda yɔnuŋ ni maa, waŋnda lekaa o lekaa, a isɔɔ o isɔɔ maŋgalaa, a waŋnda suu o suu, a lelɛŋ o lelɛŋ. Ma siiŋguu nda wanaa ŋ wa niŋ choo masa wa, nduyɛ ma siiŋguu nda wanaa soliaa lasalaa. Nduyɛ, waŋnda haa wa niŋ masaa ŋwaŋnda chiee choo o chieeŋndo choo.”​—Sɔɔŋ Chɔɔmaŋndoŋ 5:9, 10.

Mɛɛ Chiisu sɔla fulasɛiniŋndo o chieeŋndo choo mbo hel o choo choo niŋ yɛ, lende koni i cho yɔŋnɔŋ le acheleŋnda ni. Mi Chiisu dimul kiilaa nduaa laalaŋnda aa, “I cho lakɔ yiyalaŋ bɛɛndiaa le nya. . . . Nduyɛ, . . . I cho miiŋgu mi huŋ kɔ a nya le mi ŋ wa naa nyaa naa ya I wa niŋ nda.”​—Chɔŋ 14:2, 3.

Wanaa kua o choo choo niŋnda, le saboo nda kua loŋ ni. A wa niŋ loŋ a Chiisu latulu. A cho wa o Masaleŋ choo. Masale leŋ kpaaya ndɔɔ cho wa ŋwaŋnda chiee choo o lɛŋndeŋ choo kpou nduyɛ mi le huŋ dɔu nda kpou sala. A Masaleŋ ndeŋ okɔɔ Chiisu dimul buɛiyaa nduaa ni le ma piɛi o piɛile o pɛɛku nda leŋ niŋ. Leŋ le cho ni, “Mɛlɛka Finya naa o choo choo niŋ, waŋnda kpou ke diola numndaŋ bɛɛleŋ. Masale numndeŋ le huŋ. Hɛnaŋ numndo o tosaŋ o lɛŋndeŋ choo mɛɛ o cho o choo choo niŋ yɛ.”—Maatiu 6:​9, 10, NW.

“Mi [kiilanɔɔ chɔŋ] tuɛi diomndo fulaa choo choo o kpeŋgbei lemasaa. Mbo dimi aa, “Boondei hei niŋ, naa chalaa Mɛlɛkaa cho ŋwaŋnda chiee tɛɛŋ. . . . O cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa, kani fuule, nyɛ o nyɛ paandu chuu faŋaŋ.””​—Sɔɔŋ Chɔɔmaŋndoŋ 21:3, 4.

Yilaŋnde hei cho chɔmndo nyɛ nɔ le yɔŋnɔŋndo o Masale Mɛlɛkaleŋ bɛŋgu wo. Chiisu nda wanaa sɔla fulasɛiniŋndo ma hel o choo choo niŋnda, cho hunɔɔ Setana faŋa bau, okoŋ, ma toosiaa chieeŋndo kpele hɛnɛkɛ. Sɔɔŋ cho hunɔɔ a nyɛ nɛiyaa vɛlɛ a dɛnɛ palaa wana chioo choo woŋ ve lɛ niŋ te. Piɔmndo bɛɛ cho hunɔɔ faŋaŋ.

Kɛ wanaa vi yɛ niŋ o biiliɔŋndaŋ niŋ a sɔla niŋ fulasɛiniŋ le helɔɔ o choo choo niŋ te wa yɛ? O chilaŋ niŋ, a cho miiŋgu yoomu ma sɔla dikeŋnaŋndo le waa achal o Kpele Hɛnɛkiɔɔ niŋ o lɛŋndeŋ choo lefafɛɛŋ.—Luku 23:​43, NW.