MA KINDIŊ LE NDU TƐƐMBOO: Mi che bɛɛ mi Baabuiyo hiau simullo a tambei, kɛ mi wanaa miŋgi ndu poonyiaa wa a wanaa hiviaa apum kindiŋ le yooŋgu cho leniŋndo siŋgaa. Teleŋndaŋ lapum, ma kindiŋ le mi Baabuiyo chɛl pɛɛkula ndalaŋ, tuupa ma chɛl pɛɛkula cho o Baabuiyo niŋndaŋ. Ŋ tofaŋndɔ tamaseliilaŋ lapum:

• Fondaŋ lepiɛiyo: O wɔsiŋ kɛmɛ lehiɔɔloŋ a ŋ kɛmɛ lediiŋndoŋ tɛɛŋ o B.C.E. niŋ, mi wanaa poonyiaa “Samaritan Pentateuch” wa poonyiaa diomndaŋ ndaŋ o Ɛsɔdɔɔ 20:17 niŋ aa, “Aargaareezem, loŋ ŋ taŋgul bandoo ni.” Sameeliaŋnda ndaa yeema mi Diom Mɛlɛkaa toolu maaŋ nda wa taŋgullo “Aargaareezem” ndo, ɔɔ o Pembei Kɛluaasim choo wo.

• Laalaŋ mɛlɛkaa yaa wa o Mɛlɛka pilɔɔ niŋ: Mɛɛ nda chii Baabuiyo poonyiaa, ndoo fuuluu wɔsilaŋ kɛmɔɔ leyaa le mi wana poonyiaa a pɛɛku Mɛlɛkaa Yaa wa o Mɛlɛka Pilɔɔ niŋndo poonyiaa o Chɔŋ Tasoo 5:7 niŋ diomndaŋ ndaŋ maa “o choo choo niŋ, Finyaa, Diomndo, a Nyina Kasioo, nduyɛ wanaa yaa wa haa waŋndo opilɛ nda cho ni.” Diomndaŋ ndaŋ la ve o yaula taselaŋ peŋ niŋ te. Mi wana pɛɛku a Baabuiyo okɔɔ wo Blɔɔ Mɛtika dimi aa, “Kanduŋ o wɔsiŋ kɛmɛ le ŋɔmpum ndoŋ mbo hiau lachi kɛ, diomndaŋ ndaŋ la wa daandi daandi o yaula Latiŋ Paanduei a [Latiŋ] Vɔlket ve niŋ.”

• Diola Mɛlɛkalaŋ: Mi wanaa wa haa Baabuiyo hivioo wa baa ndi a naamula Chuuwa le diola Mɛlɛkalaŋ faŋaa fiou o Baabuiyo niŋ. Yɔŋi nda poonyiaa diola Mɛlɛkalaŋ, ma miŋgi, “Mɛlɛka” ɔɔ “Masanɔɔ.” O cho ko Mɛlɛka le nda veelu naa le, kɛ waŋchieeya, nyɛm nda sooluu le piɛile lachoowaleŋ ndo, nduyɛ a Nyina Wɔɔŋndo bɛɛ a veelu nda lende.—Chɔŋ 10:34, 35; Kɔliŋtiaŋ Tasoo 8:5, 6; Kɔliŋtiaŋ Diiŋ Ndɔɔ 4:4. *

MƐƐ BAABUIYO SƆLA PIOŊƆƆ YƐ: O tasoo, wanaa miŋgi Baabuiyo poonyiaa wa apum ndaa buulaŋ te, nduyɛ wanaa lakafaa nda wa ni. Kɛ a bɔɔbɔɔ ndaa nɔ kioo tau nduyɛ a wa yekeŋ. O wɔsiŋ kɛmɛ le ŋɔmpum ndoŋ a waapilɔŋ tɛɛŋ o C.E. niŋ, mi Mɛsoluɛtiiya miŋgi yaula maHibuluilaŋ poonyiaa, nduyɛ ma soli yau nɔ  diolaŋ aa yaula Mɛsoluɛtiiya wo. Ma tofa nyɛ nda poonyiaa wo lediiŋ diiŋ le ma che kɛsɛ maa biondɔŋ o biondɔŋ cho leniŋ te. Naa nda saaluŋ pɛ biondɔŋndaŋ o yaula nda cho nuaa ma poonyiaa laŋ choo wo pɛ, a poonyiaa o peeleŋ ikɛi. Mi Mɛsoluɛtiiya kɛɛ le nyɛ cho o Baabuiyo niŋndo siŋgaa. Mi Wanaa pɛɛkaa bɛndoo diolaŋ Moshe Goshen-Gottstein poonyiaa aa, “Baabuiyo siŋgaa a hɔlta vesɛi sɛɛŋ, suɛi dɛnɛ wɔɔŋnde pila wa keŋ le nda ni.”

O diiŋndɔɔ, yaula kaakuula Baabuila waŋnda miŋgi poonyiaa laŋ la mala hau wanaa pɛɛku a Baabuiyo okɔɔ wa le biondɔŋndaŋ chɔɔ. Le tamaseliiyo, le wɔsilaŋ o kɛmɛlaŋ niŋ, simlachiaa lekaŋnda ndaa nɔ yiyaŋndo maa Baabuila maLatiŋndaŋ kinɛi la nɔ tonyaa ni. Kɛ, a mɛɛ naŋ che o buŋgɛi hei niŋ amaluaŋ yɛ, ma poonyiaa choolaŋ o Chɔŋ Tasoo 5:7 o Baabuiyo maLatiŋndo niŋ. Nduyɛ ma poonyiaa vɛlɛ choola laŋ o “King James Version” cho o Iŋkilisiiye niŋndo, o waŋnda hɛnaŋ tau wo! Kɛ mɛɛ nda saaluŋ yaula cheleŋ, yɛɛ ndaa saaluŋ yɛ o laŋ niŋ? Mi Blɔɔ Mɛtika poonyiaa aa, “Nyɛ cho [o Chɔŋ Tasoo 5:7] niŋndo ve kposoŋ o yaula masindɛlaŋ niŋ kpou le, (Syriac, Coptic, Armenian, Ethiopic, Arabic, Slavonic), o Latiŋnde niŋ koni o wa ni.” Nduyɛ le saboo hoo, mɛɛ nda miŋgi “King James Version” kpɛlɛkiaa, ma faŋa biondɔŋnda laŋ leniŋ, a o Baabuila cheleŋ niŋ.

Baa mi yaula paandula cheleŋ, la waŋnda miŋgi poonyiaa laŋ la chɔm pa maa yooŋgu cho o Baabuiyo niŋndo siŋgaŋ te? Mɛɛ nda saaluŋ “Dead Sea Scrolls” o wɔsi 1947 niŋ, wanaa pɛɛkaa ndaa nɔla niŋ ma tuu sɔɔŋ ndaa poonyiaa o yaula maHibuluila Mɛsoluɛtiiya niŋndoŋ a sɔɔŋ wa o yaula simbulaala ndaa poonyiaa niŋ le wɔsioŋ waapilɛ wo. Mi wana yaasiaa opilɛ, o kunda “Dead Sea Scrolls” mɛɛlu dimi maa yau simbulaa opilɛ kpe “chɔm tonyaa kpendekele maa le wɔsioŋ hiouwɔɔ waapilɛ, nyɛ kpeekpei Baabuiyo dimi wo Chuuwaa miŋgi Baabuiyo poonyiaa wa miŋgi poonyiaa ni, nduyɛ a wa yekeŋ yɔŋi nda tosa biondɔŋndaŋ.”

Mi “Chester Beatty Library” o Dɔbiliŋ niŋ, o lɛŋnde Aililaŋ ndeŋ niŋ, chɔm yaula ndaa poonyiaa o yaula nda toosiaa a tɔlɔɔ makpɛndɔɔ laŋ. Yaulaŋ ndaŋ la wa le yaula maKilikiilaŋ kpou, a yaula ndaa miŋgi poonyiaa a wɔsiŋ kɛmɛ lediiŋ ndoŋ o C.E. niŋndo. Nduyɛ wɔsioŋ kɛmɛ koni muŋ hiou ni chɔŋ a teleŋ nda chii Baabui kpeekpeiyo poonyiaa wo. Mi “The Anchor Bible Dictionary” dimi aa, “Mi che bɛɛ naa yaula nda poonyiaa o yaula nda toosiaa a tɔlɔɔ makpɛndɔɔ laŋ laa nɔ yooŋgu sɔvɛ cheleŋ a nyɛ poonyiaŋ leniŋndo okɔɔ, kɛ mi la mala vɛlɛ wanaa wa Baabuiyo miŋgioo poonyiaa wa le poonyiaa nyɛ pilɔɔ kpe.”

FULAMAKƆƆLIOO: Wana o wana lakasiaa nyɛ wa o poonyiaa o Baabuiyo niŋndo le. Kɛ, yaula Baabuila waŋnda miŋgi poonyiaa laŋ, la masindɛ laŋ, a cho la cho puɛɛ wo, chɔɔlu ndu siɛɛnduu. Mi Sa Fɛdiliki Kenyɔŋ poonyiaa a Yaula maKilikiilaŋ okɔɔ aa, “Yau o yau masindɛ cho mbo nɔ yaula tɛnda seileŋ a ndu okɔɔ maa Baabuiyo le. Nduyɛ wana o wana sinaa dɛnɛ wa pɛ sakpo, a dimi maa yooŋgu naŋ nɔ o Baabuiyo niŋndo cho yooŋgu tonya le le.” Nduyɛ mi wana sinaa dɛnɔɔ Wiliam Hɛŋlui Kiliŋ dimi aa, “Ŋ nɔla miŋ dimi maa wali kɛ kɛ cho mbo tosaŋ nyɛkɛndɛi o sindɔɔ niŋ maa wali Baabuiyo le.”