1. Teŋgeŋ yɛɛ cho yɛ nyɛm naŋ hau ba woŋ tɛɛŋ a nyɛm naŋ yeema woŋ?

O CHO nyɔɔŋ tau le naŋ hau ba le waa achal te. Le tamaseliiyo, ŋ hau ba le nyɛdiaa, nyɛ chuɛɛnaŋndo, a naa lɔlaa. Kɛ yeemɛi naŋ nɔ le nyɛmkiɔɔŋ nde nɔ la mɛɛlu le. Nduyɛ wanaa bɔɔbɔɔ nɔ sinapɛŋgu maa a heu ba le nyɛm nda yeema woŋ te.

2. Nyɛm kuɛɛ waŋnda yeema yɛ lepum?

² Te waŋndo wa pɛ o lɛŋnde nɔ nyɛsɔlaa niŋ te wo, nyɛ o yeema wo wa teŋgeŋ a wana cho o lɛŋnde nyɛsɔlaa niŋndo. O fondalaŋ lapum o chieeŋndo choo, mi waŋnda yeema foŋndo, mutoo, ɔɔ lɛŋnde pɔmbɔ le taŋgullo. O fondala cheleŋ, mi waŋnda yeema nyɛ chuɛɛnaŋ baa kalaa, chiɛi bɛndoo, ɔɔ mɔmbil baa kalaa. Kɛ ba o ba naŋ wa, ɔɔ mɛɛ mɛɛ naŋ nɔ kanioŋ, miŋ kandu nyɛm naŋ heu ba le woŋ yeemaa, ɔɔ ŋ naŋ nɔla piondɔɔ le woŋ.

3. Yɛɛ cho yɛ yeemɛi nyɛmkiɔɔŋ?

³ Yɛɛ cho yɛ yeemɛi nyɛmkiɔɔŋ? Buulaŋ waŋndo nɔ lɔɔlɔɔ le nyɔɔŋ sɔlaa tau wo. Le wana waa naa, nyɛmkiɔɔŋ o hiou kaala  a chaŋyɛi o nɔ nda Mɛlɛka ve. O nɔ kɔl hiniaa le nyɛm o hau ba woŋ kinɛi le. Yeemɛi nduɛi le nyɛmkiɔɔŋ nɔ la mɛɛlu le. Wanaa nɔ kaniŋ bɔɔ le wa, a wanaa pindu nyɛm baa kala le wa bɛɛ nɔ yeemɛi nyɛmkiɔɔŋ. Mi waŋnda haa pɛŋgi Masale Mɛlɛkaleŋ kɛsioo nyɛ tase peŋ o yoomula ndalaŋ niŋ.​—Hibuluiya 13:5.

4. Vɛɛ Setana soliŋ yɛ “nyɛm waŋnda cha ma luɛi lehɔl o muŋ ndoŋ” kpeku?

⁴ Setana yeema miŋ laalaŋ maa le miŋ tuei yoomoo yeela, mɛɛ miŋ nɔ nyɔɔŋ tau. Lelaŋ, o cho chieeŋndo hoo soliŋndo kpeku a “nyɛm waŋnda cha ma luɛi lehɔl o muŋ ndoŋ” le miŋ nɔ yeemɛi le muŋ sɔlaa tau. (Chɔŋ Tasoo 2:15-17; Chɛnɛsee 3:6; Pulɔwaa 27:20) Lepaa o lepaa, ma keeliaa nyɛm sɛnɛiyoŋ halikpeŋ miŋ nɔ yeemɛi le muŋ piondɔɔ. Baa a pendu niŋ pa nyɔɔ le mɛɛ ŋ che ndu maa o naŋ yɛ, ɔɔ le mɛɛ nda chɔm num ndu yɛ? Te o wa pɛ lende, naapum ma cha maa o cho nyɛ num oo hau ba le ndu kpeekpei le. Te ŋ lambaŋ pɛ nyɛm naŋ heu ba le woŋ piondɔɔ, ŋ cho yoomu naa kaya kayaa. Nyɔɔŋ muŋ cho naa kɔllo faŋa o Chɛhowa piɛiyo. Le tamaseliiyo, ŋ nɔ lɛ teleŋ bɔɔ le Baabuiyo pɛɛkoo, bɛɛndiaŋndo le bɔŋaŋnda leKilisiɔŋndaŋ, a kɔlaŋ o wali pollo niŋ te. Loonuŋ maa mi kiilanɔɔ Chɔŋ sila aa, “Chieeŋndo cho chuwɔɔ a yeemaŋ cho le niŋ ndoŋ fau.”

5. Yɛɛ yɔŋnuŋ yɛ a wanaa soliŋ yoomuma ndaŋ kpeku le nyɛmkiɔɔŋ nuuviaa wa?

⁵ Setana yeema miŋ soliŋ yoomuma naŋ kpeku le chɔɔloo kanioŋ a nyɔɔŋ nuuviaa, kɛ o yeema miŋ soliŋ maŋ kpeku le Chɛhowa piɛiyo le. (Maatiu 6:24) Te o wa pɛ miŋ nɔ yeemɛi le nyɔɔŋ sɔlaa kinɛi le naapila, yoomu naa cho nɔ sabu o sabu le. Kɔllo cho naa tambu, nduyɛ, miŋ luɛi o bahawɛi ikanioo niŋ. I hiou le wɔu kpou ve, naapum miŋ mal tiindaŋndo dɔuwɔɔ o Chɛhowa niŋ a Masale ndɔleŋ. (Timoti Tasoo 6:9, 10; Sɔɔŋ Chɔɔmaŋndoŋ 3:17) Mi Chiisu dimi aa “yeemɛi nyɛm chieeŋndoŋ” cho maa yɔɔŋ kuuna tɔlɔɔ hindɔɔ a kɔmndeŋ ndo.​—Maki 4:14, 18, 19.

6. Yɛɛ bundɛi Baluki ve pɛɛku yɛ naa?

⁶ Yiyaŋndɔ a Baluki okɔɔ, wana poonyiaa Chɛluimaya wo. Mɛɛ Baluki kandu “dɛnɛ kɛndɔɔ” nuuviaa le ndupila, mi Chɛhowa loonuŋ ndu maa Chulusɛlɛm cho suŋ tambei sɔla. Kɛ mbo dimul Baluki maa o cho yoomu ndɔɔ piŋi. (Chɛluimaya 45:1-5) Baluki ndoo nɔ lɛ mbo wa kɔl o nyɛ cheleŋ te. Chɛhowa ve nyɛm waŋnda ndaa nɔ woŋ piŋi le. (Chɛluimaya 20:5) Hau, ŋ cho niŋ kpɛɛluŋ o mɛɛlula chieeŋ Setanaa hoo. Lelaŋ, o cho teleŋ naŋ nɔ miŋ wa nyɛmkiɔɔŋ deŋgelaa le naapila le. Nduyɛ ŋ nɔ miŋ wa kɔl maa te nyɛpalaa bɛndoo hiou pɛ fogbi, nyɛm naŋ nɔ woŋ cho naa lo o ba le, o yɔŋ bɛɛ miŋ wa ŋ sɔvɛ le naa.​—Pulɔwaa 11:4; Maatiu 24:21, 22; Luku 12:15.

7. Yɛɛ naŋ cho yɛ hunɔɔ yaasiaa, nduyɛ le sabu yɛɛ?

⁷ Vɛɛ naŋ looku yɛ miŋ bii naapila a yuŋgu naa nduyɛ miŋ wa vɛlɛ hɔlla mulioo o suɛi hiou bɛnda kpou o yoomu naa niŋnde? Vɛɛ naŋ looku yɛ miŋ kpakpala yeemɛi nyɛmkiɔɔŋ? Nduyɛ yɛɛ mala naa le miŋ pɛŋgi buulaŋ bɛndoo le nyɛm naŋ hau ba woŋ? Mi Chiisu ke naa sila sɔviɔɔ a hei okɔɔ o Pɛɛku ndɔɔ niŋ o Pembei choo. (Maatiu 6:19-21) Ŋ veeluŋ ndɔ diomndaŋ nduyɛ miŋ yaasiaa Maatiu 6:25-34. Hei cho tosa miŋ laalaŋ maa ŋ nɔ miŋ landuŋ kɔl le Masale Mɛlɛkaleŋ, o cho le nyɔɔŋ te.​—Luku 12:31.

8, 9. (a) Le yɛɛ naŋ nɔ yɛ miŋ buulaŋ tau le nyɛm naŋ hau ba woŋ te? (b) Yɛɛ Chiisu ndoo sina yɛ a waŋchieeya vɛlɛ a bahawɛila ndalaŋ?

⁸ Nuawɔ Maatiu 6:25. Chiisu ndoo sina maa buɛiyaa nduaa ndaa nɔ buulaŋndo  le nyɛ nda dia wo, nyɛ nda kol lo, a nyɛ nda chuɛɛnuŋndo. Lelaŋ, o Pɛɛku ndɔɔ o Pembei choo, mbo dimul nda aa, “La buulaŋ” le yoomula nyalaŋ te. Chiisu ndoo yeema nda malaa ma sina le sabu nda nɔ ma buulaŋ le nyɔɔŋ muŋ kpou le wo. Ndoo sina maa te a hiu pɛ buulaŋ le nyɛm kpeekpei nda hau ba woŋ bɛɛ, a cho puɛɛnɔŋ nyɛ hiou wa o sɔvɛ o yoomoo niŋndo. Chiisu ndoo buulaŋ tau le buɛiyaa nduaa. Lelaŋ, mbo sila nda bɛmbɔɔ le hiɔɔlu o pɛɛku o wa nda wo niŋ a kpundɛ buulaŋndo nɔ wo.​—Maatiu 6:27, 28, 31, 34.

⁹ Kɛ le yɛɛ Chiisu dimullɛ naa le miŋ pɛŋgi buulaŋndo le nyɛ naŋ dia wo, nyɛ naŋ kol lo, a nyɛ naŋ chuɛɛnuŋndo? Baa ŋ heu ba le nyɛdiaa a nyɛ chuɛɛnaŋndo le? O kpeekpei niŋ, ŋ hau ba! Nduyɛ, te o yɔŋ pɛ miŋ nɔ kanii bɔɔ le nyɔɔŋ muŋ piondɔɔ le, miŋ buulaŋ. Chiisu ndoo sina keŋ. Ndoo sina nyɛm waŋnda hau ba woŋ. Nduyɛ mbo sina maa o “palɛi mɛɛlɛi” niŋ, bahawɛila kala kalalaŋ la cho buɛiyaa nduaa komal. (Timoti Diiŋ Ndɔɔ 3:1) I cho tonya maa wana bɔɔbɔɔ hau, nɔla ma sɔla baalaa le, nduyɛ nyɔɔŋ cho hiouwɔɔ lachi a baa kaloo. O fondaŋnda bɔɔbɔɔ, waŋnda tambu bɔɔ, nduyɛ a nɔ pɛŋ nyɛ nda dia wo le. Kɛ Chiisu ndoo sina vɛlɛ maa yoomu wanachioo cho o sɔvɛ mbo hiau nyɛ diaa a nyɛ chuɛɛnaŋndo.

10. Mɛɛ Chiisu wa buɛiyaa pɛɛkoo mɛɛ nda nɔ ma piɛi yɛ, yɛɛ ndoo dimi yɛ maa o nɔ mbo wa nyɛ sɔvɛ o yoomu ndaa niŋ?

¹⁰ O tase ndɔ, mi Chiisu pɛɛku buɛiyaa nduaa maa te a wa pɛ piɛileŋ, a nɔ ma nyuna Finya nda o choo choo niŋ le mbo ke nda nyɛm nda hau ba woŋ. Ndaa nɔ ma piɛi aa, “Tosa a sabu mi ŋ sɔla nyɛ diaa naa ŋ dia paale hauleŋ ndo.” (Maatiu 6:11) A teleŋ cheleŋ, mbo dimul nda le ma piɛi aa, “Tosa a sabu mi ŋ sɔla nyɛ diaa naa ŋ dia lepaa o lepaa wo.” (Luku 11:3) Kɛ keŋ sim naa maa ŋ nɔ miŋ wa yiyaŋndo lepaa o lepaa le sɔlaa nyɛm naŋ hau ba woŋ te. Mi Chiisu dimul buɛiyaa nduaa maa piɛileŋ le mi Masale Mɛlɛkaleŋ le hiŋ cho o sɔvɛ mbo hiau piɛileŋ le bahawɛila ndalaŋ. (Maatiu 6:10; Luku 11:2) Le mbo mala buɛiyaa nduaa ma pɛŋgi buulaŋndo, mi Chiisu dɛɛniaa nda kɔllo nduyɛ mbo dimul nda mɛɛ Chɛhowa buulaŋ le nyɛm o toosiaa woŋ kpou yɛ.

11, 12. Yɛɛ naŋ pɛɛku yɛ a mɛɛ Chɛhowa buulaŋ le youwa o choo choo niŋ yɛ? (Tofa fotueiyo o peele naŋ kandu leŋ choo.)

¹¹ Nuawɔ Maatiu 6:26. Ŋ nɔ miŋ ‘yiyaŋ a youwa okɔɔ.’ Mi che bɛɛ naa nyaa yoomaa taaniŋnda youwa cho ni, kɛ dioo pila nda dia ni. Te ndoo wa pɛ mi youwo ndoo wa o bɛndu maa wanachioo, o wa nyɛdiaa dio mbo hiou wanachioo. Mi youwa de komɔɔ yɔmnde, kulloŋ, kamballa, a dondopolla. Kɛ a tosa ichiɛɛ le nyɛdiaa ndaa sɔlaa le. Chɛhowa ke nda nyɛm nda hau ba woŋ kpou ni. (Sam 147:9) Kɛ i cho tonya maa o dou nda nyɛdiaa o sondo le! A nɔ ma kɔ nuuviaa nyɛdiaa, nduyɛ ma saaluŋ ndu.

¹² Chiisu ndoo laalaŋ maa te Finya ndɔ buulaŋ pɛ a youwa, o nɔla vɛlɛ mbo buulaŋ le waŋchieeya. ^[1] (Tofa diomnda chɔɔlaalaŋ.) (Pitɛ Tasoo 5:6, 7) A tonya, maa youwa, ŋ nɔ miŋ wa wanaa isiɛlɛi le. Ŋ nɔ miŋ tosa wali ichiɔɔ le nyɛdiaa naa sɔlaa, ɔɔ le kaniei sɔlaa miŋ pendu ndu. Chɛhowa cho kindi kindiŋ naa salaa dɔuwɔɔ. Nduyɛ te o wa pɛ miŋ nɔ kanii bɔɔ ɔɔ nyɛdiaa bɔɔ le, o nɔla mbo ke naa nyɛ naŋ hau ba wo. Le tamaseliiyo, mi acheleŋnda ke naa lepum nyɔɔŋ. Mi Chɛhowa ke vɛlɛ youwa naa lɔlaa. O ke nda kpaayaa le vaande taŋgullo. Nduyɛ, ndu toosiaa bil nda taŋgul vaande wo ni. Naa bɛɛ mi Chɛhowa mala naa le naa lɔlaa kɛndiaa sɔlaa le yuŋgu naa.

13. Yɛɛ chɔm yɛ maa ŋ cho a sɔvɛ mbo hiau youwa o choo choo niŋ?

¹³ Mɛɛ Chiisu dimul buɛiyaa nduaa maa Chɛhowa ke youwa nyɛdiaa ni, mbo nyuna  aa, “La hiu youwa poloŋ te?” (Tuuwɔ Luku 12:6, 7.) O nyɛ Chiisu dimi hoo wo niŋ, naapum ndoo yiyaŋ a mɛɛ o wa yoomu ndɔɔ yɔŋgu le waŋchieeya kpou yɛ. A tonya, o cho le youwa a visiaa cheleŋ te Chiisu ndoo vi le. Le naa o vi ni, le halikpeŋ miŋ wa achal lefafɛɛŋ.​—Maatiu 20:28.

14. Yɛɛ wana buulaŋndo tiu yɛ ba tosa le?

¹⁴ Nuawɔ Maatiu 6:27. Yɛɛ Chiisu ndoo yiyaŋ yɛ mɛɛ o dimi maa o yɔŋ bɛɛ miŋ buulaŋ ŋ nɔla miŋ chɔɔlu yoomula naalaŋ bɛndi le paaleŋ lepilɛ kpe bɛɛ le? Dimioo o wa ni maa ŋ buulaŋ bɛɛ le nyɛm naŋ hau ba woŋ, ŋ nɔla yoomu naa bɛndi kposoŋ te. Te ŋ hiu buulaŋndo pɛ, ŋ cho naa, okoŋ, miŋ vi.

15, 16. (a) Yɛɛ naŋ pɛɛku yɛ a bil lapeŋgoo yondoo niŋ okɔɔ? (Tofa fotueiyo o peele naŋ kandu leŋ choo.) (b) Nyunala yɛɛ naŋ nɔ yɛ miŋ nyunaŋ naapila, nduyɛ le yɛ?

¹⁵ Nuawɔ Maatiu 6:28-30. Miŋ naŋ kɔl te ŋ nɔ pɛ nyɛ chuɛɛnaŋ kɛndɔɔ le wounɔŋndo, taama taama le kɔlaŋ o wali pollo niŋ, bɔŋaŋnda leKilisiɔŋndaŋ a la ibuŋgalaŋ. Baa ŋ nɔ pa miŋ “buulaŋ le nyɛ chuɛɛnaŋndo”? Mi Chiisu dimul vɛlɛ buɛiyaa nduaa mɛɛ Chɛhowa buulaŋ le nyɛm o toosiaa woŋ yɛ. Mi Chiisu soliŋ tamaselii “pɔmbiaŋ yondoo niŋ” kpeku. “Pɔmbiaŋ” ma cho bil lapeeŋgoo yondoo niŋ ni. Bil lapeŋgoo sondu nyɛ chuɛɛnaŋ le wounɔŋ te. Kɛ o naŋ bɔɔ nua. Lelaŋ, mi  Chiisu suaa a bil lapeeŋgoo okɔɔ maa a sul masaa Sɔlɔmɔŋndo kpou “ndu oo nɔ nyɛ chuɛɛnaŋndo mbo fuuluu naŋɔɔ mɛɛ pɔmbiaŋ ma cho yɛ le”!

¹⁶ Yiyaŋndɔ vɛlɛ a nyɛ Chiisu ndoo dimi o koŋ kɔɔli wo. Mbo dimi aa, “Naa [Mɛlɛka] tosa wɔ a billo lende, o nɔla kpeekpei mbo ke nya nyɛ chuɛɛnaŋndo. La nɔ laalaŋ bɔɔ le ma?” A tonya, o nɔla! Kɛ buɛiyaa Chiisuaa ndaa nɔ ma chɔɔlu tiindaŋndo nɔ. (Maatiu 8:26; 14:31; 16:8; 17:20) Ndaa nɔ ma nɔ tiindaŋndo maa Chɛhowa buulaŋ le nda, nduyɛ maa o nɔla kpeekpei mbo manda nda. Kɛ naa yɛ? Ŋ laalaŋ pa maa Chɛhowa buulaŋ le naa?

17. Yɛɛ tɛɛmbuu yɛ chaŋyɛi cho naa tɛɛŋ a Chɛhowa ve?

¹⁷ Nuawɔ Maatiu 6:31, 32. Wanaa bɔɔbɔɔ sina Chɛhowa le wa muli hɔlla le kanioŋ a nyɔɔŋ chɔɔloo sɔlaa. Kɛ te ŋ tol nda pɛ kɔɔli, chaŋyɛi nɛi a Chɛhowa cho tambu. Ŋ sina maa Chɛhowa cho Finya naa ni nduyɛ o kaala naa. Nduyɛ ŋ sina maa te ŋ kɛsi pɛ Masale ndɔleŋ nyɛ tase peŋ o yoomu naa niŋ, o cho naa ke nyɛ o nyɛ naŋ hau ba, nduyɛ, mbo hiou pɛŋ mɛɛ naŋ yeema yɛ. Ŋ sina vɛlɛ maa te chaŋyɛi kɛndɛi wa pɛ naa tɛɛŋ a Chɛhowa, koŋ ke naa kɔl kɛndɛ kpeekpeiyo. Nduyɛ hei tosa miŋ hini kɔl te ŋ sɔla ‘nyɛ diaa naa  ŋ dia wo a nyɛ chuɛɛnaŋndo’ pɛ.​—Timoti Tasoo 6:6-8.

18. Yɛɛ Chɛhowa sina yɛ a naa okɔɔ, nduyɛ yɛɛ o cho yɛ tosa le naa?

¹⁸ Nuawɔ Maatiu 6:33. Te ŋ kɛsi pɛ Masale Mɛlɛkaleŋ nyɛ tase peŋ o yoomu naa niŋ, Chɛhowa nɔla mbo ke naa nyɛm naŋ hau ba woŋ kpou. Mi Chiisu tɛɛsiaa le sabu naŋ nɔ miŋ dɔu tiindaŋndo o nyɛ o dimi wo niŋ. Mbo dimi aa, “Mɛlɛka finya nya ndu sina maa la nɔ le nyɔɔŋ muŋ sɔlaa.” Tuupa mi kɔllo del num maa a yeema nyɔɔ hoo, Chɛhowa ndu sina yeemɛi numnde. (Filipiaŋnda 4:19) Nduyɛ o sina maa num a yuŋgu numndo hau ba le naa lɔlaa. Chɛhowa cho tosa a sabu le ma sɔla nyɛm kpeekpei ŋ hau ba woŋ.

19. Le yɛɛ naŋ nɔ yɛ miŋ buulaŋ le nyɛ cho yɔŋnɔŋ siɔdiiyo le?

¹⁹ Nuawɔ Maatiu 6:34. Mi Chiisu dimul vɛlɛ buɛiyaa nduaa aa, “La landuŋ kɔl le siɔdii le.” Lepaa o lepaa Chɛhowa cho naa ke nyɛm naŋ hau ba woŋ. Lelaŋ, ŋ nɔ miŋ hiu buulaŋ le nyɛ cho yɔŋnɔŋ siɔdiiyo le. Te ŋ landuŋ pɛ kɔl le siɔdii, mɛɛ ŋ cho kandɔɔ tiindaŋndo dɔuwɔɔ o naapila niŋ. Nduyɛ hei tɛɛmbuu chaŋyɛi naŋ nɔ a Chɛhowa ve. Lelaŋ, ŋ nɔ miŋ dɔu tiindaŋ naa kpou o Chɛhowa niŋ.​—Pulɔwaa 3:5, 6; Filipiaŋnda 4:6, 7.

20. (a) Kpeleŋ kuɛɛ ŋ nɔ yɛ ma kɛsi o Chɛhowa piɛiyo niŋ? (b) Yɛɛ ŋ nɔ yɛ ma tosa le mi yoomu numndo wa tɛtɛlɛ?

²⁰ Te o wa pɛ miŋ chii yoomuma naŋ le nyɛmkiɔɔŋ kiltaŋ kɔɔli, okoŋ, miŋ nɔ yoomuma bɔɔ le Chɛhowa piɛiyo le, i wa bɔɔ suɛi kɔl tambɛi! Kɛ ŋ nɔ miŋ ke Chɛhowa nyɛ hiou bɛnda kpou wo. Le tamaseliiyo, a nɔla pa ma kɔ mala kunda nɔ bahawɛi wanaa dimiaa yooŋgu kɛndɔɔ wa? A nɔla pa ma tosa kɔɔfaleŋ? Ɔɔ te o wa pɛ maa kɔɔfanɔɔ ŋ cho niŋ ni, a yiyaŋ pa le ma poonyiaa yauwo le kɔlaŋ o Sukuu Wanaa Dimiaa Yooŋgu Kɛndiaa? A nɔla pa ma kɔ tosa wallo Bɛtɛl ɔɔ o fondaŋ hiviaa le palɛi pɔmbɔ o lɔɔ bɛŋgu? Ɔɔ naapum a yɔŋguŋ le Toŋgola leMasalaŋ taŋgullo. Yiyaŋndɔ a nyɛ ŋ nɔ ma tosa le mi yoomu numndo wa tɛtɛlɛ le halikpeŋ ma sɔla teleŋndo a yoomuaŋ le walta Masale Mɛlɛkaleŋ tosaa wo. Kɔfoo “ Mɛɛ Ŋ Tosa Yoomu Numndo Tɛtɛlɛ Yɛ” nɔ kɛɛsiaalaŋ lapum. Piɛi Chɛhowa le mbo mala num ma tosa kɛɛsiaa ŋ nɔ ma tosa wo. Okoŋ, ma kandu siŋgaŋnda bɛnda laŋ tosaa.

21. Yɛɛ mala yɛ num le naŋnɔŋndo Chɛhowa ikɛi kpɛɛluŋ?

²¹ Chiisu pɛɛku naa le miŋ landuŋ fɛlɛŋ kɔl le Masale Mɛlɛkaleŋ. Te o wa pɛ miŋ tosa lende, ŋ nɔla miŋ pɛŋgi buulaŋ bɛndoo le nyɛm naŋ hau ba woŋ. Miŋ naŋnuŋ Chɛhowa ikɛi kpɛɛluŋ le mɛɛ naŋ nɔ tiindaŋndo maa o buulaŋ le naa yɛ. Ŋ nɔla miŋ pɛɛku le chɔulabaa yeemɛi naŋ nɔ le piondɔɔ nyɛ o nyɛ fee chieeŋndo cho keelaa le pisioo wo, o wa bɛɛ miŋ tiuba le ndu piondɔɔ. Suŋ suŋ, te ŋ tosa pɛ yoomu naa tɛtɛlɛ, o cho naa mala le miŋ dɔu tiindaŋndo o Chɛhowa niŋ, nduyɛ, miŋ “sɔla yoomu cho yoomu kpeekpeiyo wo”, o Chɛhowa dimi le naa kioo wo.​—Timoti Tasoo 6:19.