1. Le yɛɛ i cho yɛ suɛi sɔvɛ le miŋ sina teleŋ naŋ cho leniŋndo a nyɛ cho naa yɔŋnɔŋndo ikɛiyo? Chɔmndɔ tamaseliiyo. (Tofa fotueiyo o peeleŋ ndeŋ choo.)

BƆŊAŊ bɛndoo wa hunɔɔ kandɔŋndo. Mi wana cho bɔŋaŋndo kumbioo wo hel o biŋndo choo le waŋnda kpou dimullo maa a chaa hunɔɔ. Nyɛchaa ndoo hiŋ kandɔŋndo. Mi waŋnda sina maa teleŋndo fuuluu le ma chal. Ndaa yeema le ma yaŋ nilaŋ o nyɛchaa yeelɛiyo, nduyɛ a wa lehɔl o nɛi o sɔɔŋ nɔ le yɔŋgɔŋndo woŋ. Kɛlɛŋgaa apum ve nila yaŋɔɔ o nyɛ wana cho bɔŋaŋndo kumbioo wo wa dimioo wo le, kɛlɛŋgaa niŋ te o nyɛchaa. Lelaŋ, a sina te bɔŋaŋndo kanduŋ te. A wa wɔ tuŋ balɔŋndo ɔɔ baltaŋ dɔuwɔɔ nda chaaŋaa ndaa. Nyɛ yɔŋnuŋ hoo wo chɔm nyɛ yɔŋnuŋ naa te ŋ sina teleŋ naŋ cho leniŋndo ɔɔ nyɛ cho naa yɔŋnɔŋndo ikɛiyo le. Hei pɛɛku naa suɛi sɔvɛi kanifuule, suɛi bɛndu bɛnduei nɔ le yɔŋnɔŋndo. Nduyɛ ŋ nɔ miŋ bɛɛndiaŋ le ndi. Suɛi yɛɛ keŋ?

2. Le yɛɛ Chiisu dimullɛ buɛiyaa nduaa maa a “wa a puɛiyaŋ te”?

² Mi Chiisu Kiliti sila buɛiyaa nduaa le sabu nda nɔ ma wa yekeŋ, nduyɛ ma bɛɛndiaŋ le teleŋ “chieeŋndo hoo cho fuuluu o mɛɛlulaŋ” ndo. Mbo dimul nda aa, “La wa a puɛiyaŋ te, kani fondo le, la sina lɔɔ teleŋndo cho fuuluu wo le.” Okoŋ kɔɔli, Mbo dimul nda teleŋnda bɔɔbɔɔ aa, “Lelaŋ, la wa a puɛiyaŋ te.” (Maatiu 24:3; nuawɔ Maki 13:32-37.) Yau Maatiu wo bɛɛ chɔm maa mi  Chiisu sila buɛiyaa nduaa a hei okɔɔ. Mbo dimul nda aa, “Lelaŋ, la wa a puɛiyaŋ te. Kani fondo le, la sina paale Masanɔɔ . . . cho hunɔɔ lechoo leŋ te.” Mbo sila nda vɛlɛ aa, “Lelaŋ, lende nya wa a bɛɛndiaŋ ni. Kani, boondii nya ve niŋ wana nda veelu aa, Po Wana Pɔnɔɔ wo kɔl te ve, boondii keŋ o huŋ niŋ ni.” Mbo miŋgi vɛlɛ sondo aa, “Lelaŋ, la wa a puɛiyaŋ te. Fondole, la sina paaleŋ ɔɔ havɛi Po Wana Pɔnɔɔ cho hunɔɔ wo le.”​—Maatiu 24:42-44; 25:13.

3. Le yɛɛ naŋ nɔ yɛ miŋ handu kɔllo o sila Chiisu wo choo?

³ Seiyaa Chɛhowaa cho kɔllo kɛsioo o sila Chiisu yɔŋgu wo. Ŋ sina maa ŋ cho o “mɛɛlula chieeŋndo” nduyɛ maa paale “nyɛ palaa” bɛndoo le nɔ le kandɔŋndo suŋ! (Daaniɛɛ 12:4; Maatiu 24:21) A mɛɛ Chiisu ndoo dimi yɛ, wanaa Chɛhowaa cho yooŋgu kɛndɛ leMasaa dimioo o chieeŋndo choo kpou. Nduyɛ ŋ cho vɛlɛ chɔulaŋ chɔɔ, naalaŋ, lɛŋnde nyiiyaaleŋ, a yiaŋ o fondaŋnda faŋga faŋga. Sɔŋgɔlaŋ la cho o piɛiye niŋ. Nduyɛ dɛnɛ wɔɔŋndo a delɔɔ choo wo cho kuiyo mbo hiau maa paandu. (Maatiu 24:7, 11, 12, 14; Luku 21:11) Ŋ cho chumndo a yeemɛi ikala kala le teleŋ Chiisu cho hunɔɔ sabu Finya ndɔ wo peelu wo.​—Maki 13:26, 27.

4. (a) Le yɛɛ naŋ laalaŋ yɛ maa Chiisu sina niŋ teleŋ chɔu Amakɛdɔŋndo cho delɔɔ wo? (b) Mi che bɛɛ ŋ sina teleŋ nyɛpalaa bɛndoo cho kandɔŋndo le, yɛɛ naŋ laalaŋ yɛ maa o cho yɔŋnɔŋ?

⁴ Te ŋ kuɛ pɛ o bɔŋaŋ bɛndoo, miŋ sina teleŋ pɛl bɔŋaŋ kɛ kɛ nɔ le kandɔŋndo wo. Kɛ, i cho ikala le sinaa teleŋ kpeekpei nyɛpalaa bɛndoo nɔ le kandɔŋndo wo. Teleŋ Chiisu wa o chieeŋndo choo wo, mbo dimi aa, “Wana o wana sina paale wana nda veelu aa, Po Wana Pɔnɔɔ wo o cho hunɔɔ le, kɛlɛŋgaa niŋ te havɛi koŋ. Kiilaa Mɛlɛkaa bɛɛ, a sina le. Po Mɛlɛkaa pila bɛɛ, o sina le. Mɛlɛka finya naa, ndu pilɛ kpe sina ni.” (Maatiu 24:36) A tonya, Chiisu cho chɔu Amakɛdɔŋndo lasisi lachi ni. Le hei, o sina niŋ dɔɔ teleŋ chɔu koŋ cho wa wo. (Sɔɔŋ Chɔɔmaŋndoŋ 19:11-16) Kɛ a koŋ kpou ŋ sina wɔ paaleŋ a teleŋ mɛɛlulaŋ la chɔ hunɔɔ wo le. Lelaŋ, i cho suɛi sɔvɛ bɛndu le miŋ wa lahɔl. Chɛhowa chii niŋ kɛɛsiaa teleŋ nyɛpalaa bɛndoo cho hunɔɔ wo. Nduyɛ lepaa o lepaa o cho chɔɔloo sɔɔŋgoo kpɛɛluŋ. O “doonuŋ niŋ tamala le yɔnɔŋndo le!” (Nuawɔ Habakuku 2:1-3.) Le yɛɛ naŋ laalaŋ yɛ kɛsɛ maa hei cho yɔŋnɔŋ?

5. Chɔm tamaseliiyo le chɔmndo maa sɔɔŋ Chɛhowa dimi lɔɔlɔɔ woŋ a teleŋndo kinɛi ŋ peeluŋ ni.

⁵ Sɔɔŋ Chɛhowa dimi woŋ kpou a teleŋndo kinɛi ŋ peeluŋ ni! Le tamaseliiyo, yiyaŋndɔ a teleŋ o soli wanaa nduaa Ichipi wo. Hei tosaŋ a Nesaŋ 14, wɔsi 1513 tuupa mi Chiisu vialuŋ. Okoŋ kɔɔli, mi Muuse poonyiaa a paale leŋ okɔɔ. Mbo dimi aa, “Paale paale wɔsila kɛmɛ le hiɔɔlu a bele-yaa leŋ la chiŋa leŋ, paale leŋ kpeekpei wanaa Mɛlɛka Yaawɛɛ wa haa, a fula o lɛŋnde Ichipileŋ niŋ ni.” (Ɛsɔdɔɔ 12:40-42) A Nesaŋ 14 o wɔsi 1943 tuupa mi Chiisu vialuŋ, mi nyɛ Chɛhowa dimul Ebilaham maa o cho kulii nduɛi salaa dɔuwɔɔ wo o peeluŋ. A teleŋ koŋ kinɛi o fuuluu wɔsilaŋ 430 ni. (Kaleesiaŋnda 3:17, 18) Mɛɛ teleŋndo hiou tiŋ o koŋ kɔɔli, mi Chɛhowa dimul Ebilaham aa, “Kɛsiŋ o kɔl maa chuaa num a mamaa a kua niŋ o lɛŋnde pilaleŋ niŋ ma wa loŋ lamial. Waŋnda siiŋguu niŋ nda chiaa, ma bii nda biyɔɔ lechiɔɔ le wɔsilaŋ kɛmɔɔ le hiɔɔlu (400).” (Chɛnɛsee 15:13; Walta Wanaa Chiisuaa 7:6) Wɔsila 400 laŋ la kanduŋ a wɔsi 1913 tuupa mi Chiisu vialuŋ. A teleŋ koŋ Isimɛɛl kandu Aase biyɔɔ wɔɔŋndo ni. Mi wɔsila 400 laŋ ndaŋ la mɛɛlu paale Chɛhowa soli Isɔluɛiya o chɛleŋ niŋ Ichipi wo. (Chɛnɛsee 21:8-10; Kaleesiaŋnda 4:22-29) A tonya, wɔsilaŋ la lo o kɛmɛlaŋ niŋ mi Chɛhowa kɛsi paale kpeekpei ndoo nɔ le wanaa nduaa solioo o chɛleŋ niŋndo!

6. Le yɛɛ naŋ laalaŋ yɛ kɛsɛ maa Chɛhowa cho wanaa nduaa piŋi?

 ⁶ Chɔɔsuaa wa waŋndo opilɛ o Isɔluɛiyaa ndaa fula Ichipi wa tɛɛŋ. Mɛɛ wɔsila bɔɔbɔɔ la hiou, mbo dimul wanaa nduaa aa, “Nya pila la sina o kɔlta nyalaŋ niŋ walaŋ, maa nyɛ o nyɛ kɛndɛ Mɛlɛka Yaawɛɛ ndu oo chuel naa sindɛ buŋgɛi o chii naa tosal. Nyɛ o nyɛ ndu oo chuel nya buŋgɛi, o pilɛ bɛɛ o mɛi ndu mbo kɛɛ ndu tosa le.” (Chɔɔsuaa 23:2, 14) Chɛhowa Mɛi lediom le mbo piŋi wanaa nduaa o paale kpundɛle bɛnduleŋ choo nduyɛ mbo ke nda yoomu fafɛɛŋndo o chieeŋ sɛnɛiyo niŋ. Ŋ laalaŋ kɛsɛ maa nyɛ o dimi wo cho yɔŋnɔŋ. Lelaŋ, te ŋ yeema pɛ miŋ wa o chieeŋ sɛnɛi koŋ niŋ, mɛɛ ŋ nɔ miŋ wa a puɛiyaŋ te.

7, 8. (a) Wali yɛɛ wanaa mɛŋgɛlaa ndaa tosa yɛ o sindɔɔ niŋ nduyɛ, yɛɛ hei pɛɛku yɛ naa? (b) Yɛɛ ndoo yɔŋnuŋ yɛ te wanaa mɛŋgɛlaa ndaa hiounuŋ pɛ o luaŋ? Chɔmndɔ tamaseliiyo.

⁷ Ŋ pɛɛku nyɛ o wanaa ndaa mɛŋgɛla chieeŋ bɛndoŋ o Isɔluɛi niŋ sindɛ wa o ba. Chieeŋ bɛnduŋ muŋ ŋ bɔɔbɔɔ, mɛɛ Chulusɛlɛm wa naa yɛ, wa ŋ balaa a kpakioo o helaa tema yɔŋi yaamɔɔwa luɛi leniŋ. O kpakilaŋ ndaŋ choo wanaa mɛŋgɛlaa kaŋ ndaa hel ni le ma che nyɛ o nyɛ balu chieeŋ koŋ kpou. O dio kpaki chioo wanaa mɛŋgɛlaa a piliaa ndaa sim ni. Wanaa mɛŋgɛlaa haa ndaa nɔ ma wa lahɔl idii a ichɔl. Nduyɛ te ndaa che pɛ yaamɔɔwa hunɔɔ, ndaa nɔ ma yondal waŋnda o chiee koŋ niŋ. (Aisaya 62:6) Ndaa sina le sabu i wa suɛi sɔvɛ le waa lahɔllo, nduyɛ le waa yekeŋ ma sina nyɛ wa yɔŋnɔŋndo wo. Te ndaa tosa keŋ te, wanaa bɔɔbɔɔ wa piɔmndo sɔla.​—Isikiaa 33:6.

⁸ Mi Chosifɔs, o poonyiaa a Chuuwa okɔɔ wo tɛɛsiaa mɛɛ Luomaŋnda luɛi Chulusɛlɛm yɛ o wɔsi 70 ve niŋ faŋaŋ Kiliti wo. Wanaa mɛŋgɛlaa wa chioo mɛŋgɛlaa kpeŋgei ipilɛi ya ndaa hiounuŋ o luaŋ ni. Le hei, mi puaa chɔuwaa Luomaŋnda tiuba ma luɛi chiee. Ma kua o chiɛi Mɛlɛkaa niŋ, ma mal ndu o yiŋ, okoŋ, ma tɛɛmbuu Chulusɛlɛm kpou. Paale nyɛpalaa bɛndoo pila le wa leŋ ni. Lepilɛ bɛɛ, Chuuwa ndaa sɔla wɔ nyɛpalaa suu waa lende le.

9. Yɛɛ wanaa bɔɔbɔɔ sina yɛ hau le?

⁹ Mi masɛi bɔɔbɔɔ soliŋ hau puaa chɔuwa a nyɛm mapuuluŋ sɛnɛiyoŋ kpeku le pɛŋgula ndalaŋ mandaa. Mi masɛi hei tofa le wana o wana ɔɔ nyɛ o nyɛ paaliaŋ lɛŋnde ndaleŋ. Kɛ masɛi hei sina pɛŋ te masaleŋ le cho o choo choo niŋ le nɔ kpaayaa mi le hiau masɛi ndɛi yo le. Nduyɛ Chiisu Kiliti cho masaa le masale leŋ ni. Masale leŋ le cho suŋ sɔŋga a masɛi cho hei o chieeŋndo choo ve. (Aisaya 9:6, 7; 56:10; Daaniɛɛ 2:44) Ŋ cho chumndo a yeemɛi kpeekpei le mi paale leŋ le fuuluu. Nduyɛ, ŋ cho a bɛɛndiaŋ le leŋ. Lelaŋ, ŋ nɔ miŋ handu kɔllo o sɔɔŋ Baabuiyo dimi woŋ choo, nduyɛ miŋ hiou lachi a Chɛhowa piɛiyo o laalaŋndo choo.​—Sam 130:6.

10, 11. (a) A yɛɛ okɔɔ naŋ nɔ yɛ miŋ wa yekeŋ, nduyɛ le yɛɛ? (b) Yɛɛ ke yɛ num laalaŋndo maa Nyina Wɔɔŋndo hui niŋ waŋnda le kiɔɔ sɔɔŋ Baabuiyo dimi woŋ?

¹⁰ Yiyaŋndɔ a wana lɔl mɛŋgɛlaa lahɔl pii yo. A teleŋ paale siaa leŋ kinɛi, mii wa ndu ikala o ba kpoke le loo lahɔl kanifuule, o wa niŋ o saŋgɛiyo yɔkɔɔ. Mɛɛ lende koni naŋ cho o palɛi mɛɛlɛi chieeŋndo hoo niŋ ni. Nduyɛ mɛɛ naŋ sɔɔŋguu o mɛɛlulaŋ ikɛi fau, lende koni i hiau lachi a kaloo le loo lahɔl ni. Nuawɔ se mɛɛ i wa suɛi kɔl tambɛi le hiounɔŋ ndo o malɔ yɛ! Ŋ yaasiaŋndɔ sɔɔŋ sala yaa ŋ tosa miŋ hiounuŋ o luaŋ ndo.

¹¹ Mi Nyina Wɔɔŋndo hui waŋnda. Ndu cho “masaa le chieeŋndo hoo” ni. Mɛɛ Chiisu vi, o viu bɛɛ le mbo dimul buɛiyaa nduaa a tonyaa hoo okɔɔ bɛmbɔɔ le yaa. (Chɔŋ 12:31; 14:30; 16:11) Nyina wɔɔŋndo soliŋ niŋ piɛile lachoowaleŋ kpeku le waŋnda  huiyo. Le saboo hoo, a bɔɔbɔɔ kɛɛ hau sɔɔŋ Baabuiyo dimi maa mɛɛlula chieeŋndo hoo la cho niŋ kpɛɛluŋndo sinaa. (Sɛfanaya 1:14) I cho kpendekele maa, Setana “tosa matosaa hei yɔŋi nda chɔ nyɛ wawoŋ cho nda diondɔɔ choo wo.” (Kɔliŋtiaŋ Diiŋ Ndɔɔ 4:3-6) Yɛɛ cho yɛ fulamakɔɔlioo? Te ŋ kindiŋ pɛ le waŋnda dimullo maa mɛɛlula chieeŋndo hoo la cho niŋ kpɛɛluŋ, nduyɛ maa Kiliti cho niŋ o masaleŋ choo, a bɔɔbɔɔ yeema ma yaŋ nilaŋ te. Teleŋnda bɔɔbɔɔ ma dimi aa, ‘I nɔ kaŋndeŋ le nileŋ.’

12. Le yɛɛ naŋ chɛllɛ mi Nyina Wɔɔŋndo hui naa le?

¹² Mi che bɛɛ wanaa bɔɔbɔɔ nɔ iyeema o sɔɔŋ Baabuiyo dimi woŋ niŋ te, kɛ ŋ chɛlnuŋ mi kaa ndaa tɛɛmbuu naa kɔl te. Ŋ sina le sabu i cho suɛi sɔvɛ le waa lahɔllo. Mi Pɔɔl dimul puaapiliaa nduaa aa, “Nya pila la sina chalaŋ maa paale Masanɔɔ . . . cho hunɔɔ leŋ.” Mbo hiau lachi a dimioo aa, “Mɛɛ viinɔɔ huŋ nuaa a nyumndaŋ wana ve ndu kɔl te yɛ.” (Nuawɔ Tɛsaloniaŋ Tasoo 5:1-6.) Mi Chiisu sila aa, “Lende nya wa a bɛɛndiaŋ ni. Kani fondole, boondii nya ve niŋ wana nda veelu aa, Po Wana Pɔnɔɔ wo kɔl te ve, boondii keŋ o huŋ niŋ ni.” (Luku 12:39, 40) Boondii biŋgiinii lo niŋ ni, le mi Setana hui waŋnda mbo tosa ma yiyaŋ maa “kɔl nyuloo cho niŋ o tiuwaa ba o ba fee. Mbɔ wana yɔnuŋ niŋ isiooŋ fuu.” A boondii keŋ paale kpundɛ bɛndu Chɛhowaleŋ le del niŋ nda choo o le pilɛ niŋ kpe ni. A cho woolu a leŋ wa wa. Kɛ naa yɛ? Te ŋ yeema pɛ miŋ wa a bɛɛndiaŋ le paaIe leŋ nduyɛ miŋ sɔla huiyo maa waŋnda a tuaa le, mɛɛ suŋ suŋ, “ŋ nɔ mi ŋ wa lahɔl, nduyɛ mi ŋ wa nyɛ kɛndɛ yekeŋ.” Lelaŋ, ŋ nɔ miŋ wa nuaa o Diom Mɛlɛkaa niŋ lepaa o lepaa nduyɛ miŋ wa yiyaŋndo o nyɛ Chɛhowa cho naa dimullo wo choo.

13. Vɛɛ kaa chieeŋndo cho yɛ waŋchieeya paaliaŋndo? Nduyɛ vɛɛ naŋ kpakpala yɛ kaa wɔɔŋ koŋ?

¹³ Kaa chieeŋndo paaliaŋ yiyaŋnda waŋnda. Wanaa bɔɔbɔɔ yeema hau ma sina Mɛlɛka le. (Maatiu 5:3) Kɛ, ma soliŋ teleŋ ndaa a yoomuma ndaŋ kpeku tau le nyɛm chieeŋndo cho solioo woŋ sɔlaa tau. (Chɔŋ Tasoo 2:16) Nduyɛ, yelelaŋndaŋ la cho hau tau mbo hiau maa paandu. Mi yelelaŋndaŋ ndaŋ la dɛɛniaa waŋnda kɔltaŋ le ma kaala yeemaŋ ndaŋ lahinioŋ. (Timoti Diiŋ Ndɔɔ 3:4) Mi nyɔɔŋ muŋ faŋa waŋnda kɔllo o suɛi sɔvɛ bɛnduei. Nduyɛ, a yiyaŋ a chaŋyɛi nda nɔ a Mɛlɛka ve le. Le saboo hoo Pɔɔl dimul Kilisiɔŋnda ni maa a nɔ ma “tendu o luaaŋ.” Koŋ cho ni, a nɔ ma handu kɔllo le yeemaŋ ndaŋ lahinioŋ tueiyɔɔ yeela le.​—Luomaŋnda 13:11-14.

14. Sila yɛɛ cho yɛ o Luku 21:34, 35 niŋ?

¹⁴ Nyina Mɛlɛkaa naŋ yeema ni mbo nyindu yiyaŋnda naalaŋ, o cho kaa chieeŋndo le. Nyina Chɛhowaa mala niŋ naa le sinaa kpendekele nyɛ nɔ le hunɔɔ yɔŋnɔŋndo wo. (Kɔliŋtiaŋ Tasoo 2:12) ^[1] (Tofa Diomnda Choolaalaŋ.) Kɛ ŋ nɔ miŋ wa yekeŋ. Nyɛm taaniŋndoŋ o yoomoo niŋ bɛɛ paaliaŋ naa o Chɛhowa piɛiyo niŋ. (Nuawɔ Luku 21:34, 35.) Mi acheleŋnda dimul naa maa diɔmnda naŋ cho ni le laalaŋndo maa ŋ cho o palɛi mɛɛlɛi chieeŋndo hoo niŋ. (Pitɛ Diiŋ Ndɔɔ 3:3-7) Kɛ ŋ chɛlnuŋ  nda ma tɛɛmbuu naa kɔl te. Ŋ nɔ nyɛ chɔm kpendekele maa mɛɛlulaŋ la cho niŋ kpɛɛluŋndo. Te ŋ yeema pɛ mi nyina Mɛlɛkaa nyindu naa, ŋ nɔ miŋ wa kɔlaŋ o bɔŋaŋnda leKilisiɔŋndaŋ naa chaaŋaa naa laalaŋnda.

15. Yɛɛ yɔŋnuŋ yɛ a Pitɛ, Chemisi a Chɔŋ? Nduyɛ naa bɛɛ vɛɛ suɛi waa lende yɔŋnuŋ yɛ naa?

¹⁵ Dialuŋ naŋ vilɛiyoŋ tosa mii wa ikala kpoke le miŋ wa lahɔl. Mi Chiisu sina pɛŋgu maa waŋchieeya nɔ hakioo a dialuŋ vilɛiyoŋ. Tuupa mi Chiisu sɔla piɔmndo, yiyaŋndɔ a nyɛ yɔŋnuŋ ichɔl koŋndo. Mi che bɛɛ Chiisu ndoo nɔ haki le, kɛ mbo sina maa le mbo lo o tiindaŋ ndɔɔ choo, ndoo nɔ mbo piɛi o Finya ndɔ lo le ndu malaa. Mi Chiisu dimul Pitɛ, Chemisi, a Chɔŋ le ma lo lahɔl mbo kɔ piɛi. Kɛ kiilaa nduaa ndaa sina mɛɛ i wa suɛi sɔvɛ le waa lahɔllɛ le. A wa a saŋgɛiya, nduyɛ ma hiaunuŋ o luaaŋ. Chiisu bɛɛ wa o saŋgɛiyo, kɛ mbo lo lahɔl, nduyɛ mbo piɛi o Finya ndɔ lo. Kiilaa nduaa bɛɛ ndaa nɔ ma wa piɛileŋ a boondii keŋ.​—Maki 14:32-41.

16. Vɛɛ Chiisu sila yɛ naa o Luku 21:36 niŋ le waa yekeŋ?

¹⁶ Yɛɛ mala yɛ naa miŋ “mandaŋ” nduyɛ miŋ wa a bɛɛndiaŋ le paale Chɛhowaleŋ? O bɛnda miŋ nɔ yeemɛi ikala kala le tosaa nyɛ cho o kɛndɔɔ wo. Kɛ koŋ cho letuu le. Mɛɛ piɔm Chiisu wo wa niŋ kpɛɛluŋ, mbo dimul buɛiyaa nduaa maa a nɔ ma wa piɛileŋ o Chɛhowa lo le mbo mala nda. (Nuawɔ Luku 21:36.) Le loo lahɔl o teleŋ lamɛɛloo hoo niŋ, naa bɛɛ nɔ miŋ wa piɛileŋ o Chɛhowa lo teleŋ o teleŋ.—Pitɛ Tasoo 4:7.

17. Vɛɛ naŋ chɔm yɛ maa ŋ cho a bɛɛndiaŋ le nyɛ cho hunɔɔ yɔŋnɔŋ o chilaŋ niŋndo?

¹⁷ Mi Chiisu dimi maa mɛɛlulaŋ la cho fuuluu “boondii nya ve niŋ . . . kɔl te ve.” (Maatiu 24:44) Lelaŋ, ŋ nɔ miŋ wa a bɛɛndiaŋ le teleŋ o teleŋ. Setana yiyaŋ maa kaa chieeŋndo hoo chuu naa nyaaloo. Kɛ o cho teleŋ naŋ nɔ miŋ chua kaa koŋ te cho hoo le. Lɔma sɔlaŋ ko yiyaŋ waa lende cho ni. Kɛ, a mala Baabuiyo, Chɛhowa nda Chiisu dimul naa mɛɛ naŋ lo lahɔllɛ. Lelaŋ, ŋ muliŋ hɔlla o sɔɔŋ Baabuiyo dimi woŋ choo nduyɛ miŋ che mɛɛ ŋ cho peelɔŋndo yɛ. Maa ŋ hiounuŋ lachi a Chɛhowa sɔɔŋgoo ikɛi kpɛɛluŋ nduyɛ miŋ kɛsi Masale ndɔleŋ nyɛ tase peŋ o yoomula naalaŋ niŋ fɔ! O hei niŋ, ŋ cho wa a bɛɛndiaŋ te mɛɛlulaŋ la fuuluu pɛ. (Sɔɔŋ Chɔɔmaŋndoŋ 22:20) Hei tosaa nɔ yoomula naalaŋ o ba ni!