Mi Baabuiyo sɔla pioŋɔɔ. Nduyɛ, a nɔla ma sɔla Baabuiyo hau le diomndaŋ veeloo leniŋ. Te o wa pɛ ma hɛli Baabui nda hivi nyɛkɛndɛiyo, kɛsiŋ o kɔl maa a cho nuaa o yaula taselaŋ peŋ niŋ. * Kɛ le yɛɛ Baabuiyo hɛluŋ yɛ nyɛm yeema ndu tɛɛmboo woŋ, simullo, a yooŋgu ndɔ nda kindiŋ le siŋgaa wo? Yɛɛ kpeekpei cho yɛ teŋgeŋ a Baabuiyo okɔɔ?

Wanaa bɔɔbɔɔ pɛɛku Baabuiyo wa dimi nyɛ kiilanɔɔ Pɔɔl bɛɛ dimi wo. Mi Pɔɔl poonyiaa aa, “Diom o diom cho o Yau Mɛlɛkaa niŋ, Nyina Mɛlɛkaa tosa ni ma poonyiaa laŋ.” (Timoti Diiŋ Ndɔɔ 3:16) Wanaa pɛɛkaa haa laalaŋ maa Baabuiyo sɔla pioŋɔɔ kanifuule, Diom Mɛlɛkaa o cho ni. Vɛlɛ maa, Mɛlɛka piŋi Baabuiyo tei mbo huŋ bii a hau. Mi Fayisal naŋ soo a ndu okɔɔ o buŋgɛi tasei niŋndo mɛɛlu kɛɛsiaa tosa le mbo pɛɛku Baabuiyo le mi ndupila che te yau tonyaa o cho ni. Mbo keŋela sina maa, pɛɛkula bɔɔbɔɔ Kaŋnde nɔ hau laŋ, la cho o Baabuiyo niŋ te. Nduyɛ, mi nyɛ Diom Mɛlɛkaa dimi le chieeŋndo wo pilaŋ ndu kɔllo.

Mbo dimi aa, “I laalaŋ niŋ kɛsɛ maa Mɛlɛka ke naa Baabuiyo ni. Okoŋ kɔɔli, te Mɛlɛka nɔla pɛ mbo toosiaa choo choo a lɛŋndeŋ, o nɔla vɛlɛ mbo ke naa Diom ndɔɔ, nduyɛ mbo manda ndu. Te ŋ dimi pɛ nyɛ cheleŋ okoŋ kɔɔli, mɛɛ kpaaya Mɛlɛkaa naŋ cho koŋ pɛɛsaa ni. Yɛɛ ya cho yɛ le kpaaya Mɛlɛka Kpou Kpou Wo pɛɛsaa?”​—Aisaya 40:8.