Baa a chɛl pa nyɛ Samaŋta dimi hoo wo? Maa Samaŋta, naa kpou komal niŋ bahawɛilaŋ o yoomu naa niŋ teleŋndaŋ lapum. Mɛɛ naŋ bii sɔɔŋ yɛ tosa miŋ luei balaŋ o kafalaŋ niŋ. Nduyɛ hoo chɔm nyɛ naŋ chua o sɔvɛ o yoomu naa niŋndo. Le tamaseliiyo, te ŋ yeema pɛ miŋ kumbu siɔmbula naalaŋ, mɛɛ i cho wa tɛtɛlɛ le kafalaŋ tosaa. Kɛ te acheleŋnda sina pɛ a suɛi naŋ tosa o duumu ve okɔɔ, mi hei hiŋ a fulamakɔɔli wɔɔŋndo le tonya naŋ kɛɛ dimioo wo. Ŋ soonuŋndɔ a hei okɔɔ.

O laalaŋndo choo chaŋyaŋ kilaŋ ni. Te laalaŋndo wa pɛ waŋnda tɛɛŋ, a yɔŋ isiooŋ le kpundɛ le. Kɛ o cho o nyumma pilɛ bɛŋgu le naŋ taŋgul laalaŋndo dɔuwɔɔ o waŋndo niŋ te. Mi waŋnda taŋgul laalaŋndo te a chua pɛ teleŋndo le waa diompilɛ, te a wa pɛ balta sandaalaŋ dɔuwɔɔ, nduyɛ ma ve niilu ikaaye chɔm te. Kɛ mi niilu lakafaa opilɛ kpe puusiaa laalaŋ waŋndo dɔu o chaaŋ ndɔ niŋndo. Nduyɛ mi laalaŋndo kendu taŋgul te o puusiaŋ pɛ.

Baa chaaŋ num kɛndɛ ŋ tiindaŋndo dimul num niŋ pa choolaŋ? Te lende i cho ni, vɛɛ numoo yiyaŋ yɛ? Kɛlɛŋgaa ma tuulu kɔl, nduyɛ ma yiyaŋ pɛŋ maa o nɔla mbo pisi num chi. Hei kindu sinapɛŋgu le. A tonya, niilu lakafaa tɛɛmbuu chaŋyaŋ sɔviɔŋ.

Wana sinaa dɛnɛ bɛndoo pila Lɔbɔt Inɛs cho ni. Nduyɛ o Sukuu Bɛndoo niŋ Kalifooniaa o pɛɛku ni. Mbo saaluŋ o pɛɛku ndɔɔ niŋ maa “naa taŋ ndo niilu lakafaa cho ni.” Ŋ tuu niilu lakafaa a dɛlu wɔɔŋ ke waŋndo naa wo. Te a hiu pɛ chaŋyɛi tosa a wana lakafaa, a cho “dɛlu wɔɔŋ” koŋ sɔla mi num bɛɛ simnuŋ wana lakafaa.

Vɛɛ ŋ looku yɛ ma kpakpala yaŋɔɔle niilu lakafaa? Baabuiyo nɔla mbo mala num. A yandii, tofawɔ nyɛ Baabuiyo dimi a hei okɔɔ wo.