Tofawɔ mɛɛ Baabuiyo muli nyunalaŋ ndaŋ yɛ.

Walta Kiilaa 24:​15 chɔm naa maa “wanaa sandu wa a wanaa sendu le wa cho miiŋgu yoomu.” Wanaa sandu wa cho wanaa tosa hɛnaŋ Mɛlɛkaa tuupa ma sɔla piɔmndo wa ni. Le hei diola ndalaŋ la cho o yau yoomoo niŋ. (Mal. 3:​16) Wanaa sendu le wa cho wanaa sɔla teleŋ tau le pɛɛkoo a Chɛhowa okɔɔ le wa ni. Nduyɛ diola ndalaŋ la cho o yau yoomoo niŋ te.

Chɔŋ 5:​28, 29 soo a kundala tiɔɔŋnda Walta Kiilaa 24:​15 soo okɔɔ laŋ. Mi Chiisu dimi maa ‘wanaa tosa sɔɔŋ kɛndɔŋ nda cho fula ma sɔla yoomoo. Kɛ wanaa tosa sɔɔŋ wɔɔŋndoŋ nda cho fula ma kɔɔsa a nda.’ Mi wanaa sandu wa tosa sɔɔŋ kɛndɔŋ tuupa ma wu. Nduyɛ, a cho fula ma sɔla yoomoo kanifuule, diola ndalaŋ la cho o yau yoomoo niŋ. Ke mi wanaa sendu le wa tosa sɔɔŋ wɔɔŋndoŋ tuupa ma wu. Nduyɛ, a cho miiŋgu yoomu ma kɔɔsa a nda kanifuule, diola ndalaŋ la cho o yau yoomoo niŋ te. A cho teleŋndo sɔla le ma keeku o tofaa bɛŋgu. A teleŋ koŋ, a cho pɛɛku a Chɛhowa okɔɔ, okoŋ mi diola ndalaŋ la wa la poonyiaa o yau yoomoo niŋ.

Sɔɔŋ Chɔɔmaŋndoŋ 20:​12, 13 tɛɛsiaa maa, wanaa cho miiŋgu yoomu wa kpou nɔ niŋ ma diikuŋ nyɛ cho wa o “yaula simbulaa laŋ” niŋndo. Nyɛ wa niŋ o yaula laŋ niŋndo cho sawala sɛnɛila Mɛlɛka cho naa ke o chieeŋ sɛnɛiyo niŋndaŋ ni. Wanaa kɛɛ niŋ laŋ diikɔŋndo wa cho tambei sɔla.—Aisaya 65:​20.

Daaniɛɛ 12:​2 dimi maa wanaa vi wa apum cho miiŋgu yoomu, “ma sɔla yoomu kpeekpeiyo o nɔ lamɛɛlu le wo, a pum yɛ, ma sɔla siɔmbula fɛɛŋ fɛɛŋ ndaŋ, a bɛɛla tambɛilaŋ.” Bolle Baabuileŋ le cho suɛi a nyɛ mɛɛlaa yɔŋnuŋ niŋndo okɔɔ. Ndu cho ni maa, waŋnda apum cho “yoomu kpeekpeiyo o nɔ lamɛɛlu le wo,” sɔla, mi apum sɔla “siɔmbula fɛɛŋ fɛɛŋ ndaŋ.” Hei sim ni maa, te wɔsila waa pilɛ laŋ la chuu pɛ, waŋnda apum cho yoomu fafɛɛŋndo sɔla, mi apum sɔla tambii fafɛɛŋnde.—Sɔɔŋ. 20:​15; 21:​3, 4.

Ŋ tuuwɔ ndi o nɛiyo hoo choo. Wanaa cho miiŋgu yoomu wa cho ko mɛɛ wanaa yeema waa o lɛŋnde cheleŋ niŋnda cho nuaa yɛ. Mi waŋnda haa apum sɔla yau ke nda dioo le wallo tosaa o lɛŋnde leŋ niŋndo. Apum yɛ, ma sɔla yau ke nda dioo le waa o lɛŋnde leŋ niŋ, ma wa fɛɛsɛŋ, nduyɛ ma wa hɛnɛkɛ wo. O nɛi pilɛ koŋ choo kpe wanaa sandu wa cho ni. Kɛ wanaa sendu le wa, cho ko maa wanaa sɔla dioo le kɔlaŋ yilɔɔ o lɛŋnde cheleŋ niŋ le teleŋ biŋgi wa. Wanaa waa nuaa nɔ fɛŋ ma kei o tofaa bɛŋgu, tuupa ma chɛl nda le waa o lɛŋnde leŋ niŋ. O nɛi pilɛ koŋ choo, wanaa sendu le wa nɔ fɛŋ ma diikuŋ sawala Chɛhowalaŋ, nduyɛ ma kei o tofaa bɛŋgu le halikpeŋ ma lo o Kpele Hɛnɛkiɔɔ niŋ. O yɔŋ bɛɛ ma chɛl waŋnda apum le waa o lɛŋndeŋ niŋ ɔɔ le ma kuɛ yilɔɔ loŋ, lepum ma chɛl apum le ma simnuŋ pilachieeya ɔɔ ma miŋgi apum o lɛŋii ndɛi niŋ. O lo a mɛɛ kaala ndalaŋ la wa yɛ. Nduyɛ lende koni i cho ni. O lo niŋ a laalaŋ wanaa cho miiŋgu yoomu wa nɔ niŋndo vɛlɛ a mɛɛ kaala ndalaŋ la wa niŋ o chieeŋ sɛnɛiyo niŋ yɛ.

Chɛhowa cho ko Mɛlɛka nɔ kaalaa wo le, kɛ ndu cho vɛlɛ Mɛlɛka hɛnaŋ a sakpoyɛi yo ni, nduyɛ o tosa lakafa le. (Ditɔnɔ. 32:​4; Sam 33:​5) O cho wanaa sandu wa a wanaa sendu le wa miŋgi yoomu, le nda kaala ndɔɔ chɔmndo. Nduyɛ, o cho wa wanaa miiŋgu niŋ yoomu wa kɔl le ma diikuŋ sawala ndɔlaŋ le nyɛ cho o kɛndɔɔ a o wɔɔŋndo wo. Wanaa cho ndu kaala, nduyɛ ma diikuŋ sawala ndɔlaŋ nda kinɛi o chɛl niŋ ni le ma hiou lachi a waa o chieeŋ sɛnɛiyo niŋ.