LE FELEŊGUAA
9: Wana Suu Ŋ Cho Wo
NYƐ O SIMNDO
O cho ko diola numndaŋ vɛlɛ a mɛɛ ŋ cho yɛ le chɔm wana suu ŋ cho wo le. Wana suu ŋ cho wo sim ni, kaala numndaŋ, laalaŋnda numndaŋ, vɛlɛ a mɛɛ ŋ tosa sɔɔŋ yɛ. Nyɛ o nyɛ cho a num okɔɔ chɔm wana suu ŋ cho wo ni. Koŋ cho ni, mɛɛ ŋ yiyaŋ o kɔllo niŋ yɛ vɛlɛ a mɛɛ ŋ tosa sɔɔŋ yɛ.
LE YƐƐ HEI CHO YƐ SUƐI SƆVƐ?
Te a sina pɛ wana suu ŋ cho wo, a nɔla ma soo le laalaŋnda numndaŋ, nduyɛ a chɛl ko ma tol yiyaŋnda chaaŋaa numnda kɔɔli le.
“Wanaa bɔɔbɔɔ cho ko maa nyɛm nda tuuliaa maa ŋwaŋnda chiee, o fondaŋ nda pisi nyɛlaŋ ndo. Nyɔɔŋ muŋ hɛli nyɛ chuɛɛnaŋ le wounɔŋ te kɛ waŋnda hɛlul nda ni.”—Andulu.
“I pɛɛku niŋ le tosaa nyɛ cho o kɛndɔɔ wo, o yɔŋ bɛɛ mi i wa ikala. I nɔla mi chɔm wanaa cho chaaŋaa niaa kpeekpeiya wa a mɛɛ nda tosa sɔɔŋ yɛ, nduyɛ a mɛɛ ya bɛɛ tosa sɔɔŋ yɛ te I wa pɛ latulu a nda.”—Koltɛnɛ.
SAWA MANDAA BAABUIYO: “La hiau lɛ lachi a kaalaŋ o chieeŋndo hoo niŋ tosaa le. Kɛ la siŋgaŋ mi la nɔ yiyaŋnda sɛnɛilaŋ.”—Luomaŋnda 12:2.
NYƐ Ŋ NƆ MA TOSA WO
Yiyaŋ a wana suu ŋ cho suŋ suŋndo, vɛlɛ a wana suu ŋ yeema ma wa wo. Le hei tosaa, kindiŋ ma sina yoomuma numndaŋ, dialuŋ num vilɛiyoŋ, vɛlɛ a laalaŋnda numndaŋ. Nɛi kɛndɛ ŋ kandu hei tosaa wo cho nyunalaŋ ndaŋ mulioo ni.
Yoomuma numndaŋ: Yɛɛ ya chaa yɛ tosaa, nduyɛ vɛɛ ya bii yɛ sɔɔŋ? Sɔɔŋ kuɛɛ ya chaa yɛ tosaa nyɛkɛndɛi? (Le tamaseliiyo: I wa pa lɔɔlɔɔ o teleŋndo? I tiu pa kɔl nuu ba? I cho pa wana wali kala kala? I nɔ pa kɛndɛi?) Sɔɔŋ kɛndɛŋ kuɛɛ ya tosa yɛ niŋ?
SƆƆŊ Ŋ NƆ MA WA TOSAA WOŊ: Baa ma che ndi pa ikala le sinaa sɔɔŋ kɛndɛŋ cho a numpila okɔɔ woŋ? Nyuna wana velu numndo ɔɔ chaaŋ num nya chii baltaŋ ndo le mbo chɔm num sɔɔŋ kɛndɛŋ o sina a num okɔɔ woŋ.
SAWA MANDAA BAABUIYO: “Wana o wana mɛɛndiaŋ kelala ndɔlaŋ nyɛkɛndɛi. Te la wa la kɛndɛ pɛ, ndupila cho dɔɔnɔŋ nyaale. O tuuŋgaŋ a wana cheleŋ te.”—Kaleesiaŋnda 6:4.
Dialuŋ num vilɛiyoŋ: Kaala suu kuɛɛ ya nɔ yɛ mi tosa wallo lechoo kalaŋ? A teleŋ kuɛɛ kpeekpei tɔɔndaŋndo komallɛ ya le balaŋ lueiyo o sɔɔŋ wɔɔŋndoŋ niŋ? O nɛilaŋ kuɛɛ choo ya nɔ yɛ mi tosa wallo kalaŋ le kɔl nuu baatiuwo?
SAWA MANDAA BAABUIYO: “Te ŋ dimi pɛ aa, ‘Ŋ nɔ haki le,’ mɛɛ huiyo naŋ cho naapila ni.”—1 Chɔŋ 1:8.
Laalaŋnda numndaŋ: Sawala kuɛɛ ya nɔ yɛ mi tol kɔɔli, nduyɛ le yɛɛ? Baa I laalaŋ pa o Mɛlɛka niŋ? Yɛɛ kpeekpei tosa yɛ mi laalaŋ maa Mɛlɛka cho? Kaala suu kuɛɛ ya che yɛ maa la niŋ kposoŋ te, nduyɛ le yɛɛ? Yɛɛ ya laalaŋ yɛ maa o cho yɔŋnɔŋ o chilaŋ niŋ?
SAWA MANDAA BAABUIYO: “Kɔl kalu numndo a sina num pɛŋgoo, laŋ la wa niŋ num mandaa ni.”—Pulɔwaa 2:11.