I wa o pɔmbɔ mi kaala nyɛm Mɛlɛka toosiaa woŋ. O naalo chiee Chewasikila o Fiŋlaŋ niŋ, bundɛla kɛndɛ kɛndɛlaŋ la cho loŋ, nduyɛ a mɛŋma ibuŋgaŋ ndu ma balaa silɔ. Mi yuŋgu nuu ndoo kuɛ o fondaŋndaŋ ndaŋ teleŋnda bɔɔbɔɔ le pisultaŋ. I kaala bɔɔ vɛlɛ visiaa. Teleŋ ya wa o pɔmbɔ wo, nyaaye kɛ kɛ ɔɔ tuŋ kɛ kɛ yaa che pɛ, yaa yeema mi kɔmaŋ ndu. Mɛɛ ya sul kaasoŋnɔ, mi suɛi ndii pala ya tau te yaa che pɛ waŋnda visiaa biyɔɔ wɔɔŋndo. Teleŋ pilɛ, mi sɔɔŋguu le wallo a kɔɔna ndoo suaa le dila visiaa wo. Nduyɛ, mi komal wanaa ndaa nɔ yiyaŋ pilɔɔ ma ya wa.

Ŋ wa wallo tosaa kalaŋ le dila visiaa. Mi naŋ piɔu waŋnda yaulaŋ, nduyɛ mi naŋ chɔm nda mɛɛ wana bii visiaa yɛ. Miŋ kuuna fondaŋnda ndaa tofa koowaŋ visiaa o ŋdial laŋ. Miŋ kila pɛŋ kɔɔna sɛnɛi cheleŋ le visiaa mandaa. Le mɛɛ naŋ wa kindiŋndo le hei tosaa yɛ, teleŋnda bɔɔbɔɔ masaa waa ndaa niŋ kɔl a naa le. Mi ndaa bii ya, ma kuɛ a ya o lemasa teleŋnda bɔɔbɔɔ.

O fulawɔ o buulaŋ yaa nɔ le visiaa wo kɔɔli, bahawɛila cheleŋ ndaŋ la wa la wa ya paaliaŋndo laŋ. Le hei, mi kandu wallo a kɔɔnala cheleŋ, mɛɛ “Amnesty International” a “Greenpeace” cho naa yɛ. Mi yɔŋguŋ a yoomuma niaŋ kpou le walta ndalaŋ tosaa. Mi yaa soo le wanaa bala fonduaa, wanaa wa a yiaaŋ nda, vɛlɛ a wanaa ndaa tuŋ dila ndalaŋ nda.

Mɛɛ sɔɔŋ wa kɔlaŋ yɛ, mi mɛɛlu sina maa I tiuba mi siŋga chieeŋndo le. Mi che bɛɛ mi kɔɔnalaŋ ndaŋ la kindiŋ le bahawɛila pɔmbɔlaŋ lapum siɛɛnduuwo, kɛ mi la bɛndaŋ la hiau lachi a wɔuleŋ. Mi i yɔŋnuŋ maa nyina wɔɔŋndo mel chieeŋndo. Nduyɛ maa wana buulaŋ a nyɛ o nyɛ le. Mi dialloŋ wu ya pɛ.

Mi kɔllo tambu ya pɛsɛkɛ kanifuule, yaa nɔla lɛ mi tosa nyɛ o nyɛ le. Le hei, mi kandu yiyaŋndo a Mɛlɛka vɛlɛ a Baabuiyo okɔɔ. Yaa pɛɛku niŋ paandu Baabuiyo a Seiyaa Chɛhowaa. Mi che bɛɛ Seiyaa Chɛhowaa wa wanaa ikɛndɛ, nduyɛ ma chɔm yeemɛi kpeekpeiye o ya niŋ, kɛ yaa bɛɛndiaŋndɔ mi siŋga yoomu nuu le. Kɛ a teleŋndo hoo niŋ, sɔɔŋ wa niŋ teŋgeŋ a ya.

Mi chua Baabui nuu okoŋ, mi kandu diomndaŋ veeloo leniŋ. Mi hei ke ya kɔl dɛɛniaa tau. Mi cha bolii Baabui bɔɔbɔɔ i pɛɛku naa mɛɛ naŋ nɔ miŋ bii visiaa nyɛkɛndɛi yɛ. Le tamaseliiyo, Pulɔwaa 12:​10 dimi aa: “Wana tonyaa, chɔluaa nduaa bɛɛ chaa o chaa nda biyɔɔ ni.” Mi sina vɛlɛ maa o cho Mɛlɛka le tosa mi bahawɛilaŋ la wa hau o chieeŋndo choo le. Kɛ le mɛɛ wanaa bɔɔbɔɔ kɛɛ nɛi ndɔ chɔmaa tolɔɔ kɔɔli yɛ bahawɛilaŋ la cho hiouwɔɔ lachi a wɔuleŋ ni. Mi nyɔɔ hɛnaŋ ya tau mɛɛ ya pɛɛku a kaala Chɛhowa wo okɔɔ, vɛlɛ a mɛɛ o cho wana biuwaŋ yɛ.—Sam 103:​8-14.

A boondei hei, mi saaluŋ yau pɔmbɔ nda nyuna le yauwo hoo wo, Yɛɛ Kpeekpei Baabuiyo Pɛɛku Yɛ? okoŋ mi yɔŋ le ndu. Nyɔɔ viu bɛɛ le, mi pɔnɔɔ a lanɔ Seiyaa Chɛhowaa huŋ o ya lo dio, ma dimul la le ya Baabuiyo pɛɛkoo, okoŋ mi chɛl. Mi kandu vɛlɛ kɔlaŋ o bɔŋaŋnda leKilisiɔŋndaŋ o Toŋgo leMasaa. Fulamakɔɔlioo wa ni, mi kandu tonya ya wa pɛɛkoo o Baabuiyo niŋndo kaalaa.

I naŋ bɔɔ kɔl le mɛɛ Baabuiyo mala ya mi tosa siŋgaŋndaŋ tau o yoomu nuu niŋ yɛ. Mi mal sikɛɛtiiyo kolɔɔ a muɛiyaŋ kolɔɔ bɛndoo. Mi siŋga mɛɛ ya wa paandu yɛ, vɛlɛ a mɛɛ yaa suaa yɛ. Mi siŋga vɛlɛ yiyaŋ nuu a wanaa cho o masaleŋ choo wa okɔɔ. (Luomaŋnda 13:​1) Mi soli vɛlɛ balaŋ o yoomu kaa nɔɔlɛi ya wa niŋndo. O koowaŋ niŋ kaa hoo wa ya ni, nduyɛ wana o wana ndoo nɔla ya ndu soli o ŋdial te.

Siŋgaŋ wa o kala le mi tosa wo wa yiyaŋ kɛndɔɔ nɔɔ a kɔɔnala ya wa wallo laŋ ni. Hei yɔŋnuŋ o lepilɛ niŋ te. O tasela ndɔ, mi yiyaŋ maa te I dimi pɛ maa I cho lɛ wali tosa le kɔɔnalaŋ ndaŋ te, mɛɛ pisioo ya cho laŋ ni. Kɛ mi naŋ kɔl le sinaa maa Masale Mɛlɛkaleŋ leŋ pilɛ kpe le cho tiindaŋndo ni le chieeŋndo hoo. Le hei, mi kɛɛsiaa a kɔl nuu kpou le Masaleŋ ndeŋ tooloo, nduyɛ mi mala acheleŋnda le ma pɛɛku a leŋ okɔɔ.—Maatiu 6:​33.

Mɛɛ ya wa yɛ wana ndoo chɔulaba le dilaŋ ndo yɛ, mi yaa piɔu waŋnda kundalaŋ sala tiɔɔŋ. A kɛndiaa ɔɔ a wɔɔŋnda. Nduyɛ wanaa yaa yiyaŋ maa nda cho wanaa wɔɔŋnda ni wa, I wa o bɛɛndiaŋ le nda nyɛ o nyɛ wɔɔŋ tosallo. Kɛ I naŋ bɔɔ kɔl kanifuule, Baabuiyo mala ya I nɔ lɛ hau yɛle tulaa le wana o wana le. I cho kindiŋndo le mi nɔ kaala leKilisiɔŋndo le wana o wana fee. (Maatiu 5:​44) Nɛila ya kindiŋ le kaalaa hoo chɔmndo laŋ opilɛ cho ni, waŋnda yooŋgu kɛndɔɔ dimullo a Masale Mɛlɛkaleŋ okɔɔ. I cho a kɔl kɛndɛ le chɔɔ mɛɛ wallo hoo tosa mi waŋnda wa a kɔl nyulu, ma wa a kɔl kɛndɛ, nduyɛ ma nɔ tiindaŋ kpeekpeiyo o yoomoo niŋ yɛ.

Chɛhowa malɔɔ nyɛ o nyɛ o ba tosa niŋ mi wa a kɔl nyulu. Le mɛɛ o cho wana toosiaa yɛ, I laalaŋ kɛsɛ maa o chɛl niŋ mi waŋchieeya hiou lachi a visiaa, vɛlɛ a waŋchieeya biyɔɔ wɔɔŋndo lefafɛɛŋ te. Nduyɛ o cho chɛlɔɔ mi chieeŋ naa kɛndɔɔ hoo tambu le. O baa pilɔɔ choo, nyɛ o nyɛ waŋchieeya tɛɛmbuu, o cho suŋ hunɔɔ miŋgi bɛɛndiaa sanaa a Masale ndɔleŋ. (Aisaya 11:​1-9) I cho a nyaale tau, o cho ko le tonyala ya pɛɛku laŋ ndaŋ te, kɛ le acheleŋnda malaa ma dɔu laalaŋndo o laŋ niŋ. I nɔ lɛ yiyaŋ maa I nɔ mi siŋga chieeŋndo le.