Yiyaŋndɔ maa finyaa cho baltaŋ nda po ndɔ wɔsila ŋɔmmɛu wo. Mbo dimul po ndɔɔ aa, “O cho niŋ le teleŋ vilɛi mi Mɛlɛka toosiaa chieeŋndo a nyɛ o nyɛ cho leniŋ. Mbo toosiaa paaleŋ, paŋgei, a looŋ.” Mi po ndɔɔ yiyaŋ a hei okɔɔ le teleŋ tiŋ, okoŋ mbo nyuna finya ndɔ aa, “Kɛkɛ, nɛɛnɛ toosiaa yɛ Mɛlɛka?”

Mi finyaa mulul po ndɔɔ aa, “Wana o wana toosiaa Mɛlɛka le. O cho achal kani masindɛ.” Mi muli tɛtɛlɛ koŋ nɛŋi po ndɔɔ kɔl. Kɛ mɛɛ o wa hiouwɔɔ lachi a hindɔɔ fau, o wa wɔ yiyaŋndo o nyuna pilɔɔ hoo choo. Mbo cha ndi i kala le mbo bii hei bila. Vɛɛ waŋndo wa yɛ o nɔ kandɔŋ te? Kanifuule, chieeŋndo bɛɛ nɔ kandɔŋndo. O wa nyunaŋndo aa, “Kuɛɛnɛ Mɛlɛka fula yɛ?”

Vɛɛ Baabuiyo muli yɛ nyunaa hoo? Muli pilɔɔ kpe Baabuiyo yɔŋgu ni, a muli finyaa yɔŋgu o tamaselii naa niŋndo. Mi Muuse poonyiaa aa, “Oo Masanɔɔ Mɛlɛka, . . . lɔɔpa bɛɛ ma toosiaa [pembuŋ] bɛndoŋ, ɔɔ ma toosiaa chieeŋndo, a wa niŋ Mɛlɛka, nduyɛ le fɛɛŋ a fɛɛŋ, Mɛlɛka ŋ cho ni.” (Sam 90:​1, 2) Mi Aisaya, wana ndoo suaa le Mɛlɛka wo bɛɛ dimi aa, “Baa la sina wɔ sɔɔŋ pɛŋgu le? Baa la tui yɔ a muŋ okɔɔ le? Mɛlɛka Yaawɛɛ, Mɛlɛka cho yoomu le fɛɛŋ a fɛɛŋndo o cho ni. Ndu toosiaa chieeŋndo hoo kpou ni.” (Aisaya 40:​28) O nɛi pilɛ koŋ choo, mi yau Chudi poonyiaa wo dimi a Mɛlɛka okɔɔ maa, “o cho . . . le fɛɛŋ a fɛɛŋ.”—Chudi 25.

Bolii Baabuiye hei chɔm maa Mɛlɛka cho “Masa cho le fɛɛŋ a fɛɛŋndo” ni, a mɛɛ kiilanɔɔ Pɔɔl dimi a ndu okɔɔ yɛ. (1 Timoti 1:​17) Hei chɔm kpendekele maa o sindɛ sindɔɔ niŋ bɛɛ, Mɛlɛka wa niŋ, nduyɛ o cho wa le fɛɛŋ a fɛɛŋ. (Sɔɔŋ Chɔɔmaŋndoŋ 1:​8) Wa ndɔɔ a chal le fɛɛŋ a fɛɛŋ chɔm kɛsɛ maa ndu cho Mɛlɛka Kpou Kpou Wo ni.

Le yɛɛ i wa yɛ i kala le miŋ bii hei bila? Kanifuule, teleŋ biŋgi naŋ nɔ le waa achal lo tosa miŋ nɔ yiyaŋ teŋgeŋndo a teleŋndo okɔɔ, a mɛɛ Chɛhowa ndu che ndu yɛ. Lɛ mɛɛ Mɛlɛka cho le fɛɛŋ a fɛɛŋ yɛ, ndu chua wɔsilaŋ waapilɛ maa paaleŋ lepilɛ. (2 Pitɛ 3:​8) Nuawɔ tamaseliiyo hoo: Te kambalaa viou pɛ yoomu tei, mbo chii palɛi 50. Kɛ baa kambalaa nɔla pa mbo bii bila maa mi wanachioo chii wɔsilaŋ 70 ɔɔ 80? O cho i kala. O nɛi pilɛ koŋ choo, Baabuiyo tɛɛsiaa maa waŋchieeya cho ko maa kamballa, te ŋ tuu nda pɛ a Wana Toosiaa Bɛndoo. Yiyaŋnda ndɔlaŋ bɛɛ la cho filioŋ mbo hiau la naalaŋ poloŋ. (Aisaya 40:​22; 55:​8, 9) Lelaŋ, kɔndɔfili nɔ mbo bii naa maa o cho sɔɔŋ kpou le waŋchieeya sina a Chɛhowa okɔɔ le.

Mi chɛ bɛɛ mi waŋnda che ndi i kala le laalaŋndo maa Mɛlɛka cho le fɛɛŋ a fɛɛŋ, kɛ kɔl kaloo cho o hei niŋ. Te wana cheleŋ ndoo toosiaa Mɛlɛka pɛ, mɛɛ wana koŋ wa wa wana toosiaa ni. Kɛ Baabuiyo tɛɛsiaa maa Chɛhowa “toosiaa nyɔɔ kpou ni.” (Sɔɔŋ Chɔɔmaŋndoŋ 4:​11) Le handɔɔ lechoo, ŋ sina maa boondii pum wa, chieeŋndo ve le. (Chɛnɛsee 1:​1, 2) Mɛɛ kuɛɛnɛ chieeŋndo fula yɛ? Wana toosiaa ndu wo wa fɛlɛŋ. O wa fɛlɛŋ tuupa mi nyaa yoomaa cheleŋ wa. Mɛɛ Po ndɔ pilɔɔ kpe, a maalikɛiya cho naa yɛ. (Choobu 38:​4, 7; Koloosiaŋnda 1:​15) A tonya, ndupilɛ kpe wa ni. Wana o wana toosiaa ndu le. Nduyɛ nyɛ o nyɛ ve le Mɛlɛka toosiaa le.

Wa naa achallo, vɛlɛ a chieeŋndo kpou chɔm kɛsɛ maa Mɛlɛka cho le fɛɛŋ a fɛɛŋndo cho. Wana toosiaa chieeŋ naa hoo wo, nduyɛ mbo duau sawalaŋ le ndu mandaa wo, wa niŋ kani masindɛ. Ndupilɛ kpe ke nyɛ o nyɛ yoomoo ni.—Choobu 33:​4.