O Baabui maKisioo niŋ, a hivi buŋgɛi Chiisu chuel po yɔŋ wɔɔŋ wa o baŋaa ndu ikɛi o yɔmndo choo wo aa, “Mi dimul num, naa num ŋ cho va o fondaŋ Mɛlɛkaa hau.” (Luku 23:43) Kɛ Baabuila cheleŋ la hivi diomndaŋ ndaŋ aa, ‘Mi dimul num hau, a cho wa a ya latulu o Kpele Hɛnɛkiɔɔ niŋ.’ Kɛsiŋ o kɔl maa, Chiisu chɔm naa fondaŋ koŋ wa niŋnda le. Baa dimullo Chiisu wa ndu ni maa a wa niŋ latulu o fondaŋ Mɛlɛkaa?

O tasoo, ŋ yaasiaŋndɔ te po yɔŋ wɔɔŋndo hoo ndoo suiliŋ pɛ le yoomoo sɔlaa o fondaŋ Mɛlɛkaa. Wanaa suiliŋ le kɔlaŋ o fondaŋ Mɛlɛkaa wa nɔ ma sɔla yiŋɔɔ mamɛŋndo vɛlɛ a nyina diandaa. Ndu sim ni, waa buɛiyaa Chiisuaa, nduyɛ ma simnuŋ chuauwaa Mɛlɛkaa. (Chɔŋ 3:3, 5) Suiliŋ cheleŋ nda nɔ vɛlɛ ma komallo cho kpeleŋnda diandaala Mɛlɛkalaŋ ni. Nduyɛ, a nɔ ma chɔm sandei, pimbi simiaa, a nyɛiye. (Kɔliŋtiaŋ Tasoo 6:9-11) A nɔ vɛlɛ ma chɔm lo lechoo wo o Mɛlɛka lo a Chiisu Kiliti tei a mɛɛlula yoomu ndaa o chieeŋndo choo. (Luku 22:28-30; Timotii Diiŋ Ndɔɔ 2:12) Mɛɛ ma bendal suiliŋnda waa naa o yoomu ndaa niŋ malaŋ nda sɔla fulasɛiniŋndo le kalaŋ lusulɛi cho nda chumndo o fondaŋ Mɛlɛkaa wo chuaa. Le waa wanaa soliaa salaa, a masaa a Chiisu latulu waŋchieeya choo le wɔsioŋ waa pilɛ.—Sɔɔŋ Chɔɔmaŋndoŋ 20:6.

O baa pilɔɔ choo, po yɔŋ wɔɔŋ wa hoo Chiisu ikɛiyo lo yɔŋ wɔɔŋndo tosaa haaa mbo wu o kaa wɔɔŋndo niŋ. (Luku 23:32, 39-41) Tonya, mbo chɔm kaa lebiɔɔ mɛɛ o dimul Chiisu aa, “Loonuŋ a ya Chiisu, lɔɔ ŋ cho hunɔɔ va Masaa wo.” (Luku 23:42) Kɛ poo hoo sɔla yiŋɔɔ mamɛŋ te, o ve vɛlɛ o pɔyaŋ a nyina diandaa Mɛlɛkaa maa buɛi Chiisu le. Nduyɛ, teleŋ o wa yoomu wo, o chɔm kposoŋ maa o wa wana sandaa ɔɔ wana nɔ tiindaŋndo o Mɛlɛka niŋndo le. A yiyaŋ pa maa Chiisu ndoo dimul poo hoo le waa o masaleŋ choo o fondaŋ Mɛlɛkaa latulu a buɛiyaa nduaa laalaŋaa lo o pimbi nda simiaa choo wa?—Luomaŋnda 2:6, 7.

Le tamaseliiyo, te waŋndo chiimbuu num pɛ mbo nyuna num le haki malaa, a nɔ di ma mal ndu haki, a ke ndu isɔɔ le. Kɛ a tiindaŋ ndu pa le waa yulale numndeŋ chilaŋ ɔɔ mbo wa yuŋgu numndo hɔlteŋ? Wanaa ŋ nɔ tiindaŋndo o nda niŋnda ŋ ke wali waa naa le tosaa ni. Lende ko icho a wanaa sɔla dioo le kɔlaŋ o fondaŋ Mɛlɛkaa wa ni. A nɔ ma chɔm kɛsɛ maa wanaa nda tiindaŋ le sawala diandaala Mɛlɛkalaŋ tolɔɔ kɔɔli wa nda cho ni, te a huŋ wa pɛ masaa ŋwaŋchiee choo. (Sɔɔŋ Chɔɔmaŋndoŋ 2:10) Mi che bɛɛ mi po yɔŋ wɔɔŋndo hoo nyuna Chiisu a kɔl ndɔɔ kpou, kɛ ndoo nɔ suiliŋnda waa naa le.

Chiisu dimul po yɔŋ wɔɔŋ koŋ maa o wa niŋ latulu a ndu o fondaŋ Mɛlɛkaa o paale leŋ choo le. Kanifuule, Chiisu pila bɛɛ kue o fondaŋ Mɛlɛkaa o paale leŋ choo le. Kɛ, o wa palɛi i yaa a nyumndaŋ ma yaa o sɛiyo niŋ. (Maatiu 12:40; Maki 10:34) Nduyɛ mɛɛ o sɔla fulasɛiniŋndo, mbo tosa palɛi 40 o chieeŋndo choo tuupa mbo kua o fondaŋ Mɛlɛkaa. (Walta Wanaa Chiisuaa 1:3, 9) Lelaŋ, po yɔŋ wɔɔŋndo hoo nɔla mbo wa a Chiisu latulu o fondaŋ Mɛlɛkaa o paale leŋ choo le.

Kpele Hɛnɛkɛ kuɛɛ po yɔŋ wɔɔŋndo hoo luɛi yɛ niŋ? Te o huŋ sɔla pɛ fulasɛiniŋndo, o cho wa o Kpele Hɛnɛkiɔɔ niŋ o chieeŋndo choo, o Chiisu wa niŋ masaa choo wo. (Walta Wanaa Chiisuaa 24:15; Sɔɔŋ Chɔɔmaŋndoŋ 21:3, 4) Le chɔɔloo pɛɛkoo a Kpele koŋ okɔɔ, vɛlɛ a suiliŋnda Mɛlɛkalaŋ, nyuna Chɛhowɛinɔ kɛ kɛ.