Buŋgɛi naŋ hiou ve chɔm maa, mi Chiisu yɔŋguŋ ndupila fau le “mbo dimul waŋnda yooŋgu kɛndɔɔ a masale Mɛlɛkaleŋ okɔɔ.” (Luku 8:1) Mbo yɔŋguŋ ndupila le kɔlaŋ o tiŋnda vilɛilaŋ o lɛŋnde Isɔluɛileŋ niŋ kpede le waŋnda pɛɛkoo a Masale Mɛlɛkaleŋ okɔɔ. Kona Chiisu dimul waŋnda suɛi Mɛlɛkɛiye cho o poonyiaa o Maatiu niŋ, Maki, Luku, a Chɔŋ. Yaulaŋ ndaŋ la soo bɛmbɔɔ hiouwɔɔ 100 a masaleŋ ndeŋ okɔɔ. Diomnda Chiisulaŋ la cho o yaulaŋ ndaŋ niŋ ni. Nduyɛ nyɛɛmbɔ koni nyɛ dimiŋ kpou a Masale Mɛlɛkaleŋ okɔɔ wo cho o yaulaŋ ndaŋ niŋ ni!—Chɔŋ 21:25.

Le yɛɛ Chiisu chua yɛ Masaleŋ ndeŋ nyɛ sɔvɛ bɛndu teleŋ o wa o chieeŋndo choo wo? Saboo opilɛ cho ni, Chiisu sina maa Mɛlɛka hɛli ndu le waa Masaa o Masaleŋ ndeŋ choo. (Aisaiya 9:6, NW; Luku 22:28-30) Kɛ ndoo hendu kɔllo le kpaayaa a saŋgalaa sɔlaa le ndupila le. (Maatiu 11:29; Maki 10:17, 18) O ve le tɔnɔ ndɔ ndupila le o kɛsi Masaleŋ ndeŋ nyɛ tase le. O tasoo peŋ, Chiisu ndoo nɔ yeemɛi o Masale Mɛlɛkaleŋ niŋ, nduyɛ o nɔ wɔ bɛɛ ndi. * Kanifuule, le nyɛ le tosal niŋ wanaa o kaala wa. Nda cho yɛ Finya ndɔ o choo choo niŋ, a buɛiyaa nduaa laalaŋnda ni.

Chiisu nɔ kaalaa yiŋgoloŋ le Finya ndɔ o choo choo niŋ. (Talelaŋ 8:30, NW; Chɔŋ 14:31) O kaala suiliŋnda kɛndɛ Finya ndɔlaŋ ndaŋ. Kaala, nyɛiye, a sandei. (Dutɔlɔnɔmi 32:4; Aisaiya 49:15, NW; Chɔŋ Tasoo 4:8) A tonya, Chiisu tul choola cho dimiŋndo a Finya ndɔ okɔɔ laŋ leyɛ. Choolaŋ maa Mɛlɛka buulaŋ a nyɛpalaa cho waŋchieeya cho wo le, nduyɛ maa o yeema naa miŋ saŋga. Saboo opilɛ wa hoo ni le mi Chiisu wa a dialuŋ fulaa le ‘yooŋgu kɛndɛ leMasaa’ yondaa. Mbo sina maa teleŋndo cho fuuluu mi Masaleŋ ndeŋ le ke Finya ndɔ tɔɔ kɛndɔɔ. (Maatiu 4:23; 6:9, 10) Vɛɛ le tosa yɛ niŋ keŋ?

Chɛhowa cho Masaleŋ ndeŋ soliŋ kpeku le siŋgaŋnda sɔvɛlaŋ tosaa le waŋchieeya. O cho wanaa laalaŋnda “mamɛmɛ o mamɛmɛ wɔɔsuu o hɔl fo.” Chɛhowa cho faŋa nyɛ o nyɛ tosa miŋ chaŋ. Nduyɛ mbo che maa “wana o wana vi lɛ le, wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa va.” (Sɔɔŋ Chɔɔmaŋndoŋ 21:3, 4) Mɛlɛka cho Masaleŋ ndeŋ soliŋ kpeku le nyɛpalaa waŋchieeya kpou faŋaa. *

 Le saboo hoo Chiisu ndoo fula dialloŋ ni le waŋnda dimullo a Masaleŋ ndeŋ okɔɔ! Mbo sina maa Masaleŋ ndeŋ le cho chɔm mɛɛ kpɛ Finya ndɔ nɔ kpaayaa a nyɛiye yɛ. (Chemisi 5:11) Chiisu ndoo sina vɛlɛ maa Masaleŋ ndeŋ le cho wanaa laalaŋaa o kaala wa tɔnɔɔ chuu.

Tuupa mi Chiisu huŋ o chieeŋndo choo, o wa fɛŋ o choo choo niŋ nda Finya ndɔ. Mi Mɛlɛka soliŋ Po ndɔɔ kpeku le nyɛ o nyɛ fee toosiaa, chɔŋ a nyɛm kɔndɔfilloŋ choo choo, mɛɛ looŋ kundaŋ cho naa yɛ, huŋ bii a chieeŋ naa kɛndɔɔ hoo, a nyaa yoomaa suu o suu o nɔ. (Kolosiaŋnda 1:15, 16) O nyɔɔŋ muŋ niŋ kpou, mi Chiisu “hɛnaŋ tau a waŋchieeya.”—Talelaŋ 8:31, NW.

Chiisu ndoo nɔ bɔɔ kaalaa le waŋchieeya o wali ndɔ pollo niŋ. O kandɔŋndo, mbo chɔm kpendekele maa o hiŋ o chieeŋndo choo le mbo dimul wanaa cho o kuɛi niŋ nda “yooŋgu kɛndɛ Mɛlɛkaa.” (Luku 4:18) Kɛ mi Chiisu tosa nyɛ le waŋnda malaa mbo hiau suɛi sonduei. Mbo chɔm kaala ndɔɔ le waŋchieeya teleŋ o teleŋ. Le tamaseliiyo, mɛɛ faŋga bɛndoo diinuŋ naapilɛ le ndu nilaŋ yaŋɔɔ, “mi nyɛiye bii ndu le nda. Mbo siŋgi wanaa lanaa nda hiŋ nda.” (Maatiu 14:14) Mɛɛ po pilɛ hiŋ a naa wɔɔŋ pum, mbo duau laalaŋndo o Chiisu niŋ maa o nɔla mbo siŋgi ndu te o yeema pɛ, mi Chiisu chɔm ndu kaalaa. Mbo dimul ndu a nyɛiye aa, “I chɛl mi siŋgi num. Lelaŋ, sioŋgu.” Mbo siŋgi ndu. (Luku 5:12, 13) Mɛɛ Chiisu che Meele chaŋndo le piɔm Lasalɔɔ yemandɔ wo, “mi mɔnɛi bii Chiisu,” “mbo tambu kɔl,” nduyɛ, “mi mɛmiaŋ ma tual Chiisu kpasu kpasu.” (Chɔŋ 11:32-36) Lelaŋ, mbo tosa suɛi kaamɛi waŋnda ve kɔl tei. Mi Chiisu miŋgi Lasalɔɔ yoomu, mi che bɛɛ ndoo vi niŋ le palɛi ihiɔɔlu!—Chɔŋ 11:38-44.

Mi Chiisu sina maa mala o yɔŋgu koŋ ndo wa le boondii biŋgi. Mbo sina maa o boondii niŋ, wanaa o siŋgi haa wa cho vɛlɛ naa, nduyɛ mi wanaa o miŋgi yoomu wa bɛɛ sɔla vɛlɛ piɔmndo. A koŋ kpou, mi Chiisu sina vɛlɛ maa Masale Mɛlɛkaleŋ le cho hunɔɔ bahawɛilaŋ ndaŋ chii lefafɛɛŋ. Lelaŋ, o ve ko kaamaalaŋ te Chiisu ndoo tosa le, kɛ mbo yonda “yooŋgu kɛndɔɔ a Masale Mɛlɛkaleŋ okɔɔ” a dialuŋ fulaa. (Maatiu 9:35) Nyɛɛmbɔ koni kaamaala ndɔlaŋ la chɔm ni a nyɛ Masale Mɛlɛkaleŋ le cho suŋ tosa chieeŋndo balɔɔ silɔ wo. Ŋ yaasiaŋndɔ nyɛ Baabuiyo dimi a teleŋ koŋ okɔɔ wo.

•  Naala ve lɛ niŋ te.

  “A boondii keŋ, wanaa sumɛiya cho chɔ, nduyɛ mi wanaa nila baŋulɛiya tuei. A boondii keŋ, wanaa bɛvɛiya cho lasisi ma huulu chuliaŋ maa kial chua, nduyɛ mi bobuaa bɛɛ soo.” Le handɔɔ lechoo, “wana o wana dimi lɛ niŋ aa, ‘I cho kɛndiaa le’” le.—Aisaiya 33:24, 35:5, 6, NW.

• Piɔm cho lɛ wa le.

  “Wanaa sandaa cho wa achal o chieeŋndo choo ni, nduyɛ a cho wa achal lechoo lefafɛɛŋ.”—Chondei 37:29, NW.

  “Chɛhowa, Mɛlɛka Kpuluŋgumaa cho hunɔɔ piɔmndo miolɔɔ. Nduyɛ, o cho waŋnda hunɔɔ mɛmiaŋ wɔɔsuu o lahɔl fo.”—Aisaiya 25:8, NW.

• Wanaa vi wa cho miiŋgu yoomu.

  “Teleŋ cho fuuluu mi wanaa vilɛiya kpou a tuei diom ndɔɔ, o koŋ, ma fula o sɛilaŋ niŋ.”—Chɔŋ 5:28, 29, NW.

  “Fulasɛiniŋndo cho hunɔɔ wa”—Walta Wanaa Chiisuaa 24:15, NW.

• Naa lɔlaa lepɛŋ ve lɛ niŋ te, ɔɔ baala lepɛŋndo.

  “A taŋgul niŋ chiɛila ndalaŋ mi ndapila waŋnuŋ leniŋ. A tual niŋ kpelela ndalaŋ ma de laŋ tɔnɔ. A teŋgul niŋ mi wana cheleŋ luɛi leniŋ te, kɛlɛŋgaa niŋ te ma tɔl mi wanaa cheleŋ de le. Wali o wali wanaa niaa tosa pɛ a cho ndu tueiyɔɔ yeela nyɛ kɛndɛi.” —Aisaiya 65:21, 22, NW.

•  Chɔu ve lɛ niŋ te.

  “O cho chɔulaŋ chii o chieeŋndo choo kpou.”—Chondei 46:9, NW.

  “Chɔulaba ve lɛ niŋ kaalaŋ tɛɛŋ te, kɛlɛŋgaa niŋ te ma toolu chɔuwo.”—Aisaiya 2:4, NW.

• Nyɛdiaa lepɛŋ ve lɛ niŋ te.

  “Lɛŋndeŋ le cho nyɛdiaa soli tau. Mɛlɛka, o cho Mɛlɛka naa wo cho naa salaa dɔuwɔɔ.”—Chondei 67:6, NW.

  “Nyɛdiaa wa niŋ o hɔbɛi o chieeŋndo choo, o pemboŋ choo bɛɛ o cho wa lɔpi lɔpi.—Chondei 72:16, NW.

• Bala fondola ve lɛ niŋ te.

  “Mɛlɛka puɛɛŋ niŋ a wanaa bala fonduaa le.”—Chondei 9:18, NW.

  “O cho wanaa bala fonduaa cho chaŋndo le malaa wa mala, a wanaa tuisiaŋaa nɔ wana malaa le wa. O tuinuŋ niŋ wanaa tuisiaŋ nda a wanaa bala fonduaa inyɛi. Nduyɛ o cho yoomula wanaa bala fonduaa kiindiaa.”—Chondei 72:12, 13, NW.

Te a yiyaŋ pɛ a mɛɛla Masale Mɛlɛkaleŋ ndeŋ okɔɔ, a che niko kɛsɛ le sabu Chiisu chua leŋ nyɛ sɔvɛ wo? Teleŋ o wa o chieeŋndo choo wo, ndoo nɔ dialuŋ fulaŋ le suɛi a Masaleŋ ndeŋ okɔɔ, o wanaa ndaa yeema le nilaŋ yaŋɔɔ wa lo. Mbo sina maa Masaleŋ ndeŋ le cho hunɔɔ faŋa bahawɛila cho waŋchieeya kindilaa hau laŋ kpou.

Baa mɛɛlaŋ ndaŋ o Baabuiyo niŋ a Masaleŋ ndeŋ okɔɔ la pilaŋ num pa kɔllo? Te o wa lende pɛ, vɛɛ ŋ looku yɛ ma pɛɛku tau a Masaleŋ ndeŋ okɔɔ? Yɛɛ ŋ nɔ yɛ ma tosa le ma sɔla tɔnɔlaŋ ndaŋ? Buŋgɛi cho lachi ve cho nyunalaŋ ndaŋ muli.