SUƐI LEBOLLE O KƆƆ | BAA SETANA CHO PA?
Ŋ Nɔ pa Miŋ Wo Setana?
O kendu le sina. O nɔ lekɔɔ le, nduyɛ o chuŋ te. Mbo bii waŋnda mbo diu nda a ve kɔl te. Kɛlɛŋgaa pɛŋ te ŋ yaasiaa pɛ, waŋnda hiouwɔɔ tɛndaa tɛɛŋ hueiyii pɔsɔniei dii chieeŋndo balɔɔ silɔ ni. Kɛ, siooŋii nɔ mi i bii naa le. Nɛilaŋ la cho le hueiye hei sinaa miŋ mandaŋ. Mi waŋnda kɛsi maŋsinila dimul nda a hueiyii wɔɔŋnde hei okɔɔ wo o fondalaŋ lapum. Nduyɛ ma yaŋ nilaŋ o nyɛ la dimul nda wo.
Setana cho ko maa hueiyii pɔsɔniei hei. Ŋ chi ndu le. Nduyɛ o kendu le mi waŋchieeya sina maa wana dɛnɛwɔɔŋndo o cho ni. Kɛ Mɛlɛka mel naa lende mbo kɛɛ naa malaa ke le. Siooŋii nɔ mi i bii num te, te o wa pɛ ma soliŋ malala Mɛlɛka ke naa laŋ ndaŋ kpeku.
A nɔ kpaayaa le chuaŋ chuaa tosaa. Chemisi 4:7 dimul naa aa, “La simul Masa Nyinaa Wɔɔŋnda. Te la simul ndu pɛ, o nyaanuŋ nya.” Mi che bɛɛ Setana nɔ kpaayaa, kɛ o beŋ num le ma tosa nyɛm ŋ yeema le tosa le woŋ te. A nɔ chuaŋ chuaa. Pitɛ Tasoo 5:9 dimi aa, “La hiou lachi a tiindaŋndo dɔuwɔɔ o Mɛlɛka niŋ, nduyɛ mi la simul Masa Nyinaa Wɔɔŋnda.” Loonuŋ maa mi Setana faŋaŋ Chiisu kɔɔli mbo kuanuŋ mɛɛ Chiisu kɛɛ tɔɔndaŋnda yaala laŋ. (Maatiu 4:11) Num bɛɛ tiuba ma tosa chuaŋ chuaa le tɔɔndaŋnda Setana laŋ simullo.
Chaŋyɛi a Mɛlɛka. Chemisi 4:8 dɛɛniaa naa le miŋ “sɔɔŋguu Mɛlɛka ikɛi.” Chɛhowa pila kɛsɛ veelu naa ni le miŋ kila chaŋyɛi kpɛɛluŋ nde a ndu. Vɛɛ ŋ looku yɛ hei tosa? Nɛi sɔviɔɔ le hei tosaa cho hiouwɔɔ lachi a pɛɛkoo a ndu okɔɔ o Baabuiyo niŋ ni. (Chɔŋ 17:3) Nyɛ ŋ cho pɛɛku a Chɛhowa okɔɔ wo cho tosa ma kaala ndu. Nduyɛ, kaala koŋ cho num nyindɔɔ ma tosa hɛnaŋ ndɔɔ. (Chɔŋ Tasoo 5:3) Te a sɔɔŋguu pɛ Finya num o choo choo niŋ ikɛi kpɛɛluŋ, yɛɛ ndu bɛɛ cho yɛ tosa? Mi Chemisi hiau lachi a dimioo aa, “ndu bɛɛ o cho nya sɔɔŋguu ikɛi.”
A chi hueiyii pɔsɔniei le, nduye, I wou maa Setana. Chɛhowa cho yɔŋgoo nyɛm iMɛlɛkayaŋ le num mandaa
O mɛi lediom le naa mandaa. Talelaŋ 18:10 (NW) dimi aa, “Bandu kala kalaa diola Chɛhowalaŋ la cho ni. O ndu bɛŋgu wanaa sandaa nyaanuŋ ni le kindaa sɔlaa.” Koŋ chɔm naa maa diola Mɛlɛkalaŋ sɛvɛi le la cho le bɛŋgu kɛndɔɔ boŋndo le. Kɛ o chɔm maa wanaa cho ndu piɛiyo ma nɔ bɛɛleŋ le diola ndɔlaŋ nda, veelu ndu teleŋ o teleŋ le nda mandaa.
Tamasi kɛndɔɔ. Walta Wanaa Chiisuaa 19:19 dimul naa a nyɛ sɔvɛ wanaa ndaa simnuŋ Kilisiɔŋnda sɛnɛi Ɛfisɔɔ wa aa, “Mi wanaa ka ka a nda aa nɔ kooma wɔɔŋndaŋ nda huŋ a yaula ndalaŋ naa pilɛ ma luam ndaŋ waŋnda kpede o hɔl. Kani fondole, yaulaŋ ndaŋ la aa chɔm nda mɛɛ nda toosiaa kooma wɔɔŋndaŋ yɛ ni. Mɛɛ nda dɔu baa yaulaŋ ndaŋ kpou naa pilɛ, ndu oo va le kaniŋ humboŋ waalaŋ bele ŋuɛɛnu.” * Mi Kilisiɔŋaa kaŋ tɛɛmbuu nyɛ o nyɛ wa a piɛile nyinaa wɔɔŋnda okɔɔ, a nyɛsɔlaa nyɔɔŋ muŋ wa nda kioo woŋ kpou. Tamasi kɛndɔɔ pila hei cho hau le naa ni. Chieeŋndo hoo cho o piaa cha a kueeleŋ, vɛlɛ a piɛile nyinaa wɔɔŋnda. Nyɛm cho le piɛile nyinaa wɔɔŋnda woŋ, a kaalaŋ lapum, tosa miŋ luei balaŋ o nyinaa wɔɔŋnda niŋ. O nɛi o nɛi niŋ, o bɛnda miŋ nɔ nyɛm waa naa kposoŋ o yoomu naa niŋ te.—Dutɔlɔnɔmi 18:10-12, NW.
O wɔsila ndɔla 50 la taselaŋ niŋ, Lokelio, o naŋ soo a ndu okɔɔ o suɛi lebolii tasei o yauwo hoo niŋndo ndoo laalaŋ maa Nyina Wɔɔŋndo cho le. Kɛ mbo siŋga yiyaŋ ndɔɔ. Le sabu yɛɛ? Mi Lokelio dimi aa, “Teleŋ tasoo wa hoo o yoomu nuu niŋ ni le Baabuiyo sɔlaa. Kɔlkalu ya sɔla o Baabuiyo niŋndo tosa ni mi sina maa Nyina Wɔɔŋndo cho. Kɔlkalu pilɛ koŋ kpe cho ya hau malaa ni le nɛila ndɔlaŋ kpakpalaa.”
“Kɔlkalu ya sɔla o Baabuiyo niŋndo tosa ni mi sina maa Nyina Wɔɔŋndo cho. Kɔlkalu pilɛ koŋ kpe cho ya hau malaa ni le nɛila ndɔlaŋ kpakpalaa.”
A yeema pa ma che paale Setana ve lɛ niŋ te leŋ? A nɔla ma che. Baabuiyo soo a Nyina Wɔɔŋ cho hau waŋnda huiyo wo okɔɔ maa, teleŋ cho fuuluu “ma wuu ndu o fondaŋ yiŋnde wule wule bɛndoo” niŋ. (Sɔɔŋ Chɔɔmaŋndoŋ 20:10) Yiŋndeŋ le nɔla wana toosiaŋ o inyinaya wo nyɛ yɔŋ te. Lelaŋ, yiŋnde wule wule leŋ ndeŋ le sim le tɛɛmbuu fafɛɛŋndo ni. Setana cho tambei sɔla lefafɛɛŋ. Nuawɔ nyaale bɛndu se le wanaa kaala niŋ Mɛlɛka a teleŋ koŋ nda!
O teleŋndo hoo niŋ, hiou lachi a pɛɛkoo nyɛ o nyɛ fee ŋ nɔla a Chɛhowa okɔɔ, vɛlɛ a nɛila ndɔlaŋ. * O mɛɛlulaŋ kpɔŋ, yiyaŋndɔ le waa achal, nduyɛ miŋ dimi a tonya aa, “Setana cho le!”
^ pɛl. 8 Te o yɔŋ pɛ aa kanii maLuomaŋnda kaniŋ humboŋ muŋ wa ni, nyɛsɔlaa koŋ ndoo paawa wanaa baalaa 50,000 le paaleŋ. Nyɛsɔlaa pila o wa ni!
^ pɛl. 11 Le chɔɔloo sinaa a Setana okɔɔ vɛlɛ o piɛile nyinaa wɔɔŋnda, tofa buŋgɛi 10 o yauwo hoo niŋ, Yɛɛ Kpeekpei Baabuiyo Pɛɛku Yɛ? Nyuna Chɛhowɛinɔ kɛ kɛ le yauwo hoo sɔlaa.
